وأخيرًا وصلت أهم وأكبر حصرية لإكس بوكس السنة دي، وأكتر لعبة أنا شخصيًا مستنيها وهي ستارفيلد.
لعبت اللعبة لمدة 80 ساعة وقدرت أشوف معظم اللي فيها من خلال نسخة إديتهالي شركة بيثيسدا مشكورة قبل الإصدار بإسبوع كامل، ولاحظت من خلال كلام الإعلام عن اللعبة إن في ناس كتير مش فاهمين اللعبة أو مش متابعين تاريخها والدعاية ليها غير من قريب لما بدأ الهايب على اللعبة يزيد…فأربط حزام الأمان يا صديقي عشان هنطير في مجارات ستارفيلد مع بعض وجيمزاوي جاي يحكيلك الحكاية من أولها.
تاريخ اللعبة سريعًا
بص يا سيدي، الموضوع بدأ في 2015 مع آخر لعبة أصدرها استوديو Bethesda بقيادة المخرج Todd Howard واللي كانت نجاح كبير للاستوديو واترشحت للقب لعبة السنة لكن خسرت قدام ويتشر 3.
بعدها بشهور الاستوديو أعلن إنه شغال على لعبتين جداد، واحدة فيهم مشروع جديد تمامًا. طبعًا لحد الوقت ده ماكنتش استوديوهات بيثيسدا عملت أي NEW IP أو سلسلة جديدة وده سببه إنهم مستلمين أصلا سلسلة فول أوت من استوديو Black Isle اللي اتحول لاحقًا لاستوديو Obsidian و لعبة The Elder Scrolls كانت المشروع الوحيد الجديد اللي بيثيسدا صبة عليه كل اهتمامها بقالها 25 سنة.
في 2018 بقى تم الإعلان عن Fallout 76 وتود هاورد كان المنتج بتاعها ومشرف على فريق العمل لكن ماكنش المخرج، وطبعًا اللعبة دي اتحولت لكارثة وقت إطلاقها ونقطة سودة في تاريخ تود هاورد والاستوديو بسبب مشاكلها التقنية ومحتواها الفاضي، بس ده موضوع طويل ممكن نتكلم فيه بعدين.
الفكرة إن في نفس الـE3 اللي تم الإعلان فيه عن FALLOUT 76 تم برضو الإعلان عن ستارفيلد بتيزر تريلر صغير جدًا، ومن بعدها المعلومات عن اللعبة اختفت.
في 2021 تم استحواذ مايكروسوفت على بيثيسدا، وده معناه إن تمويل الشركة كبر جدًا لإن مايكروسوفت من أغنى الشركات بشكل عام، وإكس بوكس من أغنى ناشرين الألعاب في الصناعة كلها، وعشان كده التوقعات كانت عالية جدًا على ستارفيلد وأي مشاكل تقنية ماكنتش هتبقى مقبولة في لعبة بالحجم ده، وطبعًا الدعايا بتاعة تود هاورد المخرج وطريقته الجذابة في الكلام عن ألعابه خلت الناس كلها تحط آمال ضخمة على اللعبة يمكن أكتر من طاقتها في بعض الجوانب، فهل اللعبة بقى حلوة ولا لأ، عشان نجاب السؤال ده لازم يكون نجاوبه بدون التفكير في التوقعات الغلط عن اللعبة، وعشان كده خليني أقولك بسرعة اللعبة عبارة عن إيه بالظبط.
إيه هي ستارفيلد أصلًا!؟
ألعاب الأر بي جي يا صديقي فيها نوعين، النوع الغربي اللي اسمه RPG عادي ،و النوع الياباني اللي اسمه JRPG وفي شوية فروق بين النوعين أولهم إن الياباني بيبقى في أوقات كتير مش سينيمائي خالص، و قصته ممكن يكون جزء كبير منها مبني على القراية وإنك تبحث وتدور، وأهم فرق بقى إن اليابانين بيحبوا ألعابهم تكون turn based يعني المعارك مش real time زي ماحنا بنحب كده، لأ….بتكون مبنية على الأدوار
الـRPG الغربي بقى متفرع لأنواع كتير جدًا، مش هنتكلم عنهم كلهم بس يكفي إني أقولك إن في ألعاب بتكون خطية وسينمائية وRPG في نفس الوقت زي MASS EFFECT، وألعاب تانية بتبقى عالم مفتوح وRPG ومن أشهر الألعاب في النوع ده هي ألعاب بيثيسدا، عشان كده لو أنت داخل بتوقعات مختلفة عن ألعاب بيثيسدا اللي فاتت فهيصيبك الاحباط مهما كان مستوى ستارفيلد قوي عشان كده كان لازم الشرح الكتير ده قبل ما نبدأ في الريفيو نفسه…
اللي بتقدمه ستارفيلد باختصار هو عالم مفتوح ضخم جدًا، ونظام معارك بالأسلحة ومعارك بالسفن، وإمكانية سواقة السفن الفضائية بين الكواكب وحوارات بينك وبين الشخصيات وإمكانية اختيار مسارات مختلفة للقصة والمهمات، وحتى تخصيص شخصيتك بيفرق معاك في الحوارات والقصة واللي لعب ألعاب بيثيسدا اللي فاتت هيكون فاهم قصدي كويس هنا.
يبقى لو واحد صاحبنا داخل اللعبة ومفكر نفسه قدام لعبة سينمائية، وبيقارنها بلعبة خطية بجرافيكس خرافي زي The Last of us 2 مثلًا يبقى غلطان صح؟! لإن اللعبتين مختلفين، وطبيعي إن اللي بيحب دي مش شرط يحب دي.
تعالا نمسك بقى اللعبة ونتكلم على حاجة حاجة فيها..
هل ستارفيلد حلوة؟!
خليني أجيبهالك على بلاطة ومن الأول …ستارفيلد هي أكتر لعبة خلتني أدمنها السنة دي مع إن السنة دي مليانة فطاحل وأسماء كبيرة بس يمكن ده عشان أنا شخصيًا بعشق الـRPG والحرية اللي بيدهالي….لكنننن وحط تحتها 100 خط …دي لعبة مش مثالية بأي حال من الأحوال وخليني أشرحلك ليه أنا شايف كده
أول حاجة هتحسها مع ستارفيلد هي إنك قدام لعبة مزيج بين الواقعية والخيال وده مش صدفة ده مقصود من زمان من وقت كتابة القصة بتاعة اللعبة، وإنها تكون نوع جديد من الألعاب ومخرج اللعبة مسمي النوع ده “ناسا بانك” زي ما في سايبر بانك و ستيم بانك، ده نوع اسمه ناسا بانك في جانب من الواقعية كبير مبني عليه خيال علمي محدود عشان يتكلم عن المستقبل بتاع البشرية في الفضاء واستعمارهم للكواكب والمجرات.
قصة اللعبة بقى بتدور حواليك أنت شخص بيعيش في مكان اسمه الـSetteled systems ف سنة 2330 وده بيكون بعد سنين طويلة من استعمار البشر لأنظمة شمسية مختلفة بيوصل عددهم لـ100 نظام شمسي في مجرة درب التبانة والأنظمة دي استقر فيها البشر وسموها الsetteled systems وكل ده حصل بفضل وجود تقدم علمي سمح لهم اختراع سفن فضاء قادرة تنقلهم سنين ضوئية في لحظات قليلة.
قصة البطل بتبدأ كعامل تنقيب شغال مع شركة اسمها argos ودي شركة بتاخد عقود تنقيب تنفذها بالوكالة. بتعرف إن الشركة واخدة عقد بالتنقيب عن قطعة أثرية قديمة غريبة، وبالفعل أثناء تنقيبك عنها وأول ما تلمسها بتلاقي نفسك شوفت رؤية غريبة عبارة عن موسيقى وأنوار غريبة.
الرؤية دي لما بيعرفها الشخص اللي طالب القطعة، بيديك سفينته ويطلب منك تروح مدينة نيو أطلانتس تقابل تنظيم constellation وتبلغهم باللي حصل فورًا، ومن هنا بتبدأ رحلتك في استكشاف الكون الشاسع، والإجابة على السؤال الأهم…مين اللي سايب القطع الأثرية دي وليه لما لمستها شوفت رؤية غريبة؟
جنب القصة الأساسية في قصص فرعية كتير، لإن الsetteled systems فيها مناطق كتير وكل منطقة ليها faction متحكم فيها وكل فاكشن له مهماته، فمثلًا طول اللعبة هتسمع عن مجموعة من القراصنة غريبي الأطوار اللي بيقدسوا حاجة اسمها “عقيدة التعابيين” ومجموعة قراصنة لصوص اسمهم Crimson fleet ده غير إن أصلا الsetteled systems متقسمة ما بين فصيلين رئيسين وهم Freestar collective و United colonies
كل واحد من دول عنده كويست لاين مختلف وكل كويست لاين بقصة والقصص دي كلها مستواها بيقرب أوي من القصة الأساسية، ويكاد يعديها في بعض الأحيان. هتقابل كم شخصيات جانبية رائع وكلهم تقريبا متقنين وأولهم sam coe و barret و sarah morgan ووزعيم عصابة الcrimson fleet اللي اسمه delgado وغيرهم كتير جدًا
صدقني أنا لسا ماقولتلكش حاجة!
اللعبة فيها كم كبير من الحوارات، وعشان كده الناس اللي مستنية أكشن كتير مش هتكون مبسوطة بالجانب ده، عشان الحوارات غير إنها بتعرفك معلومات جديدة عن العالم هي كمان بتمثل طرق لإنهاء المهمات ساعات، وده معتمد على مهاراتك.
من أوائل الحاجات اللي هتعملها في اللعبة هي تخصيص شخصيتك واختيار خلفيته وصفاته. أنا اخترت إنه مولود في مدينة نيو أطلنتس وشخص متحضر وعنده أب وأم عايشين في المدينة، وفعلا اللعبة كانت بتديني مهام إني أزورهم وأسلم عليهم وفي مرة قفشتهم في نادي ليلي، ولكن قصاد المحتوى ده اللعبة كانت بتدفعني مبلغ كل شهر يروحلهم…وكان ممكن جدًا إني أسحب المبلغ ده منهم لكن هم قالولي إن المبلغ ده هم معتمدين عليه جامد فصعبوا عليا بصراحة…كله إلا عقوق الوالدين يا صاحبي هتخيب ولا إيه!!!
كل ده محتوى كان ممكن جدًا ماشوفوش بسبب الصفة اللي أنا مختارها، وعشان كده اللعبة اسمها rpg وألعاب بيثيسدا بتعتبر الأفضل في المجال ده، لإنك ببساطة بتمر بمواقف ممكن غيرك مايعديش بيها.
في صفة تانية ممكن تختارها وهي إنك تختار إن يبقى ليك معجب ملزق كده يفضل يقول يجري وراك ويكلمك ويقولك أنا مش مصدق إني بتنفس نفس الهوا اللي أن تبتنفسه بس أنا بصراحة ماحبتش الموضوع خالص وحسيته ملزق فمسحت السيف دي وعملت واحدة جديدة.
بما إن كل شيء ممكن تخصيصه، فالسفينة الفضائية أكيد ممكن تتخصص؟ استنى…هي عشان تتخصص لازم تكون ممكن تتساق الأول صح؟ كل ده متاح طبعًا، وقبل ما تتوه مني وإحنا لسا بنقول يا هادي في شرح محتوى ستارفيلد خليني أوضحك بسرعة وباختصار السفينة وحواراتها الكتير دي ماشية ازاي
انت في السفينة عندك نقط طاقة محدودة، النقط دي بتكون في أول اللعبة 14 مثلًا وتقدر تزودهم مع الوقت، وال14 نقطة دول بيتوزعوا على قطع السفينة اللي هي كالآتي:
3 أسلحة إما نفس النوع أو من نوع مختلف
الجرافيتي درايف
المحرك
الدرع
لو عايز تزود سرعتك مثلا بتوجه معظم الطاقة للمحرك، لو عايز تحتمي بالدرع في معركة بتوجه كل طاقتك للدرع، لو عايز تهاجم بتوجه ال14 نقطة كلهم للأسلحة وهكذا. النظام سهل أوي بس عايز تدريب ومع الوقت هتلاقي نفسك حريف. طيب التطوير بيتم إزاي بقى؟ لازم تدرس كل قطعة ووظيفتها في السفينة، الموضوع هنا مش مجرد أسهم باصة لفوق ولونها أخضر وخلاص، لا في حسابات وتقديرات لازم تعملها عشان تعرف تخرج بأفضل قدر ممكن من التطوير.
القطعة المتقدمة أوي، محتاجة مهارات معينة تكون عندك منها مهارة بناء السفن، وده هيحتاج منك xp، ولحسن الحظ مفيش أسهل منه في اللعبة دي.
تخصيص الشخصية مش بس بيكون عن طريق المهارات، في كمان تخصيصات شكلية. يعني مثلا تقدر تروح تعمل عملية تجميل عشان تغير الكاركتر مودل بتاعك 180 درجة
تقدر تغير هدومه وشعره، وكل هدومه بتفرق في الميزات اللي بتديهالك. أنا كنت لابس بدلة فضاء بتزود قدرتي على التنفس، وبتقلل الوزن اللي ممكن أشيله.
بالمناسبة أه، في وزن محدد ليك ممكن تشيله ولو شلت أكتر منه مش هتقدر تعمل أي سبرنت خالص يا إما الأكسجين هيخصل منك بسرعة.
طيب أنا عملت فيها فتك ونزلت على سطح كوكب من غير بدلة فضاء…ماتنساش يا صاحبي أنا قولتلك إن اللعبة دي فيها واقعية شوية …الناسا بانك اللي قولناها في الأول فاكر؟
ممكن تتصاب بمشاكل وأمراض، واللعبة مهتمية أوي بالحوار ده..لو نزلت على كوكب بارد يجيلك برد ولازم تاخد أدوية برد، ولول نزلت على كوكب فيها غازات سامة بيجيلك أمراض في الرئة وتحتاجلها دواء معين برضو
اللعبة هي لعبة rpg بكل معاني الكلمة، حتى علاقاتك مع الشخصيات بتتأثر بكل حاجة بتعملها لدرجة إنك لو فضلت تعمل حاجات غلط وتسرق وتكدب في الحوارات وانت معاك شخصية أمينة مش هيعجبها الموضوع وممكن تسيبك وتمشي وتبطل تخرج معاك في مهمات تاني!!!
اللعبة برضو مانسيتش المعارك اللي كانت قوية جدًا، نظام التصويب كان ممتاز وتقريبا أفضل نظام معارك اتقدم في تاريخ ألعاب بثيسدا لإن نوعيات الأسلحة كانت كتير جدًا وكل سلاح فعلا يجذبك تعرف إزاي تحسنه وتدورله على موارده وذخيرته. أنا وصلت بعد 50 ساعة إن معايا 15 سلاح كلهم أسلحة جايبها من الاستكشاف.
أصل بالعقل ياخويا، مش أنت لو روحت تقتل واحد من القراصنة الlegendary أكيد هتلاقي معاه سلاحه المفضل الجامد فشخ؟ الأسلحة دي بقى لو احتفظت بيها وطورتها مش منطقي إنك يبقى معاك أسلحة فشيخة؟ أهووو مش محتاج حاجة يعني
الموضوع سهل ووممتع وإدماني، وأجمل حاجة إنك لو دخلت كهف عشوائي على كوكب عشوائي ممكن تلاقي في loot متوزع حلو ويحسسك بإن البيئات تستحق الاستكشاف. وهنا نيجي لحتة مهمة جدااااا في اللعبة بقى.
الاتكشاف في ستارفيلد حلو بس مش لكل الناس خالص. للأسف، أنا شخصيًا كنت أحب انه يبقى تحرك seemless بين الكواكب بدون أي شاشات تحميل خالص زي مثلا no mans sky ولكن الموضوع هنا مش كده. اللعبة فعلا فيها شاشات تحميل مش قليلة. بين الهبوط والإقلاع، وبين الدخول للأماكن والخروج منها وخصوصًا في مدينة نيون ونيو أطلانتس ودول أكبر مدينتين في اللعبة.
تقدر تقول كده إن التحليق في الفضاء بالسفينة هو لعبة والكواكب واستكشافها لعبة تانية وبينهم لودينج سكرين…هي أه بتقعد 5 ثواني بالحد الأقصى لكن أنا عارف ومتأكد إن في ناس هتتقفل من الحوار ده
انا شخصيًا تقبلته مع الوقت وكنت مستمتع بالأجواء بصراحة حتى مع شاشات التحميل الكتير ولفت نظري إن السكرينات اللي كنت باخدها كانت بتتحول لخلفيات اللودينج سكرين فدي لفتة حلوة برضو من اللعبة.
نيجي دلوقتي لأهم سؤال بقى. هل الكواكب كلها فاضية ياعم جيمزاوي ما تنجز بقى عندنا مصالح عايزين نقضيها وانت مقعدنا قدامك كده عشان إجابة السؤال ده؟!!!!!!
أصبر معايا…الإجابة هنا أه ولأ في نفس الوقت
تود هاورد لما اتسأل في المووضع ده في لقاء صحفي قال إن جزء من تجربة استكشاف الفضاء هو الكواكب الفاضية لإن طبيعي إن الكواكب مش كلها عليها حياة وطبيعي يكون صعب تكون كل الكواكب مليانة، فالإجابة أه الكواكب مش كلها مليانة نشاطات
لكننننن وحط تحتها كذا خط.. اللعبة عاملة نظام حلو وعجبني شخصيًا في توزيع النشاطات وهنا بان اوي استخدام الprocedural generation في ستارفيلد وهو إنك لما بتنزل في أي مكان بتلاقي حواليك من 3 ل5 أماكن مجهولة ممكن تستكشفهم، كل واحد فيهم على بعد 500 متر مثلا عنك، الحاجات دي ممكن تطلع محطة فضائية مهجورة أو مستعمرة تعدين أو مستعمرة مدنية، أو حتى كهف أو معبد قديم والحاجات دي كلها لو حطيناها في قايمة ممكن تطلع 8 حاجات بالكتير أوي، وتصميمهم من جوه شبه بعضهم، الجديد هو بس نوع اللوت اللي هتلاقيه جوه.
وعشان كده ممكن تحس بتكرار مع الوقت الطويل في الاستكشاف، لكن هل التكرار ده معناه إن الاستكشاف كله حاجة واحدة من الأول للآخر؟ لأ في اختلافات طبعًا زي مناخ وطبيعة وتضاريس كل كوكب. في كواكب عبارة ماية بس، وفي كواكب عبارة عن خضرة ونباتات وديناصورات، وفي كواكب زي المريخ عبارة عن عواصف ترابية وأجواء برية صعبة، وكواكب عبارة عن جبال وتضاريس عنيفة وكل ده لما تنزل عليه لأول مرة هتحس بإحساس التجديد وإنك مستكشف واللي سماه المخرج تود هاورد sense of wonder.
بصراحة الاستكشاف في ستارفيلد ماكنش مشكلة نهائي بالنسبة لي، بالعكس فضلت أنزل على الكواكب وأخد صور وسكرين شوتس ومعايا مخزون لسنتين قدام خلفيات لجهازي، ويمكن ده عشان أنا كنت لاعب ألعاب بيثيسدا اللي فاتت كلها وكنت عارف أنا مستني إيه. لعبة ستارفيلد أبعد ما تكون عن المحاكاة أو الواقعية الزايدة لألعاب الفضاء، هي قصة rpg في بيئة فضائية وده هيعجب أوي فانز ألعاب الـrpg لكن زي ما قولت كل واحد وحسب توقعاته
أداء اللعبة
الأداء بالنسبالي كان ممتاز، لعبت اللعبة على بي سي أعلى شوية من المواصفات الموصى بيها وخدت 40 فريم في الثانية إلا في بعض اللحظات اللي بيكون فيها انفجارات وكده. صادفت بعض المشاكل لكن بصراحة اللعبة تقنيًا مبهرة، والجرافيكسو التفاصيل من ملابس الشخصيات وشعرهم، لتفاصيل المركبات الفضائية والإضاءات بتاعة المدن كلها كانت أجمل من إنها تخليني أتضايق من المشاكل البسيطة اللي قابلتها.
مدينة نيون لوحدها تقريبا قضيت فيها 30 ساعة لعب، وده عمر ألعاب كاملة ماتعتبرش ألعاب صغيرة. حسيت إني بلعب سايبربانك وأنا بتاجر في عقار الأورورا وبهربه برة الكوكب وأرجع الم الارباح، وعملت تقريبا كل حاجة في المدينة دي اللي ليها عالم جريمة خاص بيها ومليان تفاصيل كتير خلتني أحبها جدًا.
اللعبة فيها جليتشات لكنها مش game breaking وفي نفس الوقت المطورين بيصلحوها مع الوقت بالتحديثات، وأجمل حاجة في اللعبة هي إنها موجودة على إكس بوكس جيم باس اللي اشتراك الشهر بتاعه ب 90 جنية بس…يعني حرفيًا التحفة دي مش هتكلفك حاجة غير الجيجات.
تقييم اللعبة
أنا بصراحة بشوف إنها حاجة غريبة إنك تتمنى إن اللعبة اللي انت مستنيها تكون لعبة مثالية ولو ماخدتش 10/10 يا إما تلاقي ناس بتدافع عنها جامد جدًا، وتبرر إن الناس اللي مش مدياها 10/10 إنهم مافهموهاش، أو يجيلها إحباط شديد إن اللعبة اللي كانوا مستنينها مش واخدة 10/10…أنا بشوف إن الواحد المفروض يهتم باللعبة دي له ولا مش له وبس لكن الباقي مش بتاعك ومش مهم أوي، لإن الأزواق بتختلف بشكل جذري.
ستارفيلد مش لعبة مثالية وفيها عيوب واضحة بس قصاد كل عيوب في ميزات كبيرة وأكبرهم هو حجم العالم والأساس اللي بدأته ستارفيلد وأكيد هتكمل عليه في أجزاء جديدة أضخم وأفضل، والمستوى التقني الجبار اللي قدمته اللعبة وقدرت تحط كل ده في قوام ثابت باداء محترم على أجهزة الإكس بوكس سريس إس حتى
ستارفيلد هي إنجاز لمطوريها، ولإكس بوكس ويا بخت كل واحد لسا هيبدأ يلعبها عشان هو قدام تجربة مش بيجي زيها كتير، وتقريبًا كده مفيش أي لعبة زيها على الساحة…
طيب لو أنت معاك بلايستيشن ومش هتعرف تلعب ستارفيلد بعد الحماس اللي حمستهولك ده كله تعمل إيه؟!
تلعب THE OUTER WORLDS عشان دي أقرب لعبة لستارفيلد في الجيم بلاي واللي طورها هو هو مطور FALLOUT 2 فيعني،لو ملحقتش ستارفيلد فزيتنا في دقيقنا يعني
