Articles, Gaming News, News, Reviews

مراجعة I Saw Black Clouds

خلال السنوات الماضية شهدنا إصدار تجارب Interactive Thrillers المميزة مثل Erica و Late Shift وغيرهما، من نظرتي الأولى  على إعلان I Saw Black Clouds  كنت متحمساً لأعيش تجربة مميزة مع تلك الشخصيات ولكن للأسف، التجربة لم تصل إلى مستوى الحماس الي كان في مخيلتي.

” تم تزويدنا باللعبة من قبل الناشر Wales Interactive “

بعد وفاة صديقة مُقربة ليها، Kristina بترجع لمسقط رأسها عشان تبحث عن إجابات وتعرف سبب وفاة صديقتها وإنتحارها بس بتتفاجئ إن الموت ده كان وراه أسرار كتير جداً بتخلي الحقيقة الي هي كانت عارفاها مظلمة ومخيفة أكتر.

خلونا نتكلم على التمثيل شوية لإن ده الحاجة الأساسية الي هتشوفها خلال الساعتين الي هتقضيهم في عالم I Saw Black Clouds، تمثيل البطلة نفسها كان كويس جداً وقدرت توصلك كمشاهد مشاعر كتير مختلفة، بس بالنسبة لباقي الممثلين الجانبيين فا أحياناً معظمهم بيكون تمثيلهم مفتعل ومش واقعي، وكمان بتحس إن تمثيلهم مش لايق مع المواقف ومش بيأثر عليك كلاعب، بشكل عام نقدر نختصر التمثيل على انه إلى حدٍ ما سطحي ومش هيأثر فيك. القصة مدتها في حدود ساعتين إلا ربع تقريباً زي أي فيلم هتتفرج عليه.

في عيب كبير جداً في التجربة السينمائية ديه لازم أذكره وهو التصوير، الكاميرا دايماً كانت بتقرب بشكل سخيف من أوجه الممثلين وده كان بيوضح أكتر مدى عدم واقعية وتأثير تمثيل معظم الكاست الموجود وشخصياً كنت أتمنى ان التصوير يتاخد بشكل واقعي أكتر من كدة.

زي أي Interactive Thriller فا لازم يكون في إختيارات كتير ولكن للأسف الإختيارات في I Saw Black Clouds مكانتش مؤثرة بالشكل المطلوب لإنها في الاخر هتأدي نفس الغرض وبيحصل نفس الحاجة، الاختيار مش هيوديك لحاجة  تانية، هتلف وتروح لنفس الحتة. على سبيل المثال، في احدى المشاهد Kristina كانت بتروح مع صاحبتها في بيت عشان تقابل شخص يساعدها في عملية التحقيق الي بتقوم بيها، اللعبة بتديك الإختيار  إنك تتكلم وتتفاهم معاه بشكل ودي أو بعصبية، انا قررت اكون Aggressive في الكلام وده خلاه يطردني من البيت. صاحبة Kristina قررت ترجع وتتكلم معاه هي بهدوء وفي الاخر انت وصلت لنفس الحاجة الي كنت المفروض توصلها وهي إنك طلعت لغرفة مُعينة بتحقق فيها، طب إيه الهدف من وجود الإختيار أصلاً ؟

من النقط الي لازم اتكلم عليها في طريقة عرض الإختيارات هي إن اللعبة بتعرض الإختيار والكلام بيتقال ومش بتلحق تفكر انت عايز تختار إيه لإن بعد مالجملة بتتقال بيكون قدامك ثانيتين أو 3 بالكتير عشان تختار. الموضوع ده حصل حوالي 6 أو 7 مرات وبالنسبالي شايفه عيب كبير جداً.التصوير كان معظم الوقت بيقرب بشكل سخيف من أوجه الممثلين وده كان بيوضح أكتر مدى عدم واقعية وتأثير تمثيل معظم الكاست الموجود في التجربة.

شوف أول 38 دقيقة من اللعبة بالترجمة العربية :

من  اكتر الحاجات الي عجبتني في التجربة ديه هي إن اللعبة فيها عامل إثارة حلو جداً، بعيداً عن مشكلة التصوير الي بتبقى قريبة من وش الشخصيات إلا إن تصوير باقي المشاهد والأحداث كان جيد جداً واتقدمت بعض اللقطات الي كان فيها إثارة عالية وهتدخلك في المود مع الشخصيات والجو العام للعبة.

الموسيقى التصويرية كانت متقدمة بشكل كويس بس للأسف معمولها Mixing غلط، أحياناً بتكون بتتفرج على مشهد وبيجي إختيار فاللعبة بتقطع كدة في النص وتلاقي الموسيقى يإما كملت يإما دخلت في نغمة تانية خالص وده عيب Mixing في الأصوات وبيخرجك من المود لإن التنقلات في المشاهد والنغمات الموسيقية  مش متقدم بشكل سلس.

بما إن اللعبة عبارة عن تجربة سينمائية بالكامل فهل هتحتاج للغة الإنجليزية ؟ يُسعدني أقولك لا لإن اللعبة مُترجمة بالكامل للغة العربية الفصحى وكالعادة شركة Wales Interactive عاملة شغل محترم في الترجمة، ترجمة النصوص والقوائم هنا ممتازة وهتفيد أي شخص مستواه مش عالي في اللغة الإنجليزية.

الخلاصة :

I Saw Black Clouds هي تجربة مشاهدة عادية قائمة بشكل أساسي على تمثيل Kristina، طاقم التمثيل الجانبي لم يُقدم أدواره بشكل ممتاز وحتى الإختيارات لا يوجد لها تأثير كبير على الأحداث العامة للقصة. من وجهة نظري، تلك التجربة كان من المفترض أنها تتوفر على شبكة مثل Netflix وتُقدم بنفس طريقة Black Mirror: Bandersnatch، هذا الأمر كان سيُساعد بنقل التجربة بشكل أفضل.

تقييم نهائي : 5/10

Ahmed Yousry

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.