Reviews, News

مراجعة Ghostrunner

مراجعة Ghostrunner

قصة اللعبة تدور أحداثها في المستقبل البعيد حيث ان البشر أصبحوا تحت حكم ميرا وهي عالمه وواحده من الي عملوا البرج الي أصبح بمثابة سجن للبشر ومهمتك انت كأخر واحد من ال(Ghostrunners) انك تحاول تقتلها وتنقذ البشرية بمساعده الاركتيكت او المنشئ الاساسي للبرج

بصفه عامه القصه متعتبرش قوية لكن فيها رسالة كويسه في النهاية وبردوا مش سيه انما هي متوسطه مقارنه بباقي جوانب العبه التانيه وشخصيا شايفها مناسبه لأنها موجودة لخدمه الجيم بلاي وده المهم

مراجعة Ghostrunner

تصميم المراحل

بالنسبه لتصميم المراحل فانا بعتبر اللعبه متقسه لثلاث اجزاء كل جزء مفصول عن التاني بقتال احد الزعماء

الجزء الاول

ففي الجزء الاول التصميم بسيط لانه يدوب بيعلمك أساسيات اللعبه ولكن مليان تحديات كبيره من شأنها انها تحسسك بالمتعه والحماس, فعلي الرغم من ان المراحل خطيه الا انك تقدر تعدي نفس المرحله بكذا طريقه مختلفه وبدون ملل. وينتهيالجزء الاول بواحد من اجمل الزعماء قتالا في اللعبه الي حرفيا هيخليك تطلع كل الي عندك من سرعه ودقه عاليه ومهارة كل ده ممزوج مع موسيقي حماسيه تحسسك كانك فعلا بقيت جزء من الاكشن الي بيحصل.

الجزء التاني

وهنا تيجي خيبة الامل ففي الجزء التاني اصبح العالم اكبر بكتير عن الاول لكن بقي عالم فاضي سهل تتوه فيه بسهوله والاعداء مبقوش متنوعين زي الجزء الاول وممكن تقضي اغلب الوقت بانك تبحث عن الطريق الصحيح للخروج فده في نظري اسوء جزء في اللعبه ولكن رغم ذلك فالجزء انتهي بقتال زعيم مش ممتع زي الزعيم الاول ولكنه كويس

الجزء التالت

وهنا بقي نيجي لاجمل جزء في وجهه نظري واللعبه رجعت خطيه زي الجزء الاول وكمان ضافوا تنوع اكتر في الاعداء والتنوع في حل الالغاز وحتي قتل الاعداء نفسهم بقي في تحسن اكتر,بقيت احس فعلا ان ده يتستحق بجداره يكون هو اعظم مرحله في اللعبه كلها وينتهي برضوا مع اخر واجمل قتال زعيم هتقابله لما فيه من تنوع ودقه

مراحل Cybervoid

وده مراحل هتقابلها في وقت ما تفتح اي مهاره جديده للتدريب شبه بالضبط مراحل ال(VR)في العاب(Metal gears solid)ولكن علي عكس المراحل ده فهي تعتبر اسوء حاجه في اللعبه من حيث التصميم الي بيوجع العين والخريطه المبهمه والمهمات السخيفه الي تحسسك انها مش جزء من اللعبه اساسا فهي في وجه نظري اسوء مراحل في اللعبه كلها

مراجعة Ghostrunner

الجيمبلاي

الجيمبلاي يعتبر مزيج قوي بين الباركور من لعبه Mirror edge و المهارات والقوه الخارقة من لعبه dishonored.

البلاتفورمنج

ففي مهمات البلاتفورمنج انت بيتقدر تتسلق أسطح الجدران عشان تقدر تتحرك في المرحلة بسهوله وكمان معاك سلاح يشبه الخيوط من لعبه سبايدرمان تقدر بيه من خلاله توصل للمناطق البعيدة بسهوله بالإضافة لقدرتك على التحكم بالآلات الي حولك عشان تحس كإنك انت الي متحكم بالمرحلة مش وده الي بيضيف لقيمه اللعبه اكتر وكمان تقدر توقف الوقت اثناء اللعب للحظات من الثواني عشان تتجنب هجمات الاعداء وتعدل اتجاهك ولكن رغم كل ده فاللعبة تحتفظ بالصعوبة العالية بيها حيث ان بعض الاحيان يكون الوصول لبلاتفورم معين يتطلب تركيز ودقه قد تصل لأجزاء من الثانية عشان توصلها وده الي بيضيف للمتعة اكتر.

مراجعة Ghostrunner

شجره المهارات

وهنا اللعبة بتتبع نهج مختلف شويه في توزيع المهارات والتحديثات حيث انها بتكون علي شكل لعبه تتريس وانت الي بتعلمه بتحط البلوكس علي حسب الاماكن الفاضية عشان تقدر تطلع بأفضل تجميعه للمهارات الي تناسبك.

القدرات

القدرات الخارقه في اللعبه عباره عن اربع مهارات بتفتحها مع تقدمك في اللعبه ,فالقدره الاولي تسمحلك انك تختار كذا عدو في صف واحد وتقتلهم في ضربه واحده والمهاره التانيه بتخليك تضرب موجه من الطاقه تقتل الي قدامك والمهاره التالته تشبه المهاره الاولي الا انها بتضرب موجه من الطاقه تعكس هجمات العدو والمهاره الاخيره والمفضله ليا الحقيقه هي مهاره انك تختار عدو وتتحكم فيه والي بتفتحك باب من الاحتمالات والمتعه ملوش نهايه ولكن تعقيبي الوحيد عليهم انهم مش بيشتغلوا في قتال الزعماء للاسف.

مراجعة Ghostrunner

الأعداء

ومن ناحيه اخري فاللعبه بتقدم تنوع رهيب في الاعداء يعني في اول اللعبه بتقابل الاعداء العاديين الي بيضربوك بالمسدس بعد كده تتفاجئ بعدو معاه mp5 يخليك تفكر كذا مره قبل ما تواجه ومره تلاقي نفس العدو بس معاه درع فتضطر انك تتفاده وفي لحظه من الزمن تلتفت وراه وتخوقه وبعديه تلاقي عدو اشبه بالقرد ينط عليك من ابعد مكان ويقتلك او الالات الي مش بتديك فرصه انك تبص حوليك حتي كل وده وتلاقي درع شامل علي كل الاعداء مجتاج تدمره الاول قبل ما تعرف تقتلهم.كل ده يخليك تفكر الف مره قبل كل خطوه تعملها والي بيزود من متعه اللعبه اكتر فانت متحلمش انك هتحس بلحظه ملل اثناء اللعب .

لعبه ghostrunner لعبه بلاتفورمنج عظيمه تستاهل تاخد مكان افضل لعبه بلاتفورمنج بسنة 2020 فكرتني بأيامي لما لعبت mirror edge و dishonored وكمان في بعض الاحيان spiderman يعني لعبه اكتر من ممتازة وأكيد لازم تجربها.

  • الايجابيات

+ تصميم مراحل متقن
+قصه متوسطه
+ تنوع فشيخ في الاعداء
+ قتال زعماء

  • السلبيات

تصميم مراحل ال cybervoid
لجزء الثاني في اللعبه غير ممتع
قلة ال check points خصوصا في المراحل المتقدمة

التقييم النهائي 8.5/10

author-avatar

About Hussein

محرر وكاتب، بحب جداً هواية الفيديو جيمز، هوايات كتير اتغيرت في حياتي إلا ألعاب الفيديو متغيرش شغفي ليها، بالعكس كان بيزيد مع مرور السنين .. بعشق ألعاب الاربيجي سواء الغربية زي فال اوت وويتشر وايلدر سكرولز او اليابانية زي فاينال فانتسي وبيرسونا ودراجون كويست