في نوع كدة من الالعاب بتبقي قريبة شوية من الالعاب الاستراتيجية لكنها بتركز اكتر علي الادارة, النوع ده من الألعاب مفتقدينه جدًا من زمان زي ألعاب The Sims مثلًا أو Football Manager و اللي مشوفناش حاجة شبههم بقالنا فترة. الألعاب ديه بتختبر قدرتك علي تنظيم مواردك و انك تكون متابع كويس لكل حاجة بتحصل في اللعبة و بتبقي إدمانية بشكل ميتوصفش.
علي قد كمية الساعات الكبيرة اللي بتديها للنوع ده من الألعاب علي أد ما بتتطور فيها و اللعبة الناجحة من التصنيف ده هي اللي تبقي عندها محتوى كافي انه يخليك متزهقش و متوصلش لنهايتها أو انها تقدملك عناصر كتير و كل واحد يشكلها براحته.
اسف عالمقدمة الطويلة و تعالي بقي ندخل في مراجعة انهاردة و اللي هتكون عن لعبة Park Beyond. لعبة إدارة الملاهي اللي هتديك فرصة تصمم مدينة الملاهي اللي بتحلم بيها و تبني لعبة قطر الموت و تجربه بنفسك..
طور الـ Campaign
بما أن اللعبة مفهاش قصة و أهم حاجة فيها الجيمبلاي فتعالى نشوف بتقدم ايه في الجانب ده. اللعبة فيها طورين لعب. الطور الأول و هو طور القصة أو الـ Campaign, زي ما قولتلك اللعبة مفيهاش قصة لكن من خلال الطور ده اللعبة بتاخدك في رحلة بناء الملاهي و بتشرحلك أساسيات اللعبة.
الطور ده مناسب جدًا لو انت حابب تتعرف علي كل حاجة في اللعبة بشكل تدريجي و تستمتع بالحوارات اللي هتعملها مع الشخصيات الكرتونية. يمكن ديه أكتر حاجة مميزة في الطور ده و هي فكرة الحوارات مع الشخصيات ديه و اللي هم بيساعدوك تفهم كل حاجة في اللعبة.
غير انهم بيحطولك objective و انت بتحاول تنجزه بالطريقة اللي انت عايزها, كمان أثناء الحوارات ديه بيخيروك بين أكتر من Objective زي مثلًا لو في بحيرة و عايز تعدي قطر الموت للناحية التانية من البحيرة ديه فهنا اللعبة هتخيرك, تلف حوالين البحيرة ولا تحط Cannon يحدف القطر و يستقبله من الناحية التانية.
غير كدة الطور ده مكانش عنده كتير يقدمه و كمان الحوارات اللي بتعملها مع الشخصيات مملة و أحيانًا بتطول حبتين. لكن مش ده أساس اللعبة لأننا عندنا طور تاني ضخم و هو ده اللي اللعبة بتجهزك في طور Campaign عشانه.
طور الـ Sand Box
نخش بقى علي طور الـ Sand Box. زي ما باين من أسمه كدة ده الطور اللي اللعبة هتسلمك فيه العجينة اللي هتشكلها علي مزاجك. و أول حاجة بتعملها في الطور ده هي انك بتختار البيئة اللي هتبني فيها مدينة الملاهي بتعتك. اللعبة بتقدم أكتر من 20 بيئة مختلفين تمامًا عن بعض. زي الصحرا أو الغابة أو المدينة و غيرها من البيئات اللي بتقدمهالك اللعبة
السؤال بقي, هل البيئات ديه مجرد شكليات بس كدة و ملهاش أي تأثير علي أسلوب لعبك, أحب أقولك لأ. Limbic Entertainment الاستوديو اللي طور اللعبة عرف ازاي يستغل ميزة زي ديه عشان يخلي كل بيئة تقدم تجربة مختلفة حتى لو اختلاف بسيط.
و ده لأن بيئات اللعبة بتختلف من حيث التضاريس و اللي كمان بدورها متنوعة بين الجبال العالية جدًا أو التلال الصغيرة أو حتى الحفر العميقة. كمان بتختلف من حيث شكل الطريق و المساحة اللي بتبدأ فيها. بس مننكرش برضو أن الهدف الأساسي منها هو الشكل و التنويع في اللي هتشوفه عين اللاعب طول الوقت.
احنا بنتكلم عن لعبة بناء وأهم حاجة فيها هي الحاجات اللي تقدر تبنيها في اللعبة. عشان كدة Park Beyond حاولت تقدم تنوع كبير جدًا في الأدوات المتاحة ليك و بنسبة كبيرة نجحت في ده.
اللعبة بتقدملك قائمة كبيرة من المباني اللي تقدر تبنيها زي محلات الأيسكريم و الاستراحات و اللي كل واحدة فيهم ليها موضوع لوحدها. زي ان المحلات تقدر تتحكم في تصميمها و ألوانها, كمان تقدر تتحكم في طريقة العمل هل يشتغلو بسرعة عادية ولا بسرعة كبيرة و طبعًا كل ما زادت السرعة قلت جودة المنتج.
ده غير انك هتتحكم أسعار المنتجات و هتعرف إذا كان سعرك مناسب ولا لأ من ردة فعل الزوار و هل المحل بيجيب مكاسب ولا لأ. كمان بالنسبة للألعاب اللي هتقدمها الملاهي فديه ماشية بنفس نظام المتاجر لكن مع شوية حاجات زيادة. الألعاب ديه بما أن بيركبها ناس فأهم حاجة فيها الأمان, عشان كدة لازم يتعملها اختبار تشغيل و صيانة كل فترة.
انت حرفيًا بتدير كل حاجة في الملاهي, من أول الأسعار زي ما قولتلك و كمان انك تهتم بصيانة الألعاب. ممكن و انت قاعد كدة تلاقي لعبة من الألعاب بتولع قدامك أو ان السير اللي بيمشي عليه قطر الموت يتكسر. و هنا انت لازم تلحق الموقف بدري و تروح توقف تشغيل اللعبة اللي باظت و تعملها صيانة.
من أكتر الحاجات الممتعة في النوع ده من الألعاب هي الإدارة الواقعية اللي بتركز علي الجانب الاقتصادي. زي مثلًا ما في لعبة The Sims بتحاول توفر فلوس عشان تلاقي تأكل عيلتك, ففي Park Beyond لازم تدير مواردك كويس جدًا, لأن لو الملاهي بتاعتك فاشلة فانت ممكن متلاقيش حتى حق الصيانة.
حاجة ممتعة جدًا انك تبقي متابع أرباح كل لعبة و رأي الزوا فيها. كمان اللعبة بتقدملك تقرير كامل مستمر عن أرباح و خسائر الملاهي. و ده دعم جدًا فكرة انك تجرب في اللعبة طول الوقت. انت ممكن في أي وقت تزود الأسعار أو تقللها أو تبني لعب جديدة و تدمر القديمة. أو حتى تغير كل حاجة في الملاهي لو الميزانية تسمح.
للأسف كنت اتمنى اشوف محتوى أكبر للمباني اللي موجودة و اللي غير انها كانت متشابهة شوية يعني تقريبًا أغلب المباني شبه بعض, كمان الألعاب المتاحة قليلة حبتين و مفهاش أفكار عبقرية و مختلفة زي الي اتقدمت في قطر الموت مثلًأ
ده بقى هو أجمد حاجة في اللعبة. انا بتكلم عن قطر الموت و ميكانيكياته العظيمة اللي بتقدمها Park Beyond. هتلاقي فين لعبة تخليك تبني قطر الموت بالشكل الواقعي ده. زي فكرة الـ Momentum أو الزخم و اللي تعتبر ميكانيكية أساسية في الجزئية ديه. و اللي بتعتمد علي فكرة انك لازم تبني سير يحافظ علي سرعة القطر.
اللعبة بتديك حرية اختيار المسار و شكل المسار كمان. تقدر تعمل مطلع عالي جدًا و تخليه ينزل مرة واحدة عشان تموتهم من الرعب. أو تعدي المسار ده من جوا نفق في الأرض مثلًا. كمان تقدر تخليه يدور 360 درجة أفقي و كمان رأسي يعني تخلي القطر يمشي بالمقلوب.
كل الأفكار ديه بتفرق جدًا لأن كل ما حافظت علي سرعة القطر لفترة أطول و خليت فيه تعرجات كتير بتزود فرصة ان الزوار يركبوه اكتر من مرة و بالتالي أرباح اكتر. كمان في Bar للإندهاش, و ده لما انت بتقدم ملاهي رهيبة لدرجة الإدهاش الـ Bar ده بيتملي.
تأثير الإندهاش أو الImpossification زي ما اللعبة بتسميه حرفيًا بيخلي أي حاجة تدهشك انت شخصيًا. طبق تأثير الاندهاش على المرجيحة و هتلاقيها بتطلع نار. طبقه على قطر الموت و تقدر تخليه يخالف قوانين الجاذبية كمان لو طبقت تأثير الادهاش على عمال النظافة هتخليهم يشيلو قاذف لهب بدل المكنسة. و هكذا كل ما بتطبق تأثير الاندهاش على أي حاجة في اللعبة هتلاقي حاجة بتدهشك فعلًا.
عشان كدة تجربة Park Beyond واحدة من التجارب المميزة في عالم ألعاب البناء و الإدارة. لأنها نجحت في التنويع بشكل كبير جدًا و كل ما بتقضي ساعات أكتر اللعبة بتقدملك مكافئات تخليك تقضي ساعات أكتر عشان تحول مدينة الملاهي العادية بمدينة ملاهي Impossified أو بمعني تاني مدينة ملاهي خيالية و مدهشة.
الجرافيك و الأداء التقني
Park Beyond ليها اتجاه فني كرتوني كدة مميز جدا. لكن الأكتر تميز هو الأنميشن بتاع كل حاجة. كل حاجة هتبنيها أو هتطبق عليها تأثير الاندهاش هتوريك أنميشن ممتع جدًا. كفاية انك تبص من بعيد على الملاهي و تتفرج علي الأضواء و الألوان اللي معمولة بشكل حلو جدًا. و عن نفسي مش طالب جرافيك و انميشن أفضل من كدة.
أما بقي بالنسبة للاداء التقني فاللعبة قدمت تجربة ثابتة من ناحية الفريمات أغلب الوقت على أجهزة مش أقوى حاجة. يمكن عيبها الوحيد هي كاميرا اللي كان ساعات و انت بتحركها بسرعة بيحصل دروب مفاجئ, و ساعات بيحصل جليتش ان الكاميرا تخش في الجبل مثلًا. لكن علي مدار ساعات لعب طويلة الموضوع متكررش كتير و مأثرش على التجربة.
