لما تم الإعلان في 2018 عن لعبة DOOM Eternal توقعنا إننا هناخد تجربة منظور شخص أول ممتازة زي لعبة DOOM 2016 ولكن إستوديو id Software تخطى كل التوقعات وقدم لعبة نقدر نقول عليها إنها أفضل وأقوى لعبة منظور شخص أول هتجربها لحد دلوقتي.
قصة DOOM Eternal على السطح بسيطة جداً ، الجحيم إحتل كوكب الأرض و60% من البشرية ماتت ، هنا هيجي دورك كشخصية الـ DOOM Slayer بإنك تتصدى لقوى الجحيم وتنهي غزو الأرض لإنك أنت هو الشئ الوحيد الي بيخافوا منه.
بتبدأ مهمتك بمحاولة قتل 3 من كهنة الجحيم عشان تنهي غزو الأرض ولكن مع التقدم في القصة هتلاقي إنها بتنفتح أكثر وأكثر وبيظهر أعداء جديدة أقوى وأشد ولكن الهدف الرئيسي لا يزال ثابت وهو إنهاء غزو الأرض. الحاجة المميزة بقى هي وجود الـ Codex Entries زي جزء 2016 والي بيدوك فكرة عن العالم وليه الجحيم إحتل الأرض ومين هم أعدائك دول وليه في الأساس هما أعدائك ، إيه قصة كل شيطان من الشياطين والأهم من كل ده : إيه هو تاريخ البطل The DOOM Slayer.
أسئلة كتير هتسألها لنفسك طول فترة القصة وإجابة معظمها هتلاقيها في الـ Codex Entries الي بتشرح كل حاجة بشكل أكثر من ممتاز ، اللعبة فيها مجموعة من المفاجئات المميزة الي هيحبها كل الناس خاصةً الي لعبوا الأجزاء القديمة الي صدرت في التسعينات. عشان تنهي القصة هتحتاج حوالي 13 ساعة تقريباً ولكن المدة ديه ممكن تزيد لو قررت إنك تستكشف وتنهي كل حاجة جانبية في اللعبة وهتوصل معاك لـ 16 أو 17 ساعة.
زي كل أجزاء السلسلة فالتركيز الرئيسي هنا هو الجيم بلاي ، إستوديو id Software أخد كل حاجة إتقدمت في جزء 2016 وحسن عليها وأضاف ليها مميزات جديدة خلت التجربة أكثر متعة. بالنسبة للحركة فأنت بقيت أسرع دلوقتي مع وجود الـ Dash والـ Monkey Bars الي بيخلوك تتنقل بشكل أسرع وأعلى في البيئة ، برضو بقيت تقدر تتسلق مجموعة مختلفة من الحوائط وبشكل عام الـ Platforming في اللعبة تطور جداً.
في 3 عناصر رئيسية لازم تستخدمهم في اللعبة عشان تقدر إنك تستمر :
- Glory Kills عشان تاخد حياة من الشياطين
- احرقهم عشان تاخد دروع
- قطعهم بالمنشار عشان تاخد طلقات للسلاح
اللعبة بتخليك غصب عنك تستخدم العناصرعشان تقدر إنك تنجو في اللعبة لإنك بدونهم أنت ميت 100%.
الأسلحة في اللعبة هي هي الي كانت موجودة في DOOM 2016 مع بعض التغييرات في الشكل والمميزات ، كل سلاح يعتبر ليه مهمة مُعينة ، يعني مثلاً لو بتحارب شيطان الـ Cacodemon هتضطر إنك تستخدم القنبلة الموجودة في الـ Combat Shotgun وتحدفها في فم الشيطان وبكدة هيخش في حالة ثبات تقدر تعمله Glory وتنهي عليه.
نفس الكلام بينطبق مع كل الشياطين الي بقى ليهم نقاط ضعف مختلفة ، على سبيل المثال الـ Revenant و Mancubus تقدر تدمر نقاط ضعفهم بالـ Scope الموجودة في الـ Heavy Cannon وبكدة هتخلي قوتهم أضعف بكتير وبقى سهل إنك تقضي عليهم.
بالنسبة للشياطين بقى فتم إعادة تصميم مجموعة كبيرة منهم وتم تقديم مجموعة كبيرة من الأعداء في اللعبة ، في DOOM Eternal أنت عندك ضعف عدد الأعداء الي كانوا موجودين في DOOM 2016 وفي منهم أقوياء جداً هيتعبوك في بداية ظهورهم زي الـ Marauder وغيره.
بتقدر في اللعبة تعمل Upgrade لكل الحاجات الي معاك ، الأسلحة تقدر تضيف ليها Mods مختلفة هتساعدك وتقدر بقى تعمل Upgrade للـ Mods ديه وتوصل في الاخر لـ Mod أقوى ، أه انت بتعمل Mods بتديك Mods تانية.
تقدر تعمل Upgrade للـ Suit بتاعتك وتضيف ليها مميزات مختلفة هتساعدك في رحلتك المستمرة لساعات طويلة ، بتقدر إنك تزود حياتك والدروع بتاعتك والطلقات الي معاك في كل الأسلحة وفعلاً انت محتاج الترقيات ديه جداً لإن اللعبة بتصعب مع الوقت حتى لو بتلعب على Normal.
على عكس جزء 2016 فاللعبة هنا مش خطية 100% ، هنا انت هتقدر تستكشف مجموعة كبيرة من المناطق في المستوى الواحد وعندك حاجات إسمها Slayer Gates ، لما بتلاقي المفتاح بتاعها بتخش في Arena كبيرة وبتحارب شياطين أقوياء جداً ولو قدرت تنهي الستة Slayer Gates الي في اللعبة هتاخد سلاح الـ Unmaykr والي يعتبر في نفس قوة الـ BFG. اللعبة فيها مجموعة كبيرة جداً من الأسرار عشان كدة أنت من نفسك هتحب تستكشف كل ركن من أركان المستويات.
لعبة DOOM Eternal مبنية على محرك id Tech 7 وهو النسخة الأحدث من محرك id Tech 6 الي كان مُستخدم في DOOM 2016، كل حاجة في اللعبة اتحسنت رسومياً عن لعبة 2016 ، الحاجة الأساسية الي هتلاحظها هي التنوع الضخم في البيئات ، انت هتزور في اللعبة كمية ضخمة من الأماكن زي الجحيم والأرض والمريخ وقمر المريخ وغيرهم من الاماكن الي هتفاجئك من التصميم المُبهر.
الشركة كانت اتكلمت عن المحرك الجديدة وأكدت إنه بيقدم 10 مرات التفاصيل الي اتقدمت في جزء 2016 وده واضح في كل زاوية من زوايا اللعبة ، لو عايز تعرف معلومات أكتر من المحرك ده أنصحك انك تتفرج على الفيديو الي نزل على قناة Digital Foundry لإنه بيستعرض جمال المحرك وقوته وازاي الإستوديو قدر إنه يركب طبقات على بعض في البيئة عشان يخليها أكثر واقعية وجمال.
تصميم شخصية الـ Slayer والشياطين المختلفة اتحسن جداً عن جزء 2016 خاصةً مع وجود فكرة تقطيع أشلاء الشياطين دلوقتي وده معناه إن كل طلقة هتضربها في الشيطان هتلاقي جزء من جسمه بيطلع من مكانه وبيبان تحته الأشلاء الداخلية والعظام ، إهتمام ضخم بالتفاصيل طبعاً.
الحاجة المفاجأة بقى هي إن أداء اللعبة أفضل من جزء 2016 وديه حاجة أنا متوقعتهاش إطلاقاً ، اه جزء 2016 كان شغال بشكل سلس ولكن كنت بتلاحظ تقطيع في الفريمات واضح في بعض الأحيان والـ Textures مكانتش بتحمل فا كنت بتلاقي مشاكل رسومية ، دلوقتي المشاكل ديه اتحلت تماماً ومن تجربتي للعبة على جهاز PlayStation 4 العادي فاللعبة شغالة على دقة 1080p و 60 فريم في الثانية وحرفياً طول فترة اللعبة محستش إن اللعبة قلت عن الـ 60 ديه تماماً ، يعني رسومات أفضل وأداء أفضل من جزء 2016 وده يوضح مدى قوة وسلاسة المحرك الجديد id Tech 7.
في مجموعة من الشخصيات بترجع من جزء 2016 وأدائهم الصوتي لا يزال ممتاز بل أكثر إمتيازاً من جزء 2016 كمان ، دلوقتي بقى في شخصيات أكثر وأعمق في اللعبة وبتستمتع بأدائهم الصوتي بشكل ممتاز جداً خاصةً مع وجود بعض الشياطين الي بقت بتتكلم حالياً زي DOOM Hunter و Marauder.
أصوات الأسلحة تم تحسينها بشكل كبير عن جزء 2016 وبقيت تحس بقوة السلاح وانت بتضرب مختلف الطلقات القوية والعنيفة منه. طبعاً منقدرش نتكلم عن الأصوات بدون ذكر موسيقى المُلحن المُبهر Mick Gordon ، موسيقى 2016 كانت خرافية لأبعد الحدود وإستمتعنا بحاجات قوية زي BFG Division و Rip and Tear ولكن هنا في Eternal المُلحن قدر يتفوق على نفسه.
الموسيقى بتدل على الشئ الي انت بتعمله في مختلف بيئات اللعبة وحتى لو مش بتحارب شياطين في بيئة من البيئات فا في موسيقى مميزة جداً في الخلفية متناسقة مع البيئة الي انت فيها ، الموسيقى بقى الي بتسمعها وانت في المواجهات هي أروع ما تكون وحماسية لأبعد الحدود وبتدخلك في المود بشكل خرافي ، في بعض الأحيان هتسمع Metal Choir كمان وده لوحدوا حاجة خرافية.
