مراجعة

Immortals of aveum

حسيت مع سنة 2023 إننا عدى علينا 3-4 سنين في الجيمينج من كتر الألعاب اللي صدرت فيها، وواحدة من الألعاب اللي كنت متحمسلها السنة دي هي لعبة Immortals Of Aveum اللي من تطوير استوديو جديد (Ascendant) بقيادة Bret Robbins وده الكريتيف دايركتور بتاع ألعاب عظيمة زي Dead Space الأولى و call of duty WWII و Call of duty advanced warfare و modern warfare 2 اللي صدرت في 2009 يعني راجل شارب الشوترز جدًا، ولما يكون هيقدم مشروع شوتر جديد يبقى لازم نتحمس.

اللعبة فعلا من خلال الدعاية كان باين إنها كلاسيك شوتر بالاستايل الخطي السينمائي اللي مركز على القصة لكن مع فرق صغير جدًا…السحر بدل الأسلحة. جيوش وحروب وصراعات بس بشكل مختلف المرة دي. مملكة Aveum اللي بيحصل فيها الأحداث هي مملكة نشأت بعد اكتشاف السحر في وقت مش متحدد هو في المستقبل ولا الماضي واتقسم عالم aveum ل5 ممالك بينهم حرب عالمية ضخمة اسمها الـEver war ونتيجة لاستخدام السحر في الحرب الضخمة دي نتج تلوث بيئي أو حاجة شبه خرم الأوزون كده اسمها The wound أو الجرح ودي حاجة مش مشروحة كويس في القصة هي إيه بالتحديد غير إنها خلل بيئي ناتج عن استخدام السحر الزايد عن اللازم، وتأثيرها على البيئة مدمر عشان بتموت النباتات والكائنات الحية.

في وسط الحرب دي بقى، ومملكة aveum عندنا مدينة فقيرة اسمها seren متقسمة نصين، نص للفقراء ونص للأغنياء وفي نص الفقرا بيتولد بطلنا جاك وبيعيش طفولته ومراهقته وشبابه في المنطقة الفقيرة دي كطفل مشرد لحد ما بيحصل حاجة بتخليه يكتشف إن عنده قدرة استخدام الأنواع التلاتة للسحر…السحر الأحمر والسحر الأزرق والسحر الأخضر.

المفروض إنك لو ساحر عادي في العالم ده فأنت تصنيفك إنك magni، ولو مابتعرفش تستخدم السحر تصنيفك هيكون Lightless، وفي حالات نادرة بيكون في شخصيات بتعرف تستخدم أنواع السحر التلاتة ودول بيتسموا Triarch Magnus والبطل بيتصنف من النوع ده من الجنود، عشان كده قائدة جيش الإيمورتالز بتجنده وبتدربه على استخدام السحر واستغلاله بأفضل شكل، وبتكون مهمته قيادة الجيش ده عشان يوقف الحرب بأي تمن، سواء عن طريق الانتصار أو السلام.

معضلة إن الحرب سلاح القتال فيها هو السحر، وهو برضو الشيء اللي بيدمر البيئة ولازم الحرب تقف عشان تمنع التدمير ده هي معضلة كانت كانت ممكن تستخدم بشكل عميق عشان تخلينا نهتم بالقصة أكتر ونحس إن البطل قدام معضلة صعبة، لكن الغريبة إن ماحدش بيناقشها بشكل جاد أبدًا.

لعبة Immortals of aveum تشبه أوي أفلام مارفل في كترة الهزار في وسط المواقف المُظلمة بشكل ساعات هتحس إنه يا اما قوة زيادة يا استهزاء بالأحداث. ساعات كنت بحس إن البطل دمه خفيف بس في النص التاني من الأحداث اتمنيت لو إن الهزار يقل شوية، لإن الأحداث شدتني وكنت محتاج البطل ياخدها جد زي مانا واخدها جد…الهزار الكتير ده في رأيي ضر القصة كتير زي لعبة forspoken وألعاب تانية كان فيها الهزار زايد عن اللزوم ودي الطريقة اللي بيسموها في السينما طريقة جوس ويدن في الكتابة.

بالمناسبة جوس ويدن ده المخرج اللي استلم فيلم justice league بعد زاك سنايدر وأعتقد كلنا عارفين الفيلم ده كان عامل أزاي….

المهم…immortals of aveum عندها عالم وlore عظيمين ويطلع منهم أحسن من اللي طلع بكتير، وشخصية البطل جاك كانت شخصية مثيرة للإعجاب لحد النص التاني من الأحداث اللي استمرت معايا توتال 15 ساعة، وكان في محتوى جانبي كمان ياخدله 5 ساعات كمان زيادة…وماتفهمنيش غلط برضو، إيمورتالز لعبة حلوة وممتعة لكن القصة فيها شوية فرص مهدرة، وبدل ما تركز على قصة إنسانية قوية ومؤثرة بتركز على إنها تكون action blockbuster ماحدش هيفتكره بعد ما يخلص…ودي مشكلة لو اللعبة كانت ناوية تتحول لسلسلة.

الجيم بلاي بقى مكانش وحش إطلاقًا، مشكلته بس إنه كلاسيكي زيادة عن اللزوم. التغييرمن الأسلحة التقليدية والبنادق والسنايبر للسحر تغيير شبه جذري والمفروض يضمنلك تجربة فريش كده وماتحسش معاها بأي تكرار صح؟

الحقيقة لأ، أنا مش عارف إزاي عملوا كده بس أسلحة اللعبة التلاتة عاملين بالظبط زي الأسلحة النارية العادية في أي لعبة شوتر. السحر الأخضر عامل زي الmachine gun او الرشاش، والأحمر زي الشوت جن والأزرق زي البندقية العادية أو السنايبر.

لو مش فاهم قصدي، فأنا أقصد إن السحر الأخضر ذخيرته سريعة والدامدج هو الأقل بين الأسلحة التلاتة، والسحر الأحمر الدامدج بتاعه الأعلى، بس مداه قصير والسحر الأزرق ال fire rate بتاعه قليل لكن دامدج أعلى من الأخضر.

ولازم تعمل ريلود كل شوية، ده غير شوية أدوات بتاخدها زي القنابل اللي بتبطأ حركة العدو، والحبل اللي بتشدهم بيهم ناحيتك، و الدرع. توزيعة الأزرار كانت مُربكة شوية وزاد من شعور الربكة والتشتيت ده الإضاءات الرهيبة اللي بتكون عالشاشة في المعارك واللي بتخليك تحس إن الدنيا بتقلب فوضى في كل معركة خصوصًا في النص التاني من اللعبة.

الكومبات ممتع، لكن صعوبته بتزيد مع الوقت مش عن طريق تقديم نوعية أعداء مختلفة، لإن وقتها مكنتش هبقى متضايق من الصعوبة لأ هو بيزودهالك إنه يحطك وسط عدد أعداء كبير جدًا، وساعات قدام أعداء كانوا بوص لسا من شوية…يعني في recycling للاعداء كمان. تنوع الأعداء بصراحة مكانش حلو، ولا تنوع الأسلحة كمان لإن الأسلحة من أول اللعبة لأخرها هم ال3 أنواع سحر الموجودين مش بيتغيروا مش هتحس بأي فرق مع الأبجريد بتاعهم.

لحسن الحظ، اللعبة مش كلها كومبات بس…في ألغاز بيئية بتستغل فيها السحر ودي كانت متصممة كويس وفي تصميم بيئات مبني على الاستكشاف والرجوع بعد فترة بأدوات جديدة عشان تفتح حاجات وأماكن ماكنتش مفتوحة قبل كده. لإن البيئات تعتبر لفلات كبيرة شوية زي مثلا جزئين God of war الأخرانيين بس للأسف الطريقة دي في التصميم ماكنتش مشجعة خالص مع immortals لإن الأدوات الجديدة مش بتفرق أوي زي gow أو star wars jedi ومش بتخليك حاسس إنك عايز تجربها كتير وتستخدمها…مش عارف ده شعور شخصي حسيته لوحدي ولا لأ، بس بالنسبالي تجربة اللعبة كلعبة خطية بس كده كانت أفضل لي من إني أتجول وأعمل الحاجات الجانبية دي خصوصًا إن القصة حماسية ومش هتخليك عايز تسيبها وتعمل محتوى جانبي، ومفيهاش لحظة ملل ولا بطئ في الأحداث.

الجرافيكس في اللعبة جميل، ولكن للأسف الأداء مش أحسن حاجة. أنا لعبت اللعبة على البي سي على كارت شاشة 3070 و 32 جيجا رامات و إنت كور i9 الجيل الأتناشر وخدت 50 فريم بس وكانت بتنزل ساعات على ultra. اللعبة مش وحشة إطلاقًا بصريًا بس مش مبهرة برضه للأسف وواضح إن حصل داونجريد عن العروض الدعائية اللي فاتت عشان الأداء يكون مقبول.

بصراحة أنا كنت مبسوط وأنا بلعب اللعبة بعيدًا عن أي حسابات، وكنت مبسوط بيها بشكل خاص عشان هي من مجموعة ألعاب ea origanls اللي بتقدم في الفترة اللي فاتت ألعاب عظيمة في معظمها، والمرة دي حاولت تقدم new ip في وقت مش بنشوف فيه غير أجزاء جديدة من سلاسل قديمة أو ريماستر وريميك…لعبة immortals of aveum تجربة ممتعة وسريعة وسعرها أقل من السعر الكامل للألعاب اليومين دول، وهو 60$…عشان كده بنصحك بيها لو عايز كلاسيك شوتر خطي وقصة سينمائية قوية، لكن ماتتوقعش لعبة السنة يعني!

التقييم النهائي

8/10