اهلا بيك في مراجعة الذكريات والحنين للماضي، مراجعة لعبة Mortal Kombat 1، و اللي نزلت في سنة مش سهلة إطلاقًا لأنها بتتنافس مع محبوبة الجماهير وعملاقة الـ Fighting Games لعبة Street Fighter اللي نزلت جزئها السادس من كام شهر. أكيد بعد انتظار 4 سنين و نص بتسأل، اتكافئنا علي الانتظار ده؟ إجابة سريعة: طبعًأ، تعالى اقولك ليه.
Mortal Kombat 1 هي الجزء الـ 12 في السلسلة واللي بيطورها ستوديو NetherRealm بيمشي فيه على خطى الجزء ال11 اللي نزل في 2019 و قدملنا عالم و قصة مختلفين و بمفاهيم مختلفة. و بيطمح الاستوديو ده انه يقدم لعبة Mortal Kombat جديدة بشكل المفروض انه يلائم الجيل الجديد و يقدم تجربة تقدر تنافس ستريت فايتر اللي نزلت و كمان takken اللي هتنزل. والمنافسة في تصنيف الالعاب القتالية شكلها مش سهلة بصراحة.
قصة اللعبة
من ضمن الـ Game Mods اللي بتقدمها Mortal Kombat 1 و اللي اتميزت بيها من الأجزاء اللي فاتت هو طور القصة. الطور اللي بتحكي فيه اللعبة قصة كل الشخصيات اللي موجودة في اللعبة بكل سيينمائي وطبعًا مع اضافة شوية Fights في نص الأحداث.
أولًا رقم 1 في اسم اللعبة ده لأن اللعبة بتحصل في خط زمني موازي معظم الشخصيات فيه لسة شباب وبعضهم لسة محصلش على قدرته القتالية. كمان العالم ده يعتبر بداية جديدة، لأن في العرض اللي قبل القصة بتعرف ان Liu Kang انهى العالم القديم وصنع عالم جديد (ده طبعًا في عالم اللعبة و كله خيال في خيال) بقوانين جديدة عشان يحافظ على السلام بين العوالم، عشان كدة اتسمت Mortal Kombat 1.
قصة الجزء ده بتحكي قصة خط زمني موازي لعوالم Mortal Kombat اللي احنا عارفينها. عالم بيكون فيه Raiden قبل ما يستحوز على قدرته على القتال بالكهربا مجرد مزارع بسيط و معاه اخوه كونغ لاو. الأخين اللي لسة في مرحلة شبابهم دول كانو بيقضو وقت فراغهم في تعلم الفنون القتالية علي ايد Bo العجوزة اللي بتديهم من خبرتها.
بتبدأ أحداث الجزء ده بمعركة بتحصل في المطعم بين الأخين و بين أخطر الـ Fighters اللي كلنا أكيد عارفينهم. صب-زيرو و اخوه سكوربيون و معاهم سموك. و اللي اختبرو الأخين بنفسهم في معركة خطرة جدًا عشان يضموهم للـ Earthrealm Champions. كل دول كانو تحت قيادة ليو كانج المعروف باستخدامه للنار في قتالاته.
ليو كانج بعد ما تنازل عن حماية الـ Hour Glass و بقي المسئول عن حماية العالم بتاعه اللي اسمه الـ Earthrealm. على الجانب الآخر موجود الـ Outworld و ده عالم موازي للـ Earthrealm. كمعاهدة سلام بين العالمين و عشان ميحصلش بينهم حرب، بتُقام بطولة كل فترة بيقاتل فيها الـ Earthrealm Champion اللي بيختاره ليو كانج اقوى مقاتلين الـ Outworld، كمحاولة يعني انهم يحولو الحروب اللي مابينهم لبطولة بيمثل فيها كل بطل شرف و أسم العالم بتاعه.
بصراحة انا بعتبر ديه واحدة من أفضل القصص اللي اتقدمت في النوع ده من الألعاب ده لو مش هي الأفضل. لأن القصة مبتوقفش عن مجرد بطولة بتشارك فيها و بتحاول تفوز بيها و خلاص. لأن مع نهاية أول فصلين بتكتشف ان في مؤامرة بتحصل عشان توقع بين العالمين. مين أطراف المؤامرة ديه؟ و ايه الفايدة اللي بتعود عليهم لو الحرب قامت بين العوالم؟ ده اللي هتعرفه من أحداث اللعبة لأني مش عايز احرق عليك.
عرض القصة زي ما قولتلك بيبقي عبارة عن مشاهد سينيمائية أغلب الوقت و بتمتد لـ 5 او 6 ساعات لعب. القصة مليانة بالتويستات والتغيير في الاحداث بشكل متكرر. و بنفس الطريقة اللي اتقدمت بيها القصة في الجزء اللي نزل في 2019، فطور القصة تقدر تشبهه بفيلم بيعرفك احداث العالم و الشخصيات اللي هتلعب بيها في اطوار اللعب التانية.
لو انت ملعبتش الجزء اللي فات أو ده أول جزء ليك في السلسلة، فأكيد بتسأل نفسك هو انا هقعد 5 ساعات بتفرج بس؟ الاجابة لا طبعًا لأن أي معركة بتحصل بين الشخصيات طول احداث القصة انت اللي بتقوم بيها، زي المعركة اللي في بداية القصة بين رايدن و صب-زيرو مثلًا و اللي بعد ما بتوريك مشهد سينيمائي حماسي جدًا، بتيجي في لحظة و اللعبة بتديك التحكم و بتنزل معركة ضد صب-زيرو و لازم تكسبه عشان القصة تستمر.
محستش بملل خالص في طور القصة و بعتبره افضل قصة اتقدمت في السلسلة لحد دلوقتي، و غالبًا لو كانت فيلم منفصل فكنت حب اشوفه برضو و هديله 10\10.
تقديم مثالي للشخصيات الأصلية
لعبة Mortal Kombat 1 بتبني عالم موازي مختلف تمامًا و شخصياته مش نفس الشخصيات اللي احنا عارفنها. و ده اداها فرصة تركز بشكل رئيسي على الشخصيات الأصلية لعالم Mortal Kombat. زي صب زيرو و سكوربيون الشخصيتين المفضلين عند اغلبنا، و الاختين كيتانا و ميلينا و غيرهم. وبقت فرصة نشوف الشخصيات ديه من منظور مختلف و جديد.
الشخصيات تم تقديمها بشكل مبهر و ده باين في التمثيل الصوتي لكل شخصية. ده غير تصميم الشخصيات نفسه و اللي اتجه لتصميم يبين فيه تفاصيل الشكل الانساني للشخصية، بدل ما كل شخصية يبقى الزي بتاعها مغطي كل حاجة و ملهمش ملامح. في Mortal Kombat 1، الشخصيات مليانة تفاصيل و ده انعكس على القصة، لما شوفنا ازاي مجرد اتنين مزارعين بقو من أقوي الـ Champions في العالم بتاعهم، و ازاي انتقلو من المعارك ضد البشر اللي زيهم، لشخصيات عالم الـ Outworld الغريبة.
اسلوب اللعب
بخلاف طور القصة اللي اتكلمنا عليه بما فيه الكفاية، اللعبة بتقدم طور جديد اسمه Invasion. طور أركيدي شوية لأنه بيقدم نظام أشبه بالـ Board Games. المود عبارة عن مناطق بتبدأ في كل منطقة بالشخصية اللي بتختارها. زي مثلًا أول منطقة هي البيت بتاع جوني كيج. و من منظور علوي بتبدأ تتحرك من نقطة لنقطة و تخش غرف البيت ده و كل غرفة بتلاقي حاجة مختلفة.
الطور ده المفروض انه يقدملك تجربة بتخلط بين كل اطوار اللعبة في طور واحد و عليهم حاجات اضافية كمان. بعض الغرف هتلاقي فيها شخصية تنزل قصادها معركة. و مناطق تانية هتلاقي فيها الـ Towers و اللي تقدر تخشها و خلصها و هنتكلم عنها كمان شوية لأنها ليها طور خاص لوحدها. مع شوية تحديثات و Mini Games. زي Test your Might مثلًا اللي بتتحداك انك تدوس ازرار معينة بسرعة و ديه معروفة طبعًا من الألعاب القديمة.
من الآخر مفروض الطور ده يخليك تعيش تجربة قصة و جيمبلاي و تحديات مختلفة في مود واحد. المود ده بالنسبالي مكانس احسن حاجة و مضافليش أي حاجة ولا من ناحية قصته ولا من ناحية اسلوب اللعبة. لان انا ببساطة بعد ما اخلص القصة احسنلي اني العب الاطوار الكلاسيك المعروفة احسن من الملل اللي في مود الـ Invasion.
يمكن الميزة الوحيدة في المود ده هي الجوايز اللي بتاخدها مع المهمات و التحديات اللي بتخلصها. هتاخد شوية Gears و Palettes اللي هي الـ Skins من الآخر. غير كدة مفيش حاجة تخليني اقضي وقتي في المود ده.
مود الـ Towers بيتحداك اكتر
طبعًا من أشهر أطوار اللعب عمومًا مش في مورتال كومبات بس هو الطور ده. عبارة عن برج من عدد أدوار معين و كل ما بتهزم عدو كل دور بتنتقل للدور اللي بعده و هكذا لحد ما تخلص الادوار المطلوبة على مستوي الصعوبة اللي انت مختاره.
الطور ده بيوفر اكتر من Tower بتختار منهم و بتختلف فقط في عدد ادوار البرج. التحدي اللي بجد بيكون في اخر برجين. واحد عدد ادواره لا نهائية، و التاني نفس الكلام بس الـ Health بتاعك مبيرجعش يتملي تاني لحد ما تموت. تحديث صعب جدًا بس عمومًا طور الـ Towers من أمتع الأطوار بالنسبالي و وجودها في اي لعبة قتالية معناها ساعات كتير جدًا من التحدي و التجربة.
نظام قتال متنوع اكتر
الـ Fighting في لعبة Mortal Kombat معروف بحماسيته و بالرتم بتاعه اللي مبيهداش. و في الجزء ده الموضوع اتحسن كتير و بقى اكتر تنوع في أساليب القتال بين كل لاعب و التاني.
ستوديو NetherRealm حط مجهود كبير في جزئية الـ Combo. كل شخصية من شخصيات Mortal Kombat من بدايتها بتتميز بكومبو خاص بيها و ده بيبقي عبارة عن ضربات معينة ورا بعض مبتديش فرصة لخصمك يهرب أو يردلك الضربات ديه. و في جزء Mortal Kombat 1 الموضوع اعقد و افضل بمراحل.
كل شخصية عندها 4 ضربات بالـ 4 زراير، مربع و أكس و هكذا يعني. بس الموضوع مش بالسطحية ديه لأن كل زرار من دول لو دوسته و وجهت الانالوج في واحد من الاتجاهات الاربعة هيديك ضربة مختلفة مع كل اتجاه. بيوصل الموضوع مع بعض الشخصيات لـ 8 أو 10 ضربات تقدر تضربها لخصمك.
و طبعًا حاجة زي ديه بتخلق مساحة كبيرة جدًا لفكرة الـ Combo. لو لعبت بشخصية معينة كفاية هتعرف ايه الضربات اللي تقدر تعملها مع بعض عشان توصل للكومبو اللي انت عايزه. و مع دخول الـ Special Moves التنوع بيزيد.
الـ Special Moves دايمًا بتميز العاب مورتال كومبات. و هي ببساطة ازرار معينة بتدوسها بشكل متتابع و بسرعة. فانت هنا بقى عندك عدد ضربات كبير بالزراير العادية و كل شخصية عندها اكتر من 5 Special Moves فانت أكيد دلوقتي متخيل التنوع اللي تقدر تستغله عشان تعمل الكومبو الخاص بيك.
إضافة الـ Kameo الجديدة
الـ Kameo هو المساعد بتاعك في كل Fights. فبعد ما تختار شخصيتك اللي هتلعب بيها لازم تختار مساعد بين 15 Kameo متاحين، ايه ده يعني هقدر استدعيه و العب بيه جوا الـ Fight؟ مش بالظبط
من خلال زرار معين بتقدر تستدعي الـ Kameo بس مش هتتحكم فيه. هو هينزل بس ينفذ الضربة اللي انت طلبتها و يرجع تاني. كل Kameo من الـ 15 عنده اكتر من ضربة، و بتختلف على حسب اتجاه الانالوج مع زرار الاستدعاء. الشخصيات اغلبها مألوف و في منها شخصيات مش مألوفة.
تقدر مثلًأ تختار Sub-zero كمساعد ليك و تستدعيه جوا الـ Fight عشان ينزل يوجه ضربة تجمد الخصم أو يعمله Knock بعيد عنك عشان يديك مساحة اكبر. كمان الـ Kameos بيشاركو في الـ Throws، الـ Throws هي انك الحركة الخاصة بتاعت شخصيتك، و اللي تقدر برضو لو ضغط زرار معين مع زرار الـ Throw تستدعي الـ Kameo هو اللي ينفذ حركته الخاصة.
الكاميو ليهم تأثير كبير جدًأ على الـ Fighting في اللعبة ديه و أحيانًا ممكن تقلب Fights لصالحك لو استخدمتها صح. كمان تقدر تدخلها وسط الكومبو بتاعك. نقدر نقول ان ديه واحدة من أفضل الإضافات اللي نزلت في السلسلة ديه عمومًا ونتمني انها تستمر و تتحسن اكتر في الاجزاء الجديدة.
دموية الـ Fatal blow و الـ Finishers
لعبة Mortal Kombat 1 وصلت لأقصى درجات الدموية الممكنة. خصوصًا مع الجرافيك المبهر و التفاصيل الخيالية. احيانًا ممكن توصل ليك بعض الـ Fatal Blows الدموية لمرحلة الغثيان لو انت مش متعود على المشاهد ديه. بصراحة انا شخص مبفضلش الدموية المبالغ فيها لكن ابهرتني التفاصيل بصراحة. و يحسب ليها انها بتتقدم بشكل سينيمائي عظيم برضو.
هل في الشخصيات Overpowered وSpamers؟
كابوس أي لعبة قتالية زي Mortal Kombat هي الـ Spams. يعني يجيلك واحد بشخصية معينة و يفضل يدوس على نفس الزرار لحد ما يخليك تكسر الجهاز لان مفيش حاجة تصد الضربات ديه. الكلام ده شبه انتهى من الالعاب القتالية بعد ما ظهرت طرق التصدي الجديدة و الـ Barrier مثلًا. لكن في شخصيات نوعًا ما Overpowered.
مش كل الشخصيات عندها نفس الضرر. في شخصيات ضرباتها سريعة جدًا و الكومبو بتاعها طويل لكن الضرر بتاعه مش اد كدة. في شخصيات تانية ضرباتها ابطأ لكن ضررها أعلى و لو اتقفشت في كومبو منه تقول علي الدنيا السلام.
في بعض الشخصيات بقى عندهم ضرر عالي نسبيًأ و كمان ضرباتها سريعة جدًا. زي شخصية Kenshi اللي بيتخدم السيف وتقدر تستدعي سياف وهمي كدة يضرب معاك. و ده غير الـ Kameo طبعًا. رغم ان السياف الوهمي ده ضرره مش كبير لكن صعب تتفادي ضربات شخصيتين و لو اللي قدامك محترف بيه فغالبًا مش هتهزمه.
اللعبة بتواجه الـ Spam بنظام التصدي العادي جدًا. اما بقى الـ Combos اللي لو اتفذت عليك مبتقدرش تعمل حاجة لحد ما الكومبو يخلص، فاللعبة بتواجه ده بالـ Kameo Breakers. و انت بتلعب هتلاقي بار تحت بيزيد كل ما تضرب خصمك اكتر، البار ده لما يتملي على أخره تقدر تستدعي الـ Kameo Breakrs عشان يصد الكومبو بتاع الخصم عن طريق انك تستدعيه في لحظة معينة.
فكرة حلوة جدًا و أفضل ما فيها هي انها مش متاحة طول الوقت، لأن لو اللاعب يقدر يصد أي كومبو بضغطة زرار، ده هيقلل من استخدام الكومبو و هيوقع رتم الـ Fights بشكل ملحوظ.
الرسوميات و الاداء التقني
نقدر نقول ان Mortal Kombat 1 قدمت أفضل مستوى رسومي ممكن نشوفه في لعبة قتالية و يتقال عليها انها لعبة جيل جديد. المستوى الرسومي و كمية التفاصيل الموجودة في مشاهد طور القصة خرافية وواضح جدًا ان في مجهود كبير اتبذل في التفاصيل ديه. و لو اتكلمنا عن الـ Fights اللي مليانة مؤثرات بصرية بتتنوع مع كل شخصية. فهي اتقدمت برضو بأفضل مستوى رسومي شوفته في لعبة من التصنيف ده.
سلسلة Mortal Kombat عمومًأ متميزة بفزيائيتها الخفيفة. التحكم دايمًا سلس جدًا و الشخصيات بتستجيل لأي كومبو معقد بشكل سريع و سلس مبيمثلش اي عوائق قصاد اللاعب.
جربنا اللعبة على جهاز متوسط بامكانيات مش افضل حاجة. و رغم كدة فاللعبة ادتني معدل اطارات ثابت فوق الـ 60 فريم في مشاهد القصة و التنقل بين القوائم. في الـ Fights برضو تجربتي كانت ثابتة و مقابلنيش دروبات مؤثرة على اللعبة لدرجة انها تأثر على لعبي.
واحد من العيوب اللي كانت ممكن تبقي افضل هي زمن شاشات التحميل. اللعبة حاولت تلغي ده عن طريق ان يبقي في Transaction بتحصل بعد اختيار الشخصية اللي هتلعب بيها بينقلك على الـ Fight بشكل مباشر من غير شاشات تحميل و ده كان عظيم. لكن بمجرد ما تخلص الـ Fight و تعوز تخرج عشان تختار شخصية تانية هنا اللعبة بتاخد وقت اكتر في التحميل. وفي بعض الاطوار الـ Transaction ده مش موجود أساسًا فبتعاني من البطء في الدخول و الخروج من الـ Fight.
الخلاصة
رأيي ان ديه واحدة من افضل الالعاب القتالية اخر كام سنة و بسبب طبعًا قلة اصدارات التصنيف ده فنقدر نقول انها واحدة من أفضل العاب التصنيف عمومًا. قصة محبوكة بشكل حلو جدًا و اتبذل جهد كبير في كتابتها و اخراجها. و اضافة الـ Kameo للـ Fights و مع الاهتمام اكتر بالـ Combo، القتالات بقت متنوعة و حماسية جدًا.
من الآخر، لو انت من محبين السلسلة فانت هتعيش واحدة من افضل التجارب. و لو انت جديد على التصنيف ده، فممكن تواجه صعوبة في التأقلم و فهم ميكانيكيات اللعبة لأنها مش سهلة اوي. أكبر عيوب للعبة ديه هو طور الـ Invasion الممل جدًا، و كمان ضعف بعض الشخصيات بشكل مبالغ فيه و شخصيات تانية قوية جدًا و صعب تكسبها.
ezz eldin adel
