مراجعة لعبة
Sherlock Holmes: The Awakened
ايه ياعم أنت هتعملي فيها شيرلوك؟؟
دلوقتي تقدر تعمل فيها شيرلوك فعلا!
في لعبة جديدة من عالم شيرلوك هولمز
هي ريميك كامل للعبة نزلت في 2007
بتقدر فيها تحقق في الجرائم وتبحث عن الأدلة كأنك شيرلوك بالظبط
اللعبة بتديك حرية في الاستكشاف والتحقيق
وبتخليك أنت اللي تربط الأدلة ببعض وتحقق مع المشتبه فيهم
وبعدين تخش الـ Mind Palace الجميل بتاعك عشان تحل القضية وتحط النقط على الحروف
وكأنك دخلت بوابة سحرية لعالم شيرلوك هولمز!
فـ تقدر تقول إن اللعبة بتحقق أحلام عشاق شيرلوك هولمز
استوديو Frogwares صاحب ألعاب شيرلوك هولمز
قرر يعمل ريميك لواحدة من أفضل ألعاب السلسلة
وهي لعبة Sherlock Holmes: The Awakened
الريميك مبني من الصفر من ناحية الجرافيك والفيزيائيات
مع المحافظة على محتوى اللعبة الأصلية
فـ يلا بينا نشوف مغامرات شيرلوك والدكتور واتسون هتاخدنا فين
في Sherlock Holmes The Awakened
القصة
في صباح يوم عادي في سنة 1882
بتتعرض قضية اختفاء خادم على شيرلوك
شيرلوك بيشوفها عادية ومملة بالنسبة للقواضي اللي بيقبلها عمومًا
بس من كتر ما هو زهقان وبيدور على أي قضية
بيقبل القضية وخلاص ويحقق فيها
بس مبيعديش كتير قبل ما يكتشف إن الموضوع أكبر من مجرد عملية خطف بكتير
وبتطلع واحدة من أخطر القضايا اللي بيمسكها شيرلوك
وتحقيقه بياخده في مغامرات لأوروبا وأمريكا
عشان يكشف سر منظمة سرية ومجنونة
فـ هل يقدر شيرلوك بمساعدة دكتور جون واتسون
إنهم يتغلبوا على المخاطر دي كلها لوحدهم؟
القصة مش طويلة أوي لأن تقدر تقول إن اللعبة دي جزء فرعي من السلسلة
وتقدر تخلصها في 7 ساعات تقريبًا…
القصة مشوقة وتقدر تشدك من البداية للنهاية وتخليك عايز تكمل تحقيق وتعرف إيه الموضوع
بس النهاية مكانتش أفضل حاجة ومشرحتش تفاصيل كافية
يعني تقدر تقول إن النهاية مفتوحة شوية وبتسيبك أنت وخيالك تفهم ايه اللي حصل.
الجيمبلاي
أكيد في لعبة عن شيرلوك هولمز، الجيبمبلاي هيكون مركز على التحقيق ومسرح الجريمة
فـ عملية التحقيق هنا بتتقسم لـ 3 محاور رئيسية:
التحقيق في مسرح الجريمة وجمع الأدلة – استجواب المشتبه فيهم والمتورطين في القضية بناءً على الأدلة اللي جمعتها –
وأخيرًا ربط الأدلة ببعض في الـ Mind Palace أو قصر العقل.
التحقيق في مسرح الجريمة بيخليك تتبع آثار أقدام أو آثار في البيئة عمومًا
وبعدها تبني اكتر من سيناريو تتوقع فيه اللي حصل في المكان
وتختار السيناريو المنطقي والواقعي أكتر،
طبعًا حسب الآثار اللي قدامك في البيئة.. يعني اللعبة مش بتقولك كل حاجة وبتسيبك أنت اللي تحدد.
التحقيق دا نتيجته إنك بتجمع أدلة مختلفة بتحتاجها في باقي القضية، ولازم التحقيق في مسرح الجريمة يكمل للآخر
لأن لو الأدلة كانت ناقصة مش هتقدر تكمل باقي القضية.
بعد كدة بتروح تتكلم مع المشتبه فيهم حسب الأدلة اللي أنت جمعتها، واللعبة بتخليك تختار الأدلة اللي عايز تسألهم عنها
فـ لما بيكون فيه دليل ينفع يخليك تستجوب حد
بيظهرلك علامة محادثة صغيرة كدة على الدليل.
طبعًا بتسمع ردود المشتبه فيهم وبتحلل شخصيتهم كعادة شيرلوك
عشان تقدر تحدد هو بيكدب ولا بيقول الحقيقة.
والمرحلة الأخيرة من التحقيق هي قصر العقل.
اللي تابع مسلسل شيرلوك أو الأفلام أو قرأ الكتب
عارف أد ايه قصر العقل أو الـ Mind Palace مهم أوي في عالم شيرلوك..
اللعبة هنا بتقدمه على هيئة خلايا في العقل وكأنك جوا عقل شيرلوك فعلًا
وبيكون متاح قدامك كل الأدلة اللي أنت جمعتها من أول القضية
وبتتقسم لـ (رصد وملاحظات – وثائق وشهادات – عناصر)
ومطلوب منك إنك تربط بين الأدلة الصحيحة عشان تجاوب على السؤال المطروح
زي مثلًا الخاطف شكله ايه؟ نقدر نلاقيه فين؟ طب بيخطف الناس فين؟
بعد ما تربط الأدلة ببعض بتوصل لأجوبة، واللي على أساسها خطوتك الجاية بتتحدد
وتقدر توجه الاتهام للشخص اللي الأدلة بتشاور عليه.
كل دا كلام جميل، بس فيه مشكلة مهمة في الجيمبلاي
من ناحية التحقيق والآليات اللي لعبة بتديهالك
فـ هي حلوة جدًا وفيها تطور عن الأجزاء اللي فاتت
بس فيه مشكلة كبيرة ومحبطة جدًا بالنسبالي
وهي إن القضايا والتحقيق بقوا أبسط بكتير من قبل كدة
يعني مسرح الجريمة مبقاش فيه آثار معقدة وأدلة كتيرة ومتشابكة تخليك تحتار فعلا
لا، أغلب القضايا لقيت نفسي بحلها بسهولة والآثار مش أكتر من
خطوات أقدام أو خرابيش أو جثة أو دم..
كمان مفيش مخاطرة في موضوع الاتهام في نهاية التحقيق
يعني أنت لما بتخلص تحقيق وتتهم شخص معين
بقى عادي لو وجهت اتهام خاطئ، اللعبة هتقولك أنه غلط وتخليك تعيده تاني
مش زي الجزء اللي فات مثلًا الموضوع كان ليه تأثير حقيقي واختياراتك كان ليها معنى.
كل ده ممكن ميكونش مشكلة لناس كتير..
بس لو أنت بتحب ألعاب التحقيق وبتهتم بالتفاصيل
فـ غالبا هتضايق زي ما انا اتضايقت
الجرافيك
جرافيك اللعبة وتصميم العالم كويسين
وهتحب إنك تتجول في العالم وتتفرج على تفاصيله البصرية
بس المشكلة الوحيدة هنا هي حركة الوشوش والشفايف
في لعبة تحقيق زي دي أنت محتاج الجانب الدرامي يكون أحسن ما يكون
يعني حركات وشوش واقعية وشفايف متناسقة مع الكلام
بس حركة الشفايف هنا سيئة ومش دقيقة في أغلب الوقت
الأداء الصوتي كويس بس حاجة زي دي بتفصلك وانت مندمج مع اللعبة
فـ نتمنى إن الاستوديو يحسن الجزئية دي في ألعاب شيرلوك الجاية.
العالم والاستكشاف
The Awakened بتقدم تجربة خطية بشكل كبير في أغلبها
العالم قدامك تحسه مفتوح وتقدر تتجول فيه براحتك
بس بردو تحس إنه ميت كدة ومفيهوش حاجة تتعمل أو تتفاعل معاها
نادرًا ما هتلاقي مهمات جانبية وقضايا صغيرة كدة تحقق فيها براحتك
ودي بردو حاجة كانت موجودة في الجزء اللي فات واتشالت من الجزء ده..
أما من حيث التنقل في العالم والاستكشاف
فـ مفيش بوصلة أو حاجة تقولك إنك محتاج تروح للمكان الفلاني عشان تكمل تحقيق
أنت بتبقى عارف إنك محتاج تروح مكان اسمه كذا
لكن هو فين المكان أو أروحله ازاي، اللعبة مش بتقولك
هو أه فيه خريطة
بس زي قلتها بصراحة، وهتخليك تلجأ للسفر السريع وتتعب عقبال ما توصل للمكان المحدد اللي أنت عايزه
الخريطة أصلًا مش بتقولك مكانك فين ولا بتحددلك أنت المفروض تروح فين
فـ تقدر تقول إن العالم خطي بس عايز يعمل فيها مفتوح ومتفاعل وكدة
واللي هو فشل فيه بشكل واضح..
الأداء التقني
من ناحية الأداء التقني فـ مقابلناش أي مشاكل في تجربتنا للعبة
سواء على البي سي أو على بلايستيشن
اللعبة مش محتاجة إمكانيات عالية وبتشتغل بسلاسة على الأجهزة المتوسطة وأجهزة الكونسول والجيل القديم
لأنها مبنية على Unreal Engine 4 والجرافيك بتاعها مش قوي أوي.
في النهاية لعبة Sherlock Holmes The Awakened هي ريميك رائع للعبة الأصلية اللي نزلت في 2007
ولو كنت بتحب ألعاب التحقيق أو شيرلوك هولمز
فـ دي فرصتك إنك تخش عالم شيرلوك في الألعاب
لأن اللعبة على الرغم من عيوبها تستحق التجربة
وبتعيشك تجربة المحقق شيرلوك ومغامراته مع جون واتسون.
التقييم النهائي
8\10
