سلسلة Dead Rising اللي نزلت لأول مرة سنة 2006 من شركة “Capcom” وكانت حصرية بس على Xbox مؤقتًا ساعتها عشان تبين قوته في وقتها واللعبة قدمت فكرة جديدة تمامًا وهو هجوم من مئات الزومبي في وقت واحد بيجروا وراك داخل بيئة تجارية مغلقة. الفكرة دي أضافت إحساس فوضوي وقلق في اللعبة، لأنك بتكون محاصر بين مئات الزومبي في وقت واحد وبتحاول تتصرف بأي حاجة حواليك حرفيًا.

مع إن Resident Evil من نفس المطور إلا أن اللعبة قدمت أسلوب مختلف تماماً عن عنها. بينما Resident Evil ركزت أكتر على الرعب والبقاء على قيد الحياة، Dead Rising قدمت تجربة مليانة حركة وإثارة في عالم مفتوح، واللعيبة بيكون قدامهم مئات الزومبي يتعاملوا معاهم في وقت واحد.

السؤال اللي بيدور في دماغ كل واحد لعب اللعبة هو أو عايز يجربها، بعد سنين طويلة من التوقف وبعد فشل Dead Rising 4، هل النسخة المحسنة من Dead Rising تستحق إنك تشتريها ورجعت السلسلة لمكانها؟ ولا هي مش بتقدم آي تجربة جديدة عن نسخها السابقة مع العلم أن دي تالت نسخة للعبة فهل تستاهل ولا مجرد محاولة من الشركة عشان تحقق مكسب وخلاص؟ 

القصة

القصة بتتكلم عن “فرانك ويست”، مصور صحفي مغامر ما يخافش من أي حاجة. فرانك سمع عن حاجة غريبة بتحصل في بلدة صغيرة اسمها “ويلاميت” في ولاية كولورادو، واللي الجيش قافلها ومش سامح لحد يدخل أو يخرج منها. فضول فرانك خده إنه يدخل البلدة دي بطريقة غير قانونية عشان يطلع بقصة حصرية، وراح على المركز التجاري الضخم اللي هناك.

بس اللي ما كانش في الحسبان، إنه يلاقي المول مليان زومبي، والدنيا هناك بقت زي الجحيم. لقى نفسه محبوس مع شوية ناس لسة عايشين، وبدأ يدور على سر الكارثة اللي حصلت. ومع إنه كان عايز يكشف الحقيقة، برضو كان لازم ينقذ أكبر عدد من الناس قبل ما الوقت يخلص. معاه 72 ساعة بس، يعني قدامه 3 أيام قبل ما الجيش يتدخل.

لعبة Dead Rising مش بس فيها قصة مثيرة، كمان فيها لمسة كوميدية وسخرية اللي بتخليها مختلفة عن باقي الألعاب والأفلام اللي فيها زومبي.

الجيم بلاي

لما نيجي نتكلم عن الجيم بلاي في Dead Rising، نقدر نقول إنها محافظة على أساسها اللي الناس حبوه، بس مع شوية تعديلات وتحسينات تفرق. الفكرة الرئيسية إنك تقدر تستخدم أي حاجة حواليك كسلاح عشان تفضل عايش. يعني أي حاجة تقع عليها عينك، سواء مسدس، مضرب بيسبول، حلة، أو حتى حاجات غريبة زي الدمى والسيوف البلاستيك، أو حتى المجوهرات تقدر تستعملها. التنوع ده بيضيف متعة، ويخليك دايمًا تبتكر حلول جديدة قدام الزومبي خصوصًا إنك في مول تجاري مليان محلات تقدر تخش اي محل وتستخدم منه آي حاجة تحارب بيها. اللعبة بتديك حساس كأنك فعلاً في موقف بقاء، وأي حاجة قدامك هتكون مفيدة.

في النسخة الأصلية كان أكبر تحدي إن الأسلحة اللي بتستعملها كانت بتتكسر بسرعة. دلوقتي بقى فيه شريط بيوضح لك السلاح قرب يبوظ إمتى، وده بيديك فرصة تغيره في الوقت المناسب بدل ما تفاجأ إن السلاح باز في وسط المعركة.

واحدة من أهم التحسينات في النسخة الجديدة هي نظام الحفظ. زمان كنت مضطر تحفظ في أماكن معينة بس، وده كان عامل قلق لأي حد بيلعب، خصوصًا لو مات فجأة وخسر تقدمه. دلوقتي بقى فيه نظام حفظ تلقائي، وده خلى اللعبة أريح وأقل توتر.

برضو التحكم في التصويب واستخدام الأسلحة النارية اتحسن. في النسخة القديمة كنت لازم توقف تمامًا عشان تضرب نار، وده كان بيخليك هدف سهل للزومبي، لكن دلوقتي تقدر تتحرك وتضرب في نفس الوقت، وده خلّى اللعب أسرع وأسهل.

الذكاء الاصطناعي للزومبي والناجين اتحسن شوية، لكن لسه فيه مشاكل. الناجين اللي بتحاول تنقذهم ساعات بيتصرفوا بطريقة غبية ويعملوا حاجات تضيعك، وأحيانًا القتال بيحسسك إن الأوامر بطيئة شوية في التنفيذ.

الاستكشاف في اللعبة كمان لسه فيه تحدي كبير. الخريطة اللي بتاخدها صغيرة جدًا، وانت اللي لازم تكتشف الطرق لوحدك. ومع وجود الزومبي في كل مكان، الموضوع بيبقى مرهق وصعب إنك تلف وتدور في المكان بشكل مريح.

الجرافيكس

من ناحية الجرافيكس، التحسينات في Dead Rising واضحة جدًا. الشخصيات والبيئات بقت شكلها أفضل وأكتر تفاصيل مقارنة بالنسخة الأصلية. مع إن الرسوميات مش بمستوى أحدث الألعاب، إلا إنها تقدم تحسينات كبيرة تخليها تبان كأنها لعبة جديدة بالكامل. التفاصيل في المول، الإضاءة، وتصميم الزومبي كلهم بيدوا إحساس بالتطور، وبيخلوا اللعبة أقرب للـ Remake أكتر من مجرد Remaster. اللعبة قدرت تحافظ على طابعها الأساسي مع لمسات بصرية حديثة تخلي التجربة ممتعة وجذابة لعشاق السلسلة واللاعبين الجدد.

التقييم النهائي

8/10

في النهاية، النسخة المحسنة من Dead Rising بتقدم تجربة ممتعة لعشاق السلسلة، مع تحسينات ملحوظة في الجرافيكس، أسلوب اللعب، وبعض عناصر التحكم. اللعبة نجحت في الحفاظ على روحها الأصلية اللي خلتها مميزة عند جمهورها، خصوصًا فيما يتعلق باستخدام أي شيء كسلاح والإبداع في محاربة الزومبي. لكن مع ذلك، التحسينات اللي أضيفت ممكن ما تكونش كافية لجذب اللاعبين الجدد أو اللي جرّبوا النسخ السابقة. السعر المرتفع للنسخة المحسنة يمكن يكون عقبة لبعض اللاعبين، خصوصًا مع وجود خيارات ألعاب أخرى في السوق بأسعار منافسة.

لو أنت من محبي السلسلة، هتلاقي النسخة دي تستحق التجربة، خاصة مع التحسينات في الجرافيكس والحفظ التلقائي. أما لو كنت مجرد لاعب عادي أو جديد على السلسلة، ممكن يكون من الأفضل تنتظر تخفيضات عشان تحصل على اللعبة بسعر مناسب يعكس القيمة الفعلية اللي هتاخدها منها.