مراجعة

WWE 2K24

لعبة WWE 2K24، اللعبة اللي بينتظروها جمهورها كل سنة زي حبايبنا اللي بيستنوا فيفا أو اللي كانت معروفة زمان بفيفا. السلسلة دي بتعتبر من الألعاب الرياضية اللي ليها طابع خاص وبتحاول دايمًا تطور من نفسها على طول. بس للأسف، إصدار 2020 كان فيه مشاكل كتير والناس استقبلوه بشكل وحش واتريقوا عليه كتير. 

الفريق اللي بيطور اللعبة قالك مبدهاش وقرر ياخد بريك سنة عشان يعيد تقييم الوضع ويحسن اللعبة، وده خلاهم يرجعوا بتصميم جديد ويحسنوا من سمعة السلسلة. بس السؤال الكبير: هل لعبة WWE 2K24 هي الخطوة الصح اللي هتثبت الرؤية الجديدة دي وتبني إرث جديد للسلسلة؟ ولا هي مجرد نسخة تانية مليانة مشاكل زي إصدار 2020؟ ده اللي هنشوفه في مراجعة وتقييم لعبة WWE 2K24. فيلا بينا يا كبير على المراجعة.

المحتوى وأطوار اللعبة

اللعبة فيها تشكيلة واسعة جدًا من المصارعين، بتقريبا 200 مصارع، يعني زي العدد اللي كان موجود في الإصدار اللي قبله. فيها وشوش جديدة وأساطير المصارعة القديمة، وكمان فيها نسخ مختلفة لبعض المصارعين المعروفين.

وبالنسبة للعبة نفسها، فـ WWE 2K24 محتفظة بالأطوار الكلاسيكية اللي بتميز سلسلة WWE 2K واللي الناس بتحبها في السلسلة بشكل عام، لكن مع شوية تطورات وفي نفس الوقت جابت تشكيلة أطوار الماتشات جديدة ومتنوعة، بتوقع إنها هتبقى شيء أساسي في الإصدارات اللي جاية.

في الإصدار اللي فات من WWE 2K، الأطوار الجديدة للماتشات كانت محدودة، وكان فيه بس اللي كان جديد ماتشات WarGames بتشكيلات 3 ضد 3 و4 ضد 4. لكن WWE 2K24 جاية بتنوع أكبر سيكا في أنواع الماتشات، زي ماتشات الإسعاف اللي اللاعبين بيتصارعوا فيها عشان يحطوا خصومهم في عربية الإسعاف، وماتشات النعش اللي المصارعين بيحاولوا يقفلوا خصومهم جوه نعش، وكمان فيه ماتش الحكم الضيف الخاص للي بيسمح لواحد من النجوم المصارعة يلعب دور الحكم وتلاقيه بقى يعد بطيء أو ميعدش أصلًا، أو حتى يهاجم الخصم اللي مش بيحبه أو اللي مش جاي معاه سكة، وغيرها من الماتشات الجديدة التانية اللي لو كلمت عنهم هنحتاج فيديو خاص ليهم.

نجي بقى نكلم عن الأطوار في بمناسبة الاحتفال بالأربعين سنة لبطولة WrestleMania، فاللعبة جابتلنا طور جديد اسمه “2K Showcase Of The Immortals” اللي بيديك فرصة تعيش وتغير في أجمد وأشهر الماتشات اللي حصلت في تاريخ البطولة دي. الإصدار اللي فات كان مركز على جون سينا وماتشاته الكبيرة، دلوقتي في WWE 2K24 هتلاقي حوالي 20 ماتش أسطوري ممكن تلعبهم. 

زي الماتش الأسطوري بين هالك هوجان وأندري ذا جايانت في WrestleMania 3 لبطولة العالم للوزن الثقيل سنة 1987، أو المواجهة الخالدة بين أندرتيكر وشون مايكلز في WrestleMania 25 سنة 2009، وكتير من الماتشات العظيمة التانية اللي علمت تاريخ البطولة واللي تقدر تلعبهم بكل سهولة. لكن الطور واجه شوية صعوبات في إنه يعيد اللحظات الأصلية والصحيحة في تاريخ المصارعة بالظبط زي ما هي.

وبالنسبة لطور MyRise، الطور ده رجع تاني بسيناريوهات جديدة ومثيرة للرجالة والستات، وهدفك هنا تطور مصارعك الشخصي وتخليه أيقونة في عالم WWE. كل قصة في MyRise المفروض بتقدملك تجربة مختلفة وجديدة. لكن للأسف حسيت إن القصص مفهاش تجديد كفاية وبتكرر نفس الأفكار مع أغلب المصارعين تقريبًا، وده ممكن يخلي اللعبة تفقد بعض من الحماس اللي المفروض تجيبه.

وعن طور MyGM، في WWE 2K23 كان الطور ده بسيط شوية، بس في WWE 2K24 ضافوا حاجات جديدة زي مديرين جدد وأنواع ماتشات مختلفة. وكمان دلوقتي تقدر تبادل النجوم مع مدراء تانيين وتجرب وشوش جديدة في عالم المصارعة.

وأخيرًا، طور Universe، الطور ده شبه السنة اللي فاتت، يعني تقدر تخطط لعالم WWE كله أو تركز على مسار مصارع معين. فيه حاجات جديدة ومواجهات ممكن تضيفها، لكن للأسف محبي طور Universe مش هيلاقوا تغييرات كبيرة حصلت.

الجيمبلاي

نجي بقى لطبق الأساسي واللي هو الجيمبلاي أول حاجة، اللعبة مش مختلفة أوي عن اللي قبلها، بس ده بيورينا إن التحديثات الكبيرة اللي حصلت عملت شغل جامد في تظبيط اللعبة وخلتها ممتعة وده اللي خلى الشركة متعملش أو تضيف حاجات جديدة كتير فيها للسنة التانية. فده شيء كويس إلى حد ما طبعًا.

زي ما كان في نسخة 2K23، النظام الجديد اللي بيشبه ألعاب القتال في الهجوم والدفاع متغيرش كتير. النظام بيرد بسرعة، وعادل وبيدي إحساس حقيقي وفي نفس الوقت ممتع زي الألعاب الأركيد.

أحسن حاجة هي Super finishers. دي بتخلي اللاعبين يخزنوا تلات ضربات نهائية قبل ما يعملوا حركة كبيرة ويفنشوا بيها على الخصم. زي الضربة “الدريل” الجامدة اللي بيعملها سيث رولينز في الماتشات الكبيرة ويفنش بيها على الخصم.

ومش بس شكل من بره، ده فعلاً بيخليك تحس بإيقاع الماتش صح. وكمان بيخلي فيه توازن بين المخاطرة والمكافأة بطريقة مسلية، لأنك ممكن تخزن ضرباتك النهائية، بس ده ما يعنيش إن خصمك هيعمل زيك.

الحاجة الكبيرة التانية الجديدة هي “Trading Blows”. ودي عبارة عن Minigame بيظهر زراير على الشاشة ولازم تدوس عليها بسرعة ويبدأ المصرعين يتبادلوا اللكمات والجمهور يهلل. ده بيحصل لوحده وأنت بتلعب، واللي يغلط في الضغط على الأزرار أو يتاخر بيخسر ويبقى مش قادر يتحرك وسهل يتضرب.

وفيه حاجات صغيرة جديدة تانية في اللعبة هتلاحظها، زي النط من فوق الحبل على مجموعة من الخصوم، أو إنك تقدر ترمي أي حاجة حرفيًا بتقبى قدامك ودي حاجة تفكرك بأيام العز لألعاب المصارعة على البلاي ستيشن 2.

الجرافيكس والأداء التقني

الرسومات في النسخة دي جامدة جداً مقارنة باللي قبلها، خصوصاً في تفاصيل الحلبة والحاجات اللي بتشوفها وأنت بتلعب، كل ده خلى اللعبة شكلها حلو ومثير أكتر. بس يعني، لسه فيه حاجات مش مظبوطة زي شعر الشخصيات اللي لسه شكله مش حقيقي أوي، وكمان فيه حركات مش واقعية زي اللي كانت في الإصدار اللي فات. بس بصراحة، الأداء التقني للعبة عالي أوي. اللعبة شغالة على 60 إطار في الثانية على أعلى إعدادات الجرافيكس وبجودة صورة أصلية، وده كله على كارت شاشة 1650ti، من غير ما تقطع أو تهنج.

التقييم النهائي

8.5/10

لعبة WWE 2K24 دي جنان لأي حد بيحب المصارعة، فيها كل حاجة من الآخر وأساليب لعب جديدة كده، وكمان فيها كل المصارعين اللي ممكن تتخيلهم. يعني متعة وإثارة على طول. صحيح مفيش حاجات كبيرة اتغيرت فيها، بس اللي بيعشقوا WWE هيلاقوا فيها اللي بيدوروا عليه وأكتر.