من وقت الإعلان عن لعبة Redfall وأنا حاسس إن اللعبة وضعها غريب بشكل بيبشر بكارثة وقت الإصدار، على الرغم من إن مخرج اللعبة هو Harvey Smith واحد من أفضل مخرجي الألعاب على الإطلاق. اللعبة نزلت يوم 2 مايو اللي فات وجربناها لمدة كافية وأقدر أقولك إن كل اللي توقعته طلع صح…في الوقت اللي هتنزل في مراجعتنا دي هيكون الكل عرف مستوى اللعبة، وعشان كده أنا مش جي أقولك الكلام المعروف عن اللعبة…أنا جي أديك خلاصة التجربة وتستاهل تحملها ولا لأ ، لإن خلينا صرحاء مع بعض..دي لعبة جيم باس وقليل اللي هيشتريها، فهل تستاهل جيجات التحميل؟
من وقت الإعلان عن redfall وفي حالة من حالات الضبابية من حيث المحتوى اللي اللعبة بتقدمه، ومكنش في توضيح صريح لهل اللعبة دي لعبة خدمية في المقام الأول، بمحتوى مستمر في فترة ما بعد الإصدار زي مثلا destiny ولا لعبة قصة وعالم مفتوح فيها عناصر co-op زي مثلًا saints row اللي نزلت السنة اللي فاتت، أو far cry؟
في كل المقابلات الصحفية مكنش في توضيح بشكل كافي هل اللعبة دي مركزة على القصة بشكل أساسي برضو ولا لأ، لحد آخر شهرين قبل الإصدار تم التركيز أكتر في الدعاية على القصة وبعد ما لعبنا اللعبة حسيت إنها كانت هتكون لعبة خدمية في الأول بس تم التراجع عن القرار ده. أسباب كتير خلتني أحس كده، وخليني أفصصهملك واحدة واحدة بس الأول خليني أطلب منك تعمل لايك وشير وسبسكرايب لو محتوانا عاجبك لإن ده بيساعدنا في الانتشار.
قصة لعبة ردفول بتتكلم عن قرية بنفس اسم اللعبة، بينتشر فيها مصاصي الدماء، وبيسيطروا عليها بشكل مفاجئ، وبيحبجوا إضاءة الشمس بشكل شبه كامل عن القرية، وبيتحول المتبقي من سكان القرية دي لحالة من حالات الاختباء والدفاع عن النفس، ولكن طبعًا بدون نتيجة فعالة في مواجهة الوباء ده.
أنت بتلعب دور واحد من أربع شخصيات، بيكونوا زي فرقة انتحارية كده هدفها كشف ملابسات اللي حصل، ومين وراه، ومواجهة الفامبيرز وكل اللي بيعاونهم من البشر. القصة في بدايتها بتحسسك إن اللعبة فيها شوية رعب، وإن مخلوقات الفامبيرز دول خطر كبير هيوترك طول اللعبة ويخليك على أعصابك. تحضير ممتاز لرحلة مليانة جمدان صح؟ الحقيقة القصة بتبوظ في نصها…هي خلصت معايا في 15 ساعة لعب منهم 7 ساعات مكنتش عارف أنا بعمل إيه…الأحداث كانت مبهمة وممطوطة…لا وفي الآخر بيشوقك لجزء تاني الفاجر…ههههههه
القصة مش بشعة برضو، عشان أكون منصف العيوب لما بتظهر مش بتخرب عليك 100% من عناصر القصة، بس مش بتديك الpay off اللي بتكون متوقعة ومستنيه من نفس مطور لعبة prey اللي بعتبرها من أفضل 10 ألعاب في تاريخ الصناعة. إنت متخيل الصدمة لما دي تكون توقعاتك وده اللي تاخده في النهاية؟
القصة فيها سرد بيئي ممتاز، واتجاه فني جميل بس واضح جدًا إن حصل داونجريد عشان الأداء ميكونش كارثي أكتر كمان من صورته الحالية. اللعبة رسوميًا طالبة إمكانيات أعلى من Deathloop لكن في نفس الوقت شكلها أضعف وأفقر بكتير. السرد البيئي حسسني إن عالم رد فول ده لو كان تم استغلاله صح كان زمانه من أحسن عوالم الألعاب في ألعاب استوديوهات arkane. في وثائق مرمية بتلاقيها بيكون فيها قصص انسانية جميلة ومؤثرة عن حياة الناس قبل الوباء، وأثناء محاولة النجاة منه، وتأثير فقدانهم لأنماط حياتهم الطبيعية بشكل مفاجئ، وقد إيه نفسهم يرجعوا حياتهم زي ما كانت ويرجع حواليهم الناس اللي بيحبوهم واللي فقدوهم بسبب الوباء.
في قصة من القصص كانت بتتكلم عن إن واحد حد بتحبه أتحول لفامبير وعلى الرغم من إنه لسا حي، لكن الشخص اللي قدامها ده مش الشخص اللي حبته…وقد إيه ده مضايقها ومخليها مش واثقة في حد تاني خالص…ثانية واحدة حاسس إني بقرأ مشاكل الناس على تويتر!! إيه المجتمع ده
على العموم السرد البيئي زي ما قولتلك هو أقوى حاجة في القصة، والغريب إنك لما بتلعب مالتي مع الشخصيات ال3 التانين بتلاقيهم بيتكلموا ويتفاعلوا مع بعض وبتعرف عنهم أكتر…ودي حاجة عظيمة من الواضح إن اللعبة نسيت تشجعنا عليها …لإن اللعبة فيها خيار تصميمي كده زي ما يكون بيقولك أوعى تلعبها مع حد خالص…وهو إن الهوست بس اللي بيحتفظ بتقدم الأحداث عنده، والباقي هيعيد المهمات اللي لعبها مع الهوست من الأول.
زي ما تكون اللعبة معاندة نفسها ومش عارفة هي عايزة إيه، ودي جملة هتلاقيني بقولها كتير في المراجعة لإنها أكتر جملة بتلخص حالة redfall بصدق. اللعبة حلوة أوي مع أصحابك، وممتعة أكتر وقدرات الشخصيات بتكمل بعضها لكن كل الظروف مش هتشجعك تلعب مع حد، وهنا بتيجي مشكلة كمان.
الشخصيات على الرغم من إنهم مع بعضهم هتلاقيهم بيتكلموا وليهم شخصية مميزة، ولكن ده مش بينعكس لما بتكون لوحدك خالص، وحتى الcutscenes بتاعة اللعبة عبارة عن صفحات رسوم متحركة شبه الكوميكس. الوقت الوحيد اللي هتشوف الشخصيات فيه بشكل سنيمائي جذاب هو التريلرز بتاعة كل شخصية!! مين أخد القرار ده وهو في كامل قواه العقلية؟
كل شخصية من الأربعة عندها قدرتين بيميزوها، وقدرة تالتة اسمها قدرة الألتميت بتتشحن عن طريق قتل الفامبيرز.
الشخصيات هم
Jacob Boyer
قناص deadeye وقدرته الألتميت هي استدعاء سلاح قناصة خفي الدامدج بتاعه عالي وتقدر تستخدمه عشان تعلم على الأعداء.
القدرة التانية هي التخفي، ودي تقريبًا القدرة الوحيدة اللي بتدعم أسلوب لعب التخفي في لعبة رد فول على الرغم من تقديم الأسلوب ده في ألعابهم اللي فاتت بشكل عظيم.
قدرة الغراب دي القدرة التانية وده بيقدر يعلم لك على الأعداء عشان تتبع حركتهم.
Devinder ‘Dev’ Crousley
قدرته إن بيقدر يرمي سلاح بيطلع موجات كهربائية تقدر تكهرب أعداد كبيرة من الأعداء.
القدرة التانية إنك تقدر ترمي أداة وتسخدمها في الـ TELEPORTATION، تشبه قدرة BLINK من ألعاب ديسهونرد.
قدرة الألتميت بتاعته اسمها blacklight وده سلاح بيخليك تحول الفامبيرز لحجر، ومع ضربة واحدة لكل واحد فيهم بيتكسر ويموت.
كروسلي ده كان أكتر شخصية مفيدة في المواجهات مع عدد ضخم من الاعداء، وأكتر عدو حسيت قدراته مختلفة عن الباقي خصوصًا سلاح البلاك لايت ده.
Remi De La Rosa
○ شخصية فيمنست كده ومعاها آلي قوي بيساعدها في المعارك
○ قدرتها الألتميت هي إنها بتعالج نفسها وحلافئها الموجودين حواليها، ودي واحدة من القدرات المفيدة جدًا في المعارك الصعبة وخصوصًا في الزحمة اللي بتحتاج تهيل فيها بسرعة
○ القدرتين العادين بقى، واحدة بتديك قنابل c4 والتانية إنك تؤمر الآلي اللي معاها يلهي الأعداء عشان تخلص أنت عليهم.
Layla Ellison
أكتر واحدة فرهودة ممكن تشوفها في حياتك…حركتها سريعة وضرباتها مباغتة ولو العركة فيها قلق هتلاقيها بتكلملك صاحبها القديم يجي يخلص…أه والله دي قدرتها الألتميت على فكرة مش أنا اللي بروش…
أما بقى القدرتين التانية، ففي مظلة على شكل درع بتحميك من ضربات الأعداء،
والتانية استدعاء منصة عشان تنط من عليها لأي مكان عالي
شخصيًا أنا لعبت بليلى، وكانت قدراتها بالنسبالي على قد ما هي منطقية على قد ما هي ساعدتني في التنقل في اللعبة وحماية نفسي بشكل فعال ومؤثر في المعارك، كان معايا صديق لعب بشخصية remi وكانت برضو مؤثرة جدًا في اللعب، وأعتقد إن كل شخصية تأثيرها بيكون واضح على اللعبة، ولكن المشكلة زي ما قولت…اللعبة فعلًا مش بتشجع إنك تلعب مع حد.
الشخصيات بعيدًا عن القدرات ملهمش شخصية مميزة أوي في القصة، أو كانت أقل من منا توقعت على الأقل مع إن أركين من الاستوديوهات اللي بتعرف ترسم شخصيات بشكل جذاب جدًا وتخلي أداءتهم الصوتية ليها روح كده وتعلقك بيهم. للأسف هنا مفيش الكلام ده، وأنا الحقيقة كنت اتمنى إن الشخصيات يفضلوا مع بعض حتى لو بوتات AI، لكن إنك تلعب لوحدك خالص دي حاجة بتقتل 50% من متعة اللعبة بالنسبالي.
الجيم بلاي في مهمات قصة، ومهمات جانبية على طريقة ألعاب يوبي سوفت اللي بتطلب منك تجمع حاجات، أو تعمل نشاطات ملهاش معنى تندرج تحت مسمى CHECKLIST ACTIVITIES ودي أكتر حاجة بكرها في ألعاب العالم المفتوح، وللأسف لقيتها هنا.
أنواع الأسلحة في اللعبة هنا مكنش فيها ابتكار لسبب أنا مش فاهمه برضو، هتحس إنك بتلعب call of duty modern warfare مثلًا بأنواع أسلحة تقليدية ممكن تلاقي نفسك اًصلا عارفها كلها، معادا سلاحين واحد فيهم بيضرب أوتاد خشب، والتاني بيطلع أشعة فوق البنفسجية بتحول الفامبيرز لأحجار…واحدة من الحاجات اللي بتميز استوديوهات أركين وألعابهم هي الأسلحة وتصميمها، كل سلاح بيقدموه كان بيبقى مختلف ومميز وله شخصية لوحده. في لعبة prey مثلًا في سلاح مهم أوي اسمه الـglu gun كان مؤثر لدرجة إنه مش بس ممكن تستخدمه في المعارك، لا أنت كمان كان ممكن تمشي بيه نفسك في التنقل وتبدع بيه، وتوصل بفضله لأماكن كان ممكن ماتوصلهاش من غيره، هنا مفيش الكلام ده، وده شيء محزن جدًا بصراحة لأن رد فول كانت فرصة ذهبية لتقديم أسلحة بتشجع عالإبداع بهوية أركين المميزة، لكن الفرصة ضاعت. وهنا أفتكر نقطة تانية كلامي فيها يكون متشابه مع نقطة الأسلحة، وهي تصميم البيئات.
تصميم البيئات هنا flat أوي بمعنى إنه مفيش أي عمق وحاجات تحمسك تفكر وتخطط وكده. المكان الواحد له أكتر من مدخل وبس على كده! فكرة بقى إنك تدور فتلاقي باسكود أو كارت يديك أكسيس لأماكن مكنش المفروض توصل لها، أو سرداب سري في لوت جامد، وأسلحة نادرة…الكلام ده إنساه خالص…أستوديو أركين جاله زهايمر تقريبًا في الحتة دي.
أنواع الأعداء بين البشر والفامبيرز الاختلاف فيها مش كتير، في اختلاف أه بس الذكاء الإصطناعي مخليهم كلهم أغبيا، بدون هوية. كلهم مستنينك تخش معاهم في مواجهات مباشرة وخلاص. فاكر لما قولتلك في الأول اللعبة بتتحسك بتوتر وإنك قدام خطر كبير؟ كان نفسي ده يتم استثماره في طريقة الأعداء. كان نفسي أشوف مثلًا عدو بيستخدم التخفي وبينقض عليك ودايمًا يتتبعك بشكل قريب من mr x أو nemisis بتوع resident evil، أو عدو تاني عنده أدوات مضادة لسلاح الأشعة فوق البنفسجية لإن السلاح ده بيعتبر أداة قوية ملهاش أداة مضادة ليها طول اللعبة…لكن للأسف الأعداء هنا مش متنوعين، سلوكهم كله واحد، وده بيخليك مش متشجع تجرب شخصيات جديدة، وخصوصًا وإن اللعبة بعد ما بتخلص مش بتديك خيار إنك تكمل المهمات الجانبية، لا لازم تلعب من الأول..وفي كذا حاجة بتوضح إن اللعبة هدفها إن اللي هيلعبها يلعبها مرة بكل شخصية عشان ياخد التجربة كاملة، فإزاي هلعب مرة بكل شخصية وأنا مش حاسس بفروق لا في تصميم البيئات ولا في الأعداء اللي بواجههم؟ اللي هيلعب اللعبة أكتر من مرة 90% من تجربته هتكون هي هي، وبالتالي اللعبة لا تصلح لكده…على الأقل بمحتواها الحالي.
رد فول كمان فيها نظام اقتصادي غريب بيخليك تجمع أسلحة وموارد وتفككها عشان تاخد موارد أكتر، لكن مفيش حاجات مهمة تشتريها بالموارد دي، وغير كده ماتقدرش تطورها إلا إذا كنت شاريها، لكن أي سلاح هتلاقيه مش هينفع تطوره. الأسلحة متصنفة بلفلات وألوان على حسب ندرتها لكن النظام ده مش مؤثر ومش هتلاقي نفسك مهتم بيه غير في أول كام ساعة بس…حلاوة البدايات بقى يا صديقي، بعد كده هترميه في الزبالة وبيني وبينك ده لمصحلة اللعبة عشان هي كده أمتع كتير.
الجرافيكس في اللعبة ضعيف، ومش هتلاقي تفاصيل كتير في البيئات، بس للأمانة اللعبة شكلها مش وحش زي ما في ناس بتحاول تصور، اللعبة حلوة فنيًا جدًا وتصميم البيئات مليان تفاصيل لو ركزت، لكن على الجانب الآخر الأداء مش حلو حتى على كارت RTX 3080TI وده المفروض كارت من الفئة العليا. اللعبة في تساقط إطارات بتوصلها تحت ال30 فريم، وفيها حالات pop in كتير بشكل مزعج للعين، بس مصادفتش معاها كراش غير مرة واحدة. المشكلة إن اللعبة always online حتى لو أنت بتلعب لوحدك وده طبعًا مع نت مصر مش مساعد أوي…خلي بالك عشان ممكن تضيع على نفسك تقدمك لو نتك وحش.
اللعبة فيها موسيقى من تلحين Jongnic Bontemps هتحس إنك قدام فيلم عظيم وملحمي، الموسيقى هي الحاجة الوحيدة اللي مفيهاش عيب في اللعبة دي ومش بعيد تفضل تسمعها زيي بعد ما تخلص اللعبة، والمؤثرات الصوتية كمان كانت كويسة ومتقنة إلى حد كبير فيما عدا بعض الجليتشات اللي قابلتها أثناء اللعب واللي كانت بتخلي الشخصيات صوتها يتأخر أو يختفي خالص
الحقيقة لعبة REDFALL حيرتني، في حاجة اسمها الMOMENT to moment gameplay وده اللي هو الجيمبلاي اللحظي بعيدًا عن الصورة الكبيرة للي بتعمله في اللعبة. ده كان ممتع في رد فول خصوصًا لو بتلعب مع حد…الشوتينج كويس، القدرات ممتعة واستخدامها مع بعض في مجموعة مكونة من 4 لاعبين هي أفضل ما في اللعبة، والاستكشاف اللي بيكافئك بلحظات قصصية مميزة، وتفاصيل تخليك حاسس إن العالم واقعي وحي هي أحلى حاجة عملها المطور هنا، وبما إنها لعبة جيم باس، أقدر أقولك تحملها بس تخفض توقاعتك ليها، وتحاول ماتقرنهاش خالص بألعاب الاستوديو السابقة. اللعبة فيها تكرار زي فار كراي فلو أنت مش ممانع، ساعتها بس اللعبة ممكن تعجبك، لكن لو كنت مستني لعبة ماستربيس من أركين، فبنصحك ترجع تلعب prey وخلاص.
لعبة redfall فيها ترجمة عربية كاملة للنصوص والقوايم، والترجمة متقنة وهتساعدك كتير لو أنت بتواجه صعوبة في اللعب بالإنجليزي. لعبة ممتعة بس فيها عيوب كتير
الشخصيات هم
