لعبة “Test Drive Unlimited” كانت من أوائل ألعاب عربيات اللي دمجت بين العالم المفتوح والتجربة الجماعية عبر الإنترنت، وده كان خطوة كبيرة وقتها. كتير من الألعاب اللي جات بعدها زي “Forza Horizon” و”The Crew” استوحت الفكرة منها. بعد ما غابت السلسلة لفترة طويلة من سنة 2011، تم الإعلان عن جزء جديد اسمه “Test Drive Unlimited Solar Crown” في 2020، والناس كانت متحمسة جدًا لأنهم كانوا مستنيين اللعبة ترجع من تاني. بس الموضوع ماكانش بالساهل، اللعبة تأجلت كذا مرة لحد ما نزلت أخيرًا في 2024.

بس اللي كان مثير للجدل هو إن اللعبة معتمدة تمامًا على الاتصال بالإنترنت، يعني حتى لو كنت عايز تلعب لوحدك لازم تكون متصل. ده خلى في تشكيك في إمكانية إننا ممكن نعرف نستمتع باللعبة، عشان كدا هل اللعبة هتعرف ترجع السلسلة لقمة مجدها، ولا هتكون سبب في إن الناس تنساها تمامًا؟

القصة

القصة في “Solar Crown” بتدور حوالين منافسة بين فصيلتين: فصيل “Sharps” وفصيل “Streets”. الفصيلين دول عندهم أسلوب حياة مختلف تمامًا، وده بينعكس في نوع العربيات اللي بيحبوها وأماكن تجمعهم.

فصيل Sharps: الفصيل ده بيحب الأناقة والفخامة، ودايمًا بتلاقيهم سايقين عربيات فاخرة وعايشين في بيوت راقية. تجمعاتهم بتكون في أماكن شيك وراقية.

فصيل Streets: دول العكس تمامًا، بيحبوا العربيات المعدلة وسباقات الشوارع. حياتهم كلها سرعة وإثارة، وبتلاقيهم في أماكن شعبية.

بتبدأ اللعبة بانضمامك لأحد الفصيلين، وبتدخل في بطولة اسمها “Solar Crown” اللي بتقام في جزيرة هونغ كونغ. هتقدر تخصص عربيتك، وتدخل سباقات متنوعة، وتتعامل مع لاعبين تانيين في أماكن زي “Solar Hotel”.

مع تقدمك في اللعبة، هتكتشف تفاصيل أكتر عن كل فصيل، وهتقابل تحديات ومهام جانبية بتدي القصة عمق أكتر. والهدف الرئيسي ليك هو إنك تفوز ببطولة “Solar Crown” وتثبت إنك الأفضل في الجزيرة.

الجيم بلاي

اللعبة فيها حوالي 99 عربية، والعدد ده يعتبر قليل مقارنة بألعاب السباقات التانية زي “Forza Horizon”. كمان التركيز في اللعبة مش قوي على إنك تغير العربيات كتير. يعني هتبدأ اللعبة بثلاث عربيات أساسية، وكل واحدة فيهم هتقدر ترقيها بتعديلات بسيطة. لكن العربيات الأقوى والترقيات الأعلى مش هتبقى متاحة ليك إلا لما توصل لمستوى أعلى من السمعة، وده معناه إنك هتقضي أول ساعات اللعبة وانت بتحاول تتعرف على عربيتك وتجمع شوية فلوس علشان تقدر تشتري عربية جديدة.

لكن لما تقرر تشتري عربية جديدة، الموضوع مش هيكون بالسهولة اللي في ألعاب تانية. مش هتفتح قائمة وتختار العربية اللي عجباك على طول. في “Solar Crown”، لازم تروح بنفسك لصالات عرض العربيات، وتشوف كل عربية على حدة، تعرف إمكانياتها وسعرها، وكمان تعرف قد إيه محتاج من نقاط السمعة علشان تقدر تشتريها.

كل مرة تفتح فيها اللعبة، هتبدأ يومك في غرفتك الفندقية بدل ما تبدأ وأنت قاعد في العربية زي معظم الألعاب التانية. لازم تنزل من غرفتك وتروح للجراج تختار عربيتك، وبعدين تخرج. ده بيخلي بداية كل يوم في اللعبة شوية مملة لأنك بتعمل نفس الخطوات كل مرة.

لو عايز تشارك في أي سباق، لازم تروح للحدث بنفسك وتوصله بالعربية بتاعتك، واللعبة بتكافئك على استكشاف الجزيرة. جزيرة هونغ كونغ نفسها مكان جميل، والخريطة كبيرة جدًا ومليانة تفاصيل بتخليك تحس إنك بجد بتستكشف الجزيرة كلها.

بس في نقطة المكافآت، اللعبة محتاجة لتعديل. لو خلصت سباق وماكنتش من الأوائل، هتاخد كمية كبيرة من نقاط الخبرة، لكن لو فزت، هتاخد نقاط خبرة أكتر شوية بشكل قليل؛ وده غريب لأن المفروض الفوز يكافئ أكتر.

فيزياء القيادة في اللعبة شوية تقيلة مقارنة بألعاب السباقات التانية، وده مش بالضرورة حاجة وحشة. بالعكس، التقل ده بيخلي اللعبة أقرب للواقعية في بعض الأوقات.

المنافسة مع الذكاء الاصطناعي فيها تحدي وفي بعض الأوقات ممكن ميكونش عادل، بس لو قللت المساعدات في القيادة، هتلاقي إن اللعبة بقت أصعب كمان بس أكتر مكافأة. لكن الغريب إن العربيات مش بتتعرض للتدمير، حتى لو اتخبطت بسرعة عالية، الشكل الأمامي للعربية ممكن يتجعد شوية، بس مش هتشوف أي تدمير حقيقي.

معظم الوقت هتقابل لاعبين حقيقيين بدل الشخصيات اللي بيتحكم فيها الكمبيوتر، وده لأن اللعبة دايمًا متصلة بالإنترنت. لازم يكون عندك إنترنت ثابت لأن في بعض الأوقات ظهرت مشاكل زي “خطأ في الخادم”، وده كان خلاني شخصيًا اخسر في سباقات، خصوصًا حتى لو كان النت عندك كويس فممكن يكون المشكلة من خوادم اللعبة نفسها. 

الجزيرة مليانة باللاعبين طول الوقت، وده بيدي الحياة للعبة ويخلي السباقات مع ناس حقيقية أكتر إثارة. لكن أحيانًا هتلاحظ إن العربيات اللي حواليك بتختفي فجأة، وكمان مش هتلاقي أي ناس ماشية في شوارع اللعبة، وده غريب شوية لأنك بتلعب في جزيرة زي هونغ كونغ المعروفة بتكدسها بالناس والشوارع الحية.

الجرافيكس

من ناحية الجرافيكس، اللعبة بتحاول تكون خليط بين “Forza Horizon” و”Need for Speed”. لكن الغريب إن الجرافيكس بتكون أحسن بكتير في الليل. بالنهار، الإضاءة بتبقى غريبة شوية على العربيات، وبتلاحظ إن الحواف مش واضحة، ومفيش تفاصيل كتيرة. لكن بالليل، الدنيا بتكون مختلفة، بتشوف انعكاسات وتباين أحسن بكتير.

بشكل عام، الرسومات بتحسسك إن اللعبة من جيل قديم، أو حتى جيل أقدم منه. العربيات بتشبه ألعاب الأطفال في بعض الأحيان، والشخصيات مش مصممة بشكل جيد.

التقييم النهائي

6/10

في النهاية، لعبة “Test Drive Unlimited Solar Crown” للأسف لم ترتقِ إلى مستوى التوقعات. بالرغم من أن الفكرة كانت واعدة، إلا أن التنفيذ جاء مخيبًا للآمال. اعتمادها الكامل على الاتصال بالإنترنت مزعج جدًا. الجرافيكس بدت قديمة وغير مبهرة، بالإضافة إلى أن الفيزياء في اللعبة يعتبر حلو إلا إن غياب تدمير العربيات، والروتين الممل في بداية كل يوم داخل اللعبة، جنبًا إلى جنب  المشاكل التقنية زي اختفاء العربيات ومشاكل الخوادم، خلى اللعبة تفقد جزء كبير من جاذبيتها. عشان كدا اعتقد أن اللعبة معرفتش من إعادة السلسلة إلى القمة، بل على العكس، شكلها خليتها في موقف أصعب.