العاب القتال من اكثر التصنيفات اللي الناس دايمًا بتتطلعلها و بتستنى تشوف منها أجزاء جديدة, و ده لأن النوع ده من الألعاب بيبقي مليان تنافسية و افكار كتير جدًا و كل ماتش هتلعبه هيبقي مختلف عن اللي قبله. و من ضمن الألعاب ديه هي سلسلة Street fighter و اللي اتميزت دايمًا بأسلوب القتال الأقرب للكونج-فو و الكراتيه ده غير شخصياتها الأيقونية و حركاتها الشهيرة زي الـ Hadoken مثلًا.
و اخيرًا دلوقتي احنا قدرام جزء جديد بعد ما كان اخر جزء صدر للسلسلة في سنة 2016. و الجزء ده مش جاي بايده فاضية, لا ده ناوي يقدملنا طور جديد كليًا ده غير ساحة كبيرة تجمع اللاعبين في تجربة اونلاين مختلفة. هل قدمت Street Fighter 6 تجربة قتالية جديدة و مميزة؟ خصوصًا ان السنة ديه مليانة بألعاب من النوع ده و المنافسة مش هتبقي سهلة, ده اللي هنعرفه في مراجعتنا للجزء السادس من سلسلة قتال الشوارع العريقة.
طور القصة الجديد
لاعبين كتير كانو بيلومو سلسلة Street Fighter بسبب ان جزئها الخامس مكانش فيه طور قصة, و علي الجانب الآخر قدمت Mortal Kombat طور قصة قوي خلي محبين Street Fighter يحسو بالغيرة. و واطح ان Capcom زي ما عودتنا بتهتم برأي لاعبيها عشان كدة الجزء السادس اللي بعنوان Street Fighter 6 هيحتوي علي طور قصة أسمه World Tour. فتعالي نشوف الطور ده بيقدملنا ايه.
طور القصة بيحكي قصة مقاتل عايز يبقي من المقاتلين العظماء و بيبدأ رحلته بالتدريب علي أيد Luke, واحد من أيقونات اللعبة. و اللي هيدربك و يعرفك كل أساسيات الطور. بينضم ليك في التدريب متدرب تاني و اللي بيسعي للقوة لأهداف مختلفة زي انه عايز يبقي ذو قيمة و يقدر يقاتل أي حد من غير قيود.
عالم اللعبة المفتوح بيعيش أجواء ما بعد الاستقرار, و ده لأن المدينة كانت في حالة فوضي و كله بيقاتل في كله بدون قواعد. لحد ما جه حاكم جديد قدر يوقف الفوضي ديه, لكن الحاجة الوحيدة اللي متغيرتش هي ان الناس كلها بقو مقاتلين.
الطور ده مليان عناصر RPG, بداية من تصميم الشخصية اللي بتعمله قبل ما تبدأ القصة. و هنا بيقابلك تنوع رهيب قدامك. أول حاجة بتختار خصائص جسم شخصيتك, زي الطول و حجم العضلات و طول الأطراف و توزيع عضلات الجسم. كل ده بيتيحلك انك تبني شخصية ليها أسلوب مختلف تمامًا عن اللي هيبنيها صاحبك مثلًأ.
زي مثلًا طول الأطراف و اللي هي الدراع و الرجل. دول لو زودت طولهم و انت بتخصص شخصيتك فانت كدة هتقدر تضرب ضرباتك من مسافة اكبر بعيد عن العدو اللي قدامك, و بالتالي مش هيقدر ينفذ عليك حراكته الخاصة لأنه هيحتاج يلزق فيك. بس ده علي حساب سرعة و قوة الضربات. يعني لو الأطراف قصيرة فضرباتك هتبقي أقوي و أسرع بس هتحتاج تقرب جدًا عشان ضرباتك توصل للعدو.
نفس الكلام بينطبق علي توزيع عضلات الجسم يعني تقدر تخلي الجزء العلوي أقوي أو تقوي رجل اللاعبي بتاعك اكتر. نفس الكلام بينطبق علي سرعة حركتك علي أرض المعركة و ارتفاع قفذتك و اللي بيعتمدو علي طول و وزن اللاعب بتاعك.
كل ديه حاجات هتخلي كل لاعب ليه بصمته علي الشخصية بتاعته, ممكن تعمل لاعب ضرباته سريعة جدًا و حركته سريعة أو تخلي ضرباته بطيئة و ضعيفة لكن الضربة بالرجل منه بتجيب من الآخر. و ديه واحدة من أفضل الإضافات في الطور ده و في اللعبة عمومًا.
عالم اللعبة المفتوح بقي نشاطاتك فيه مش كتير أوي. كل اللي هتقدر تعمله هو انك تروح للناس اللي في الشوارع تعرض عليهم القتال, بس خلي بالك من مستواهم. يعني ممكن عادي جدًا تروح تعرض علي عامل البيتزا انه يقاتلك أو واحد ماشي ببدلة رايح شغله توقفه تقوله تعالي عاركني.
الفكرة ديه حلوة لكن مع الوقت بتقلب بملل و بتلاقي ان اغلب الناس في الشارع مستواهم أقل منك كتير و بتكسبهم بسهولة. يمكن الملل ده بيختفي شوية لما تنتقل لمناطق جديدة لكن مع أول ساعة في كل منطقة هتحس انه عالم مفتوح ياباني فاضي مفهوش حاجة تتعمل.
و طبعًا مننساش المهمات الرئيسية و هي انك بتروح تتدرب علي ايد المقاتلين العظماء و اللي هم بيبقو من شخصيات اللعبة الأيقونية بتاعتنا, و اللي لما بتتعلم منهم بتاخد من مهاراتهم و بتضيفها لقايمة المهارات الخاصة بيك. و مع الوقت لما تفتح مهارات كتير هتقدر تعمل الكومبو بتاعك مكون من 4 مهارات من اللي جمعتهم. و ده زي ما قولتلك من شوية بيخلي كل لاعب أسلوبه و شخصيته مختلفة تمامًا عن اللاعبين التانيين. و أول ما تحس ان شخصيتك جاهزة للقتال, خش علي الطور اللي بعده علطول و هو طور الأونلاين Battle Hub.
طور الـ Battle Hub
بعد ما تلفل شخصيتك و توصل لمستوى محترم و تجمع مهاراتك المفضلة و تختار أسلوب الـ Master بتاعك, انطلق علطول في الطور اللي بعده و هو طور الأونلاين في ساحة Battle Hub. في الأجزاء اللي فاتت كنت تقدر تلاعب الناس من خلال طور المباريات الأونلاين 1 ضد 1. لكن في الجزء ده اللاعبين هيتجمعو في ساحة كبيرة و هتشوف كل اللاعبين حواليك بمستوياتهم المختلفة و أسلوب الـ Master بتاعهم.
هتقدر تاخد شخصيتك اللي بنيتها في طور القصة و تبارز بيها شخصيات الناس التانية, و ديه من أمتع الحاجات اللي في اللعبة ديه. لأنك تقدر كل ماتش تغير من أسلوب المقاتل و من المهارات الرئيسية, و كمان تقدر تغير في تخصيص الشخصية اللي اتكلمنا عليه زي الطول و الوزن و الأطراف و كل ده. يعني كل ماتش حرفيًا قادامك عشرات الأساليب كل ما تزهق غير براحتك.
كمان تقدر تشارك بشخصيتك في بطولات و ده من خلال منصة معينة هتلاقيها في الـ Battle Hub برضو. هتشارك في بطولات ضد لاعبين تانيين و تحاول تهزمهم كلهم. حرفيًا المود ده في متعة لا توصف. و طبعًا مش محتاج اقولك انك تقدر تلعب بشخصيات اللعبة الـ 18 الرئيسية. قمة التنوع موجود فيا الطور ده.
طور ساحة القتال Fighting Ground
نرجع بقي لأصل اللعبة في الطور ده. الطور ده بيقدم الحاجات اللي اتعودنا عليها من السلسلة العظيمة ديه. طور الـ 1V1 و اللي بتلعب فيه ضد الكمبيوتر أو ضد صحابك. الجزء ده فيه 18 شخصية بس, منهم 6 شخصيات جديدة علي السلسلة و 4 شخصيات رجعتلنا من تاني بعد ما غابت عن السلسلة. ده غير ال شخصيات الرئيسية اللي متبقاش Street Fighter من غيرهم.
الطور ده رغم بساطته الرهيبة, و هو انك بتختار شخصيتك و تخش القتال علطول بس, إلا انه في تنوع كبير برضو و ده من خلال مستوي الشخصية اللي بتلاعبها و اللي بيتيحلك الاختيار بين 8 مستويات صعوبة, ده غير نجوم الأفضلية. يعني كل ما هتحس ان الكمبيوتر أو صاحبك بقي هفية و بتكسبه بسهولة, فتقدر تديله أفضلية بانك تضاعف الضرر بتاعه اكتر من مرة.
غير طور الواحد ضد واحد, طور الـ Arcade المحبوب موجود و هتقدر من خلاله تعرف قصة كل مقاتل من الـ 18 مقاتل في السلسلة. طريقة عرض القصة مسلي جدًا لأنك في البداية بيجيلك لقطات علي طريقة Comic books بتديك مقدمة عن البطل ده و أيه هدفه و ليه بيلف العالم.
هتلف العالم بكل شخصية في الطور ده بين أمريكا و البرازيل و بلاد تانية كتير. هتقابل كل 5 شخصيات بشكل متتالي و كل ما تكسب واحد هتخش علي التاني, و في الأخر لو قضيت عليهم كلهم هتشوف مقطع سينمائي جامد للبطل بتاعك مش هتشوفه الا اما تكسب, ده غير ان هيتفتحلك شوية ARts حلوين تقدر تحفظهم علي جهازك.
حرفيًا انت ممكن تقعد في طور الأركيد عشان تخلص الـ18 شخصية وقت طويل جدًا و ممتع و متنوع. ده غير انك تقدر تضيف مباريات كـ Bonus. و ده بيعلي من قيمة الإعادة لو حبيت تعيد قصة واحد من الأبطال تاني بس بماتشات أكتر.
اللعبة مبتوقفش تنوع هنا, لا بالعكس لسة في كمان. طور الـ Extreme Battle. الطور ده هو نفس طور الواحد ضد واحد العادي لكن بلمسة مجنونة. أول حاجة انت هتختار طور الماتش, يعني مثلًأ اللي يضرب 5 ضربات قاضية هو اللي يكسب. و بعد كدة بتختار العامل الخارجي, زي ان في قنابل بتنزل بشكل عشوائي من السما او صواعق. و ده لو زهقت من الطور العادي فانت عندك طور تقدر تعمل منه فوق الـ 20 طور جديد بانك تدمج الحاجات اللي بتختارها قبل ما تلعب و تجرب كل حاجة.
الجرافيك و الأداء التقني
اللعبة بتقدم مستوي رسومي عالي جدًا. تفاصيل الشخصيات واضحة جدًا و جميلة جدًا هتخليك تستمتع بالفرجة عليهم من قريب و انت بتختار الشخصيات. ده غير تفاصيل ساحات المعركة, و اللي دايمًا هتلاقي فيها حاجات بتحصل في الخلفية تلفت انتباهك.
و من الحاجات المتقنة جدًا في اللعبة ديه هي الأنميشن بتاع المقاتلين و اللي بقي فيه سلاسة رهيبة و مع كل حركة جديدة بتأديها خلال الماتش اللي بتلعبه هتقعد تتفرج علي الأنميشن المبهر بتاع اللعبة.
بالنسبة للاداء التقني فمفيهوش غلطة الحقيقة. اللعبة علي معظم الأعدادات في أطوار القتال كانت بتدي فريمات ثابتة جدًا علي إعدادات عالية بدون مشاكل. لكن برضو لازم تبقي عارف ان طور الـ World Tour أو العالم المفتوح بيتطلب أجهزة أقوي شوية و ده طبيعة أي عالم مفتوح, عشان كدة اللعبة بتوصي انك لو واجهت مشاكل في الطور ده, تقدر تشغل مود الـ Performance من الاعدادات و الأداء هيتحسن بشكل كبير.
