مراجعة DARQ: Complete Edition

خلال السنوات الماضية شوفنا ألعاب 2.5D Puzzle Platformer كتير ولكن معظمهم كانوا بيقدموا نفس الأفكار بدون أي إبتكار. من بداية تجربتي للعبة DARQ وأنا كنت متأكد إني أمام تجربة فريدة من نوعها بأفكار مبتكرة ومليئة بمختلف التفاصيل المميزة. لكن على الرغم من ذلك، فاللعبة لم تُقدم تجربة مثالية من كل النواحي.

” تم تزويدنا باللعبة من قبل Feardemic و Evolve PR.”

قصة DARQ بتتكلم عن ولد إسمه Lloyd، زي أي شخص فا هو بيخش ينام بس بيلاقي نفسه في Lucid Dream ( يعني هو عارف إنه بيحلم )، خلال الحلم ده الولد بيواجه مجموعة ضخمة من المخاطر والمخلوقات الغريبة الي بتطارده وعشان كدة بيحاول إنه يهرب منهم سواء عن طريق التخفي والتسلل أو حل لمختلف الألغاز وثني قواعد الفيزياء.

اللعبة بتحاول تقدم فكرة مختلفة في القصة بس للأسف أنا شايف إنها مقدرتش تشرحها بشكل كويس،  هو في قصة بس طول الوقت انت هتبقى مش فاهم إيه الي بيحصل وحتى بعد ما تخلص اللعبة والإضافات بتاعتها هتلاقي نفسك تايه ومش عارف تحط إيدك على نظرية معينة في دماغك بتشرح القصة.

أكيد عارف إن في ألعاب كتير قدمت نفس الفكر ده في طريقة شرح القصة زي Limbo و Inside بس الألعاب ديه بالفعل الإستوديو بيحطلك تلميحات تشرح القصة طوال فترة اللعبة وبعد ما توصل للنهاية هتلاقي مخك تلقائي كون نظرية عن القصة، و DARQ بتفشل في ده. اللعبة الأصلية مش طويلة وهتاخد منك حوالي ساعتين عشان تخلصها، لما تضيف عليهم الـ DLCs الي نزلوا للعبة وهما The Tower و The Crypt فا هتلاقي إن التجربة هتوصل معاك لـ 3 ساعات تقريباً وده وقت حلو بالنسبة لسعر اللعبة الي هو 20 دولار.

التركيز الأكبر في لعبة DARQ على أسلوب اللعبة وهنا الإبداع كله بيظهر، فكرة تحدي قواعد الفيزياء ديه  أنا أول مرة أشوفها في لعبة 2.5D Platformer والمُطور بيقدمها بشكل خرافي، تخيل تبقى ماشي وفجأة تقلب العالم من حواليك وتمشي على الحيطة والسقف !

الألغاز في اللعبة مُصممة بأفكار مبتكرة انا معرفش المُطور نفسه وصلها إزاي وهتحتاج منك جهد وتفكير. اللعبة متقسمة لسبعة فصول، كل فصل بيركز على بيئة مُعينة / حلم مُعين بيكون فيه Lloyd وكل بيئة بتقدم ألغاز مختلفة لحلها، مع تقدمك في اللعبة فالالغاز بتبقى أصعب وأقوى بل وأحياناً هتحتاج منك سرعة في حلها أثناء مطاردتك من عدو ما.

بمناسبة كلامنا على الأعداء فاللعبة بتقدم تصميم حلو جداً للأعداء، في مجموعة أعداء رئيسية هتشوفهم كذا مرة في فصول اللعبة ولكن مفيش أي مواجهة معاهم أو إي إبتكار في عملية التخفي والتسلل، الفكرة كلها إنك بتلاقي عدو قدامك فا بتستناه لما يبص الناحية التانية وتستخبى، العدو يعدي فا تطلع انت من المخبئ بتاعك وتكمل في طريقك لحل الألغاز. الفكرة ديه مش بتتكرر مرة أو 2 بس في اللعبة بل أكثر من مرة ومع الوقت هتبدأ تحس بملل شوية خاصةً وإن الأعداء حركتهم بطيئة فا كنت أتمنى إن المُطور يبتكر طرق أفضل للتخفي والتسلل.

حل الألغاز بيعتمد بشكل رئيسي على إستكشاف كل مكان في البيئة عشان توصل لـ Items مُعينة بتساعدك على فتح باب أو الوصول لأماكن سرية ومخفية وهنا بيجي دور تحدي قواعد الفيزياء، الطبيعي إنك كشخص عادي بتقدر إنك تمشي على الأرض ولكن بما إن Lloyd بيحلم في اللعبة فا بيقدر إنه يواجه القواعد الطبيعية للعالم وبإستخدام بعض الآلات المتواجدة في البيئة بيقدر إنه يقلب العالم رأساً على عقب وبيتحرك على الجدران والسقف ومع التقدم في المراحل هتلاقي الإبتكار بيزيد في حل الألغاز بالطريقة ديه.

طول مانا بجرب اللعبة مكنتش مصدق إن فيه مُطور إشتغل لوحده وقدر يقدم كم التفاصيل المهول الي في اللعبة بألغاز من أفضل ما رأيت في الألعاب لحد دلوقتي. أول 6 فصول في اللعبة كلهم معتمدين على التخفي والتسلل وحل الألغاز وعلى الرغم من إنك هتحبهم بس هتحس إنك محتاج تنويع شوية وهنا بيجي دور أخر فصل من فصول اللعبة، الفصل السابع مفيهوش تخفي وتسلل وألغاز بل بيعتمد بشكل رئيسي على مطاردة ضخمة بيكون فيها كل الأعداء الي قابلتهم طول فترة اللعبة. على الرغم من إن المطاردة نفسها عجبتني عشان قدمت إحساس مختلف للعبة إلا إنها كانت سطحية جداً وكل الي بتعمله فيها إنك بتجري وخلاص، كان هيبقى أفضل لو المطاردة اعتمدت على حل الألغاز بسرعة للهروب من الأعداء وده كان هيدي للاعب إحساس مرعب اكتر ولكن للأسف بعد مالمطادرة تخلص مش هتحس براحة أو إنك عملت إنجاز خاصةً وإن القصة بتقفل و بتفضل مش مفهومة.

أخر حاجة حبيت أتكلم عليها من ناحية أسلوب اللعب هي الإضافات، الإضافة الأولى بعنوان The Tower والثانية بعنوان The Crypt وهنا مستوى الألغاز بيكون أصعب من أي فصل من فصول اللعبة الرئيسية مع إضافة ميكانيكيات جديدة مش هحرقها عليكم عشان لو حبيتوا تجربوا اللعبة بنفسكم، الحاجة الي عجبتني إن الإضافات ديه اتقدمت للاعبين بشكل مجاني على الحاسب الشخصي ولو اشتريت اللعبة على الكونسول فا هتمتلك النسخة الكاملة والي فيها الإضافات ديه.

من ناحية الرسومات فا DARQ بتتميز بتصميم خفيف بألوان باهتة بتقدر إنها تدخلك في مود الرعب والكآبة والأحلام بشكل مميز جداً. اللعبة طاغي عليها اللون الرصاصي والموف معظم الوقت و ده بيخلي شكلها مختلف عن أي لعبة جربتها من النوعية ديه.

زي ما ذكرت في كلامي عن أسلوب اللعب فا كل Chapter بيقدملك بيئة مختلفة تماماً عن الـ Chapter الي قبله وعلى الرغم من إن طابع الكآبة مأثر على كل فصل من فصول اللعبة إلا إن إختلاف البيئات بيديك إحساس بالتنوع الدائم. من أكثر المناطق الي حبيت تصميمها هي وجود واحد من الفصول على قطار متحرك وبتتنقل فيه من عربة لعربة عشان تحل مختلف الألغاز وتواجه  أعداء مُنوعة.

الأداء التقني للعبة كان ممتاز، أنا جربت اللعبة على منصة Xbox Series S ومواجهنيش في اللعبة أي مشاكل في الفريمات أو الأداء العام للعبة، ولكن للأسف واجهتني مشكلة تقنية واحدة وهي إني لما بدأت إضافة The Crypt اللعبة كانت جايبة شاشة سوداء وإضطريت إني أقفلها و أفتحها تاني عشان المشكلة تتحل وده خطأ تقني لازم الإستوديو يركز عليه ويحله عشان أنا لوهلةٍ ما افتكرت إن الإضافة معتمدة على الأصوات.

اللعبة مفيهاش موسيقى تصويرية ومفيهاش حوارات بل الإعتماد الكامل على المؤثرات الصوتية وديه اتقدمت بإحترافية كبيرة خاصةً وإن الي صممها هو مُطور إشتغل على ألعاب ضخمة أهمهم Cyberpunk 2077.

الخلاصة :

تجربتي مع DARQ كانت تجربة مميزة، المُطور نجح في إنه يستعين بأفكار قوية من ألعاب رعب أخرى ولكنه أضاف نكهة مختلفة للعبته بتقديم ألغاز صعبة بتعتمد على التفكير المستمر والسريع وتحدي قواعد الفيزياء، ولكن شخصياً كنت أتمنى إن اللعبة تكون أطول في المدة مع التركيز على محاولة شرح القصة بشكل أفضل. لو حبيت ألعاب زي Limbo و Inside فأنصحك بتجربة DARQ فوراً.

التقييم النهائي : 7.5/10