تخيل نفسك قاعد مستني اليوم اللي تنزل فيه اللعبة الجديدة من السلسلة اللي بتعشقها، EA Sports FC، اللي كانت قبل كده معروفة بإسم FIFA. كل سنة بيجي نفس الوقت، وتبدأ الأسئلة اللي متعود عليها: “هو إيه الجديد؟” و”يا ترى اللعبة هتكون مختلفة فعلاً ولا مجرد تعديلات بسيطة؟”؛ وبتبدأ بقى تشوف الإعلانات، وتسمع عن التقنيات الجديدة اللي بيقولوا عليها إنها هتغير اللعب تمامًا. بس مع كل الحماس ده، بتحس إنها شوية تعديلات شكلية، ومش تغييرات جذرية في قلب اللعبة.
ولما تشغل اللعبة لأول مرة، هتحس إن فيه تحسن، بس من غير ما يكون فيه ثورة حقيقية. التحسينات دي ممتعة، لكن مش بتوصل لدرجة إنها تخليك تحس إنك بتلعب لعبة مختلفة تمامًا عن اللي فاتت.
نيجي دلوقتي للنسخة الجديدة اللي هي FC 25. الحقيقة، التغييرات اللي اتقال عنها بتقول إنها بتدي إحساس إنها تحسينات تدريجية أكتر من إنها ثورية في اللعبة. طبعًا في ناس كتير متحمسة بس هل فعلاً التغييرات دي هتخلينا نقول إن اللعبة دي بقت أحسن بشكل كبير؟
الجيم بلاي
أول حاجة لازم نتكلم عنها هي الجيم بلاي أو أسلوب اللعب، واللي زي كل سنة بيكون عليه الكلام الكبير. السنة دي EA قدمت لنا حاجة جديدة اسمها “FC IQ”، واللي بصراحة تعتبر التغيير الأهم في النسخة دي. الفكرة من FC IQ إنك تقدر تتحكم في أدوار اللاعبين في الفريق بطريقة أدق. يعني، مثلاً، تقدر تخصص لكل لاعب دور معين حسب مهاراته. زي ما تقول كده، الجناح ممكن تدي له دور إنه يركز على العرضيات والهجوم من الاطراف، بينما رأس الحربة ممكن تركزه أكتر على إنه يدخل جوه منطقة الجزاء ويسدد على المرمى.
التغيير ده جميل، لإنه بيسهل عليك حاجات كتير، وبيخلي اللاعبين يتحركوا بذكاء أكتر من غير ما تضطر تتحكم فيهم بشكل يدوي زي الأول. يعني مثلاً، لما تكون في هجمة مرتدة، مش هتحتاج تضغط على الأزرار علشان تحرك اللاعبين. النظام بقى ذكي لدرجة إنه بقى يعرف إزاي يتحرك حسب الموقف ودور اللاعب.
التعديل ده فعلاً أضاف طبقة جديدة من الواقعية، لأنك مش بس بتتحكم في الكرة، لكن كمان بتتحكم في الفريق كله بطريقة أذكى. اللاعب اللي بتخصص له دور معين هيغيرلك شكل التشكيل كله لما تنتقل من الدفاع للهجوم أو العكس. ده شيء بيدي متعة كبيرة للي بيحبوا التفاصيل في اللعبة، الناس اللي بتحب تركز في كل حركة وكل تكتيك.
نيجي بقى للتكتيكات. طبعًا FC IQ مديك خيارات كتيرة إنك تخصص تكتيكاتك حسب اللي إنت شايفه مناسب. يعني تقدر تلعب بطريقة 4-4-2 لو بتحب توازن بين الهجوم والدفاع، أو 4-3-3 لو بتحب تهاجم من الأطراف. الحلو في الموضوع إنك تقدر تغير الخطة بتاعتك في وسط الماتش بناءً على اللي بيحصل على أرض الملعب، يعني لو شايف إن الفريق محتاج ضغط أكتر، تقدر تعدل التكتيك وتدي أوامر جديدة.
اه كمان اللعبة بتضيف الخطة الحقيقية الخاصة بكل مدرب واللي تقدر تضيفها لخططك وتبدل بينها وبين خطتك الأساسية أثناء الماتش يعني مثلا لو مدربك انشيلوتي هتلاقي انك تقدر تطبق خطة وتكتيك ريال مدريد الحالي وتلعب بيه جوا ماتشات الالتيميت تيم
وكمان اللعبة بقت ذكية في تحليل أداء اللاعبين، وبتديك اقتراحات فورية لو في حاجة محتاجة تعديل. يعني لو فريقك مش ماشي كويس في المباراة، اللعبة هتديك إشارات تساعدك تاخد قرارات أحسن. ده شيء فعلاً جديد، وبيساعد جدًا في الماتشات الصعبة.
أما بالنسبة لحركة الكرة على أرض الملعب، لازم نعترف إن التمرير بقى أسرع من النسخة اللي فاتت، وده شيء حلو. إرسال الكرات الطويلة بقى سلس أكتر، والتسديد كمان بقى أسرع واستجابته أحسن. يعني لما تيجي تسدد دلوقتي، بتحس إن الضربة قوية ومؤثرة، مش زي الأول لما كانت الضربة بتاخد وقت عبال ما تتنفذ.
من الحاجات اللي أضافتها اللعبة السنة دي كمان هي تأثيرات الطقس. يعني لو بتلعب في ماتش تحت المطر، هتحس إن الكرة بتتحرك بطريقة مختلفة، مش بتنزلق بسهولة زي لما تكون الأرض ناشفة. اللحظات دي بتدي شعور واقعي أكتر، وبتخلي اللعبة ممتعة لما تحس إنك بتتعامل مع عناصر الطبيعة وانت بتلعب.
بس خلينا نبقى واقعيين، على قد ما التعديلات دي عظيمة، إلا إن لسه في مشاكل بتواجهنا في أسلوب اللعب. يعني مثلاً، على قد ما الذكاء الاصطناعي اتحسن في اللعبة، إلا إن في مواقف بتحس إن الدفاع مش قوي كفاية. اللاعب السريع لسه يقدر يعدي من المدافعين بسهولة، والمدافعين ساعات بتحس إنهم مش على المستوى اللي إنت محتاجه في اللحظات الحرجة. ده بيخلي الدفاع محتاج إعادة نظر، لأن في اللحظات دي بتحس إن اللعبة مش عادلة.
وفيه حاجة تانية لاحظناها، وهي إن مفيش تعليمات مباشرة تخلي اللاعبين يضغطوا بقوة بعد ما يخسروا الكرة. يعني الدفاع هو نص اللعبة، لكن في EA Sports FC 25، تحس إن التركيز أكتر على الهجوم. هتلاقي إن التكتيكات الجديدة مش بتديك الحرية الكاملة في الدفاع زي الهجوم. يعني، مثلاً، مفيش إعدادات كتير تخليك تضغط على الخصم بشكل عالي. كان نفسي أشوف خيارات أكتر في الضغط والتغطية الدفاعية، زي التغطية الضيقة أو الضغط العالي بعد فقدان الكرة. ده شيء للأسف لسه مش موجود بشكل قوي، وده بيخلي الدفاع في اللعبة لسه مش بالمستوى المطلوب.
في النهاية، حتى مع التعديلات دي كلها، الدفاع لسه ضعيف ومحتاج شغل كتير. مهما كانت خطتك هجومية أو دفاعية، بتحس إن الأداء في الدفاع بطيء وبيفتقر للتحكم الدقيق. ساعات تحس إن اللاعبين مقيدين في حركاتهم، وكأنهم مش متحركين بحرية.
من الحاجات اللي اتحسنت فعلاً هي حراس المرمى. دلوقتي تقدر تحرك الحارس بيدك قبل التسديدة، وده بيدي فرص أكتر للتصدي في اللحظات الحاسمة. لكن برضه، التحسين ده مش بيغير إن الدفاع كله محتاج تحسينات أكتر.
الجرافيكس
بالنسبة للجرافيكس، مش هتلاقي اختلاف كبير بين FC 25 والإصدار اللي فات. في شوية تحسينات في الإضاءة وزوايا الكاميرا، لكن مش تغييرات ضخمة. اللاعبين لسه شكلهم حلو، وحركة الجماهير متناسقة مع الأحداث اللي على أرض الملعب. كمان حركة الشعر والقمصان بقت واقعية أكتر، وده شيء بيخلي المشهد العام للعبة ممتع.
أطوار اللعب
طور المدير الفني
لو هنتكلم عن طور المدير الفني “Career Mode”، فالسنة دي أخيرًا EA قررت تدي الطور ده التحديثات اللي كان مستنيها من زمان. التحسينات دي بقت واضحة جدًا، وخلت الطور أكتر مرونة وتخصيص. يعني مثلًا، بقى عندك قدرة إنك تحدد توقعات وأهداف المجلس بالطريقة اللي تناسبك. دلوقتي تقدر تخلي الأهداف دي متساهلة أكتر معاك، وده هيساعدك إنك متتحطش تحت ضغط إنك تصرف كل ميزانية الانتقالات أو تنطرد لو متمشتش على توقعات النادي.
ومن الحاجات اللي خلت الطور ممتع أكتر هي إنك دلوقتي تقدر تتحكم في خطط التدريب بتفاصيل أكبر. تقدر تحدد مستوى الصعوبة في تدريبات اللاعبين، وكمان تحدد الأدوار اللي تناسب كل لاعب حسب مهاراته. ده بيدي تجربة أعمق في تطوير اللاعبين، وخصوصًا المواهب الشابة اللي ليهم مستقبل طويل في الفريق. الناس اللي بتحب تطور اللاعبين بنفسها هتلاقي إن التحديث ده ممتاز جدًا، لإنك بقى عندك تحكم أكبر في كيفية تدريب اللاعبين وتحديد أسباب التركيز على كل واحد.
