محبي و متابعي سلاسل عالم The lord of the rings سواء الافلام او الروايات عارفين اد ايه العالم ده من اغني العوالم اللي اتعملت لحد دلوقتي, و ده لأنه مليان بالقصص الغريبة و المؤثرة جدًا و كل شخصية فيهم تقدر تعملها لعبة لوحدها و لو اديتها شوية اهتمام غالبًا هتنجح لكن ده مش اللي عملته The lord of the rings Gollum خالص.
القصة
شخصية Gollum من افضل شخصيات المسلسل, بسبب القصة بتاعته و ازاي الخاتم حوله من Hobbit عادي لمسخ عنده انفصام في الشخصية. و لعبة The Lord of the Rings: Gollum قررت تاخدنا لفترة 60 سنة بعد ما الخاتم ضاع من Gollum, قضي جولم الوقت ده كله في الجبال بيكلم نفسه لحد ما شاف غراب بيراقبه من بعيد و فضل يجري وراه لأنه كان معتقد ان الغراب بيتجسس عليه.
و هو بيطارد الغراب اتقبض عليه من كائنات الـ Orc و سجنوه, عشان تبدأ رحلتك كلاعب بيحاول ينجو من المهمات اليومية اللي بيدوهالك في السجن, و كمان متنساش هدفك الاساسي في اللعبة و هو انك تحاول تخرج من السجن عشان تكمل بحث عن الخاتم اللي جنن Gollum.
و زي ما كلنا عارفين من الافلام Gollum أو Smeagol بيعاني من انفصام في الشخصية, و جواه شخصية شريرة و شخصية و ده يعتبر الحاجة الوحيدة اللي اتعملت صح في اللعبة ديه, لأن التمثيل الصوتي بتاع Gollum و Smeagol كان بيعبر عن كل شخصية جدًا خصوصًا في اللحظات اللي بتختار فيها ترك بأنهي شخصية فيهم الشرير ولا اللطيف.
لكن غير كدة قصة اللعبة مبتقدمش جديد ولا في عالم Mordor ولا بتحاول تبتكر أحداث جديدة. القصة بتدور في وقت Gollum فيه بيحصله بعض الأحداث اللي كان ممكن يتعمل منها لعبة كويسة زي فترة سجنه و مراحل هروبه و حاجات تانية مش هينفع اتكلم عليها تجنبًا للحرق.
اللعبة قدمت شخصيات تانية من السلسلة غير Gollum زي جاندولف و Shelob العنكبوت و غيرهم اللي اتقدمو بشكل زي ما الكتب وصفتهم بالظبط لكن وجودهم مكانش مؤثر ولا مبهر بالشكل المطلوب, و مش هتشوفهم كتير أصلًا طول مراحل اللعبة.
أسلوب اللعب
لعبة Gollum بتركز في الأساس علي الباركور و التخفي. التخفي في اللعبة بسيط جدًا, استخبي ورا ديه و اغطس في العشب و امشي في الضلمة عشان الأعداء ميشوفوش Gollum. للأسف التخفي مقدمش أي أفكار ذكية خالص و كان كل اللي بيقدمه هو تخفي بسيط عشان تعدي بعد المناطق, و مبيبقاش خيار قدامك انك تعدي بالطريقة اللي انت عايزها, لأن اللعبة بتجبرك علي أسلوب معين في كل مرحلة أو مهمة.
أما بقي بالنسبة للباركور فهو ببساطة هتنط يمين و شمال و تتسلق الحروف الصفراء اللي بتميزهالك اللعبة عشان توجهك. و ده كان بدائي اكتر من اللازم يعني مكانش في اي تحديات أو صعوبات اللاعب بيواجهها تخليه محتاج تركيز أو حتي ألغاز صعبة. لأن بعد أول كام ساعة هتحس انك ماشي علي مود الـ Auto Pilot يعني ماسك الدراع و بتدوس نفس الزراير بنفس الطريقة لمدة أكتر من 8 ساعات لعب.
غير كدة تقريبًا اللعبة مقدمتش أي شيء في أسلوب اللعب, ممكن بس ميزة انك تقدر تقتل الأعداء لو تسللت وراهم و خنقتهم و ديه مش هتقدر تعملها الا في مراحل لازم تعمل فيها كدة. و ممكن برضو بعض اللحظات زي انك تجري من الحيوانات المفترسة أو انك تجري من العنكبوت الكبير وتتجنب الحفر. و ديه حاجات لو فكرت فيها هتلاقيها أساليب اتعملت من اكتر من 10 سنين في العاب زي Uncharted و Tomb raider و عشرات الالعاب اللي جابت آخر الأسلوب ده من زمان.
باختصار أسلوب لعب Gollum هو أسلوب لعب قديم جدًا يمكن لو كانت نزلت من 10 سنين كانت حصلت علي تقدير اكتر من كدة, لكنها مقدمتش حاجة تنافس بيها الجيل الجبار اللي احنا بنعاصره دلوقتي.
مشكلة اللعبة الأكبر في رأيي إنها مش بتحاول تقدم اللي بيبرر اختيار جولام لبطولة اللعبة. لا اللعبة بتتعامل مع الوضع كأن الجمهور بقاله سنين بيطلب لعبة لجولام والمطورين استجابوا وعملوها على مضض.
الحقيقة إن في ألعاب كتير بتقدم ساعات أفكار جريئة بيكون اللاعبين مش مقتنعين بيها في الأول لكن بيقتنعوا لو اللعبة قدمت ما يبرر ده.
طيب هل اللعبة هنا قدمت ما يبرر الفكرة بتاعة إنك تسيب كل الأبطال اللي في عالم lord of the rings دول، وقدراتهم الرائعة وتلعب بجولام؟ للأسف لأ، مفيش أي مبرر خالص يخليني أقتنع إن جولام كان اختيار موفق…أنا حتى ماحستش بكده طول فترة اللعب وحتى القدرة الوحيدة اللي حسيت إنها مميزة شوية كانت متقدمة في 200 لعبة قبلها.
القدرة دي اسمها gollum vision زي الdetective vision بتاع باتمان أو eagle vision بتاع اساسينز كريد. دي القدرة اللي المطور طلع بيها عشان يحسسنا إن اللعب لجولام شيء مميز.
بصراحة اللعبة محبطة جدًا في الجانب ده، إن المطور تحسه مش فاهم هو عايز إيه، ومعندوش رؤية ولا فهم لقاعدة الجماهير اللي ممكن تحب تلعب اللعبة دي.
المشكلة إن اللعبة مش نازلة حتى على الجيم باس فمقيش طريقة تجربها بيها غير إنك تشتريها، والتسعير هنا عامل عمايله برضو ومش حلو خالص. سعر اللعبة مخفض…50$ وده سعر كبير برضو على اللعبة دي خصوصًا لو قولتلك إن لعبة زي a way out كان سعرها 30$ وقت الإصدار و it takes two كانت ب 40$…فليه لعبة زي gollum تطلب مني أدفع الكم ده من الفلوس قدام منتج بالسوء اللي هي عليه؟
ملخصًا كده، الجيم بلاي مش ممتع، ومفيش ريحة التجديد والمطور كان واضح جدًا إنه مش عارف هو عايز يقدم إيه ومعندوش رؤية ولا دراية بالجمهور. الحلو في اللعبة بس هو البيئات، وشوية من لحظات البلاتفورمينج والتنطيط. غير كده اللعبة في مستوى سيء جدًا.
الأداء التقني
اللعبة تم تجربتها علي أجهزة متوسطة و ضعيفة و كانت النتيجة سيئة جدًا. اللعبة بتعاني علي أعل يالأعدادات انها تجيب أكتر من 30-40 فريم بالنسبة للأجهزة المتوسطة. أما بقي بالنسبة للأجهزة القوية فمشكلة الفريمات مش هتواجهم بكثرة لكن هتواجهم مشاكل تانية زي الجليتشات و مشاكل الذكاء الاصطناعي زي ان الأعداء يشوفوك و يقتلوك من غير ما تقرب منهم حتي, ده غير ان بعض الناس واجهت مشاكل علي منصات تانية زي الـPS5 زي ان اللعبة بتقفل فجأة مثلًا.
الرسوميات و الأداء الصوتي
رسوميًا اللعبة قدرت تقدم بعض المناظر المميزة اللي ممكن تقف عندها شوية و تتمعن فيها, لكن أغلب الوقت هتبقي في أماكن مغلقة و مظلمة مش هتشوف المناظر ديه كتير. و لأن الحاجة الوحيدة اللي ثابتة قدامك هي Gollum نفسه فكان لازم يتم إتقان تصميمه. تصميم الشخصية و حركاته مش وحشة و كانت بتحاكي حركة Gollum اللي شوفناها في الأفلام بالظبط, لكن برضو كان في بعض المشاكل في جرافيك الشعر و بعض الأجزاء اللي كانت بتبان بشكل سيء جدًا في حالات معينة.
الأداء الصوتي للعبة ممكن يكون من الحاجات القليلة في اللعبة ديه اللي يتقال عليها جيدة خصوصًا الاداء الصوتي لشخصية Gollum و جاندولف مثلًأ, حتي الشخصيات الجانبية و الأعداء كان التمثيل الصوتي بتاعهم معقول جدًا.
