اخيرا تم فك حصرية Ghostwire و نزلت على اجهزة XBOX مع تحديث كبير صلح مشاكل و ضاف مزايا و Combat منوع عن الأول فا خلينا نشوف اللعبة دي تستاهل تتلعب ولا لا خاصة انها نازلة على خدمة Gamepass
القصة
القصة هنا بتدور في مقاطعة شيبويا في اليابان و بطلها شخصية اكيتو الي رايح يزور اخته في المستشفى لكن وهوا رايح عمل حادث اتوفى فيه و لحسن الحظ كانت روح بطلنا التاني كي كي في المكان و تلبست جسد اكيتو الي طلع لسا فيه الروح فا اصبح جسد فيه روحيين و في نفس الوقت ضباب غريب انتشر في المقاطعة بيموت اي حد بيجي قدامة لكن بسبب حالة اكيتو الغريبة الضباب ماعملوش حاجة وهنا هتبدأ رحلة المطاردة للراجل المجنون المتسبب في كدا ومعرفة ايه هدفة في تجميع الارواح دي كلها بجانب خطف اخت اكيتو الي ماتأثرتش بالضباب هيا كمان.
طريقة اللعب
اللعبة هنا بتقدم تجربة مميزة ومختلفة اول مرة نشوفها في عالم الألعاب بتقديمها عناصر من الفلكلور و الاساطير اليابانية بدقة كبيرة والكلام ده بيظهر بشكل كبير في تنوع الاعداء الي هما حاجة زي ابو رجل مسلوخة و امنا الغولة و النداهة عندنا كدا بس هنا عبارة عن اشباح يابانية .
بطلنا هنا بسبب عملية الدمج بينه و بين كي كي بيتولد عنده قدرات غريبة بتخليه يطلق هجمات سحرية من ايده عبارة عن نار او رياح او ماء و الهجمات دي بتقدر تطورها بمرور الاحداث و الموضوع مسلي الحقيقة و مختلف.
بجانب كدا وانتا بتتمشى في المقطاعة هتلاقي ارواح محتاجة تحرير و هتبدأ تجمع الأرواح دي في عروسة ورق و تبدلها بنقط تطور بيها من مستواك و قدراتك و عشان تقدر تكتشف منطقة جديدة فيها ضباب لازم تحرر بوابة توري الي هيا حاجة اشبه بأبراح المراقبة في العاب يوبيسوفت عشان تعرف تشوف العناصر و الانشطة في الجزء دة من المقاطعة.
اللعبة طبعا عالم مفتوح بس رغم كدا فا القصة قصيرة جدا انا عن نفسي خلصتها في يومين.
الرسوميات و الأداء التقني
اللعبة من ناحية الرسوميات فا هيا جميلة بصراحة خاصة انها بتدور في مقاطعة شيبويا الي مليانة يفط و لمض نيون الي بتنعكس على برك المياة في الارض خاصة لو فعلت خاصية تتبع الأشعة.
كمان تصميم الاشباح في اللعبة كان مميز جدا و متنوع بصراحة لو قارناه بمده اللعبة.انما الجانب التقني على جهاز زي السيريز اكس فا هو ببساطة سيء اللعبة مش قادرة تحافظ على ٣٠ فريم في وضع الكواليتي الي حتى مش شغال 4K دا شغال 1800p مع تتبع أشعة مش اقوى حاجة انما مود الأداء فا هوا 1440p و برضو متذبذب بين ال٣٠ و ال٦٠ فريم و بصراحة دي حاجة مش مقبولة في لعبة منظور اول من المفترض انها ماتقلش عن ٦٠ فريم.
الحقيقة في اتنين موود ٤موود تانيين منهم الي بيفتح الفريمات و ممهم الي بيقلل الجودة لحوالي ال1080p وبالنسبالي انا مش مقتنع اني العب بجودة زي دي على جهاز جيل حالي.
الملخص
لعبة Ghostwire Tokyo لعبة كويسة جدا وفكرتها مختلفة عن اي حاجة الواحد لعبها قبل كدا فا من رأيي تستاهل اللعب خاصة انها متوفرة على Gamepass الي بيخلي الواحد يتغاضى عن قصر مدة اللعبة او حتى المشاكل التقنية.
