ماين كرافت شبعت تريقة من يوم ما طلعت, اللي يقول عليها لعبة مربعات و اللي يقولك ديه لعبة أطفال من غير قصة حتي. لكن النظرة ديه اتغيرت من كام سنة لما Mojang مطورين لعبة ماينكرافت قرروا ان جه الوقت اننا نشوف العاب تانية من ماين كرافت. شوفنا ألعاب قصصية متكونة من كذا حلقة و شوفنا العاب زي Minecraft Dongons. و آخر لعبة نزلت هي Minecraft Legends.
قصة اللعبة
خلينا متفقين ان القصة مش عمرها ما كانت الحاجة اللي بتميز العاب ماين كرافت عمومًا. بس علي الرغم من ان اللعبة الاصلية كانت بتحاول تحطك في اجواء و عالم و انت بتحاول تنجو فيه اطول وقت ممكن و تخلق قصتك بنفسك. لكن لعبة Minecraft Legends قدمت قصة لا بأس بها.
قصة لعبة Minecraft Legends بتحصل في عالم موازي لعالم ماين كرافت اللي احنا عايزينه. عالم ميعرفش الشر و كل الكائنات اللي موجودة فيه مسالمة. لدرجة ان اول مشهد في اللعبة الزومبي بيدي وردة لواحد من القرويين.
لكن عشان ده عالم ماين كرافت فالعالم السفلي اللي معروف باسم nether موجود برضو. و ده العالم اللي فيه كل الكائنات الشريرة. الكائنات ديه بتقرر في يوم انها تغزو الأرض و تقضي علي السلام اللي موجود فيها. و ده عن طريق بوابات الـ Nether اللي بتوصل العالم السفلي بعالمنا العادي. و بترسل من خلال البوابات ديه جيش من كائنات البيجينز اللي هم ببساطة خنازير صغيرة شايلين سيوف.
و في العالم الموازي بتاعنا موجود البطل و هو بيستكشف كهف و ماشي في حاله ييجي حكماء العالم الموازي اللي اتكلمنا عليه و يستدعوه و يكلفوه بمهمة انقاذ عالمهم عشان هما ناس مسالمين جدًا و ملهمش في الكلام ده خالص.
ده تقريبًا قصة اللعبة كلها من لحظة ما تدوس New Game لحد ما تخلصها. و ديه منقدرش نقول عليها سلبية في اللعبة لأن اللعبة أصلًا مش هدفها الأساسي القصة. لأنها في الاول و الاخر لعبة استراتيجية.
اسلوب اللعبة
زي ما قولنا لعبة Minecraft Legends هي لعبة استراتيجية مع شوية أكشن و مغامرة من بتوع ماين كرافت. بعد ما بتعدي بالتوتوريال اللي بتعرفك بكل ادواتك هتنطلق في العالم عشان تدمر الكائنات الشريرة و تنقذ العالم.
أغلب الوقت هتبقي بتعمل حاجتين أساسيين. أولهم الهجوم علي معسكرات و بوابات البيجينز اللي متوزعة في العالم. و ديه بالنسبالي كانت ساعات بتبقي فيها شوية متعة لكن مع مرور الساعات هتبدأ تحس انك بتعمل نفس الحاجة.
الهجوم علي المعسكرات هيديك شعور انك بتقود جيش في حرب حقيقية في العصور القديمة. قبل اي معركة لازم تبني مباني معينة بتخليك تستدعي انواع مختلفة من الجنود و كل واحد منهم بتميزه حاجة من أول الصناديق اللي بترمي أسهم من بعيد و الجوليم الصغيرين لحد الجوليم الكبير. و عشان تعمل حاجة زي كدة هتحتاج تجمع شوية موارد و ده خبر سعيد للناس اللي بتحب ماين كرافت الاصلية.
و زي ما قولنا من شوية Minecraft Legends هي لعبة استراتيجية, فأهم حاجة فيها هي التكتيك و التخطيط. كل معسكر أو بوابة من بوابات البيجينز متصمم بشكل مختلف و بالتالي كل معسكر هيحتاج منك خطة مختلفة عشان تقدر تتخلص منه. زي مثلًأ المعسكرات اللي بتبقي مليانة بوابات صغيرة بتفضل تطلعلك بيجينز طول الوقت فلازم تقضي عليها عشان تعرف تحمي نفسك و تحمي جيشك و هو بيوقع ابراج الأشرار.
و ديه انا شايفها ايجابية مهمة جدًا في اللعبة لأن لو كان كل المعسكرات تقدر تقضي عليها بنفس الطريقة فاللاعب كان هيمل جدا و غالبًا مش هيكمل اللعبة. لكن ماين كرافت اتخطط ده و قالتلك خش يا بطل شوف اليه الطريقة الي هتقضي بيها عليهم.
الحاجة التانية اللي هتعملها غير الهجوم علي المعسكرات هي حماية القرية. خريطة اللعبة فيها اكتر من قارية و طول الوقت القرية بتتعرض لهجوم من اليجنز و لازم تبقي موجود عشان تصد الهجوم ده. و عشان مستحيل تبقي موجود في كل مكان ييجي هنا اكتر حاجة ممتعة في اللعبة و هي البناء و اللي برضو ليه ايجابياته و سلبياته.
عشان تحمي القرية اللعبة بتوفرلك اشكال من البناء زي ابراج السهام و اللي بتحمي دايرة معينة و بتضرب اي وحش يقرب منها. ده غير الأسوار و البوابات و السلالم و اللي بتديك مساحة كبيرة جدًا من الأبداع. فانت تقدر مثلًا تبني اسوار حوالين القرية كلها و تعمل البواب عشان ينجزب ليها البيجينز و تحط عند الابواب ديه ابراج السهام و بكدة انت بتحمي القرية طول الوقت و مش محتاج تكون موجود.
الهدف من حماية القرية انها بتوفرلك طول الوقت مصدر موارد مهم جدًا. يعني كل شوية هتروح عند القرية هتلاقي صندوق القرويين بيملوه خشب و احجار و معظم الادوات اللي هتحتاجها عشان تبني اماكن جديدة و تحصن القرية اكتر و كمان تطور جيشك.
السلبية الوحيدة في موضوع حماية القرية هي قلة المباني الدفاعية. يعني لما بتروح معسكرات الأعداء هتلاقي هناك ابراج سهام و ابراج بترمي نار و مباني تانية بتنشر غاز سام. لكن ده كله مش موجود بالكمية المطلوبة في القايمة اللي فيها المباني اللي تقدر تبنيها.
و زي ما اتكلمنا من شوية قولنا انك بتحتاج تجمع موارد معظم الوقت عشان تقدر تبني حصون قوية للقرية و تطور جيشك. و ديه بتدفعك لحاجة مفروض انها من عناصر اللعبة و هي الاستكشاف. عالم اللعبة مفروض انه مساحته كبيرة و طول الوقت بتبق بتلف بالحصان من مكان لمكان تاني. لكن للأسف العالم ده فاضي جدًا و مفهوش نشاطات تقدر تعملها.
بس لازم نبقي فاكرين اننا بنتكلم عن لعبة استراتجية في الاساس و فكرة الاستكشاف و تجمع الموارد هي فكرة بيحاول بيها المطور يجذب اللاعبين اللي بيحبو ماين كرافت بس مبيحبوش الالعاب الاستراتيجية. و ديه حاجة كويسة جدًا لأنها بتحسسك مع الوقت انك مش بتلعب لعبة استراتيجية و حتي المعراك و الحروب ضد البيجينز بتبقي فيها اكشن كتير جدًا و كل شوية هتنسحب من المعركة عشان تقوي جيشك و ترجع تاني.
اللعب الجماعي
غير طور القصة, اللعبة ديه فيها لعبة جماعي. و اللي حسب ما شوفنا في عروض اللعبة حماسي جدًا. و اللي فيه كل واحد بيجمع موارده و يجهز جيشه و يحصن قريته عشان يبقي جاهز علي اد ما يقدر لهجوم اللاعبين التانيين. و اللي علي حسب ما شوفنا فكرته حلوة جدًا خصوصًا لو لعبته مع صحابك.
لكن للأسف الطور ده لحد بعد 3 أيام من إصدار اللعبة صعب جدًا تلعبه. و السبب ان مفيش لاعبين كتير بيلعبو اللعبة بالرغم من انها متاحة مجانًأ من خلال خدمة الـ Gamepass. لكن بمجرد ما يمر وقت و اللعبة تنتشر اكتر و الناس تشتري اللعبة هتقدر تلعب الاونلاين و هيبقي ممتع جدًا.
الاداء و الجرافيك
جرافيك اللعبة بسيط جدًا و مفيهوش تعقيد. يعني أغلب الأجهزة هتقدر تشغل اللعبة بسلاسة و طبيعي متستناش جرافيك جبار ولا اي حاجة. لكن من مميزات اللعبة هي المؤثرات. مؤثرات زي المطر و الانفجارات و النار و العشب اللي حواليك. ده غير مشاهد القصة اللي كانت مرسومة بشكل كرتوني مش وحش خالص.
الترجمة العربية
أول ما عرفت ان اللعبة فيها ترجمة عربية اتبسط جدًا ان لعبة زي ديه هتبقي مناسبة جدًا للعمر الغصير و فكرة وجود اللغة العربية هتسهل عليهم انهم يفهممو اللعبة و يندمجو مع القصة اللطيفة بتاعتها. و كمان يقدرو يفهمو استراتيجيات الهجوم و الدفاع.
لكن اللي لقيته حاجة ضحكتني جدًا و في نفس الوقت زعلت علي سوء الاهتمام بينا كعرب. الترجمة سيئة جدًا و هي عبارة عن ترجمة حرفية. يعني الـ Campaign اللي هو معروف انه طور القصة ترجمته كانت “الحملة”. و جوا اللعبة الترجمة معكوسة و هتلاقي جمل كتير بتبتدي من اخر كلمة لأخر كلمة زي مثلًأ “الهجوم يتعرض للقرية”.
و حتي التنسيق كان كارثي و كأنك فتحت ورد و حطيت كلام عربي لكن بتنسيق انجليزي. الفقرات اللي فيها اكتر من جملة في كذا سطر هتلاقي السطر الثاني و الثالث و هكذا بيبدأو من الشمال و النقط و الفواصل موجودة في آخر الجملة. يعني من الآخر هم خدو النص الانجليزي ضربوه في خلاط برنامج ترجمة تعبان و حطوه من غير حتي ما ينسقوه.
