أخيراً وصلت لعبة call of duty المنتظرة بشكل كبير، فهل هي مجرد لعبة call of duty تقليدية جداً ؟ ولا لعبة هتديك تجربة، عمرك ما هتنساها ابدا ؟ 

(القصة)

الcampaign من المودات اللي بالنسبة ليا مود جانبي، بلعبه لما يكون النت عندي قاطع مثلا، او عشان اجربه لاول مره وبعد كده خلاص، بس الcampaign في لعبة cold war غيرلي مفاهيمي كلها. قصة اللعبة بتدور أحداثها في التمانينات، في فترة الحرب الباردة طبعا، جو اللعبة فعلا يحطك في الحقبة دي بشكل ممتاز، من style اللبس، او الناس اللي بتشرب سجاير كتير أوي في كل حته، وانا بعشق الالعاب اللي بتهتم بالتفاصيل الصراحة، وcold war اهتمت بيها جامد أوي. من التفاصيل دي أنك نوعاً ما بتصمم شخصيتك، بأنك تديها خواص معينة مميزة، وهي تعتبر نفس نظام الperks كده في الmultiplayer، زي مثلا سرعة الreloading، او أنك تعلى الdamage، كده يعني. وعجبني أوي فكرة أن كل ده مرتبط بالgameplay، وليه تأثير مختلف، بأختلاف خواص شخصيتك. مخضرمين السلسة رجعتلهم شخصيات كلاسيكيه من black ops 1، زي Woods او Mason، بجانب أن الخبر ده حمس ناس كتير، فا هو محبط برده في نفس الوقت، لأن الشخصيات دي، شخصيات ثانوية ملهاش تأثير كبير في القصة، ولا حتى بيظهروا كتير، مجرد مساعدين ليك في بعض المهام. ولكن ده ميمنعش أنك تلعب تاني بMason في بعض الأوقات، شعور يرجعلك زكرايات كتير أوي حلوة. اللي واخد الكدر كله تقريبا طول القصة هو Russell Adler، أسطورة مخضرم في وكالة المخابرات المركزية، اللي بيتم تجنيده للمساعدة في إيقاف Perseus، راجل شرير وغامض، بتميل أفعاله للإسقاط بالحكومة. في الsafe house بتاعك، تقدر تراجع الأدلة، أو تتمشى كده وتتكلم مع زمايلك، عن طريق إختيار حوارات تقولها، الأختيارات بتعتك بتأثر على احداث القصة، وممكن تديك نهايات مختلفة، من النهاية السعيدة المعتادة لو كانت ردودك حلوة، او نهاية سواداوية خلتني أكتأب الصراحة، ولكن أكيد هتلاقي نفسك بتلعب القصة تاني، عشان تشوف باقي النهايات. في بعض المهام بتطلب منك مراجعة بعض الأدلة عشان تحل ألغاز بسيطة قبل ما تبدأ المهمة، اللي بتدي شعور الاندماج في الاحداث بشكل كبير. طبعا من أهم العناصر اللي لازم تكون موجودة في أي جزء call of duty، هو الاكشن، ولكن في cold war من رأي أفضل مهمة في اللعبة، مفيهاش أسلحة أصلا، وهي مهمة تسلسل في مبني حكومي للعدو، تحسها كده مهمة في لعبة Hitman، بأنك مثلا ممكن تقتل أعدائك بطرق مختلفة، وبالطريقة اللي تحبها، بجد من أكتر المهام الحماسية اللي لعبتها في حياتي. وأكيد أغلبكوا أفتكر مهمة شبيها ليها جدا من تلت سنين كده، في لعبة world war 2. بأختصار، قصة cold war فعلا ممتعة.

(اللعب الجماعي)

الmultiplayer هو من أهم العناصر في أي لعبة call of duty، والسبب الوحيد لاستمرارية اللعبة لفترة طويلة قدام، لحد ما طبعا ينزل جزء جديد. وطبعاً الmultiplayer هنا هو المعتاد ومشابه جدا من ناحية المودات السته التقليدية، زي  team death match، domination، search and destroy، وغيرها. ولكن بإضافة مودات كتير مشابه للground war، ماب كبيرة وفيها عدد كبير من اللاعبين، وبتكون غالبا المهمة domination، ولكن انا شخصيا مش بحب المودات دي، لان بيبقا من كتر اللاعبين والتفاصيل في الماب، اللعبة بتكون تقيلة جدا، وده طبعا مع الlag اللي بيعمل ميكس لزيز اوي. في مود تاني برده جديد اسمه Vip escort، وده عبارة عن تيم في حد بيبقا Vip والمهمة بتبقا ان التيم بتاعه لازم يحميه عشان يوصله لمكان معين، وبتكون طبعاً مهمة التيم التاني أنه يقتل الشخص الVip ده، مود الصراحة ممتع بس محتاج يكون معاك صحابك، لانه بيعتمد على ناس تقدر تتواصل معاهم بشكل كويس، فا المود ده ممتع جدا مع صحابك. وطبعاً الاسلحة متقسمة لassault rifles و sub machine guns، وsnipers وهكذا. وبالنسبة للجيم بلاي فا هو طبعاً مشابه، ولكن في تطور في الجرافيكس بشكل كبير جدا، وتوفر خاصية الray tracing اللي ممكن تفعلها او تقفلها براحتك، وطبعاً مع تفعيلك ليها، الframes بتقل. خاصية الgun smith المميزة اللي كانت موجودة في Modern Warfare موجودة برده في cold war، اللي بتخليك تحط إضافات مختلفة على السلاح براحتك، اللي ممكن بيها تغير السلاح كله، ولكن مفيهاش عمق كبير أوي زي Modern Warfare. طبعاً ستوديو Treyarch دايما معروف بإبداعاته في الcamos للأسلحة، وتنوعها الكبير، اللي كنا مفتقدنها جدا في modern warfare، فا بترجعلنا تاني الreactive comos اللي كلنا بنعشقها. من الخواص اللي عجبتني اوي الصراحة ليها علاقة بموضوع سرقة الkills، وأخيرا لاقوا حل للمشكلة دي، لو انت دمجت واحد جامد اوي و واحد تاني جه وقتلوا، فا الkill بتتحسب ليك انت، ولكن اللي من رأي مشكلة برده أنها مش بتخش في الstreak بتاعك، ولكن طبعا أحسن بكتيير من كل شوية واحد يجي يسرق مجهودك كله في ثانية. 

(الزومبي)

مود الزومبي بجد مود كلاسيكي، بيرجعلي زكرايات كتير اوي حلوة، ومن أهم مزايا لعبة call of duty، اللي بتستغله بشكل ناجح جداً. لو أنت شخص متحمس لمود الزومبي وحابب تشوف حجات جديدة، فا للأسف مفيش اي جديد، مود الrounds التقليدي جداً. انت ومجموعة من صحابك بيتم إرسالكم من الحكومة في مكان مليان بالزومبيز، أيوه أخيراً اللعبة ادوها واقعية شوية، بدل ما كنت بتنزل من portal كده غريبة، فا في تواصل بينك وبين العالم الخارجي يعني. في خاصية جديدة عجبتني الصراحة، أنك ممكن بعد كل 10 روندات تطلب حاجة اسمها exfill، وده بيخليك تطلب طيارة عشان تخرجك من المكان، ولكن طبعا هي مش بالسهولة دي، أول ما بتطلب الexfill، الرواند بيوقف، وبعد فترة بيظهرك أعداد مهولة من الزومبيز، وعندك وقت محدد في انك توصل للمكان اللي هتنزل فيه الطيارة، ولازم بطريقة ما أنك تعدي الاعداد دي كلها عشان توصل للطيارة، ولو  إتأخرت عن الوقت المطلوب، الطيارة اللي مستنياك بيضرب عليها من الروس، فا لازم يكون في إحتراف وسرعة. من ضمن الأفكار الجديدة برده، انك ممكن تعمل الloadout الخاص بيك، بدل ما كنت بتجيب الأسلحة من الحيطان، او تفتح صناديق وانت وحظك، الصنادق لسه موجوده بس أنا شخصيا بحب التحدي في أيه اللي ممكن يطلعلي، أنه ممكن يبقا سلاح وحش جدا وابقا مش عارف اعمل حاجة وكده. غير كده فا مود الزومبي هو اللي انت متعود عليه.

(الملخص)

في الختام، لعبة Call of Duty Black Ops Cold War، اسمها طويل اوي، هي لعبة كود تقليدية جداً، مفيش إضافات كتير مع الجزء ده، ولكن طبعاً هنتزل للعبة تحديثات كتير في المستقبل، اللعبة بتقدم تجربة قصة مميزة، ولكن طبعاً لا تقارن بقصص أجزاء Black ops 1 و 2. الMultiplayer هو اللي متعودين عليه من أي جزء call of duty، متتحمسش أوي لمود الزومبي عشان مفهوش جديد.

(نقاط المزايا والعيوب)

المميزات:

+القصة ممتعة وفيها عمق بسيط بيضيف للتجربة.

+رجوع بعض الحاجات المحبوبة، زي مود الزومبي، او الcamos المميزة.

+جرافكيس ممتاز يخليك تحس بقوة الجيل الجديد.

العيوب:

-لعبة تقليدية جداً في السلسلة.

-نقص في المحتوى.

(التقييم)

8.0/10