بعد سنة من إصدار Sonic Origins اللي بتجمع ريماستر لـ أربع ألعاب كلاسيكية من ألعاب سونيك
دلوقتي بيصدر DLC للمجموعة بيضيفلها عدد أكبر من ألعاب سونيك الكلاسيكية
واللي بيصدر مع مجموعة Sonic Origins تحت عنوان Sonic Origins Plus
المجموعة دي مبتقدمش حاجة جديدة تقريبًا
تقدر تقول إنها تجميعة لأحسن الألعاب الكلاسيكية من ألعاب سونيك
فترة التسعينيات الذهبية
عشان كدة اللي هيقدر اللعبة دي فعلًا هما جيل العظماء اللي لعبوا الألعاب الأصلية دي زمان
فـ متستناش لعبة جديدة لسونيك بجرافيك جديد والكلام ده
لا، دي مجرد ريماستر بسيط مع شوية إضافات للفانز القدامى لسونيك
يعني تقدر تقول إنها رسالة حب من سيجا لعشاق سونيك
الإضافة بتقدم ايه؟
طبعًا أبرز حاجة في الإضافة هي الـ 12 لعبة من ألعاب سونيك الكلاسيكية اللي كانت بتنزل على جهاز Game Gear
الألعاب دي تعتبر عناوين جانبية لعناوين Sonic
ما بين ألعاب سباق وألعاب Puzzle أو ألعاب Platformer شبيهة للـ 4 عناوين الأساسية..
دا مع الموسيقى الأصلية والمرخصة،
ومودات وتحديات جديدة..
ولو اشتريت مجموعة Sonic Origins Plus هتاخد الـ 4 ألعاب اللي نزلوا في الـ Sonic Origins
مع الـ12 لعبة الجداد بتوع إضافة الـ Plus
بس بجرافيك متحسن شوية ووضع عرض واسع مناسب للأجهزة الحديثة
كمان شخصية إيمي بقى ينفع تلعب بيها في الـ 4 ألعاب الأساسية
اللي هي سونيك 1 و2 و3 و سونيك CD
تقدر تلعب بيها بدل سونيك
وبدل الـ Drop Dash بتاعته
هي معاها مطرقة Piko Piko
واللي بتساعدك تضرب الأعداء وانت في الهواء
أو تعمل Dash لقدام بعد ما تنط
وبصراحة استمتعت وانا بجرب شخصية إيمي
والفرق بينها وبين سونيك في الجيمبلاي واضح وممتع
يعني محسيتش اني محتاج ارجع العب ب سونيك،
وده لأن إيمي ليها أسلوبها في الجيمبلاي، واللي معمول بشكل كويس جدًا ومختلف عن سونيك
Knuckles “ناكلز” هو كمان بقيت تقدر تلعب بيه في لعبة Sonic CD
والاتجاه التصميمي لمراحل اللعبة بيخلي استخدام ناكلز مناسب جدًا
ومش هتحس إن اللعبة ناقصها حاجة لأنك بتلعب بشخصية تانية غير سونيك
الأداء التقني
طبعًا من أهم الحاجات اللي تفكر فيها لما نتكلم عن ألعاب كلاسيكية معمولها ريماستر
هو الأداء التقني
وهنا مش بتكلم عن الفريمات واستهلاك موارد الجهاز وكدة
لا أنا أقصد الجرافيك لو فيه مشاكل أو جليتشات
الأصوات لو شغالة كويس ولا فيها مشاكل..
الجرافيك كويس
مش هتحس إن الصورة مبكسلة أو مشوشة
وأعتقد كل الألعاب اشتغلت بالجرافيك الكلاسيكي الطبيعي بتاعها من غير مشاكل في تجربتي..
لكن بالنسبة للأصوات، فـ لازم نتكلم عن الأصوات في الألعاب الكلاسيكية دي
لأنها فيها مشاكل واضحة جدًا
كل الأصوات تحس فيها صدى صوت خفيف كدة
ومش عارف أوصفهالك ازاي بس الصوت مش واضح خالص
فعلًا الصوت من أسوأ عناصر التجربة وكفيل إنه يقفلك من اللعبة خالص
هل أنصحك بـ Sonic Origins Plus؟
لو اشتريت مجموعة Sonic Origins اللي نزلت السنة اللي فاتت
فـ بصراحة أنا مش شايف سبب يخليك تشتري إضافة الـ Plus
إلا لو كنت من عشاق سونيك لدرجة إنك مش بتفوت لعبة أو فيلم من عالم سونيك
لكن لو كنت مشتريتش مجموعة Sonic Origins،
يبقى أنصحك تجيب المجموعة بالإضافة الجديدة Sonic Origins Plus لو عايز تعيش شوية نوستاليجا
المجموعة بالإضافة موجودين على كل المنصات تقريبًا
بلايستيشن 4 و 5 ، إكس بوكس سيريس و إكس بوكس ون
بي سي، و نينتندو سويتش
سعرها 40 دولار، وسعر الإضافة لوحدها 10 دولار
الحكم النهائي
في النهاية، اللي بتقدمه الإضافة من ألعاب الـ Game Gear
ده متوقف على مستوى الألعاب نفسها
والـ 12 لعبة بما إنهم ألعاب فرعية وصغيرة
ميستاهلوش أوي إلا لو كنت فان قديم للألعاب دي ..
وكمان من ناحية الأداء التقني زي ما قولنا، الصوت فيه مشكلة واضحة جدًا
يمكن الحاجة الوحيدة اللي تستاهل فعلا هي شخصيات إيمي وناكلز والاستايل المميز بتاعهم
دا مع التحديات الجديدة في كل لعبة ..
والسعر بالنسبة لكل اللي قلناه ده غالي حبتين
