أخيرًا نزلت اللعبة اللي بقالها حوالي 10 سنين في التطوير وحصل في عملية تطويرها تخبطات كتيرة، من تأجيلات وتغيير في فريق المطورين، كل دا يخلينا نتوقع لعبة يادوب يعني مش حاجة قوية، لكن أقدر أقول إن Granblue Fantasy: Relink خالفت توقعاتي، مش كدة وبس، دي كمان فاجأتني في أكتر من حاجة..
للي ميعرفش فالسلسلة دي بدأت في 2014، من حوالي 10 سنين، لما كانت لعبة موبايل في أول ظهور ليها.. القصة بعدها كملت في أنمي مشتق من اللعبة نزل في 2017، وطول الوقت دا كان عشاق السلسلة مستنيين اللعبة الكبيرة والضخمة Granblue Fantasy: Relink، اللي زي ما قولت كانت عملية تطويرها مرهقة حبتين.
القصة
بتاخدنا القصة لمغامرة جديدة مع فريق المغامرين، طاقم سفينة السحب اللي بتطير في السما، وهما بيدوروا على جزيرة غامضة اسمها “استولوشيا”، بعد ما بطلنا لقى رسالة من أبوه، رسالة بتقوله يدور على الجزيرة الأسطورية الغامضة دي، فبيبدأ المغامرة هو والطاقم بتاعه لتحقيق رغبة والده..
ولكن في طريقهم بتظهر جماعة تانية معادية ليهم وبتحاول توقفهم، فهل هيقدر البطل وصحابه يوصلوا للجزيرة؟ ويا ترى ايه غرض المغامرة دي اصلا؟ وهيلاقوا ايه هناك؟ كل دا بتحاول القصة تحكيه في مدتها اللي هتكمل معاك 12 – 14 ساعة قبل ما تخلصها. بعد نهاية القصة فيه فصول إضافية في الخاتمة، واللي مدتها أبهرتني لأنها بتكمل معاك حوالي 12 ساعة كمان، يعني تقريبا هتحتاج 25 ساعة عشان تشوف كل مشهد وكل جملة في القصة هنا.
القصة نفسها مش أجمد حاجة، يعني تقدر تقول إنها كويسة وبتأدي غرضها مش أكتر، وده لأن التركيز الأكبر هنا على الجيمبلاي، ودا اللي هنعرفه أكتر كمان شوية.. لكن من الحاجات اللي عجبتني فيها القصة هي المشاهد السينمائية، واللي معمولة بجودة عالية وتركيز في التفاصيل والتمثيل هنا أكتر من أي لعبة JRPG تانية، يعني تقدر تحطها في نفس اللفل بتاع Final Fantasy 16.
كمان القصة مش بتعرفك على الشخصيات وتاريخهم من البداية، لأنها ضمنيًا تقدر تقول إنها Sequel للجزء الأول اللي نزل في 2014، ولكن في نفس الوقت الأحداث منفصلة، وعشان كدة اللعبة فيها حاجة ذكية بتعرفك أكتر عن كل شخصية وعلاقتها بالشخصيات التانية، وهي عبارة عن حلقات نصية اسمها Fate، بتتفتحلك لكل شخصية على مدار القصة في أوقات معينة عشان تديك خلفية أكتر عن اللي بيحصل، وبتفرق جامد في فهمك للأحداث لو أنت متعرفش حاجة عن القصة. الحلقات دي مش أكتر من كلام مكتوب على صورة، يعني مفيهاش مجهود أو تركيز وممكن تكسل إنك تقراها، بس هتفرق معاك فعلا لو قريتها.
الجيمبلاي
نيجي بقى لأهم عنصر من عناصر Granblue Fantasy: Relink، واللي هو الجيمبلاي.
اللعبة بتديك الحرية تلعب بـ 20 شخصية بحالهم، وتقدر تبدل بينهم زي ما أنت عايز. كل شخصية ليها قدرات خاصة بيها وميكانيكس مميزة في اللعب، ولما بقول قدرات خاصة فـ أقصد الكلمة بكل ما تحمله من معنى، لأن كل شخصية من الـ 20 شخصية هنا مختلفة بشكل كبير جدًا جدًا عن غيرها وليها مهارات مختلفة، وبتغير طريقة لعبك بشكل مش هتتخيله.
مثلًا شخصية Io تخصصها الهجوم من مسافات بعيدة وإنها تعمل Stun للأعداء بهجمات سحرية من التلج والنار وكدة، لكن Lancelot بيطلع سلاحه ويدخل في حضن العدو مع مجموعة من الهجمات القريبة عشان يعمل أكتر دامدج ممكن، و Rackam معاه أسلحة بيضرب بيها من بعيد بأشكال مختلفة، و Ferry بتهاجم من مسافات متوسطة وبتطلع زي أشباح كدة بيلفوا في دواير والهدف إنها تعمل دامدج أكتر عشان تكمل ضرب. كمل على كدة بقى لعشريــــــن شخصية بحالهم.
غير المهارات والقدرات، كمان كل شخصية ليها شجرة مهارات، أو تقدر تقول إنها شجرة تطوير أكتر. هي شجرة طويلة بتتقسم للهجوم والدفاع، وبتختار إنك تطور الجانب اللي يهمك أكتر فيهم، عن طريق إنك تزود الدامدج بتاع الشخصية أو تزود المقاومة للسموم مثلًا وهكذا. الشجرة طويلة حقيقي، ولحد دلوقتي، بعد أكتر من 35 ساعة لعب، لسة مخلصتش شجرة القدرات دي.
الجيمبلاي نفسه بيخليك متحكم في الشخصية بشكل كبير، يعني غير الهجوم فأنت تقدر تصد، تقدر تـ Dodge وتنط، كمان فيه هجوم خفيف Light Attack وهجوم Heavy Attack، دا غير قدرة الـ Relink واللي بتشحنها وأنت بتلعب ولما بتعملها بتعمل هجوم سبيشال قوي جدًا شكله روش.
من أكتر الحاجات اللي بتميز Granblue Fantasy: Relink هي البوص فايتس أو معارك الزعماء. كل بوص فايت هنا متعوب فيها جامد ومميزة عن غيرها، وده بيظهر في حركات كل بوص وضرورة التعامل معاها بشكل مختلف عن باقي البوصات، دا غير إن استخدام القدرات نفسه والهجمات ممتع جدًا، من أول الأنميشن والتحريك لكل حركة، والفيدباك من كل هجمة، لغاية الأصوات الجامدة اللي بترن في ودانك وأرقام الدامدج اللي بتظهر على الشاشة.
محتوى اللعبة
Granblue Fantasy: Relink هي لعبة هتغرق فيها من كتر محتواها، فـ لو حطينا القصة مع فصول الخاتمة على جنب، اللي هما 25 ساعة تقريبًا، ونبص لمحتوى الـ Endgame بتاع اللعبة، هنلاقي إن فيه مهمات جديدة كتير بتتفتح بعد نهاية القصة، وأنا مش ببالغ بس فعلا المهمات دي هتحس إنها مش بتخلص، دايمًا في حاجة جديدة تعملها ومهمات بتديلك تحدي أكبر، سواء كنت عايز تطور شخصيتك لأعلى مستوى أو تطور حاجات معينة.
تقدر تلعب اللعبة سولو مع زملاء من الـ AI أو تلعبها Coop مع صحابك، وفي الحالتين هتستمتع لأن الـ AI بتاع اللعبة هنا قوي جدًا ومتجاوب مع لعبك بشكل كبير.
اللعبة هنا ماشية بنظام الكويستات، سواء كويستات القصة الرئيسية أو الكويستات الجانبية الكتير والممتعة. كويستات القصة غالبا بتكون بسيطة ومركزة، وغالبا بردو بتعمل كذا حاجة وفي الأخر بتخش على بوص فايت.
كمان فيه مدينتين كبار تقدر تعتبرهم الـ Base بتاعتك واللي بتروح لها تطور العتاد بتاعك أو تاخد كويستات، وكمان تعمل فاست ترافل.
الجرافيكس
أول ما تبص للعبة هتعرف الجرافيكس هنا رايحة فين، فاللعبة واخدة توجه الأنمي في كل تفاصيلها، من الإضاءة والألوان والشخصيات والمؤثرات البصرية في المعارك، كل حاجة هتشوفها هنا هتحسسك إنك بتتفرج أنمي بجودة محترمة جدًا.
الجرافيكس هنا بالنسبالي هي من أحسن الجرافيكس اللي شوفتها في الألعاب الـ JRPG والألعاب اللي واخدة توجه الأنمي بشكل عام، ولو بتحب النوع دا من الألعاب هتستمتع جدًا بالجرافيكس هنا، خصوصًا المؤثرات البصرية اللي بتزود متعة الجيمبلاي.
دعم اللغة العربية
للأسف اللعبة مش بدعم اللغة العربية في أي حاجة فيها، لا ترجمة ولا صوتيات ولا قوائم ولا حاجة، سواء على البلايستيشن 4 و 5 أو حتى على الـ PC على ستيم، وهتضطر تلعبها بالإنجليزي أو بالياباني لو بتحب تعمل كدة في الألعاب اللي واخدة ستايل الأنمي دي.
في النهاية Granblue Fantasy: Relink هي لعبة ممتعة مليانة بالمحتوى الممتاز والمتنوع، مع جيمبلاي روش جدًا وهيخليك تدمن اللعبة لو بتحب النوع دا من الألعاب، لكن قصتها العادية والمملة في بعض الأحيان، كمان إن مفيش ولا شخصية مميزة في القصة، وشوية تكرار في المهمات، يقفوا عائق قدام إنها تكون واحدة من أفضل ألعاب السنة.
