من 3 شهور بالظبط وتحديدًا في شهر يونيو اللي فات في حلقة PlayStation State of Play الأخيرة، أعلنت سوني عن لعبة جديدة حصرية لـ PS5 من نوع الـ Platforming وهي لعبة Astro Bot وده كان عن طريق إعلان مميز ومبهر الحقيقة خلاها واحدة من أهم الألعاب في السنة دي بالنسبالي وأهم لعبة حصرية لجهاز PS5 تقريبًا خصوصا إننا في سنة مفيهاش أي ألعاب طرف اول من استوديوهات بلايستيشن، وبما اني عاشق لألعاب بلايستيشن فكنت مستنيها بفارغ الصبر.
ولو متعرفش فا Astro Bot هي لعبة بتبني على اللي قدمته لعبة Astro’s Playroom اللي صدرت مجانًا بالتزامن مع إصدار جهاز PS5، ومع أنها تعتبر مجرد ديمو لتجربة دراع الـ Dualsense إلا أنها قدمت تجربة مميزة جدًا. أسترو بقى بتقدم نفس التجربة بس أكبر منها بخمس مرات تقريبًا؛ وخلال الفترة اللي فاتت قدرنا نلعبها نخلصها بالكامل، ودلوقتي بنقدم ليكم بقى مراجعتنا الكاملة ليها ونعرف إذا كانت تستحق الشراء ولا لا فا يلا بيناااا!
القصة وعالم اللعبة
بتتكلم القصة عن شخصية Astro اللي تعتبر تجسيد لعلامة بلايستيشن اللي هتكمل 30 سنة قريبًا واحتفالًا بالذكرى دي بيرجع أسترو عشان يفكرنا بالذكريات الجميلة اللي عشناها مع بلايستيشن من اول PS1 لحد PS5. بتبدأ القصة برحلة بيروح فيها أسترو وأصحابه الروبوتات لاستكشاف الفضاء عن طريق مركبة PS5 الفضائية، بس وهما في نص الرحلة بيهجم عليهم كائن فضائي بيدمر المركبة وبيتسبب في سقوطها في كوكب مجهول واختفاء أصحاب أسترو ومن هنا بتبدأ رحلتك في البحث عن اصحابك وقطع المركبة الفضائية الضايعة في المجرات التانية.
في الحقيقة قصة اللعبة بسيطة جدًا ومتوقعة وده طبيعي في لعبة من النوع ده وده اللي ببميزها اصلا، لكن وبالرغم من بساطتها فهي بتقدم لحظات مميزة بترجعلك الذكريات الجميلة اللي عشتها مع PlayStation طوال الـ 30 سنة اللي فاتت وبتقدم برضو بعض اللحظات الغير متوقعة؛ طوال القصة انت هتزور 6 مجرات فيهم أكثر من 80 مرحلة/كوكب وكل كوكب منهم بيتميز بتصميم خاص بيه زي الغابات والصحاري والشواطئ والبراكين.
والأهم من كدا أن في مراحل مقتبسة من تصميم عوالم أهم حصريات بلايستيشن زي God of War و Uncharted واكتر. اللي بيميز المراحل دي مش تصميمها المميز والمبهر بس، بل اللي بيميزها كمان أنها بترجعلك ذكريات جميلة من الألعاب وبتخليك مبسوط طول ما انت بتلعب، وده اللي حصل معايا بما إني عاشق لألعاب بلايستيشن.
المراحل بقى أو الكواكب دي بتقدر تتنقل بينها أو تهبط عليها عن طريق مركبة اسمها Dual Speeder مقتبسة من دراع Dualsense الخاص بالـ PS5، وبمجرد هبوطك على الكوكب بتبدأ تستكشف كل الأسرار عليه وتحل الألغاز اللي فيه وتنقذ كل الروبوتات اللي موجودة عليه واللي عددهم 300 روبوت من بينهم 150 روبوت من شخصيات بلايستيشن، ده كله طبعا وانت بتواجه عقبات كتير سواء من الأعداء نفسهم اللي بيوصلوا لأكثر من 70 نوع جديد أو من عقبات البيئة نفسها اللي هي متنوعة برضو، وبما إننا ذكرنا العقبات فا لازم تعرف إن اللعبة بتقدم 4 مستويات صعوبة حسب كل مرحلة وده عشان تتحدى اللاعبين خاصةً اللي بيحبو التحدي منهم.
في نهاية كل مرحلة بتواجه غالبًا واحد من الزعماء اللي بيوصل عددهم لأكثر من 10 زعماء، كل زعيم منهم بيتميز بتصميم وبيمتلك قدرات ومهارات خاصة بيه وده بيخليك تستخدم كل الأدوات والقدرات اللي بتديهالك اللعبة واللي بالمناسبة بتستفيد بالكامل من مزايا كنترولر Dualsense؛ بعد ما بتخلص المرحلة بترجع مع الروبوتات اللي أنقذتها لمكان اسمه “موقع الحطام” وهو المكان اللي هبطت عليه لأول مرة ويعتبر مقرك الرئيسي واللي تقدر من خلاله تغير لبس أسترو ولون مركبة Dual Speeder وتعمل حاجات اكتر.
مدة اللعبة بتوصل لـ 10 ساعات لو هتركز على المراحل الأساسية بس، ولو هتركز على إنهاء اللعبة بنسبة 100% فا ممكن توصل معاك المدة لحوالي 15 أو 25 ساعة وهي مدة كويسة جدًا للعبة من النوع ده؛ المدة دي هتزيد اكتر المستقبل عن طريق محتويات إضافية مجانية هتتوفر للعبة بشكل مستمر لدعمها بعد الإصدار.
بشكل عام، اللعبة بتقدم قصة بسيطة جدًا ورغم بساطتها دي إلا إنها بتقدم لحظات مثيرة وممتعة بل وأحيانًا مضحكة هتفكرك بكل الذكريات الجميلة اللي عشتها مع كل أجهزة وألعاب بلايستيشن طوال الـ 30 سنة اللي فاتوا، ومنقدرش ننسى اللحظات غير المتوقعة برضو. أما عن عالم اللعبة نفسه فهو من أفضل العوالم في الألعاب من نفس النوع، من حيث التصميم وتنوع المراحل، ده بجانب التوجه الفني المميز لعالم اللعبة اللي يخليك تقعد تتأمل في كل مرحلة جديدة.
أسلوب اللعب
بما ان Astro Bot بتبني على كل اللي قدمته لعبة Astro’s Playroom المجانية فهي بتقدم نفس الجيمبلاي تقريبا واللي هو عبارة عن التنطيط بين كل منصة والتانية ده بجانب مواجهة الأعداء برضو، لكن الفرق هنا أن أسترو بوت بتقدم أدوات وقدرات كتير بيوصل عددهم لـ 15 قدرة تقريبًا، زي قدرة بتخليك تصغر حجمك زي الفأر عشان تتحرك في الأماكن الصغيرة وأداة تانية على شكل القرد بتخليك تمسك أي حاجة في البيئة تقريبًا وترميها على الأعداء وحاجة تانية بتحولك لكرة حديدة وتتصدى لضربات الأعداء من خلالها وأدوات اكتر هتكتشفها بنفسك لما تلعب.
طبعا الأدوات دي بيكون ليها دور مهم جدًا في معارك الزعماء فعن طريقها هتقدر تستغل نقاط ضعف الزعيم اللي بتظهرلك بالتدريج طول المعركة عشان تهزمه في النهاية، ومن بين الأدوات اللي بتوفرهالك اللعبة هي أدوات خاصة بأشهر شخصيات بلايستيشن تقدر تستخدمها في مرحلة معينة زي فأس كريتوس اللي تقدر تستخدمه في مرحلة مقتبسة من عالم لعبة God of War Ragnarök.
وبعيدًا عن القتال اللي الحقيقة يعتبر جزء كبير جدًا من اللعبة، فتقدر برضو تستكشف مراحل اللعبة وتدور على كل الأسرار اللي فيها، وبعض الأسرار دي هتفتحلك حاجات جديدة في مقرك نفسه “موقع الحطام” أو مراحل جديدة سرية واللي في الحقيقة كانت أمتع في بعض الأوقات من مراحل اللعبة الأساسية، وده خلاني أحاول دايمًا استكشف كل المراحل عشان افتح الحاجات الجديدة دي.
الخلاصة إن الجيمبلاي في لعبة Astro Bot، هو من أمتع العناصر في اللعبة ومن أمتع طرق اللعب في الألعاب من نفس النوع “الـ Platforming”، وده في معظم الأوقات هيخليك تدمن اللعبة ومتحسش بالوقت فيها وده اللي حصل معايا، لدرجة إني خلصت معظم المحتوى في اللعبة في اقل من 3 ايام.
الرسوميات والصوتيات
نيجي بقى دلوقتي لاتنين من أهم عناصر اللعبة واللي ميقلوش أبدًا عن العناصر التانية اللي ذكرتها وده لأنهم يعتبروا جزء لا يتجزأ من التجربة المميزة اللي بتقدمها اللعبة. أولًا اللعبة بتقدم توجه فني جميل جدًا وهو توجه بطابع كرتوني شوية هيخليك تندمج اكتر واكتر في عالم اللعبة، أما عن مستوى الجرافيكس فهو من الأفضل في الصناعة خلال الفترة الأخيرة ورغم إن هو بطابع كرتوني زي ما قولت إلا إن فيزيائية عناصر البيئة من حواليك واقعية زي الماية والعشب والتلج ومعظم عناصر البيئة دي تقدر تتفاعل معاها، وده خد اللعبة لمستوى تالت خالص.
بالنسبة للصوتيات فمستواها برضو ميقلش عن مستوى باقي عناصر اللعبة وده لأن صوت كل حاجة في البيئة معمول بإتقان بداية من صوت عناصر البيئة نفسها زي العشب والماية والتلج والهواء وصوت الأدوات اللي بتديهالك اللعبة وحتى صوت الأعداء والزعماء نفسهم، وكمان الموسيقى مميزة هنا فا كل مرحلة ليها موسيقى مميزة خاصةً بيها بتخليك تندمج اكتر في عالم المرحلة نفسها.
الأداء التقني في اللعبة كان كويس جدًا الحقيقة فاللعبة بتشتغل بدقة 4K و 60 فريم ثابتين طوال الوقت، ففي مدة لعبي واللي وصلت لأكثر من 13 ساعة ملاحظتش أي هبوط في الفريمات أو تقطيع ومقابلنيش ولا جليتش أو أي مشكلة تقنية، ده بجانب استغلال اللعبة لمميزات دراع Dualsense بالكامل زي ردود الفعل اللمسية Haptic Feedback والمحفزات التكيفية Adaptive Triggers، فهي تعتبر اكتر لعبة استغلت الدراع في الجيل ده ويمكن تكون الوحيدة اللي استغلته بالشكل ده، ودي حاجة هتخليك منبهر طول اللعبة ومنغمس فيها أكتر من أي لعبة تانية، ومنقدرش ننسى برضو دعم الصوت ثلاثي الأبعاد والتحميل السريع للقوائم؛ كل ده بيخلي التجربة مبهرة أكتر.
في النهاية
حابب اقول إن لعبة Astro Bot قدمتلي تجربة كنت مفتقدها لفترة طويلة، فمن زمان وانا نفسي في لعبة ممتعة من أول لحظة ولحد أخر لحظة ومحسش فيها بالوقت، وده فعلا اللي قدمتهولي أسترو في اليومين اللي فاتوا، فهي لعبة فيها كل العناصر اللي تخلي اي لعبة ممتعة بداية من العالم المبهر والمتنوع والقصة البسيطة المليانة باللحظات الجميلة اللي هترجعلك كل ذكرياتك مع بلايستيشن طول ال 30 سنة اللي فاتوا؛ وحتى الجيمبلاي الممتع ومستوى الجرافيكس والفيزيائية العاليين.
التركيبة دي كلها خلت أسترو بوت واحدة من أفضل ألعاب سنة 2024 وأمتع لعبة لعبتها طول السنة دي، وده مش عشان السنة دي كانت ضعيفة من حيث عدد وجودة الألعاب بل لأن اللعبة بتقدم واحدة من أفضل التجارب فعلا
وعشان كدا تقييمنا النهائي للعبة
10/10
