في حوار صحفي تم من خلال موقع boilingsteam مع أحد المطورين اللي حصلوا على نسخة المطورين من الـ Steam Deck، ابدى فيه عن إعجابه الشديد بالجهاز لكنه معجبوش نظام التشغيل اللي شغال على الجهاز وأن السبب الحقيقي وراء تأجيل الـ Steam Deck مكنش بسبب نقص الموارد إنما كان بسبب تحسين اداء نظام التشغيل و دمجه بشكل افضل مع الالعاب. وكان اتسأل المطور شوية أسئلة من المهتمين بالجهاز وده كان رده عليهم.
هل عدة التطوير كلها جاية بنفس مساحة التخزين؟
اه، كل المطورين استلموا نفس النسخة وهي نسخة الـ 256 GB
هل جربت ألعاب ثقيلة على الجهاز وايه هو عمر البطارية مع الألعاب ده؟
اه، والأداء الألعاب كان بيختلف من لعبة للثانية وعمر البطارية ما بين 2 الى 5 ساعات من اللعب المستمر
جربت تشغل الالعاب من بطاقة التخزين الخارجية SD Card؟
اه ومكنش في اختلاف ملحوظ بين تشغيل اللعبة من الـ SD Card و ما بين الـ SSD الداخلي
تقدر تخرج من اللعبة و ترجعلها تاني في نفس الجزئية ولا لزماً تقفل اللعبة كلها وتفتحها تاني؟
اه تقدر تخرج من اللعبة و ترجعلها تاني في اي وقت
الدقة المنخفضة للشاشة كانت عائقاً في الاستمتاع بالتجربة؟
اه، خصوصاً في لعبة Final Fantasy Pixel Remasters، النصوص كانت صغيرة جداً لدرجة تصعب قرائتها
لأي درجة وصلت له حرارة الجهاز أثناء اللعب.
كان بيحمى لكن موصلتش لمرحلة الانزعاج بالحرارة
هل كان صوت مراوح التبريد عالي؟
لا، وبشكل عام هي في نفس مستوى مراوح الـ Switch ولكن أعلى بنسبة بسيطة
هل الواجهة الجديدة للـ SteamOS 3 احسن من وضع الـ Big Picture اللي موجود دلوقتي؟
اه هي أحسن
هل في طريقة لمعرفة اذا كانت اللعبة شغالة من خلال Proton أو بشكل مباشر على الجهاز؟
في الوقت الحالي لأ
هل تقدر تضيف نسخ غير رسمية من Proton؟
اه ممكن
هل من السهل تنزيل برامج خارجية؟
اه، ولكن يعتمد على البرنامج نفسه اللي عايز تنزله
هل حاولت أنك تدخل على الـ BIOS؟
لا
حاولت أنك توصله بشاشة خارجية وتنفذ عليه مهامك بشكل مباشر؟
اه، والتجربة كانت زي اي PC تاني
تجربة الإستخدام كـ PC عادي كانت عاملة ازاي
تجربة كويسة، ولكن لا أنصح بيها كبديل للـ PC العادي
مقارنةً بالـ Switch تجربة اللعب كانت عاملة ازاي
هو اريح من الـ Switch في اوقات اللعب الطويلة، توزيع الأزرار كويس وبما انه اعرض من الـ Switch فتوزيع الوزن كان احسن
هل الجهاز فعلاً يستحق الحماس اللي متوجه له؟
كـ Hardware اه ويعتبر احسن جهاز العاب محمول نزل من وقت الـ Gameboy Advance، لكن من ناحية التجربه مش قد كدة
في رأيك ايه ردة فعل اللاعبين اللي بيلعبوا على Windows؟
ده سؤال عام، ولكن المطورين الاخريين بيقولوا لو الـ Deck قدر يوصل لتجربة مماثلة للـ Switch فمايكروسوفت هتكون في موقف حرج
ايه ردة فعل المطورين للجهاز وهل بيفكروا بدعمه بشكل كامل؟
بالنسبة للمطورين اللي كلمتهم (حوالي 30 مطور)، فنصهم يفكر بشكل فعلي بدعم الجهاز وتنزل ألعابهم بشكل مباشر من غير Proton، ولكن الباقي هيجربوا العابهم على Proton بس.
هل جربت تشغيل محاكيات على الجهاز؟ بالأخص Retroarch؟
اه، والجهاز بيشتغل بشكل كويس، لكن Valve مش بتبيع الجهاز على انه جهاز للمحاكيات
هل قدرت تشغل العاب الـ Switch عليه بإستخدام المحاكيات؟
مقدرش ارد على السؤال ده
إقرأ ايضاً:
فالف تأمل بكسر حاجز المليون نسخه في أول إطلاق للـ Steam Deck
الخاتمة
من خلال ردود المطور احنا نقدر نستنتج أن في نسبة كبيرة من المطورين ابدوا اعجابهم بالجهاز وبيفكروا بشكل جدي بدعم الجهاز، ولكن في النهاية الوضع كله محتوم بمدى مبيعات الجهاز والرأى العام عليه لأن ده اللي هيحدد فعلاً اذا كان المطورين يشتغلوا عليه ولا لأ.
