بعد الفشل الذريع للعبة Man of Medan ترجع شركة Bandai Namco بكل برود وتكمل سلسلة the dark pictures وتتجاهل كل الانتقادات وتقدملنا واحدة من أعظم الألعاب القصصية في التاريخ.
القصة
تدور أحداث القصة في مدينة little hope الي معروف عنها من زمان انها مدينة مسكونة والكل عارف ان محدش يقرب ناحية المدينة دي ابدا، ولكن يشاء القدر بأنه يجمع ابطال قصتنا الخمسة ويكونوا ضايعين و يلاقوا نفسهم في المدينة دي. بتكون مهمتك انك تحاول تخرج او تهرب من المدينة في رحلة مليانة بالإثارة والرعب وسط قصة خرافية، وانسى اي تجربه ليك مع العاب الاستوديو من ناحية القصة زي Man of medan أو until dawn اللي كانت قصصهم مكررة وكل اللي بيحاولوا يعملوا أنهم يخضوك وبس بدون ما يحترموا عقلية اللاعب أبدا، أما قصة لعبة Little Hope ليها هدف ورسالة وفلسفة عايزه توصلها، وبتقدر توصلها بطابع الغموض والرعب بشكل رائع جدا. أي حد من محبي الرعب عارف كويس اوي معنى الرعب الحقيقي في الأفلام والمسلسلات اللي بتخليك بعد ما تخلص الفيلم وتقفل التلفزيون هتموت من رعب عشان تخش اودتك وتنام وتفضل بتاع اسبوع مش عارف تقعد لوحدك في أي مكان أما الأعمال اللي بتعتمد على الjumpscares بس فا دي أعمال فاشلة متعتبرش من قايمة الرعب اصلا، في لعبة Little Hope عملوا ميكس مابين الاتنين ادوك jumpscares كتير بايخة ملهاش لازمة ولكن في نفس الوقت ادوك قصة واقعية وفعلا مرعبة ومن القصص اللي هتفضل في دماغك فترة قدام، اللعبة دائما بتفجأك وتمنعك خالص من ان انت تتوقع ايه اللي ممكن يحصل وبتخليك متحمس تعرف ايه اللي جي، طول طريقك في اللعبة هتلاقي أخطاء غبية كتير اوي في الحوارات والاحداث تخليك تشك في عقلانية الكاتب ده، ولكن في نهاية اللعبة واسمحوا لي اني اقول انها واحدة من أفضل نهايات للعبة رعب في التاريخ، تخليك تتفاجأ وتكتشف أن كل الأخطاء اللى انت كنت فاكرها أخطاء طلعت تفاصيل في قمة الذكاء والابداع ومكتوبه باهتمام وعناية عالية، بأختصار استديو Supermassive games فشل كتير اوي قبل كده بس المرة دي تعاقدوا مع مخرج ومع كاتب جديد تماما مشتغلوش مع الاستوديو قبل كده في أي عمل سابق فا قدمو لينا واحدة من أفضل الألعاب القصصية الي لعبتها. المشكلة الوحيدة ان اللعبة مدتها 5 ساعات بس وده بجانب روعة القصة الي هتخليك تخلصها في قعدة واحدة.
الجيم بلاي
بأختصار شديد اللعبة من انتاج استوديو Supermassive Games فا الجيم بلاي هنا هو المعتاد اللي بيتعمد على الـ Quick time events بشكل رئيسي, ومعنى quick time events بكل بساطة انك بتدوس على الزرار المطلوب في الوقت المطلوب وبس ودي مش مشكلة خالص لان اللعبة قصصية زي ما قولت يعني اكنك بتتفرج على فيلم ولكن انت ليك دور كبير جدا فيه نفس فكره ألعاب Telltale بالضبط. اختيار القرارات والجمل اللي هتقولها في الحوارات فيها ديناميكية كبيرة جدا، يعني اللعبة مش هتقولك game over لو اخترت اختيار معين، بالعكس اللعبة بتمشي على الطريقة اللي انت عايزه وتخليك انت اللي تقرر ايه اللي يحصل وايه اللي ميحصلش. الكاميرا في اللعبة من نوع الFixed camera نفس Man of Medan ولكن في الجزء ده كانت واسعة اكتر وتديك مجال رؤية أكبر وتشجعك على الاستكشاف. بجانب القصة اللي انت ماشي فيها في collectables كتير تقدر تجمعها من عالم اللعبة.
الجرافيكس
اللعبة دي هتخليك تحس انك بتتفرج على مسلسل او فيلم من إنتاج Hollywood من روعة إخراج المشاهد والأحداث واستخدام أساليب سينمائية في عرض المشاهد وكل ده بمساعدة الرسومات الواقعية عالية الجودة في اللعبة، والجو العام في اللعبة بيديك شعور الغموض والرعب الدائم المثير اللي مستوحاة من سلسلة الرعب الشهيرة Silent Hill.
في النهاية
لعبة Little Hope هي من أفضل ألعاب الرعب القصصية في التاريخ، اللعبة هتديك قصة واقعية سينمائية مرعبة هتعلق معاك لفترة طويلة، وعالم غامض ومثير بجرافكس واقعية بمساعدة إخراج وكتابة رائعة، لعبة Little Hope هي الجزء التاني من سلسلة the dark pictures والجزء الاول كان Man of medan، مش لازم تلعب الجزء الاول عشان تلعب Little Hope وعامة متلعبش الجزء الاول اصلا، اللعبة معربة بالكامل ولكن منصحش بيه ابدا لانه معمول وحش جدا والكلام مكتوب بخط صغير ميتشفش اصلا.
https://youtu.be/qqxR6A_ia10
