انتشر الفترة اللي فاتت الإعتماد على تقنيات الـ Blockchain سواء في المعاملات المادية زي العملات الرقمية وده اداها شعبية كبيرة وخلانا نشوف تطبيقات تانية معتمدة على نفس التقنية أشهرهم الـ NFT واللي بقت مركز إهتمام الكثير من شركات الألعاب زي EA و Square-Enix، وبدأنا نشوف تطبيقات فعلية زي منصة Ubisoft quartz. فيعني ايه NFT بالضبط وليه هتكون سبب في تدمير صناعة الألعاب بالصورة اللي نعرفها دلوقتي.
يعني ايه NFT
مصطلح NFT يعني non-fungible token او الوثيقة الغير قابلة للتغيير، ومع ان لسه المصطلح لسه معقد برضوا لكن نقدر نبسطة بمثال بسيط: لو افترضنا انك معاك 10دولار و جه حد تاني خدهم واداك بدالهم 10 دولار تانين ده كده معناه انها قيمة قابلة للتبديل لانك اه مبقاش معاك نفس ال10 دولار اللي في الأول،
ولكن الإتنين بيحملوا نفس القيمة المادية، وعلى العكس تماماً لو فكرنا في لوحة فنية زي الموناليزا فهي واحدة بس في العالم كله ومتقدرش تبدلها بواحدة تانية حتي لو حصل في يوم من الأيام و تم تدميرها فده معناه انها ضاعت للأبد.
ليه الـ NFT خدت الشهرة ده كلها
لإن زي ما وضحنا فهي تقنية بتحاول تدي قيمة مادية للأعمال الرقمية سواء رسومات أو مقاطع موسيقية أو حتى سلاح في لعبة، وده اللي مخلي عيون الشركات كلها تروح عليها وده بسبب بسيط جداً، ليه تبيع سلاح في لعبة ب 10 سنت وانت بقي بإمكانك تحطه في مزاد ويتباع بمئات الدولارات لمجرد انك خدت ضمان ان مفيش حد تاني في العالم معاه نفس السلاح اللي معاك.
على الرغم من أنه يبان انها تقنية مفيدة إلا أنها تحمل مشاكل كثيرة خصوصاً فيما يتعلق بالبيئة، وده لإنها معتمدة على تقنية الـ BlockChain زي الـ Bitcoin بس المختلف أن عدد الـ Bitcoins محدود في العالم بينما الـ NFT لأ، وكمان انتاج NFT واحد ممكن ياخد كهرباء تكفي بيت شهر كامل، وده اللي مخلي العملية مكلفة جداً على موارد الجهاز اللي بتتعمل عليه و كمان على البيئة
الـ NFT وصناعة الألعاب
في 2017 ظهرت لعبة اسمها Crypto Kitties وفكرتها انك بتشتري NFT علي هيئة قطة وتقدر تدمجها مع قطط تانية من مستخدمين تانيين وتطلع قطة جديدة تقدر تبيعها كـ NFT، وبالرغم من فكرة اللعبة الغبية ولكنها قدرت تحقق نجاح كبير لدرجة ان فى قطه اتباعت بأكثر من مليون دولار،
وبعدها ظهرت لعبة تانية بإسم axie infinity وهي لعبة RPG بنظام شبيه بألعاب Pokemon حيث انك بتشتري وحش و تمرنه وتلعب بيه ولكن الوحش الى معاك ده عبارة عن NFT تقدر تبيعة لمستخدمين تانين، واللعبة حققت نجاح كبير لدرجة ان قيمتها السوقية تتعدي الـ 3 مليار دولار دلوقتي.
وده كله من إستديوهات اندي فطبيعي الموضوع كان مسألة وقت قبل ما الشركات الكبيرة تدخل في المجال، وده اللي شفناه مع Ubisoft لما أعلنوا عن منصتهم Ubisoft quartz واللي تقدر تشتري منها Outfits وأسلحة تستخدمهم في ألعاب Ubisoft المختلفة ولكن لسه في مرحلة البيتا لعبة Ghost Recon Breakpoint بس اللي مدعومة مع دعم لبقية العابهم في المستقبل.
إقرأ ايضاً:
فالف تأمل بكسر حاجز المليون نسخه في أول إطلاق للـ Steam Deck
NFT عقبة جديدة للمطورين في الصناعة
أمل شركات الألعاب دلوقتي أنهم يلحقوا التريند قبل ما يخلص و يحاولوا من خلاله أنهم يتمصوا أموال اللاعبين على قد ما يقدروا تحت شعارات وآمال واهية،
زي أنهم يروجون لفكرة انك تشتري سلاح واحد وتستعمله في كل الألعاب اللي انت عايزها، فعلي الرغم من صعوبة تنفيذ الفكرة عملياً لإنها هتتطلب تغيير جذري في طريقة عمل محركات الألعاب بشكل عام، ولكن لو افترضنا جدلاً انها نفعت فساعتها هنكون قدام مشكلة تانية وهي توازن السلاح في كل لعبة،
فلو افترضنا أنك اشتريت سلاح من لعبة Borderlands 3 بيقدر يحقق DMG بقدرة 1500 ونقلته للعبة Call of Duty Warzone اللي أغلب الأسلحة اللي فيها بتحقق متوسط DMG حوالي 50 فانت كده بقي معاك سلاح OverKill بالنسبة للعبة و مش هتبقي ممتعة، والعكس صحيح فسلاح من Call of Duty مينفعش في لعبة زي Returnal.
لكن لو الناشرين أصروا على الفكرة فواحدة واحدة هنلاقي كل الألعاب بقت شبه بعض واي طريقة للتنوع هتتقتل في سبيل تحقيق مطالب الناشرين الجشعة لحد ما نوصل لمرحلة هنلاقي الصناعة تدمرت بالكامل.
الخلاصة
على الرغم من أن الـ NFT تقنية هدفها نبيل إلا أنها لو استعملت بطريقة غلط هتكون سبب في هلاك الصناعة، ولكن لحسن الحظ فلسة في شركات كبيرة زي Valve اللي منعت أي لعبة في متجرها Steam من أنها تستخدم الـ NFT، وكمان أعلن phil spencer أنه ضد فكرة إستخدام الـ NFT في الألعاب وأن مايكروسوفت مش هتستخدمه في أي من ألعابها
