خلال السنين الماضية شوفنا مجموعة كبيرة من ألعاب تُسمى Souls-like وده عشان هي بتاخد نفس فكرة ألعاب الـ Souls وبتقدمها بشكل يتناسب مع عالمها. فعلياً مفيش غير مجموعة بسيطة من الألعاب هما الي نجحوا في إنهم يقدموا تجربة شبيهة ولكنها في نفس الوقت مميزة أهمهم لعبة Nioh.
إستوديو Cold Symmetry المُكون من 15 فرد فقط اشتغل لمدة 3 سنين على لعبة Mortal Shell والنتيجة النهائية بتوضح إن الإستوديو على الرغم من حجمه الصغير وميزانيته الضئيلة فهو مُدرك تماماً لعناصر اللعب الي بتخلي كل مُحبي ألعاب الـ Souls مستمتعين بتجربة النوعية ديه !
( نسخة المراجعة تم تقديمها من الناشر Playstack و Evolve )
كعادة ألعاب الـ Souls فالقصة مش بتكون واضحة ليك كلاعب وبتضطر انك تبحث في البيئة عشان تعرف تفاصيل أكثر عن عالم اللعبة وفكرتها والشخصيات المختلفة المتواجدة فيها.
انت بتلعب بـ Foundling ، الشخصية ملهاش إسم مُحدد ولكنها معروفة بالإسم ده في اللعبة ( لقيط ). وانت Foundling أي ضربة بتؤدي لموتك عشان كدة بعد مقدمة اللعبة بيتم تقديم أول Shell ليك في اللعبة. أكيد هيكون عندك سؤال وهو إيه هما الـ Shells ؟ بإختصار الـ Shells هي دروع بتلاقيها في بيئة اللعبة، اللعبة بتقدملك 4 Shells وكل Shell فيهم بتكون عبارة عن شخصية مختلفة عن الشخصيات التانية وبيكون ليها قصة مختلفة بيتم شرحها لما تفتح قدرات أكثر لكل Shell ولما تستمر أكتر في اللعبة.
القصة غامضة جداً وفي مجموعة من الشخصيات الي بتتقدملك في بداية اللعبة هتكون مش فاهم ايه سبب وجودهم ولكن مع الإستمرار في اللعبة والبحث في البيئة وقراءة مختلفة الـ Notes الي هتلاقيها، فأنت هتبدأ إلى حدٍ ما تفهم وزي ألعاب السولز فمجتمع اللاعبين نفسه بعد الإصدار هو الي هيوضح القصة بشكل كامل لإن هيكون في تعاون كبير بين اللاعبين لمحاولة شرحها بشكل تفصيلي.
لعبة شبيهة بألعاب الـ Souls يعني تجربة فائقة الصعوبة عشان كدة أنا من دلوقتي لازم أوضحلك ان اللعبة ديه مش لأي حد ولو انت شخص مبتحبش ألعاب الـ Souls فأكيد اللعبة ديه مش عشانك وأنصحك تبعد عنها تماماً عشان متكسرش أي حاجة عندك في البيت.
عالم Mortal Shell إلى حدٍ ما يعتبر مفتوح ولكن التقدم فيه مختلف، اللعبة بتقدملك مجموعة من المناطق وكل منطقة فيهم ليها طابع خاصة ولما بتخلص الـ Boss الأخير فيها بتخش على المنطقة الي بعدها على طول لإن مبيكونش في حاجة ناقصة تعملها في المكان الي انت فيه. اللعبة فيها نسبة إستكشاف ولكن الموارد الي بتلاقيها مش بتكون متوفرة بكثرة وده بيضيف صعوبة للتجربة. من الحاجات الحلوة الي في اللعبة هي الألغاز، على سبيل المثال في منطقة دخلت فيها وكان لازم اني احل لغز هيفتحلي بوابة، اللعبة مش بتقولك تعمل ايه ومفيش Waypoint وانت بنفسك الي المفروض تكتشف المفروض تعمل ايه عشان تقدر تستمر في القصة.
زي ما وضحت فاللعبة بتقدملك 4 Shells، كل Shell منهم له أسلوب لعب خاص لإنك هتلاقي Shell حياته عالية ولكن في نفس الوقت الـ Stamina قليلة، في Shell تاني بيقدم تجربة عكس الأولى تماماً عشان كدة إختيار الـ Shell هيتوقف على تجربتك وأسلوب لعبك الشخصي. كل Shell بتفتحه بيكون غير معلوم وبتضطر إنك تعرف اسمه عن طريق Sester Genessa وبكدة هتبدأ تفهم قصته وتفتح مجموعة من القدرات المختلفة لمساعدتك في رحلتك.
من الحاجات التانية الي بتأثر على إختيارك للـ Shell هي الـ Resolve وده عبارة عن قدرة خاصة بتقدر تستخدمها لصد ضربات الأعداء و ( تحجير شخصيتك ) لتفادي الضربات والقيام بمجموعة من القدرات الخاصة بالأسلحة أو بالـ Shell نفسه. كل Shell له شريط Resolve بيختلف عن الـ Shells التانية واختيارك هيعتمد على تفكيرك وأسلوبك سواء كان دفاعي أو هجومي.
شخصية Sester Genessa مش بس بتقدملك قدرات لكل Shell لا ديه بتفيدك جداً في شرح بعض تفاصيل القصة والعالم وبتحاول تلمحلك لبعض الحاجات الي المفروض تعملها. بعد فتح أي Shell بتحصل على Effigy بتقدر عن طريقه تغير لأي Shell في أي وقت، نفس الكلام بينطبق على الأسلحة، اللعبة بتقدملك تنوع مميز في الأسلحة زي سيف عادي وسيف طويل و Hammer معاه سكينة، إختيار السلاح برضو هيعتمد على أسلوب لعبك وقدرات الـ Shell الي انت اخترته. بتقدر انك تعمل Upgrade للأسلحة لما بتلاقي موارد في البيئة وده بيساعدك على تقوية السلاح وبيسهل عليك المواجهات الكبيرة.
كل بيئة هتمر فيها في عالم Mortal Shell هتقدملك مجموعة مختلفة من الأعداء، كل عدو له أسلوب مواجهات خاص ولما بتخش في مواجهات مع عدد كبير مع الأعداء بتلاقي نفسك بتستخدم اكتر من أسلوب لعب في نفس الوقت وكل منطقة من مناطق اللعبة هتحتاج منك تركيز في نوعية الأعداء الموجودة عشان تفهم أسلوبهم وتعرف تتكيف معاه.
للأسف الجيم بلاي مش خالي من العيوب والعيوب الي فيه مؤثرة على التجربة. من أهم العيوب في تصميم اللعبة هو تمركز الأعداء، في معظم الأحيان لما بتخش مكان مُعين بتلاقي إن المطور حاططلك مجموعة ضخمة من الاعداء هدفهم الوحيد انهم يهجموا عليك ( مش بذكاء ولكن بكثرة ) وديه هتعتبر مشكلة كبيرة بالنسبالك في بدايات اللعبة وهتتعود عليها بعد وقت، بعد كدة لما تلاقي عدد كبير من الأعداء هتطلع تجري عشان تريح نفسك من المواجهات الي بنسبة 99% هتؤدي لموتك في النهاية.
من المشاكل التانية في الجيم بلاي هي الـ Hitboxes ، في بعض الأحيان في خطأ واضح في اللعبة وهي ان الضربات بتيجي فيك حتى لو انت بعيد عنها بنسبة، وفي بعض الأحيان بتلاقي ان في ضربات كانت المفروض تقضي عليك تماماً مجتش فيك أصلاً، المشكلة ديه هتحتاج وقت للحل ولكن من الممكن أنها تتحل بشكل كامل بتحديث مستقبلي أو على الأقل يحسنها شوية.
بالنسبة للرسومات فالعبة Mortal Shell بتقدملك مجموعة كبيرة من البيئات وكل بيئة فيهم ليها رسومات وطابع مختلف تماماً عن البيئات الأخرى. على سبيل المثال فالمنطقة الأولى الي بتبدأ فيها وهي Fallgrim تعتبر شبيهة بالغابة وليها طابع رسومي مختلف عن المنقطة التانية وهي Abandoned Chamber، المنقطة الثالثة بتقدملك رسومات ثلجية رائعة وبتفضل كدة في كل منقطة بتتفاجئ بمدى روعة رسومات وتفاصيل اللعبة.
تصميم الـ Shells أكثر من رائع وكل Shell فيها مجموعة من التفاصيل الي بتميزها بشكل كبير عن الـ Shells التانية، زي ما ذكرت قبل كدة فا كل منطقة فيها أعداء مختلفة ، الأعداء ديه كلها بيكون تصميمها مختلف ولايق على المنطقة الي بتكون فيها. تصميم الزعماء مميز جداً وفي بعض الأحيان بيكون مرعب !
اللعبة مفيهاش محادثات كتيرة بين شخصيات ولكن كل شخصية بتتكلم بيكون ليها صوت مميز ومختلف خاصةً الأربعة Shells والي كل واحدة فيهم بتحس ان ليها لكنة وأسلوب كلام مختلف تماماً. شخصية Sester Genessa بتديك معلومات طول فترة اللعبة بأداء صوتي ممتاز هيحسسك بعمق الشخصية والمكان الي انت فيه.
على عكس سلسلة Dark Souls والألعاب الشبيهة زي Bloodborne و Sekiro فالموسيقى في Mortal Shell بتتقدم بشكل مختلف. الموسيقى مش عالية ومفيهاش Coral بل هي موسيقى Ambient بتشتغل بأسلوب حلو جداً مع كل Boss Fight وعلى الرغم من وجود تشابه بين موسيقى كل زعيم إلا أنك بتحس بإختلاف لو ركزت في بعض الالات الموسيقية المستخدمة وده بيدي لكل مواجهة إنطباع خاص بيها.
الأداء التقني للعبة مواجهنيش فيه أي مشاكل، انا بلعب اللعبة على منصة PlayStation 4 العادية وعلى حسب تجربتي مع اللعبة فهي كانت شغالة على 30 فريم ثابتة 99% من الوقت، الوقت الوحيد الي كانت الفريمات بتقل فيه هي في واحدة من ضربات نوع مُعين من الأعداء ، وبشكل عام المشكلة ديه ممكن تتحل عن طريق تحديث اليوم الأول أو تحديث هيصدر للعبة بعد الإصدار بفترة بسيطة وبكدة أدائها هيكون مثالي.
الخلاصة :
لعبة Mortal Shell هي تجربة رائعة في عالم الألعاب الشبيهة للـ Souls، اللعبة قدرت تقدملك قصة غامضة بأسلوب لعب قوي وعلى الرغم من إنه سريع إلا أن المواجهات نفسها بيكون ليها ثقل وقوة مع كل ضربة سواء منك أو من الأعداء، كل ده مربوط بتصميم رسومي مميز ومتنوع مع موسيقى رائعة ومواجهة زعماء قوية. ولكن على الرغم من تواجد مميزات كويسة جداً إلا إن اللعبة بتفتقر لتوزيع صحيح للأعداء في البيئة مع وجود مجموعة من المشاكل التقنية وفي بعض الأحيان هتلاقي نفسك بتتعرض لضربات من الاعداء بشكل غير منطقي وغير مُبرر وديه مشكلة Hitbox لازم تتحل.
بشكل عام، رؤية إستوديو زي Cold Symmetry مُكون من 15 فرد فقط بيقدم تجربة بالمستوى ده بميزانية بسيطة خلال 3 سنين حاجة تفرحني وتأكدلي إن الإستوديو هيكون له مستقبل ضخم في عالم صناعة الألعاب، وشخصياً أنا متحمس جداً أشوف المشروع القادم للإستوديو في المستقبل.
المميزات :
- قصة غامضة ومثيرة
- أسلوب لعب سريع وثقيل في نفس الوقت
- أساليب لعب مختلفة على حسب إختيارك للـ Shells
- مواجهات زعماء رائعة
- تنوع رهيب في البيئات مع موسيقى محيطة مخيفة
العيوب :
- تمركز غريب للأعداء وغير مُوزع بأسلوب صحيح
- مشكلة التعرض لضربات بشكل غير منطقي
- بعض المشاكل التقنية