مراجعة

WWE 2K23

جاهز عشان تعيش قصة جون سينا وتعرف هو ازاي وصل للعالمية؟؟

نجم السنة دي في WWE 2K23 هو جون سينا بنفسه، وهتقدر تلعب الكارير بتاعه كامل وتعرف قصة نجاحه بكل التفاصيل، وتعمل فينش You can’t see me زي ما انت عايز!

دا غير المودات الجديدة والتحسينات في الجرافيك والجيمبلاي،

كل ده بيخلي WWE 2K23 هي احسن نسخة نزلت من لعبة المصارعة المشهورة.

اللعبة موجودة على كل المنصات وتقدر تطلبها دلوقتي.

بقت حاجة معروفة عند الجيمرز، إن ألعاب WWE زيها زي ألعاب FIFA، نفس اللعبة مع تحديث الأسماء والنجوم مع شوية تحسين في الجرافيك، وتنزلك لعبة كاملة كل سنة بسعر كامل، بحجة إنها لعبة جديدة.

لو متعرفش فالموضوع دا أرحم بكتير في ألعاب FIFA من ألعاب WWE، لأن معروف إن ألعاب WWE دايمًا فيها مشاكل، وممكن جدًا تلاقي نسخة سنة أقل من نسخة السنة اللي قبلها، مع مشاكل في التراخيص والمصارعين الجدد، وغيرها من وجع الدماغ.

نسخة السنة دي بقى من WWE تقدر تقول إنها أفضل نسخة نزلت في السنين الأخيرة، بعد تطور كبير في الجيمبلاي وأنظمة اللعبة في نسخة السنة اللي فاتت، لأن اللعبة دلوقتي بقى فيها محتوى حلو فعلًا و مودات تشجعك إنك تلعب، دا كله مبني على النجاح اللي حققته نسخة السنة اللي فاتت أخيرًا بعد فشل طويل..

 دا طبعًا مع وجود واحد من المصارعين الأيقونيين واللي كلنا بنحبه، جون سينا، كواجهة للعبة السنة دي ونجم مود Showcase.

يلا بينا نعرف أكتر عن اللعبة وتفاصيلها من خلال المراجعة.

المودات: هي نفسها مع تعديلات بسيطة

المودات اللي كانت موجودة في نسخة السنة اللي فاتت كلها موجودة هنا بردو.

مود Universe اللي بيخليك تلعب ماتشات عشوائية خفيفة بالمصارع اللي تختاره،

 ومود MyGM اللي بيخليك تلعب كمدير أعمال لأحد المصارعين، وتحاول تخليه يتفوق على المنافسين، بس من الناحية الإدارية والمادية..

وكمان مود MyRise اللي بيخليك تعمل مصارع جديد وتعيش معاه قصة نجاحه في كارير خاص بيك. الاختلاف هنا إنك دلوقتي تقدر تختار من المصارعين اللي انت عاملهم في الإصدارات اللي فاتت من اللعبة، وكمان تخصيص شكل المصارع والتحكم فيه بقى واقعي أكتر.

دا كله طبعًا مع المودات العادية من اللعبة، إنك تلعب ماتش عادي بالمصارع اللي تختاره في العرض اللي تختاره، عندك RAW و SmackDown و NXT وغيرهم من العروض المشهورة، وتلعب فيها سواء لوحدك أو مع حد تاني.

مود الأونلاين كمان موجود، وتقدر تلاعب حد تاني أونلاين، سواء ماتش عشوائي سريع أو تخش مع واحد صاحبك. بس خد بالك، اللعبة مفيهاش كروس بلاي للأسف، يعني مش هتقدر تلعب مع حد على منصة تانية غير المنصة بتاعتك.

مود جديد تمامًا: War Games

أول إضافة حقيقية هتلاحظها في نسخة السنة دي من WWE 2K هو مود War Games الجديد.

في المود ده بيتنافس 6 أو 8 لاعبين، 3 ضد 3 أو 4 ضد 4، بس مش في حلبة واحدة، دا في حلبتين! ومش بس كدة، الحلبتين موجودين جوا قفص حديدي، وكمان مسموح بكل الأسلحة من البداية.

المود دا على الرغم إنه يبان تقليدي شوية، إلا إنه فعلا ممتع وبيغير شوية من أجواء اللعبة المعتادة والماتشات العادية.

حاجة كدة بتديك فوضى وحماس بس مش عاليين أوي، مش زي رويال رامبل مثلا، بس بردو فيها حماس أكتر من الماتشات العادية.

هتعيش قصة جون سينا في مود Showcase!

أكتر حاجة بتميز كل جزء جديد من WWE 2K هو مود Showcase، وده لأنه عامل زي مود القصة كدة، كل سنة بيبقى فيه قصة نجم جديد من نجوم WWE، السنة اللي فاتت النجم كان راي ميستريو ، والسنة دي النجم هو الأسطوري جون سينا.

المود هنا بيقدملك قصة سينمائية مدتها 3 ساعات تقريبًا، مع ميكس بين مشاهد حقيقية من ماتشات جون سينا مع مشاهد من الجيمبلاي اللي أنت بتتحكم فيه، ده مع صوت روائي بيحكيلك القصة برواقة كدة في الخلفية، واللي بيحكيها هو جون سينا بنفسه.

الاختلاف هنا هو إنك بتلعب أهم الماتشات اللي خسرها جون سينا بس، وعشان كدة مش بتلعب بـ جون سينا، لا ، انت بتلعب بالمصارع التاني خصمه. وده كله تحت شعار Never Give Up اللي جون سينا مشهور بيه.

بيكون لازم إنك تعمل حركات معينة في الماتشات عشان تتقدم وتفتح الماتش اللي بعده، وده بيكون مبني على كلام جون سينا اللي في الخلفية وذكرياته مع الماتش ده.. هي طريقة عشان يخليك تعيش الذكريات دي فعلًا، بس تكون انت اللي متحكم في الماتش بردو.

عمومًا، الأسلوب ده بيخليها كأنك بتتفرج على وثائقي جامد معمول باحترافية، فأنت بتعيش مع مسيرة جون سينا بالتفاصيل، من أول ماتشه مع روب فان دام في 2006، وماتشات أيقونية زي ماتشات جون سينا مع ذا روك و أندرتيكر و تريبل إتش وغيرهم، لغاية ماتشات حديثة زي الماتش مع رومان رينز في Summer Slam 2021، كل ده وجون سينا بيحكي ذكرياته مع كل ماتش من دول وتأثيرهم عليه.

كل ماتش منهم معمول بكل تفاصيله، تصميم الحلبة والأجواء والجمهور، وحتى التعليق بتاع الماتش، كلها بترجعك بالذكريات لكل ماتش، ويا سلام بقى لو كنت اتفرجت على الماتشات دي في الحقيقة، هتحس بـ نوستاليجا مش طبيعية في المود ده.

المشكلة في مود Showcase السنة دي هي إنك بتلعب بمصارع مختلف في كل ماتش، وبالتالي هتلعب بحركات مختلفة وأسلوب متغير بين الماتش والتاني، وده ممكن يضايق ناس كتير.

الجيمبلاي هو هو تقريبًا مع تحسينات بسيطة

أول ما تبدأ تلعب WWE 2K23، مش هتحس بفرق كبير عن لعبة السنة اللي فاتت، فـ تقدر تقول إن الجيمبلاي هو هو تقريبًا.

فيه شوية تحسينات بسيطة، زي مثلًا التصدي لضربات المنافس بقى مستجيب أكتر وأفضل بشكل عام.

والتحسين الأهم تقريبًا، هو طريقة جديدة لـ فك التثبيت. في 2K22 كنت بتفك التثبيت بإنك تدوس على زرار في توقيت معين حسب شريط كدة بيتعرض قدامك، دلوقتي بقيت تقدر تفك التثبيت بإنك ترفع الأنالوج لفوق في التوقيت المناسب. إضافة بسيطة بس أحسن من إنك تفضل تدوس على زرار وخلاص.

كمان فيه تحسين ملحوظ في الأنميشنز والتحكم في المصارعين، هتحس إنها بقت سلسة أكتر والتبديل بين حركة والتانية بقى واقعي أكتر.

مش هكدب عليك، موضوع سلاسة الحركات ده لسة محتاج شوية تحسينات زيادة وده باين فعلًا في الجيمبلاي، لكن لما نقارن مع نسخة السنة اللي فاتت من اللعبة، هتلاقي فيه تحسن ملحوظ في الحتة دي.

الأداء التقني

بالنسبة للأداء التقني للعبة، مفيش كلام كتير يتقال عليه هنا، لأن تقدر تقول إنه عادي.

دا طبعًا مع لفت النظر لـ إن فيه شوية كراشات ورسايل إيرور بتيجي لبعض لاعيبة البي سي مؤخرًا.. بس الاستوديو أكد إنه شغال على حل ليها في تحديث هينزل في أقرب وقت..

لكن بشكل عام، الأداء التقني في WWE 2K23 على بلايستيشن وعلى البي سي.. مش ممتاز، وبردو مش كارثي، دا بخلاف بعض الكراشات والجليتشات اللي بتحصل للاعيبة البي سي حاليًا.

 وكمان اللعبة مش تقيلة على الجهاز لأنها مبنية على نفس المحرك بتاع إصدار السنين اللي فاتت، وبالتالي مش محتاجة إمكانيات خارقة ولا حاجة.

الخلاصة من الآخر

WWE 2K23 متشابهة في حاجات كتير مع الجزء اللي فات بتاع 2022، لكن التفوق الواضح للجزء بتاع السنة دي هو المحتوى، فعليًا اللعبة بقى فيها محتوى ضخم ومتنوع عن قبل كدة.

الجرافيك اتحسن وأشكال الشخصيات بقت واقعية أكتر، لكن الجيمبلاي يُعتبر هو هو، مع تحسينات بسيطة ممكن متعرفش تلاحظها أصلًا.

يعني من الآخر، اللعبة هي نفسها بتاعت السنة اللي فاتت، مع محتوى زيادة وقصة جون سينا، بس اللي أقدر أقولهولك بكل ثقة، إن دي أفضل نسخة من ألعاب WWE 2K لحد دلوقتي، فـ لو كنت بتحب المصارعة، هي دي اللعبة المناسبة ليك. 

التقييم النهائي

10 \ 8