اسوأ شيء ممكن تعمله كمطور إنك تحاول تعمل لعبة أولد سكول، فينتهي بيك الحال إنك تعمل لعبة الناس لما تلعبها تحس إنها قديمة. لإن الفرق بين التأثر بألعاب كلاسيكية وبين إنك تقدم جودة متأخرة فرق كبير جدًا ودي للأسف المشكلة اللي وقع فيها مطور لعبة GUNGRAVE Gore واللي كان هدفها تعيد تقديم تجربة بلايستيشن 2 الكلاسيكية بشكل حديث. لكن يا ترى هل اللعبة وحشة ولا فيها مميزات تغني عن عيوبها؟ ده اللي هنعرفه النهاردة في مراجعتنا للعبة.
القصة
قصة اللعبة مش هي التركيز الأساسي، عشان كده هي سطحية شوية. أنت بتلعب بشخصية راجل راجع من الموت اسمه Grave (قبر) وهدفك هو محاربة منظمة اسمها The Raven Clan بيبيعوا دواء بيحول الناس لوحوش. ليه بقى وهدفهم إيه وهتوقفهم إزاي وإيه أصلا علاقتك بكل ده. كل دي اسئلة بتبدأ معاك واللعبة بتحاوب جزء منهم في القصة بشكل ساذج شوية ومش مطبوخ حلو، والجزء التاني من الأسئلة دي بيعتمد على تفسيرك الشخصي أو معرفتك بالأجزاء السابقة. مع إن أخر جزء كان على بلايستيشن 2..فمش عارف بصراحة ليه القصة ماتمش الاهتمام بيها أكتر من كده؟
الجيم بلاي
الجيم بلاي معتمد على شخصية Grave اللي بتصميمها البصري المميز هتلاقي معاها مسدسين ودول هما سلاحك الأساسي، وشايل على كتافه تابوت خشبي بينفذ بيه ضرباته اليدوية. شايف إن ده شيء غريب؟ أنت لسا ماشوفتش حاجة.
المسدس تقدر تعمل بيه ضربات سريعة متتالية، وتقدر تعمل charged shot بتشحنلك الدرع بتاعك وطبعًا الكومبات مبني على الضرب بالمسدسين والتابوت وتفادي ضربات الأعداء أو صدها. تقسيمة الحركات المتاحة ليك في البداية بتكون بدائية وقليلة وبتتوسع مع الوقت. كل ده جميل لكن هل التوسع والتطوير بيحسن من تجربة اللعب؟
أيوة، بيحسن منها كتير وبيقدم أسلوب لعب ممتع ومتنوع على مدار اللعبة خصوصًا إن أعداد الأعداء كبيرة ومتعة قتلهم بأشكال مختلفة أمتع حاجة في اللعبة لكن الكلام ده بيبدأ يتكرر قرب نهاية اللعبة وبتبدأ تحس إنك شوفت كل حاجة وبيكون لسا قدامك شوية حلوين في اللعبة.
المشكلة الأساسية في أسلوب اللعب كانت إن تصميم البيئات خطي، فمفيش أي استغلال للبيئة في الكومبات. وبيزود الموضوع ده إن الأسلحة اللي معاك، المسدسين والتابوت هم بس الأسلحة اللي هتفضل معاك ومش هتحصل على أي قطعة سلاح جديدة، على عكس مثلا لعبة لسا مجربها الفترة اللي فاتت وهي Evil West أو حتى God of war اللي بيحافظوا على تدفق العتاد والسلاح الجديد عشان يغيروا من التجربة.
تنوع الأعداء معدوم، لكن معارك الزعماء اللي بتظهر متأخر في اللعبة وبتتحول لحاجة ثابتة في كل المراحل بعدها بتقدم تحدي كبير وممتع جدًا. تصميمهم البصري جميل وتصميم العملي مختلف كتير عن بعض. لكن بشكل عام كان نفسي في كومبات يستغل مهارة اللاعب ويتحداني أشغل دماغي، مش مجرد تكرار للضغط على الأزرار وخلاص. خصوصًا إن اللعبة بتطلب منك تدوس R2 في كل مرة تضرب فيها طلقة من مسدسك، علمًا بإنك بتضرب طول الوقت تقريبًا…فليه الخيارا للتصميمي العجيب ده؟
بشكل عام الجيم بلاي في طابع DmC بسبب الضربات الكتير اللي بتتفتح معاك على مدار اللعبة وبتسرع من وتيرة اللعب، لكن ده بتعيقه تصميم الشخصية السيء واللي حركتها بطيئة جدًا. لعبة زي دي عشان تستمتع بيها محتاجة تكون وتيرتها أسرع والشخصية اللي بتلعب بيها قادرة على التحرك والاستجابة بشكل سريع جدًا.
الجرافيكس وتصميم المراحل والأصوات
كل ما هو خارج إطار أسلوب اللعب أقل من المتواضع، وهيديك شعور بإن المطور صرف قليل عليه بشكل متعمد. الأداءات الصوتية متواضعة وفي بعضها سيء وكأن الممثلين كانوا بيسجلوا الأصوات غصب. تصميم المراحل بصريًا كان جميل ومتنوع، لكنه خطي زيادة عن اللزوم. مفيش أي طرق مختصرة أو مراحل بونص أو أي مكافأة على الاستكشاف. ده لإنه مفيش استكشاف أصلا ولا أشياء قابلة للجمع ولا أي محتوى جانبي.
مشكلتي مع الجرافيكس كمان كانت في قد إيه هو بسيط وخالي من التفاصيل المثيرة. بالنسبة للعبة سعرها 50$ مكنتش بتمنى أشوف أحسن جرافيكس في الجيل بس حسيت إن اللعبة مش متعوب عليها أوي في الجانب ده.
المؤثرات البصرية الناتجة عن الطلقات والضربات والإنفجارات على اختلافها كانت قوية ومرضية، لكن المؤثرات الصوتية هي اللي كانت أضعف مما توقعت وتمنيت.
في المجمل أنا انبسط من الجيم بلاي في لعبة Gungrave Gore في 20 مرحلة من ال31، لكن بعد المرحلة 20 بدأ الموضوع يبقى متكرر وبدأت أحس إني شوفت كل حاجة. بالنسبة للعبة ب50$ فهي بتقدم تجربة متواضعة برضو والسعر لا يبرر الجودة وفقر الأفكار. لكن لو أنت من محبي النوع ده من الألعاب بنصحك على الأقل تجربها لإن الجيم بلاي ممتع وبيتطور مع الوقت على الأقل في أول 20 مرحلة…لكن ماتتوقعش تحفة فنية بأي حال.
التقييم النهائي 6/10
يذكر ان اللعبة متوفرة بشكل مجاني على خدمة Xbox Game Pass
