مراجعة
Atomic Heart
لعبة Atomic Heart هي أول لعبة للاستوديو الروسي Mundfish ومن نشر Focus Entertainment.
لعبة Atomic Heart من أكتر الألعاب اللي كنت مستنيها بشكل شخصي، وده لأن ألعاب الشوتر اللي بتقدم قصة كويسة دي الوصفة السحرية بالنسبالي وبالنسبة لكتير من اللي بيحبوا ألعاب الشوتر بشكل عام، وأكيد كلنا عارفين ازاي لعبة زي Bioshock حفرت مكانها في تاريخ الألعاب، ومع كل لعبة شوتر جديدة بنبقى مستنيين نشوف حاجة شبه Bioshock، والآمال على Atomic Heart كانت عالية أوي في الحتة دي.
بجانب الدوشة اللي انتشرت عن اللعبة من قبل ما تنزل حتى، فتلاقي اللي بيقول إنها مؤامرة روسية على أوكرانيا، عشان يعني الاستوديو المطور هو استوديو روسي، واللي بيقول إنها بتقدم محتوى جنسي ضخم ولازم نقاطعها وكدة، تعالوا نتكلم عن اللعبة نفسها من غير أي كلام تاني، ونشوف، هل فعلا Atomic Heart تجربة تستحق ولا لا.
القصة والسرد
أحداث Atomic Heart بتحصل في أوائل خمسينيات القرن اللي فات، تحديدًا بعد الحرب العالمية التانية، لكن في اللعبة اللي فاز بالحرب هو الاتحاد السوفيتي، ومش بس كدة، دا وصل لتقدم علمي رهيب محدش وصله قبل كدة، تقدم علمي أكبر من اللي احنا فيه دلوقتي حتى في 2023، فـ بقت الروبوتات حاجة عادية في حياة الناس وموجودة في كل مكان في الاتحاد السوفيتي. التقدم ده بفضل اكتشاف مادة كيميائية جديدة اسمها البوليمر، وهي حجر الأساس لكل الثورات العلمية اللي حصلت.
بتلعب في اللعبة بشخصية الرائد Nechaya المعروف بالكود P-3، وهو رائد كان موجود في الحرب وحصلتله إصابة خلته يفقد جزء كبير من ذاكرته، واللي أنقذه كان البروفيسور Sechenov، المسؤول الأول عن التقدم العلمي اللي بيحصل.
اللعبة بتبدأ والناس في الاتحاد السوفيتي بتحتفل بالتقدم العلمي الكبير وإطلاق تقنية جديدة اسمها Kollective، وهي تقنية بتخلي البشر تقدر تتحكم في الروبوتات بعقولهم بس، باستخدام جهاز بيتحط على الراس اسمه THOUGHT، ولكن قبل أيام قليلة من إطلاق التقنية للناس، بتحصل كارثة كبيرة، وهي إن الروبوتات بتخرج عن السيطرة وبتنقلب على البشر، تحديدًا في منبع العلم والتكنولوجيا، في المؤسسة 3826.
دورك بقى إنك تنقذ الوضع بأسرع وقت ممكن قبل الإطلاق الرسمي لـ Kollective وقبل ما الغرب يشم خبر عن الموضوع وإلا هتكون فضيحة للاتحاد السوفيتي، ودي المهمة اللي بيكلفك بيها البروفيسور Sechenov، وبيديك قفاز ذكاء اصطناعي اسمه Charles عشان يساعدك في مهمتك، فهل هتقدر تكمل المهمة وتنقذ الوضع فعلا؟ ولا التطورات اللي هتحصل في الأحداث والشخصيات هتغير الموضوع؟
القصة مدتها تقريبا 15 ساعة على الصعوبة المتوسطة، ولو استكشفت شوية وعملت شوية محتوى جانبي ممكن توصل معاك لـ 20 أو 25 ساعة، والرقم دا طبعًا معتمد على إنك هتموت كام مرة وهتعدي اللفلات في وقت أد إيه، وعلى الصعوبة اللي هتلعب عليها.
يعني القصة حلوة ولا إيه؟
بصراحة القصة حلوة جدًا، حاجة كدة من ريحة Bioshock فعلًا، مليانة تفاصيل وصراعات وأطراف مختلفة بمصالح مختلفة، وكمان فيه شوية حبكات جامدة في الآخر هتخليك تلغي أي اعتقادات كانت عندك عن النهاية.
مش كدة وبس، دا كمان فيه نهايتين مختلفين للقصة، بيعتمدوا بشكل مباشر على اختيارك في الآخر، فـ يا تختار كذا يا كذا، وكل اختيار فيهم عكس التاني، ومع ذلك مش هتحس إن واحد فيهم مش منطقي، لا، كل واحد فيهم اتشرح بطريقة منطقية والدوافع بتاعتهم مبررة من غير مشاكل.
الجيمبلاي متعة مش بتنتهي!
مش عارف أقول إيه ولا إيه عن الجيمبلاي بصراحة، أنا حاسس إني بقيت مدمن في الأيام اللي فاتت دي!
بالرغم من بساطة الجيمبلاي، هو حرفيا أنت بتضرب بالسلاح والقفاز وبتفادي الضربات، بس كدة، لكنه ممتع لأقصى حد. يمكن ده عشان فيه أسلحة كتير ومختلفة، ويمكن عشان استخدام الأسلحة حلو أوي وحاجة إدمان فعلًا!
الكومبات هنا بيتقسم لحاجتين: الكومبات من قريب، والكومبات من بعيد. من قريب بيعتمد على أسلحة يدوية زي الفاس بأشكاله المختلفة، وعلى الشوتجن كمان، ومن بعيد بيعتمد على المسدس والرشاش وقدرات القفاز، فمثلًأ تقدر ترفع الأعداء في الهوا وترميهم على الأرض، وتقدر تكهربهم أو تجمدهم.
كمان فيه خزنة إضافية تقدر تضيفها للسلاح بعد ما ترقيه للمستوى المطلوب. الخزنة دي بتبقى نار أو تلج أو كهربا، وبتخلي الطلقات يبقى ليها نفس تأثير الخزنة، وده طبعًا بيزود الدامدج وتأثير الطلقات، وده هتحتاجه خصوصًا في الفايتات الكبيرة وفي البوص فايت.
في رأيي إن اللي بيخلي الجيمبلاي حلو أوي كدة، مع الأسلحة والقفاز طبعا، هما الأعداء. الأعداء هنا عدوانيين وأجريسيف جدًا، ف هتلاقي نفسك بتترمي يمين وشمال وبتقوم تهيل وتلاقي اللي جاي يطير عليك وانت مش ملاحق، دا كله بيخلي الأدرينالين عندك يضرب في السما، ودي الصراحة من أهم مميزات اللعبة، إن الذكاء الاصطناعي عالي أوي وبيزود حماس التجربة. واللي يزود من روعة الموضوع هو إن الأعداء متنوعين وفيه منهم أنواع كتير جدًا.
والأعداء هنا بتتضمن زعماء كمان “Bosses” بتقابلهم في البوص فايت، واللعبة كلها فيها حوالي 6 بوص فايت. البوص فايتس جامدة جدا جدا لدرجة إني بعد ما خلصت اللعبة بقيت عايز أرجع ألعب البوص فايتس بس! الموسيقى مع تصميم الفايت نفسه والذكاء الاصطناعي الجامد للأعداء بيخلوا البوص فايت حاجة عظيمة!
حاجة كمان هي الألغاز الممتعة والكريتيف! بصراحة متخيلتش إن في 2023 ألاقي لعبة بتهتم بالألغاز بالطريقة دي، وده إن دل على شيء يدل على تفاني الاستوديو في شغله واهتمامه بكل التفاصيل.
كرافتنج وشوية عناصر RPG
اللعبة بتقدم نظام كرافتنج للأسلحة والذخيرة والهيل، وكمان لقدرات القفاز. بتقدر تكرافت من آلة كدة اسمها نورا، بتلاقيها كل فترة في العالم. للأسف النظام ده مش أحسن حاجة.
الأسلحة لازم تعملها كرافت عشان تجيبها، وعشان تكرافت لازم تلاقي الوصفة بتاعت السلاح، ودي بتلاقيها في صندوق عشوائي وأنت بتلوت، كمان بتلاقي موارد كتير أوي، 8 موارد تقريبًا في اللعبة كلها.
المشكلة هنا هي تعقيد نظام الـ RPG زيادة عن اللازم، فأنت لما تلوت مش بتاخد بالك أنت لميت أد ايه من الموارد دي ولا من الموارد دي، ومفيش حاجة تقولك أنت باقيلك أد إيه عشان تكرافت السلاح الفلاني مثلا، لا لازم تروح على آلة الكرافت وتشوف أنت جمعت اد ايه وهتعرف تكرافت ايه، وده بيخلي موضوع الكرافت مرهق بصراحة.
حاجة كمان هي حتة إنك متقدرش تشيل غير قدرتين بس من قدرات القفاز، ومفيش نظام يخليك تبدل بينهم بطريقة سريعة زي اللي موجودة في Hogwarts Legacy مثلًا، لا، لازم تروح لآلة الكرافت وتبدل القدرة دي مكان دي.
العالم وجمال العالم.. لكن!
من ناحية الجرافيك، فالجرافيك حلو جدًا وهتشوف مشاهد جميلة كتير على الرغم من إن العالم بقى وحشي وعدواني بعد اللي حصل.
أفضل حاجة في تصميم العالم هنا هي الاهتمام الكبير بكل التفاصيل فيه، من ناحية القصة مثلًا هتلاقي حواليك حاجات كتير بتدعم القصة وبتقويها أكتر، فهتلاقي عروض على الجدران وروبوتات بتحكي عن العالم وبداية التقدم العلمي اللي حصل وتفاصيله.
لكن السلبية الأكبر في اللعبة كلها تقريبًا هي العالم المفتوح.
بصراحة أنا مش فاهم ليه أصلًا تعمل عالم مفتوح في لعبة زي دي، فعليًا اللعبة مكانتش محتاجة عالم مفتوح خالص، والأسوأ إن العالم المفتوح هنا متواضع أوي.
الخريطة ملهاش أي لزمة، مفيش بوصلة، مفيش أي وسيلة توجيه محترمة توريك العالم وتشجعك على الاستكشاف، حتى العربيات اللي بتسوقها، سواقتها وحشة وتحس إنها من لعبة تانية مش من Atomic Heart خالص.
كلمة أخيرة
لعبة Atomic Heart هي ميكس جامد بين ألعاب شوتر عظيمة زي Bioshock و DOOM و Fallout، وبصراحة مكنتش متوقع إنها تطلع بالحلاوة دي، فأقدر دلوقتي أقول إنها لعبة شوتر عظيمة جديدة!
عيبها الوحيد هو العالم المفتوح المتواضع ونظام الكرافت اللي محتاج تحسينات كتير. غير كدة، هي لعبة عظيمة بتقدم قصة جامدة وجيمبلاي يخليك مدمن!
التقييم النهائي
8.5/10
