سلسلة لعبة NBA 2K تعتبر واحدة من أشهر ألعاب الرياضة اللي بتتحدث سنويًا، يعني زي ما بتشوف إصدارات جديدة لألعاب كرة القدم أو المصارعة، فكل سنة في إصدار جديد لـNBA 2K، وده بقى حاجة أساسية لعشاق السلسلة كأنها عادة كشرب الميه كدا؛ ومع كل سنة، اللاعبين دايمًا مستنيين يشوفوا التحسينات اللي هتضيفها اللعبة سواء على مستوى الجرافيكس أو التحكم السلس وأطوار اللعب اللي بتتحسن أو بيضتف عليها جديد. بس هل يا ترى إصدار  NBA 2K25 ضاف جديد زي ما اتعودنا كل سنة؟ وهل اللعبة قدرت تستفاد من الجيل الجديد وقدراته، ولا الموضوع مجرد تجديد شكلي؟

أطوار اللعب

من أكتر الحاجات اللي بتميز لعبة NBA 2K هي الأطوار المختلفة اللي بتوفرها للاعبين، واللي كل سنة بتحاول تقدم تجارب جديدة أو تحسين التجارب القديمة. في NBA 2K25، هنتكلم عن مجموعة الأطوار اللي موجودة، وهل فعلًا قدمت تجربة مختلفة السنة دي ولا لأ؟

MyCareer

ده من أشهر الأطوار اللي الناس بتحب تلعبها. في الطور ده، بتقدر تبني لاعبك الخاص من الصفر، وتبدأ رحلتك في عالم الـNBA، يعني من أول الأندية الضعيفة لحد ما توصل لنجومية الدوري الأمريكي للمحترفين. السنة دي، اللعبة جابت أفكار جديدة، زي إنك تقدر تختار أسلوب اللعب بتاعك اللي مستوحى من لاعبين حقيقيين في الدوري. يعني لو اللعبة هتديك الفرصة تبني اللاعب بتاعك بناءً على قدرات النجوم كرة السلة الحقيقين. وفيه ميزة تانية في MyCareer السنة دي، وهي المدينة المفتوحة اللي تقدر تتحرك فيها وتستكشفها. مش بس إنك بتلعب ماتشات، لا كمان بتقدر تتفاعل مع لاعبين تانيين وتعمل مهام مختلفة جوه المدينة. ده بيدي إحساس إنك مش مجرد لاعب في لعبة، بل كأنك عايش في مدينة حقيقية مليانة حياة وتفاصيل، وده بيزود من تجربة اللاعب. لكن على الرغم من كده، الطور في شئ قاتل وهو إن اللعبة بتركز أكتر على إنك تدفع فلوس عشان تطور اللاعب بتاعك بسرعة. يعني لو مش عايز تضيع وقت طويل في تطوير المهارات، هتلاقي نفسك بتضطر تدفع فلوس حقيقية عشان تحسن مستوى لاعبك؛ وده ممكن يكون مزعج لبعض اللاعبين اللي بيحبوا يطوروا كل حاجة بنفسهم من غير مصاريف إضافية.

MyTeam

لو إنت من محبي تجميع الكروت وبناء الفرق، فـMyTeam هو الطور المناسب ليك. في الطور ده، بتقدر تجمع بطاقات لاعبين حقيقيين وتبني فريق الأحلام بتاعك. يعني بتجمع البطاقات من لاعبين أساطير أو حتى اللاعبين الحاليين في الـNBA، وبتقدر تدخل بيهم في مباريات وتحديات مختلفة. السنة دي، فيه نظام مكافآت جديد ومزادات للبطاقات عشان تقدر تبدل اللي معاك وتكمل فريقك. لكن برضو، مفيش تغييرات كبيرة في الطور ده عن السنين اللي فاتت. يعني هو تقريبًا نفس الفكرة مع شوية تحسينات في الرسومات والمكافآت. يعني لو إنت متعود على MyTeam، مش هتحس إن فيه جديد قوي يغير التجربة اللي إنت عارفها.

The W

الطور ده مخصص لدوري السيدات الأمريكي (WNBA)، واللي بقى ليه دور كبير في اللعبة. في The W، بتقدر تلعب بلاعبات محترفات من دوري السيدات، وتبني مسيرتك كلاعبة في الدوري. الطور ده بيجمع بين السرد الممتع والمباريات الحماسية، وبيقدم تجربة مختلفة عن باقي الأطوار. اللعبة هنا مركزة بشكل كويس على إظهار تفاصيل الدوري ده بطريقة ممتازة، واللي بتخلي اللاعبات يقدروا يحسوا إنهم جزء من القصة.

MyGM

ده بقى الطور اللي بيشبه ألعاب الـRPG، لكن بدل ما تتحكم في لاعب، إنت بتتحكم في مدير الفريق. بتختار فريق معين وبتتحكم في كل حاجة من أول التعاقدات والانتقالات لحد تدريب الفريق واتخاذ القرارات الإدارية. السنة دي، تم تحسين MyGM شوية، بقت تقدر تختار الخلفية الإدارية بتاعتك والفريق اللي إنت شايف إنك هتقدر تحقق معاه نجاحات. لكن، برضو، زي MyTeam، مفيش تغيير كبير هنا. في بعض التحسينات الطفيفة، زي التفاعل مع وسائل الإعلام واللاعبين، لكن في النهاية، لو إنت لعبت MyGM في الإصدارات القديمة، مش هتحس إن فيه تغيير جوهري.

Play Now

ده الطور اللي بيوفر لك تجربة سريعة ولعبة فورية من غير تعقيدات. بتقدر تلعب ماتش سريع مع فرق الـNBA أو الـWNBA سواء كانت فرق حالية أو فرق تاريخية. الطور ده مناسب لو إنت عايز تلعب ماتش سريع من غير ما تدخل في تفاصيل بناء فريق أو تطوير لاعبين.

The City

المدينة المفتوحة دي من الإضافات المهمة في NBA 2K، واللي بتحسسك إنك مش بس بتلعب ماتشات، لكن كأنك في مدينة حقيقية مليانة تفاصيل وأنشطة. اللعبة هنا بتقدم تجربة مفتوحة، تقدر تتحرك فيها وتلعب مع لاعبين تانيين، أو تشارك في فعاليات وتحديات. السنة دي، المدينة بقت أنيقة أكتر، يعني التصميم بقى أحسن وأماكن اللعب بقت أكتر واقعية. وده بيخلي التجربة ممتعة أكتر لمحبي السلسلة، لأنك بتحس إنك مش بس بتلعب، لكن بتستكشف عالم كبير مليان حاجات تعملها.

Learn 2K

ده الطور اللي هيساعد اللاعبين الجداد يتعلموا اللعبة بسرعة. لو إنت لسه جديد على NBA 2K، الطور ده هيشرح لك كل حاجة، من التحكمات لحد أساسيات اللعب، عشان تكون جاهز تدخل في المباريات الكبيرة.

عمومًا، اللعبة قدمت أطوار كتير، وكل واحد منهم ليه تجربته الخاصة. لكن لسه فيه مشاكل زي التركيز على الدفع والاتصال بالإنترنت في أطوار معينة، ودي حاجات هتزعج بعض اللاعبين.

الجيم بلاي

التحسينات اللي اتعملت في أسلوب اللعب السنة دي واضحة جدًا، وخصوصًا بفضل نظام ProPLAY الجديد. ده النظام اللي بيحاكي حركات اللاعبين في الحقيقة بطريقة أدق، يعني لو إنت بتتحكم في لاعب بيحب المراوغة أو لاعب تسديداته قوية، هتحس بفرق في طريقة تحكمك بيه. اللعبة بقت أكتر واقعية، وده واضح في كل حركة بتعملها، سواء كنت بتمرر الكرة أو بتسدد.

نظام التسديد كمان تم تحسينه، بقى أكتر دقة وبيوفر تجربة سلسة جدًا. تقدر تتحكم في توقيت التسديدة بناءً على قدرتك الشخصية أو تستعين بالإحصائيات اللي بتقدمها اللعبة لكل لاعب.

الميزة الحلوة كمان هي إنك تقدر تلغي التسديدة لو حسيت إن التوقيت مش مناسب، وده بيدي اللاعبين مرونة أكتر في التحرك واتخاذ القرارات بسرعة.

الرسوميات

NBA 2K25 قدمت تحسينات ضخمة في الرسوميات. ملامح اللاعبين بقت أدق بكتير، وكل حاجة من تفاصيل الوشوش لحد الشعر بقت واضحة جدًا. التحسينات اللي اتعملت في نظام الحركة والأنيميشن بتخلي كل حاجة طبيعية أكتر، يعني هتحس إنك بتلعب بممثلين حقيقيين مش شخصيات كرتونية. كل حاجة من التسديدات لحد الدفاع بقت سلسة وأقرب للواقع.

التقييم النهائي

7.5/10

لعبة NBA 2K25 قدمت تحسينات مهمة في الرسوميات وأسلوب اللعب، لكن لسه فيها بعض المشاكل اللي بتزعج اللاعبين، زي التركيز على الدفع عشان تقدر تطور لاعبينك بسرعة، أو إنك لازم تكون متصل بالإنترنت عشان تلعب في بعض الأطوار. لكن في النهاية، اللعبة بتظل واحدة من أفضل ألعاب الرياضة الموجودة في السوق، وبتقدم تجربة ممتعة لمحبي كرة السلة سواء كنت بتحب الأطوار الفردية أو اللعب الجماعي.