News, Reviews

مراجعة Crash Bandicoot 4: It’s About Time

مراجعة Crash Bandicoot 4: It's About Time

إصدار ريماستر لثلاثية Crash Bandicoot في 2017 كان تلميح صريح من Activision إنها ناوية ترجع للسلسلة مرة تانية ومن ساعة ما تم الاعلان عن الجزء الرابع كان في بعض التخوفات والاصوات المتشائمة. سبب التشاؤم منطقي وهو إن إستوديو Toys for Bob هيشتغل على اللعبة بشكل فردي بدون مساعدة من المطورين الاساسيين للسلسلة، ده غير الآراء السلبية إلي قبل الاصدار إلي كانت بتقول إن الإستوديو هيفشل في تقديم جزء رابع.

يسعدني إني أقولكم إن إستوديو Toys for Bob بطريقةٍ ما قدر بالفعل إنه يتفوق على ثلاثية Naughty Dog الأساسية إلي نزلت في تسعينيات القرن الماضي وقدم واحدة من افضل تجارب الـ Platforming إلي هتفضل في ذاكرتي لفترة طويلة.

مراجعة Crash Bandicoot 4: It's About Time

كعادة ألعاب Crash Bandicoot فا مش بيكون فيها تركيز كبير على القصة بس على الرغم من كدة فإستوديو Toys for Bob نجح في انه يقدم تكملة ممتازة لأحداث Crash Bandicoot 3 Warped وشوفنا عودة مجموعة من الشخصيات الشريرة الي حبيناها زي Neo Cortex و Nefarious Tropy وغيرهم من الأعداء.

في الجزء الي فات بعد ما هزمنا Neo Cortex و Nefarious Tropy و Uka Uka قدرنا ان احنا ندخلهم في سجن زمني بس بتوحيد قوتهم قدر Cortex و Tropy إنهم يهربوا وأثناء هروبهم قتحوا نوع من انواع الأكوان المتعددة، كالعادة دورنا احنا كـ Crash و Coco اننا نقفل البوابات الزمنية وننقذ العالم من الأشرار. قصة لذيذة وخفيفة ومليانة بأحداث ولقطات كتير مضحكة هتحبها وهتحب شخصياتها جداً.

مراجعة Crash Bandicoot 4: It's About Time

أهم حاجة بتميز كل ألعاب Crash Bandicoot هي أسلوب اللعب، إستوديو Toys for Bob نجح في انه يحافظ على هوية أسلوب اللعب القديم الصعب من ناحية، ومن الناحية التانية نجح في انه يقدم مجموعة ميكانيكيات لعب جديدة أضافت مميزات مختلفة لأسلوب اللعب.

في البداية حابب بس أقول حاجة عشان الناس الي بتشتكي من صعوبة اللعبة، الإستوديو حالياً بيقدملك مود إسمه Modern تقدر تخلص القصة كلها عليه، في المود ده انت عندك حياة لا نهائية ولو مُت بترجع من الـ Checkpoint السابقة على طول. ده على عكس المود الكلاسيكي الي بيلعب عليه مُحبين كراش وهو ان بيكون عند عدد محدود من الحيوات لما بتخلصهم بتعيد المرحلة كلها من الأول تاني.

مراجعة Crash Bandicoot 4: It's About Time

ميكانيكيات اللعب الأساسية الي اتعودنا عليها موجودة زي Double Jumping و Spin  و Slide وكل الحاجات الحلوة ديه بس المرة ديه في 4 أقنعة هيتقدمولك على مدار قصة اللعبة، كل قناع منهم بيكون له قدرات خاصة بتقدر تستفيد بيها في المراحل المختلفة.

قناع منهم بيكون له القدرة على انه يعمل Spin بشكل أقوى و يعمل Double Jump أعلى  فا بيساعدك في انك تعدي الفجوات الكبيرة، قناع تاني بيقلب الجاذبية فا بدل ما تمشي على الارض بتمشي على  السقف، القناع الثالث بيوقف الوقت لفترة محدودة والقناع الرابع  والأخير بيغير من تركيب العالم الي حواليك عشان يقدملك Platforms جديدة تقدر تنط عليها. كل قناع من دول بيتم إستخدامه طول فترة اللعبة وكل مرحلة بتقدملك أفكار جديدة تقدر تستفيد بكل الأقنعة فيها.

مراجعة Crash Bandicoot 4: It's About Time

اللعبة بتقدملك شخصيات جديدة قابلة للعب وهما Doctor Neo Cortex و Tawna و Dingodile، الشخصيات بيتم تقديمها بشكل اجباري في مراحل معينة وبعد كدة مراحلهم التانية بتكون قدامك كمراحل جانبية تقدر تستمتع بيها بجانب القصة الرئيسية. شخصية Cortex بيقدر يعمل Dash ومعاه سلاح بيقتل بيه الأعداء وبيحولهم لمادة مطاطية. شخصية Tawna  بتقدر تعمل Wall Jumping ومعاها خطاف بينقلها للأماكن البعيدة وأخيراً شخصية Dingodile معاه سلاح بيشفط حاجات مختلفة في البيئة وتقدر ترميها على الأعداء عشان تقتلهم أو تكسر مكان تعدي منه.

لعبة Crash Bandicoot 4: It’s About Time هي أضخم لعبة Crash اتقدمت لحد دلوقتي، مراحل القصة الأساسية هما 43 مرحلة وأخدوا مني في حدود 8 ساعات ونص عشان اخلصهم، غير المراحل الأساسية فأنت عندك مراحل جانبية بكل الشخصيات الي ذكرتها ديه وفي كمان حاجة اسمها Flashback Tapes. الـ Tapes بتاخدها أثناء رحلتك في القصة الأساسية وبتقدر تلعبها كمراحل جانبية عشان تشوف التجارب الي عملها Cortex على Crash و Coco لما كانوا في المعمل بتاعه زمان.

مراجعة Crash Bandicoot 4: It's About Time

اللعبة بتقدملك 6 مواجهات لزعماء، 3 منهم سهلين إلى حداً ما والـ 3 التانيين في قمة الصعوبة حرفياً بس على الرغم من الصعوبة ديه فا هي تجارب ممتعة هتحتاج منك تركيز وسرعة وفي بعض الأحيان استخدام الأقنعة الي اللعبة بتقدمهالك خلال القصة.

زهقت من القصة وعايز تجرب حاجة مع صحابك ؟ لعبة Crash Bandicoot 4 بتقدملك Local Multiplayer ( يعني لازم الي هيلعب معاك يكون قاعد جنبك بدراع تاني ). اللعبة بتقدملك مودين، المود الأول هو Crate Combo وهنا بتنافس صاحبك على مين الي يقدر يكسر صناديق اكتر في مرحلة معينة والي هيكسر اكتر طبعاً هيكون هو الفائز. المود التاني وهو Checkpoint Race وهنا اللعبة بتحسب الوقت من ساعة ما تبدأ لحد ما توصل للـ Checkpoint والفائز بينكوا هيكون هو الي وصل بشكل أسرع.

مراجعة Crash Bandicoot 4: It's About Time

لعبة Crash Bandicoot 4 مبنية بالكامل على محرك Unreal Engine 4 وده محرك مختلف تماماً عن الي استخدمه إستوديو Vicarious Visions لتصميم الثلاثية، بالتالي هتشوف نقلة رسومية ضخمة بين الثلاثية والجزء الجديد من ناحية كل حاجة. تصميم الشخصيات ممتاز سواء الشخصيات الرئيسية أو الأعداء وحركة أجسادهم وتعابير وشهم مُحسن بشكل ضخم عن الثلاثية.

اللعبة بتقدملك مجموعة ضخمة من البيئات وكل مرحلة هتحسها مختلفة تماماً عن الي قبلها بسبب التنوع، على سبيل المثال هتلاقي بيئات ثلجية وغابات وبراكين ومستنقعات ومدن مستقبلية ومدينة مبنية على الطراز الياباني وحاجات كتير هتاخد مني وقت عشان اذكرهالك كلها.

مراجعة Crash Bandicoot 4: It's About Time

تصميم كل بيئة من البيئات معمول بإحترافية كبيرة وكل مرحلة  فيها كمية ضخمة من التفاصيل المميزة، التفاصيل مش باينة بس في الاماكن الي انت بتتحرك بيها داخل المرحلة، لا ديه كمان بتظهر بشكل أوضح في تصميم البيئات المحيطة بيك والي ساعات بتلاقي فيها Easter Eggs من ألعاب تانية زي Spyro، المؤثرات البصرية زي الإنفجارات بيغلب عليها الطابع الكرتوني طبعاً بس شكلها لطيف جداً. بعض المؤثرات التانية الي اتفاجئت من وجودها هي الإنعكاسات ومعمولة بإحترافية لدرجة انها قريبة جداً من  تقنية تتبع الأشعة الي بنشوفها على الحاسب الشخصي.

الأداء الصوتي لكل الشخصيات ممتاز وفعلاً من المقدمة بس هتخش في مود Crash الي اتعودت عليه من الأجزاء القديمة. مش بس الأداء الصوتي الي هيرجعلك ذكريات، الي هترجعلك ذكريات مميزة أكتر هي وصوات البيئة لما تضرب الأعداء أو تموت أو تعمل Spin. بشكل عام كل الحركات الي اتعودنا عليها في الاجزاء السابقة بترجع بصوتها المميز الي عارفينه مع وجود تحسينات عليه بتخليه مناسب اكتر مع اللعبة.

لعبة Crash مش هتبقى متكاملة إلا بالموسيقى التصويرية وأول لحن هتسمعه في أول مرحلة هو لحن Crash القديم الرائع. المُلحن الي اشتغل على اللعبة قدر يحافظ على أسلوب موسيقى كراش القديمة بس قدم عليها شوية ألحان جديدة مميزة ومناسبة للي اتعودنا عليه.

مراجعة Crash Bandicoot 4: It's About Time

بالنسبة للأداء التقني فا في تعليق لازم يتقال على اللعبة، لو فاكرين ريماستر الثلاثية فا هو كان شغال على 30 فريم في الثانية على كل الاجهزة. إستوديو Toys for Bob قرر انه يشغل الجزء الرابع على  60 فريم وديه حاجة كويسة طبعاً بس في مشكلة موجودة على الاجهزة العادية PS4 و Xbox One، المشكلة هي ان الاستوديو ساب الاطارات مفتوحة ولذلك هتلاقي ان اللعبة عمالة تنط بين 30  و 40 و 60 فريم. بشكل عام ديه حاجة مش حلوة والافضل ان الاستوديو كان يخلي اللعبة مقفولة على 30 فريم مع عمل sync مظبوط للفريمات على 33 مللي ثانية وبكدة مش هتلاقي تغيير تلقائي بيحصل بين الفريمات.

أنا جربت اللعبة على PlayStation 4 العادي واللعبة كانت شغالة على دقة  1080p بس طبعاً بتواجه مشكلة الإطارات ديه. المشكلة ديه موجودة بس على  PS4 و Xbox One العاديين، لو بتلعب على PS4 Pro أو Xbox One X فاللعبة شغالة على 60 فريم ومش بتواجه مشاكل. هل ديه مشكلة هتأثر على التجربة ؟ شخصياً أقدر اقولك لا ، التجربة ستظل ممتعة وسلسة وممكن بتحديث بسيط الإستوديو يديك امكانية غلق الفريمات على 30 فريم.

مراجعة Crash Bandicoot 4: It's About Time

الخلاصة :

 لعبة Crash Bandicoot 4: It’s About Time بالنسبالي هي واحدة من أفضل ألعاب الـ Platformer الي اتعملت في التاريخ. انا مكنتش متوقع ان الاستوديو هيتفوق على الثلاثية القديمة، أنا سعيد ان الاستوديو تفوق على  توقعاتي والثلاثية وحط مستوى جديد لألعاب الـ Platforming.

تجربة متكاملة من ناحية كل حاجة، أسلوب لعب ممتع وصعب، رسومات خلابة، أداء صوتي وموسيقى تصويرية ممتازة مع قصة لطيفة جداً بالشخصيات الي بنحبها. أنصحك بشراء الجزء ده فوراً والإستمتاع بكل حاجة هو بيقدمهالك من قصة ومراحل جانبية.

التقييم النهائي : 10/10

لشراء اللعبة على  PS4 اضغط هنا
لشراء اللعبة على Xbox One اضغط هنا

author-avatar

About promidoz

Editor-in-Chief. About 5 years of experience in Gaming Journalism with more than 13k news written, tens of articles, video scripts and reviews. A hardcore gamer that loves a challenge.