بتستغل Sony نجاح الجزء الاول من Spider Man اللي نزل في سنة 2018، ويرجعلنا ستوديو Insomniac Games بقصة جديدة وشخصية جديدة، وتكون لعبة إطلاق للجيل الجديد الPS5.

(القصة)

تدور أحداث القصة بعد أحداث الجزء الأول على طول وفي نفس المدينة وهي New York، وقبل ما تبدأ اي حاجة بتعرضلك اللعبة ملخص لأحداث الجزء الاول عشان تفتكر أو تعرف أيه اللي حصل لو ملعبتش الجزء الاول، وبعد مهمة صعبة مع شخصية Spider Man الأساسية لأختبار قدرات الشاب Miles ويشوف هل يقدر يعتمد عليه ولا لا، لان Peter Parker هيسافر وههيسب المدينة لفترة مش قليلة، وبعد ما يطمن بيسيب مسؤولية الحفاظ على أمن المدينة في أيد Miles. وبمجرد سفر Peter تبدأ المشاكل والمخاطر تتراكرم بشكل سريع جدا على Miles. أحداث اللعبة سريعة جدا وقد يكون ده عيب فيها عند البعض والبعض الآخر ممكن يحب السرعة دي، لانك مش بتلحق تاخد نفسك ولا تتعرف على الشخصيات الجديدة الرائعة الصراحة. Miles هو ولد من أب ببشره سوداء وأم من Puerto Rico وده بيخلي Miles ميكس رائع من الثقافات واللغات وده هتلاحظه في طريقته المميزة في التنقل بين المباني ولهجته المميزة في الكلام. قصة اللعبة هي قصة البطل الخارق المعتادة ولكن قصة Miles Morales مميزة وهتشدك وهتكون حابب تتقدم في الاحداث عشان تعرف أكتر. ولازم تكون عارف ان اللعبة نفس فكرة Uncharted the lost legacy جزء فرعي متصل بالجزء الاصلي، وقصة Miles Morales قصيرة مدتها 10 ساعات، مقارنة بالجزء الاول اللي كان مدته 20 ساعة لعب. بشكل عام قصة اللعبة ممتعة ومستوحاة من الcomics الاصلية والافلام وبنوا على القصص دي قصة جميلة جداً الصراحة.

(أسلوب اللعب)

الGameplay مشابه للجزء الاول بشكل كبير، ولكن المطورين بنوا على الGameplay بتاع الجزء الاول وضافوا قدرات جديدة خاصة بشخصية Miles، زي طبعا قدرة الكهرباء اللي مشهور بيها Miles واللي تقدر تستخدمها بدون حدود برحتك وكمان قدرة التخفي المميزة، ولكل قدرة عندك ليها الSkill tree الخاصة بيها، واللي تقدر تطور فيها براحتك بالSkill points اللي بتحصل عليهم كل ما لڤلت أكتر في اللعبة. ولكن لو انت شخص لعبت الجزء الاول ممكن من شدة تشابه نظام الCombat بين الجزء ده والجزء الاول تنسى ان في قدرات جديدة أصلا وتلعب بشكل عادي جداً اكنها الجزء الاول وده يعتبر عيب في اللعبة، انك مش بتحس أنك بتلعب بSpider Man مختلف عن Peter خالص، ولكن في بعض المهام في اللعبة اللي بتطلب منك استخدام قدرات Miles المميزة ولكن الطلب ده نادر جدا في اللعبة. وطبعا زي الجزء الاول تقدر تفتح بدلات كتير جديدة اللي ليها Perks متنوعه، ومن ضمن البلات دي بدلة Spider Verse المميزة جدا، بالإضافة لمعدات جديدة تقدر تستخدمها كأسلحة بدل الSpider Web المعتادة. وكل ده مهم جدا لمواجهة الأعداء الجدد في اللعبة اللي ليهم أسلحة وقدرات جديده ومختلفة. المطورين شالوا من اللعبة مهمات الstealth اللي كانت ممله وكانت أحد سلبيات الجزء الأول وأستبدلوا المهمات دي بألغاز بسيطة في وسط المهمات، ولكن ده ميمنعش من أستخدامك لقدرة التخفي، والتسلسل ما بين خطوط الاعداء والتخلص منهم واحد ورا التاني. Miles عنده برنامج على التليفون بتاعه تقدر الناس في اللعبه من خلال البرنامج ده طلب المساعدة ورفع البلاغات لMiles، وتقدر تختار المهمة الي تناسبك من على تليفون Miles بكل حرية. وفي تنوع في المهام المنتشرة في عالم اللعبة المفتوح اللي مقسم لعدة مناطق، من تحديات Peter، او تجمعات الأعداء أو الصناديق اللي فيها loot وغيرها كتير. ومن خلال المهام دي كلها تقدر تكسب فلوس اللي تقدر تفتح بيها بدلات جديده أو تطور المعدات بتعتك.

(الجرافيكس والموسيقى)

عالم اللعبة في مدينة New York زي ما قولت قبل كده هو نفس عالم الجزء الاول، ولكن انت بتلعب في فترة الشتا واعياد الكريسماس اللي بتدي شعور مختلف ومميز لعالم اللعبة. على الPS4 pro اللعبة فيها إختلافات وتحسينات بسيطة عن الجزء الاول، ولكن تحس بجمال اللعبة الحقيقي على جهاز الPS5، من خاصية تتبع الاشعة أو الRay Tracing وإضافة تفاصيل أكتر من رائعة في عالم اللعبة بشكل عام. المزيكا في اللعبة عبارة عن بيتات Hip hop ظريفة وده طبعا بسبب سن Miles الصغير، ولكن من كتر المهام والحجات اللي لازم تعملها، دايما اللعبة بتقطع حماس المزيكا دي بحد بيكلمك على التليفون يفكرك بالمهمة او يطلب منك حاجة، طبعا تقدر تقفل موضوع ان حد يكلمك كل شوية دي، ولكن اغلب المكالمات بيتقال فيها أحداث القصة ولازم تسمعها عشان تتابع اللي بيحصل.

(الدعم العربي)

اللعبة فيها زي الجزء الاول خاصية الدبلجة باللهجة المصرية، ولكن انا منصحش فيها لانها مش معموله حلو، ولكن الأختيار متوفر للحابب يستخدمه.

(الملخص)

في الختام Marvel’s Spider-Man: Miles Morales هي حرفياً الفصل الناقص من الجزء الاول واللعبة شبيها جدا بالجزء الاول، اللعبة بتكمل أحداث الجزء الاول بشكل ممتاز، وتقدم لينا قصة رائعة خاصة بشخصية Miles المحبوبة، مع تحسين في أساسيات اللعبة الأولى بقدرات وأعداء مميزين. لعبة Miles Morales طريقة ممتازة لاقتحام الجيل الجديد، اللي متوفر فيها كل عضلات الPS5 من خاصية الHaptic Feedback في دراع الDualSense أو سرعة التحميل اللي لا تذكر وخاصية الصوت المحيطي ال3D المميز وغيرها كتير. لعبة Miles Morales هي متابعة رائعة لواحدة من أفضل ألعاب الأبطال الخارقين.

(نقاط المزايا والعيوب)

المميزات:

1- قصة ممتعة وتكمله ممتازه للجزء الاول في الاحداث.

2- جرافكيس أكتر من رائعة على الPS5.

3- أستخدام كل مميزات الPS5 من خواص الDualSense او سرعة التحميل.

العيوب:

1- التشابه كبير ما بين الجزء ده واللي قبله.

2- مفيش شعور أن Miles شخصية Spider Man مختلفة.

(التقييم)

8.5/10