مراجعة

Marvel’s Spider-Man 2

ليه يبقى عندك سبايدرمان واحد لما ممكن تخليهم 2 ؟
هو ده مبدأ لعبة سبايدرمان 2 اللي ضاعفت حاجات كتير
2 سبايدرمان بدل واحد
وحجم الخريطة ضعف حجم الجزء الأول..
مفيش شك إن سبايدرمان 2 من أفضل حصريات بلايستيشن 5
وبالنسبة لناس كتير هي أفضلهم أكيد
وخلاص بشكل رسمي، استوديو Insomniac شايل منصة بلايستيشن على أكتافه في الجيل ده..
بس تعالى نتكلم بالتفصيل شوية عن سبايدرمان 2
لأني النهاردة جايلك وأنا عندي كلام كتير عايز أقوله
فـ جهز الشاي بتاعك ويلا بينا نخش في المراجعة..

القصة
أحداث قصتنا بتبدأ بعد 10 شهور بس من أحداث جزء مايلز
وبنشوف إن بيتر بقى مدرس فيزياء في مدرسة ثانوية
ووصل لمرحلة أعلى من النضوج
وأكيد مينفعش يكون بيتر مدرس من غير ما تلاقي مايلز طالب معاه في الفصل
المهم بعد شوية شرح من الأستاذ بيتر باركر
بنلاقي إن (ساند مان) مش عاجبه الكلام ده وقرر يدمر المدينة والحصة شغالة
ف بيضطر بيتر ومايلز يسيبوا المدرسة ويروحوا يوقفوه
وبتحصل واحدة من أجمد الافتتاحيات السينمائية اللي شوفناها في الألعاب
مع فايت خفيف كدة قدام (ساند مان)، أول شرير نحاربه في اللعبة..
بعد الافتتاحية بنلاقي هاري أوزبورن رجع من تاني بعد ما كان غايب وبيتعالج في أول جزء
وبنشوف إن صحته بقت زي الفل
لكن مبيعديش كتير قبل ما نكتشف إن سبب علاجه السحري ده هو إنه اتعالج باستخدام Symbiote.. بالظبط كدة، فينوم يعني
فينوم لسة مهدي اللعب ومأعلنش عن ظهوره، بس بيظهر تهديد تاني خطير

وهو Kraven The Hunter
اللي بيكون الشرير الرئيسي مع فينوم في الجزء ده..
بييجي كريفن ل نيويورك عشان يصطاد “فريسة” قوية تناسب قدراته وتتحداه بأكبر شكل ممكن
وطبعا “الفريسة” دي هي الأشرار اللي سبايدرمان حابسهم أو خلص عليهم، زي مارتن لي و Lizzard و Scorpion
فهل هيقدر بيتر ومايلز يوقفوا التهديد الجديد اللي وصل نيويورك؟
طب وهيعملوا ايه مع فينوم اللي لما يظهر أخيرًا؟
وهل هيحاول Kraven إنه يصطاد فينوم لو شافه؟ كل دي أسئلة بتجاوب عليها القصة، وكفاية كدة عشان محرقش عليك..
في تجربتي على أعلى صعوبة خلصت القصة الأساسية في حدود 12 ساعة
وهي مدة قليلة بالنسبة للعبة بالحجم دة، وبالنسبة للجزء الأول كمان…
بشكل عام القصة كويسة وفيها أكشن كتير
وعجبتني لمسات بسيطة كدة زي علاقة مايلز ومارتن لي اللي خدت حقها واتقفلت بشكل حلو جدًا
وكمان المهمات اللي كان فيها بيتر وهاري وهما صغيرين أو وهما بيتفسحوا مع بعض،
مهمات بَنِت كويس لعلاقتهم اللي هتتعقد قدام في أحداث القصة مع وجود فينوم..
عموما القصة متوقعة زيها زي أي قصة سوبر هيرو، يعني متستناش حاجة جديدة من الأحداث هنا
باستثناء مهمة واحدة مكنش حد يتوقعها..
لكن أكتر حاجة ضايقتني فعلا في القصة هي إنها مفيهاش لحظات درامية تقيلة تعلق معاك
يعني مفيش حاجة زي لحظة موت العمة ماي
أو مشهد زي مشهد المواجهة بين بيتر ودكتور Octopus في الجزء الأول
للأسف القصة بتاخد طريق آمن زيادة عن اللزوم ومش بتخاطر بحبكات أو أحداث مفاجئة
وفيه فرص كتير ضايعة في الأحداث كان ممكن جدا تتحول لقصة أفضل بكتير وتقدم لحظات ملحمية ودرامية

الجيمبلاي

لحد النهاردة لسة بدخل ألعب الجزء الأول من سبايدرمان وأقضي ساعات في المرجحة في شوارع نيويورك
وبصراحة عمري ما زهقت ولا هزهق منها
لأنها ببساطة لعبة في اللفل الجامد أوي ده من 2018 ولحد النهاردة..
الكلام نفسه ينطبق على جيمبلاي سبايدرمان 2
الجيمبلاي إدمان إدمان إدمان.. جميل؟ جميل
تعالى نخش على المشكلة بقى..
فعلا فيه شوية إضافات في الجيمبلاي، زي
الجناحات اللي بتخليك تطير
أنميشنز جديدة في المرجحة بالشبك
القدرات اللي بقت منفصلة عن البدلة وتقدر تستخدمها وتطورها بشكل منفصل
والـ Parry أو الصد المثالي..
كل دا كلام حلو، لكن على أرض الواقع في تجربة اللعب نفسها..
لما بتحارب أعداء أو تطير في المدينة..
فـ للأسف كنت أغلب الوقت بحس إني بلعب الجزء الأول بتاع 2018
خصوصًا في الكومبات والمواجهات اللي هتلاقي نفسك بتقضي فيها وقت أكبر
يعني فعلا الكومبات تفرق عن الجزء الأول في حتة القدرات (اللي كانت موجودة كدة كدة بس مش بالتوسع دة)
والـ Parry اللي محتاجتش استخدمه وأنا بلعب على أعلى صعوبة إلا في حالات معينة وقليلة
وكمان إنك تقدر تطور الشخصية زي الهيلث والدامدج وال focus…
دي الإضافات الحقيقية للكومبات
لكن غير كدة المواجهات هي هي بتاعت الجزء الأول ومفيش إضافات كفاية تخليها ليها شكلها الخاص ومتعتها المختلفة

في الجزء ده بقى فيه تركيز كبير على البوص فايتس أكتر من الجزئين اللي فاتوا
مبدئيًا عددها زاد جدًا وبقى كل عدو مهم بتحاربه لازم بوص فايت معاه
سواء في المحتوى الرئيسي أو الجانبي
ومش بس العدد زاد، دا كل فايت بقى فيه 3 أو 4 مراحل
بس المشكلة إن حركات الزعماء محدودة وعددها قليل
وبتتكرر في كل مراحل المواجهة من غير تغيير تقريبًا
وده خلاني أزهق ساعات

نروح لحاجة تانية عجبتني جدًا
وهي الستيلث أو التخفي
لأنك دلوقتي تقدر تعمل خط شبك أو Web line يوصل بين مناطق بعيدة عن بعض
ومش بس كدة، الخطوط دي ملهاش عدد معين أو وقت تحميل معين وتقدر تحطها في أي حتة وأي اتجاه
والمدى بتاعها بعيد بحيث يساعدك تغطي مسافات كبيرة..
هي إضافة بسيطة جدًا بس عبقرية جدًا بسبب تأثيرها على الجيمبلاي وخصوصًا التخفي
لأنك بتعمل طرق جديدة تساعدك تخلص المنطقة بالطريقة اللي انت عايزها
بس للأسف الأدوات أو Gadgets بتاعت التخفي،
زي فخ الشبك والليزر والحاجات دي
كلها اتشالت
ومش عارف ليه بصراحة أو إيه المنطق ورا ده
لأن لو كانت لسة موجودة كان التخفي هيبقى أحسن أضعاف

أخيرًا في الجيمبلاي لازم نتكلم عن استغلال مزايا دراع ال dual sense اللي بتعمل فرق كبير وأنت بتتمرجح أو في المواجهات
سواء في الفايبريشن اللي فيه تفاصيل جامدة جدًا حسب كل فعل بتعمله
وكمان في زراير الـ Triggers والـ Haptic Feedback
فـ تقدر تقول إنها اكتمال لتحفة تقنية، ومتقلقش هنتكلم عن الأداء التقني كمان شوية..

العالم والمحتوى الجانبي

حجم خريطة نيويورك بقت الضعف في الجزء ده مع إضافة أحياء بروكلين و كوينز
وحجم الخريطة بقى ضخم فعلا أكتر من الأول، يعني مرجحة أطول ومتعة أكتر
ومش بسبايدر مان واحد، لا دول اتنين!
وطبعًا تقدر تبدل بين بيتر ومايلز في أي وقت على طريقة GTA V
وبسرعة خرافية..
بس مش حجم العالم بس اللي زاد
كمان المحتوى الجانبي اتحسن بشكل ملحوظ
وفيه مهمات مختلفة لمايلز وبيتر
مثلًا مهمات مايلز ليها علاقة بالجامعة اللي بيقدم فيها وأصحابه الشباب
ومهمات بيتر مرتبطة بشخصية كدة كان يعرفها في الجزء الأول، بس مش هحرق عليك وأقولك مين..
غير المهمات الجانبية فيه أنشطة كتير تقدر تعملها في العالم
والأنشطة دي تقدر تعملها بـ بيتر أو مايلز عادي
منها أنشطة مرتبطة بالأشرار بتوع اللعبة وبتعرفك أكتر عنهم وبتضيف للقصة فعلا
ومنها أنشطة في صورة خدمة بيقدمها سبايدرمان للعالم..
في نهاية نشاطات معينة بتتفتحلك مهمة جديدة
فيها مفاجآت وأسرار مستخبية واللي غالبا بتكون تلميحات لشخصيات وعوالم تانية في عالم مارفل
واللي مش هتكلم فيها كتير وهسيبك تكتشفها بنفسك..

غير الأنشطة والمهمات الجانبية، فيه اللي تقدر تعتبره أحداث ديناميكية زي جرايم السرقة والهجوم وكدة اللي بتحصل بشكل عشوائي وانت بتستكشف
الأحداث دي مكررة، وبعد ساعات لعب هتحس إنك زهقت ومش عايز تعملها تاني بسبب تكرارها

الجرافيكس والأداء التقني

نيجي بقى للي بشوفه أهم إنجاز وإبداع حصل في سبايدرمان 2
وهو الأداء التقني واستغلال أحدث التقنيات بشكل عظيم..
مبدئيًا كل أوضاع الجرافيك فيها تتبع آشعة
يعني تقدر تلعب على وضع الأداء بـ 60 فريم ومعاك تتبع آشعة عادي
واللي بالمناسبة عامل فرق كبير في شكل اللعبة بشكل عام والإنعكاسات على المباني
واللعبة مفيهاش أكتر من المباني..
استغلال سرعة الـ SSD بتاع البلايستيشن 5 هو أهم نقطة في الأداء هنا
لأن أول مرة نشوف Fast Travel بالسرعة دي
يعني مش بس تقدر تعمل سفر سريع لأي نقطة في الخريطة وفي أي وقت
لأ دا كمان الموضوع مبياخدش ثانية حرفيًا ومفيش أي شاشات تحميل
وده طبعًا ينطبق على سرعة التبديل بين بيتر ومايلز بردو..

الجرافيكس فيها تحسن واضح عن الأجزاء اللي فاتت
وبالأخص في الإضاءة اللي بتدي لكل وقت من اليوم وكل منطقة لمسة سحرية
سواء ساعة الغروب أو في سواد الليل
فـ بشكل عام جرافيكس سبايدرمان 2 هي جرافيكس لعبة جيل جديد،
جميلة بصريًا وتحفة تقنيًا..

وتقييمنا النهائي هو…
8/10
سبايدرمان 2 بتقدم تجربة مليانة متعة مبتخلصش وأدرينالين هيفرقع في عروقك
وبالرغم من إضافات جميلة زي البوص فايتس وجناحات الطيران وتحسين المحتوى الجانبي
والطفرة التقنية في الأداء والجرافيكس وسرعة التحميل
لكنها لا تزال متشابهة بشكل كبير جدًا مع الجزء الأول ومقدمتش جديد كافي بالنسبة للعبة بسبعين دولار
سواء من ناحية الجيمبلاي أو الأحداث الديناميكية
وبتقدم قصة قصيرة ومتوقعة وكانت محتاجة تاخد حقها أكتر من كدة