لما دخلت على سن الشباب وحبيت ألعاب الفيديو أكتر، بقيت عايز أرجع للألعاب القديمة خاصًة ألعاب الأركيد اللي كنت بلعبها وأنا صغير. كان فيه كتير من الألعاب الجامدة اللي كانت صعبة جدًا، بس اللي شدتني أوي وكانت أصعب من الباقي كانت لعبة Contra. لعبة Contra Operation Galuga خلتني أفتكر تاني أيام العب الثنائية الأبعاد والجري والضرب من زمن ألعاب الأتاري اللي كنت عايشها وأنا طفل. لعبة Contra كانت من أول الألعاب اللي جابت فكرة الجري والضرب، وعلى مدار السنين، مع إن السلسلة ماحققتش النجاح الكبير اللي حققته اللعبة الأصلية اللي نزلت في صالات الألعاب في آخر التمانينات، ومع التغييرات اللي جت في الأجزاء الجديدة ماكانتش برضوا كفاية علشان تخلي Contra لعبة مشهورة عند الجيل الجديد من اللاعبين. لكن هل Contra Operation Galuga التصوير الجديد للسلسلة والنسخة المحدثة من الجزء الأول أقدر يخلي السلسلة فعلًا ترجع تاني وبقوة ؟ ولا للأسف لأ ومفيش أي فرق بينها وبين أفشل جزء نزل سنة 2011؟ من غير ماطول عليك، يلا يا باشا على المراجعة.
القصة
في لعبة Contra: Operation Galuga، اللي هي عبارة عن تجديد للعبة الأصلية من السلسلة، بتلاقي نفس القصة والأحداث اللي كانت في الجزء الأول. في المستقبل، الجماعة الإرهابية “Red Falcon” احتلوا جزر Galuga قدام سواحل نيوزيلندا وبيشتغلوا على حاجة شريرة بتهدد العالم كله. فبيل ريزر ولانس بين، الكوماندوز النخبة من Contra، بيتبعوا الإرهابيين ويحاولوا ينقذوا العالم، وفي الطريق بيكتشفوا إيه اللي الإرهابيين كانوا بيخططوا له بالضبط وإزاي هيأثر على البشرية.وخلافًا للجزء الأصلي اللي كانت بتركز أكتر على اللعبة نفسها أو بمعنى تاني يعني بتركز على أسلوب اللعب بس مش القصة، في Contra: Operation Galuga بتلاقي كتير من المشاهد القصيرة والحوارات اللي بتعبر عن القصة بالكامل، وده كله خلال الحملة اللي بتمتد على تمان مراحل.
الجيمبلاي
في لعبة Contra: Operation Galuga الهدف واضح وبسيط، تعدي كل المراحل وتضرب كل اللي يقابلك من جنود وروبوتات وكائنات فضائية، وماتفتكرش إنه مبالغة لما أقولك إنك لازم تلعب اللعبة بشكل مثالي علشان توصل لآخر تمانية زعماء في المراحل النهائية. التصميم بتاع المستويات والطريقة اللي الأعداء موزعين بيها بتخلي اللعبة تحدي كبير، حتى لو انت بتلعب على السهل. التصميم المراحل متنوع وجامد جداً، بيحط لاعبين Contra في مواقف مختلفة كتير. كل مرحلة من المراحل التمانية، ما عدا الأولى، فيها حاجات مميزة بتفرقها عن باقي المراحل، وده بيخلي التجربة مثيرة وبيضطر اللاعبين يتأقلموا مع اللعبة، بس متقلقش من الصعوبة العالية عشان مبقتش مزعجة زي زمان في الألعاب الأصلية، دلوقتي بقت أحسن بكتير.
في البداية هكون معاك في الرحلة بيل رايزر ولانس، وهيبقى فيه شخصيات تانية كمان ممكن تلعب بيهم. فيه شخصيات تقدر تفتحها لما تلعب القصة، وفيه تانيين تقدر تجيبهم من متجر اللعبة بعد ما تخلص القصة الأساسية.
القناصين الاتنين الأساسيين من اللعبة عندهم نفس الحركات، زي الجري ونط مرتين والداش عشان يتفادى بيه الطلقات اللي جاية عليه زي أي لعبة أركيد والتصويب في كل الاتجاهات وهما واقفين مكانهم، بس خلي بالك، كل ضربة في Contra مهمة، فلازم تتعود تتفادى بسرعة وإلا هتشوف شاشة الـ Game Over كتير. مع الشخصيات الأساسية في الشخصيات التانية عندها حركات خاصة بيها بتغير من طريقة اللعب. يعني مثلاً، أريانا مش بتعرف تتحرك بسرعة بس بتعرف تزحلق، ولوسيا دراك مش بتعرف تنط مرتين ولا تتحرك بسرعة ولا تزحلق، بس بتعرف تنط لفوق على المنصات وتطلع عليها، وستانلي أيرونسايد مش بيعرف ينط مرتين ولا يتحرك بسرعة، بس بيعرف ينط لفوق زي لوسيا ويتعلق في الهواء لفترة، وده بيساعد اللاعب يعدي المنصات بسهولة.
اللعبة محتفظة بالطراز الأصلي للعبة Contra، يعني اللي اتربى على اللعبة مش هيلاقي حاجات كتير مختلفة. هتستخدم نفس أنواع الأسلحة اللي كنت بتستخدمها في الأجزاء القديمة، من الليزر للبندقية، علشان تقضي على الأعداء اللي انت متعود عليهم. نظام الأسلحة في اللعبة دي مشابه جدًا للجزء الأول من السلسلة، بس فيه شوية تحديثات جديدة مثيرة بتضيف للعبة شوية عمق. كل الأسلحة، زي الرشاش ومسدس اللهب والليزر، ممكن تتطور للمستوى التاني لو جمعتها مرتين في المرحلة أو اشتريتها من المتجر بالنقط اللي بتكسبها وأنت بتخلص المهمات. كل ما تاخد مخاطرة أكتر زي لما تلعب على مستويات صعوبة أعلى أو تلعب على وضع أن اللعبة تقتلك من ضربة واحدة، بتكسب نقط أكتر، وممكن تقدر تستخدم النقط برضوا علشان تكبر شريط الصحة بتاعك، أو تشتري أرواح إضافية، أو حتى تبدأ بسلاح معين.
كل الأسلحة في اللعبة فيها خاصية التحميل الزائد اللي بتخليك تدمرها بس بتطلق هجمات خاصة أو بتديك تأثيرات مفيدة وقوية، وده بيضيف للعبة حتة من المغامرة والمكافأة. بس في الغالب، أنت هتحب تحتفظ بالأسلحة خاصًة لو كانت مطورة بدل ما تدمرها بالتحميل الزائد، لأنها بتكون أقوى بكتير من النسخ العادية. بس لو الشخصية اتضربت مرة واحدة، الأسلحة هتضيع، فلازم تلعب صح علشان توصل بيها للمعركة مع رؤساء المراحل الأخيرة.
الجرافيكس
لما تفتح اللعبة وتشوف الجرافيكس، هتستغرب، لأن الرسومات جميلة جداً وبضيف لمسة جديدة وبتخلي اللعبة تبان أكثر حيوية وإثارة وده حاجة مُختلفة تمامًا عن الأجزاء القديمة لدرجة أنك مش هتصدق أنها فعلا لعبة Contra بتعت زمان!
وكل ما تقدمت في المراحل شوية، هتلاقي نفسك مُبهور بجمالية الرسوميات دي أكتر وأكتر. بس للأسف فيه حاجة، المؤثرات البصرية ممكن تكون زيادة أو مبالغ فيها جدًا، وده اللي ممكن يضايقك، وأحيانًا، المؤثرات دي ممكن تضر بعينيك.
التقييم النهائي
7/10
بتصميم مستوياتها اللي بيجمع بين الإبداع والتحدي، وبتغييراتها الذكية على النمط التقليدي، لعبة كونترا: أوبريشن جالوجا بتعيد تقديم واحدة من أفضل ألعاب الأركيد بشكل مثير وجديد. لكن، رغم مميزاتها الكتير، فيه شوية حاجات ممكن تخلي اللاعبين يتحفظوا، زي قصر القصة، وقلة المحتوى، وعدم وجود خيار اللعب الجماعي على النت، للأسف ده كله هيخلي اللاعبين مش هيستمروا كتير في اللعب اللعبة بعد ما يخلصوا المراحل التمانية لأول مرة.
