في أول محاولة ليهم استطاع استديو Ember lab انهم يقدمو لنا تجربة تجمع بين جمال وجودة تشبه أفلام بيكسار مع الغاز وعالم مستوحى بشكل ملحوظ من العاب زيلدا الكلاسيكية، ولكن مع شوية مشاكل وده الى هنعرفه في مراجعتنا.
القصة
قصة اللعبة تتمحور حوالين Kena البنت الى عندها القدره انها تساعد الأرواح العالقة في عالمنا لسبب أو لأخر للعبور للعالم الآخر بأمان قبل ما يتحولوا لوحوش تلتهم الطاقة السحرية من العالم و بمساعدة حيواناتها الاليفة والي اسمهم Rots ومع مساعدة بعض الأرواح الأخرى بتحاول Kena مساعدة الارواح الضائعة للوصول للعالم الآخر.
وعلى الرغم من سطحية القصة، الا انها بتقدم معاني واضحة عن ما هي الحياة والموت بطريقة تشبه قصص الاطفال قصص افلام استديو جيبلي القديمة، فهي بالتأكيد مش أفضل طريقة لعرض قصه الا انها في نفس الوقت تعتبر مناسبة للأطفال والي لعبتنا موجه بشكل كبير ناحيتهم.
الرسوميات و الموسيقى
كينا قدرت انها توفر لنا مستوى رسومي اشبة بمزيج بين أفلام بيكسار الجديدة ممزوجة مع رسومات استديو جيبلي المبهجة، وده اللى بيبان من الوهلة الأولي مع بداية اللعبة وإلقاء النظرة الأولى على تصميم كينا نفسها والي تسحر العين بمجرد النظر ليها من جمالها وتناسق الانيميشن وده اللي بيستمر طوال اللعبة،
بالإضافة إلى موسيقى ساحرة بتحسسك بالاندماج مع عالم اللعبة، فهي فيها روح من موسيقي الالعاب الكلاسيكيه من جيل الN64 و الPS1،
فهي تعتبر امتداد لـتراكات لألعاب كلاسيكية زي Majora’s Mask فكل تراك معمول بعناية للمكان الى بيمثله وده بيستمر طوال فترة اللعبه. فاللعبة عبارة عن مزيج ممتع سواء على المستوى البصري أو السمعي.
البيئات والعالم
ولكن على الجانب الآخر تصاميم البيئات متكرر ومفيش تنوع كبير بين كل منطقه والتانيه و ده اللى بيدى شعور انك ماشي في منطقة واحدة بس من كتر تشابه المناطق ببعضها وكمان تنقصها بعض الاساسيات الى المفروض تكون موجوده في لعبة عالم مفتوح زي الـ Mini Map على سبيل المثال،
وده اللي بيخلي التنقل في عالم اللعبة صعب احيانا وبتضطر تفتح الخريطة الكاملة كذا مره علشان تعرف بس تحدد طريقك.
الجيم بلاي
من ناحية الجيم بلاي، فاللعبة مقسمة الى 3 سكاشن أساسية والي لا يخلوا من العيوب و المميزات في نفس الوقت، فاللعبة بتقدم نظام بلاتفورمنج مقتبس بشكل واضح من العاب زي Uncharted و Breath of the Wild، ملحوق بالغاز كويسة بتستغل كل قدراتك و مهاراتك بطرق ذكيه و مش بسيطه تخليك لما تحل لغز فيهم تحس باحساس النصر والانجاز.
ولكن على الجانب الآخر ف نظام الكومبات ضعيف لدرجة ان ابسط الحركات والي المفروض تكون مفتوحه من البداية بتكون مقفوله ورا upgrade system ضعيف، وحتى عدد الـ Upgrades قليل، واللي بيدي طابع بـ التكرارية في وقت القتالات.
لكن الى يعوضه هو تنوع الزعماء وتنوع أفكارهم الى كل مره هتحتاج تفكر بطريقة مختلفة عن اللى قبلها علشان تتغلب عليهم، وخصوصاً لما يتم دمج مراحل البلاتفورمنج مع الزعماء علشان يطلع ميكس يخليك تطلع كل ما عندك علشان تتغلب عليه،
بالإضافة انه بعد ما تهزم زعيم منهم بيتحول لوحش عادي تواجه في المواجهات العاديه بالظبط زي Dark souls، وده اللى بيدي قيمه كبيره للقتالات كل ما تتقدم في اللعبة.
النهاية
Kena: Bridge of Spirits تمثل محاولة استديو Ember lab الأولى للدخول لعالم الألعاب، وبالنسبة للمحاوله الاولي وعلي الرغم من العيوب الواضحه الا انها ناجحه جداً و تخلينا نتطلع للمشاريع القادمة من الاستديو
المميزات
- رسومات جميلة شبيه بأفلام بيكسار
- بلاتفورمنج جميل
- الغاز صعبه
- معارك الزعماء متنوعة وكثيرة
- موسيقى جميله ملائمة للجو العام للعبة
العيوب
- كومبات ضعيف
- قلة التنوع في البيئات
- التكرارية في بعض الحالات
التقييم النهائي
7.5/10
لو عجبتكم المراجعة تقدروا تشتروا اللعبة علي جهاز الPS4 او الPS5 من خلال موقع Gamezawy عن طريق الرابط ده
