مؤخرا بدأت تزداد شعبية الألعاب اللي ماشية على نهج موسيقي والايقاع شوية جوا القصة واللي شوفنا منها من فترة لعبة NFC UNBOUND, وحاليا احنا معانا واحدة من أمتع الألعاب اللي تم الاعلان عنها بشكل مفاجئ كحصرية لأجهزة Xbox والحاسب الشخصي بالطبع خلال حدث Xbox & Bethesda Developer_Direct وهي HI-FI RUSH, الجدير بالذكر ان اللعبة تم اصدارها في نفس يوم الاعلان عنها كمان اتوفرت بشكل مجاني عبر خدمة GamePass لأجهزة Xbox ,اللعبة بتجيلنا من نفس الاستوديو اللي كان مسؤول عن ألعاب مهمة كتير زي سلسلة The Evil Within أو لعبة Ghostwire Tokyo وهو استوديو Tango Gameworks و طبعا من نشر Bethesda, اللعبة دي هي عبارة عن مزيج ممتاز بين الموسيقى والرسم الكرتوني والجيم بلاي, واللي أقدر أقولك انها هتوفرلك تجربة هايلة و عدد ساعات من الاستمتاع
القصة
بتحكي القصة عن شاب اسمه Chai واللي ممكن نقول انه شايف نفسه عازف روك مستقبلي وبيحاول يستخدم الموسيقى عشان يحقق هدفه وهو نشر الإيجابية والوحدة بين الناس, بيروح لمقر شركة Vandelay واللي بتكون مسؤولة عن مشروع جديد لتركيب أطراف اصطناعية متطورة, بيوصل Chai للمؤسسة وبتبدأ فعلا العملية اللي بيحاول يحصل فيها Chai على ذراع اصطناعية جديدة بدلا من ذراعه المكسورة.
ولكن بيحصل خطأ وسط العملية دي واللي بيؤدي الى ان جهاز الموسيقى الخاص بـChai انه يقع على صدره خلال العملية وبعدها بيندمج جهاز الموسيقى فعلا مع جسمه عشان يكون الجهاز ده هو المسؤول بعد كده انه يمد Chai هو و ذراعه الجديدة بالطاقة و يديله قوى شبه خارقة بتخليه قادر على مزامنة إيقاع الموسيقى مع حركة جسمه بشكل مهول, ولكن الشركة بتعتبر عملية Chai فشلت وبتطلق عليه وصف “معيب” وبتقرر انه لازم التخلص منه في أسرع وقت, وبتبدأ من هنا رحلته في المحاولة من الهرب من روبوتات الشركة وكمان مسؤولين المنظمة الشريرة نفسها واللي بيعتبروه عائق ليهم بسبب كشفه بعد كده لمخططاتهم.
الجيم بلاي
تميزت HI-FI RUSH ببساطة وروعة الجيم بلاي اللي ممكن يسببلك الإدمان فعلا واللي ممكن يخليك تلعب لساعات منغير ما تحس بالوقت, ووظيفتك كلاعب انك هتكون متحكم بالشخصية الرئيسية واللي هو Chai ,ومع كل ال Abilities بتاعته واللي مع الوقت هتكون قادر تعملها Upgrades وتشتري Combos جديدة بالعملات او الأدوات بمعنى اصح اللي بتجمعها من عالم اللعبة واللي هتساعدك اكتر في المعارك الخاصة بيك وقتلك للروبوتات, واكيد طبعا مننساش الجزء الأساسي من اللعبة وهو ان لازم تطابق حركاتك وضرباتك مع إيقاع الموسيقى اللي فالـLevel, واللي بتختلف من مستوى للتاني ,سواء كانت للضربات العادية , ضربات قوية او ضربات قصوى.
وبتتنقل انت كلاعب بمنظور الشخص الثالث عبر مستويات مختلفة ورائعة في مدينة Neon-lit city, ولكل مستوى مسار صوتي مختلف عن التاني وبيئة فريدة من نوعها, واللي هتقابل فيها اشخاص هيساعدوك وسط رحلتك لأنقاذ العالم.
وتم تصميم عالم اللعبة علشان يكون غامر جدا, مع ستايل انيميشن وتفاصيل معقدة والوان زاهية خلقت جو مفعم بالطاقة لدرجة اني كنت منبهر فعلا كون كل ده متواجد جوا لعبة بالحجم ده.
الشخصيات كمان كانت حركتها سلسة جدا ومصممة بشكل رهيب يحببك فيهم, وده بيوفرلك إحساس بالحرية والسيولة وسط اللعب والتنقل عبر المستويات.
آليات اللعبة سهله وبسيطة واللي تقدر تتعلمها بشكل سريع في المستويات الاولى, ولكن ده ميمنعش انك مع الوقت هتحتاج تزامن الحركات كلها في المستويات المتقدمة بشكل اسرع علشان تقدر تتغلب على الBosses الأقوياء.
بالإضافة للمستويات الرئيسية, بتضمن HI-FI RUSH عدد من المستويات الإضافية اللي بتساعدك على انك تجمع منها مكافئات زيادة واللي هتساعدك في الMain Levels وتقدر منها انك تزود من سرعة التغيير في اللعب وتفتح Achievements من تطويرك لأدواتك ومهاراتك.
وفي نهاية كل مرحلة هتلاقي نفسك بتقاتل مسؤول او زعيم من زعماء Vandelay واللي منهم هتقدر تكسب مهارات زيادة هتساعدك جامد في كل المراحل اللي بعدها لحد ما توصل للزعيم الاخير منهم وهو رئيس الشركة Kale Vandelay.
يمكن يكون بس في جزء خاص بصعوبة التنقل بين الاماكن في المستويات واللي صعب تلاحظة في بداية اللعبة ولكن عقبال ما تتعود مع اندماجك في مستويات اكتر بعد كده هتفهم الدنيا بتمشي ازاي وهتبقى سهله بالنسبالك
وممكن نقول بشكل عام, ان الجيم بلاي في HI-FI RUSH جذاب جدا ومليان تحديات ممتعة, وده يرجع لسلاسة عناصر التحكم والمستويات اللي كانت معمولة بشكل متقن وتنوع الموسيقى جواها, واللي من المؤكد ان اللاعبين هيبقوا مستمتعين بوقتهم أوي في تجربتها.
دعم اللغة العربية
من أهم الحاجات اللي عجبتني جدا هي إضافة اللغة العربية واللي شملت الsubtitles والقوائم كلها, ودي حاجة انا شايفها اضافة رائعة كونها هتخلي اللعب اسهل شوية وممتع أكتر لبعض الناس, ولكن ده ميمنعش ان الترجمة كان فيها شوية أخطاء لغوية بسيطة, واللي ساعات كانت بتبقى ترجمة حرفية مثلا, ولكن في الأول والأخير ممكن تمشي حالك بيها.
الخلاصة
في النهاية نقدر نقول ان لعبة HI-FI RUSH هي rhythm-action game بشكل ممتاز وأكيد ننصحك بتجربتها خصوصا و انها موجودة بشكل مجاني عبر خدمة GamePass لأجهزة Xbox و الحاسب الشخصي اللعبة هتوفرلك التجربة الفريدة من نوعها اللي نفسك فيها من ناحية النظام الكرتوني السلس ومجموعة الموسيقى المتنوعة والجيم بلاي الممتع لأقصى حد و دي كلها عوامل تخليها لعبة لا غنى عنها لأي شخص بيحب النوع ده من الألعاب وجديرة بالتجربة حتى لأي شخص ممكن يكون مش بيفضل النوع ده.
