WWE 2K25: هل هي أعظم لعبة مصارعة في التاريخ أم انتكاسة جديدة؟

المصارعة المحترفة مش مجرد رياضة قتالية وخلاص، دي خليط متكامل من الدراما، والاستعراض، والتحدي، وده اللي بيخليها مادة دسمة لعالم ألعاب الفيديو. من سنين طويلة وألعاب المصارعة بتحاول تجسد أجواء WWE الصاخبة، اللي بتمزج بين النزالات العنيفة والقصص الدرامية والشخصيات الكاريزمية، وده اللي بيديها طابع خاص يميزها عن ألعاب القتال العادية. لكن التحدي الكبير دايمًا كان في تحقيق التوازن بين حاجتين متناقضتين: العروض اللي بتتكتب مسبقًا وبتعتمد على السيناريوهات الجاهزة، والتجربة التفاعلية اللي بتطلب من اللاعبين يعتمدوا على مهاراتهم الفعلية عشان يكسبوا خصومهم.

سلسلة WWE 2K عدت بمراحل كتير، فيها نجاحات ضخمة وانتكاسات حادة، وأكبر ضربة كانت مع WWE 2K20 اللي فشلت فشل ذريع، لدرجة إن الشركة اضطرت توقف شوية وتعيد حساباتها بخصوص مستقبل السلسلة. لكن من وقتها، فريق التطوير Visual Concepts بدأ رحلة استعادة الثقة، واشتغل على تحسينات مستمرة في كل جزء جديد، لحد ما بقت كل نسخة أحسن وأكتر دقة من اللي قبلها. ومع إصدار WWE 2K25، التوقعات بقت أعلى من أي وقت فات، خصوصًا مع الانتعاشة الكبيرة اللي بتمر بيها عروض المصارعة الحقيقية دلوقتي، والتغيرات الدرامية في شخصيات المصارعين، زي التحول المفاجئ لجون سينا لدور الشرير.

طيب، WWE 2K25 جايبة معاها إيه جديد لعشاق المصارعة؟ هل فعلاً حسّنت تجربة اللعب بشكل واضح عن الأجزاء اللي فاتت؟ وهل نقدر نقول إنها أفضل جزء في تاريخ السلسلة لحد دلوقتي؟ ولا الجزء ده هيهد كل اللي أتبنى؟ طيب ما تيجوا نشوف!

المحتوى وأطوار اللعبة

مع إصدار WWE 2K25، السلسلة راجعة بقوة وبتقدم مجموعة أطوار لعب متنوعة، تدي تجربة مليانة حماس ومتعة، فيها خليط بين الواقعية والخيال، وبين الاستعراض والتحدي. سواء كنت بتحب تلعب نزالات فردية، أو تفضل تدير العروض، أو حتى عاوز تجربة جديدة برا الحلبة، WWE 2K25 هتلاقي فيها اختيارات كتير تناسب كل الأذواق.

اللعبة بتفتخر بأكبر قائمة مصارعين في تاريخها، بأكتر من 300 نجم من عروض Raw وSmackDown وNXT، بجانب أساطير WWE وأعضاء قاعة المشاهير. هتلاقي نجوم كبار زي رومان رينز، كودي رودز، وسيث رولينز، ومعاهم أيقونات زي الأندرتيكر وستون كولد ستيف أوستن.

طور Showcase راجع في WWE 2K25 علشان يركز على فريق The Bloodline، وبيقدم تجربة تفاعلية بترجعك لأهم نزالاتهم، مع لمسة جديدة وهي سيناريوهات “ماذا لو؟”. يعني ممكن تلعب مواجهات خيالية زي 3 Minute Warning ضد The Authors of Pain في Extreme Rules، أو حتى تعيد كتابة التاريخ وتخلي ريكيشي يهزم ستون كولد في No Mercy 2000. الميزة هنا إنك مش مضطر تخسر متعمد بس علشان تفضل الأحداث التاريخية زي ما هي.

الطور كمان مبقاش ياخد التحكم منك كتير علشان يعرض مشاهد حقيقية، وكمان الأهداف بقت مرنة أكتر من السنين اللي فاتت. لكن لسه فيه مشاكل زي الأهداف اللي لازم تتحقق في وقت معين، وده ممكن يحسسك بالضغط أكتر ما يضيف إثارة. ولو فشلت في هدف معين، ممكن تخسر مكافآت وتضطر تعيد المباراة كلها، بس في الآخر، المكافآت بتستاهل المجهود.

طور MyRise كان قبل كده ممل شوية بسبب القصة الرتيبة، لكن WWE 2K25 بتقدمه بشكل مختلف تمامًا. القصة بتبدأ بسرعة ومن غير مقدمات طويلة، وبتجمع بين المصارعين الرجال والنساء في حبكة واحدة بدل ما يكون لكل واحد منهم خط سردي منفصل. المرة دي القصة بتتكلم عن غزو نجوم NXT للعروض الرئيسية، وده بيخلي الأحداث مشوقة ومتسارعة، خصوصًا مع وجود اختيارات اللاعب اللي بتأثر في القصة.

أما لمحبي طور MyGM، فا لعبة WWE 2K25 بتقدم أفضل نسخة ليه من ساعة ما رجع في WWE 2K22. تم إصلاح مشاكل كتير، بقت الأحزمة لكل عرض أدق، واتضاف اللعب الجماعي أونلاين لحد 4 لاعبين، وكمان رجعت العروض الشهرية المشتركة بين العلامات التجارية، وده زود المنافسة والحماس.

في الطور ده، هتقدر تدير المواهب، وتحجز النزالات، وتتحكم في العقود وحالة المصارعين الصحية، مع ميكانيكيات جديدة زي مباريات الرجال والسيدات المشتركة اللي بتحصل في العروض الشهرية، والفايز بيكسب مكافآت كبيرة زي بطاقة تديك 100,000 دولار جوه اللعبة. لكن لسه فيه شوية مشاكل، زي فقدان الأبطال لألقابهم مع إعادة ضبط الموسم، وعدم وجود بعض أنواع المباريات، بس بشكل عام التحسينات خلت الطور أحسن بكتير.

أكبر إضافة جديدة في WWE 2K25 هي The Island، وهو طور تنافسي فيه 50 لاعب بيتنافسوا علشان ياخدوا عقد WWE تحت إشراف رومان رينز. الطور ده بيقدم بيئة مستوحاة من WWE، واللاعبين بيقدروا يخوضوا تحديات ويجمعوا مكافآت.

لكن المشكلة الكبيرة هنا إن الطور بيعتمد بشكل كبير على عملة VC، ودي لازم تنفقها علشان تطور مهاراتك أو تشتري حاجات تجميلية، وده ممكن ياخد وقت طويل جدًا، أو يجبرك تصرف فلوس حقيقية. الموضوع ده بيخلق توازن غير عادل، وبيخلي الطور قريب جدًا من نظام الدفع للفوز (Pay-to-Win)، رغم إنه ممتع في حد ذاته.

طور Universe راجع بقوة مع إضافة العروض الترويجية، اللي بتسمح بخلق نزاعات أكتر ديناميكية وتستمر لفترات أطول. العروض دي بتديك الحرية إنك تحدد طبيعة السيناريوهات بين المصارعين، وده بيأثر على العلاقات بينهم وبيخلق لحظات درامية تشبه العروض الحقيقية. كمان تقدر تتحكم في جداول النزالات، وتخصص القصص اللي بتتطور مع مرور الأشهر، وده بيخلي الطور مثالي لمحبي WWE اللي عاوزين يصمموا تجربتهم الخاصة.

ورغم إن الأطوار التانية حصلت على تحسينات كبيرة، إلا إن طور MyFACTION مفيهوش تغييرات جوهرية، ولسه بيعتمد على تجميع البطاقات وبناء فريق قوي علشان تنافس بيه فرق تانية. مفيش فرق كبير عن الإصدارات اللي فاتت، وده ممكن يخليه أقل جذبًا للناس اللي مش بتحب النوع ده من الألعاب. لكنه لسه موجود كخيار إضافي بيقدم تحديات إضافية للمهتمين بجمع البطاقات وترقية فرقهم على مدار الموسم.

الجيم بلاي

أما عن الجيم بلاي فبترجع WWE 2K25 بتجربة لعب محسنة بشكل واضح، مع إضافات كتير بتخلي المواجهات جوه الحلبة أكتر عمقًا ومتعة. واحدة من أبرز الحاجات اللي رجعت هي ميكانيكية “Chain Wrestling”، واللي بتسمح للمصارعين يتنقلوا بسلاسة بين الحركات أثناء الاشتباك، وده بيضيف واقعية تكتيكية أكبر للنزالات. ولو مش عاجبك النظام ده، تقدر تطفيه من الإعدادات وتلعب بأسلوب مباشر أكتر.

كمان، دلوقتي المصارعين يقدروا يتسلقوا الحواجز اللي حوالين الحلبة ويقفزوا منها لتنفيذ هجمات جوية، وده بيخلي اللعب برا الحلبة أكثر حيوية. بالإضافة لكده، التفاعل مع البيئة بقى أحسن، وبقى ممكن الحواجز وأعمدة الحلبة تتكسر أثناء النزالات، وده بيزود الإحساس بالواقعية. ولأول مرة في السلسلة، اللعبة أضافت إمكانية نزيف المصارعين خلال المباريات، وده بيعزز عنصر الدراما والعنف في النزالات القوية.

كمان، اللعبة قدمت فئة جديدة من المصارعين تحت اسم “Giant Class”، ودي مخصصة للعمالقة اللي عندهم شريط صحة إضافي باللون البنفسجي، لازم يتخلص منه الخصم الأول قبل ما يقدر يسقطهم على الأرض. ده بيضيف تحدي جديد للمواجهات ضد المصارعين الضخام. ومع التحديثات دي، اللعبة كمان قدمت نظام كاميرا جديد، بيخليك تتحكم في الكاميرا أثناء اللعب أو لحظة دخول المصارعين للحلبة، وده بيخلي المشاهدة أكتر ديناميكية وحماس.

البيئات الخلفية اتطورت بشكل كبير، وتمت إضافة أماكن جديدة للقتال زي “WWE Archives”، اللي فيها تقدر تتسلق مجسم القبضة المشهورة بتاعة SmackDown، أو ساحة انتظار NXT اللي فيها لوح زجاجي قابل للكسر أثناء النزالات. وكمان تم إضافة عنصر تفاعلي جديد على جانب الحلبة اسمه “Prime Hydration Station”، وده ممكن تستخدمه كسلاح جوه المباراة!

نظام الاستسلام الكلاسيكي رجع من تاني، وبدل ما كانت اللعبة بتستخدم أساليب حديثة لتنفيذ الإخضاع، رجع نظام العجلة الدوارة القديم، واللي بتحدد بيه الفائز أثناء تنفيذ حركة استسلام. تقدر تحرك المؤشر باستخدام أزرار R2 و L2 علشان تملأ العداد بلونك، ولو مش حابب النظام ده، تقدر تعطل الميكانيكية دي من الإعدادات أو تخصصها حسب رغبتك برضو يعني.

أما بالنسبة للمباريات اللي بتتضمن سلالم، فتم تحسينها بشكل كبير، ودلوقتي تقدر تعمل “Finishers” و “Signatures” من فوق السلم زي زمان. كمان، لما تيجي تسحب الحزام أو الحقيبة، اللعبة أضافت لعبة مصغرة جديدة، ولازم تضغط مجموعة أزرار معينة بسرعة قبل ما الوقت ينتهي. ولو السلم وقع وإنت ماسك الحزام، تقدر تفضل متشبث من غير ما تضطر تعيد وضعيتك، وده بيخلي المواجهات دي أكثر تشويقًا.

الذكاء الاصطناعي في اللعبة اتحسن جدًا، وبقى عندك تحكم أكبر في أسلوب لعب الكمبيوتر. في “Create-A-Moveset”، تقدر تحدد الأولوية والتكرار والتوقيت لكل حركة، وده بيخلي تصرفات الذكاء الاصطناعي أقرب للواقع، وكأنك بتتفرج على مصارعين حقيقيين بيخوضوا مباراة تكتيكية حقيقية.

أما بالنسبة لميكانيكيات اللعب، فتم تطوير نظام “Paybacks” بإضافة قدرات جديدة بتديك اختيارات تكتيكية أكتر أثناء القتال. على سبيل المثال، REF BUMP بتمكّنك من دفع خصمك في اتجاه الحكم علشان يوقعه مؤقتًا، وده بيدي فرصة لتنفيذ حركة غير قانونية من غير ما تاخد عقوبة. وفيه كمان POWDER، اللي بتخليك ترش مسحوق في وش الخصم علشان تعطل رؤيته، بس لو الحكم شافك، ممكن تتعاقب على الحركة دي!

DIRTY BREAKER هي قدرة جديدة بتسمحلك إنك تكسر إمساك الخصم بطريقة غير قانونية، وده بيساعدك تستعيد السيطرة على المباراة بسرعة. أما ADRENALINE RUSH، فبتديك دفعة طاقة تخليك تقاوم الهجمات اللي عليك وتنفذ هجوم مضاد بشكل أسرع. وبالنسبة لـ BULLY، فهي قدرة بتخليك تقدر ترهب الحكم، وده بيخليه يعد بسرعة أكبر أثناء محاولة التثبيت، وده ممكن يكون عنصر حاسم في الفوز بالمباريات.

ومن الإضافات القوية، إنك تقدر تستدعي حد من فريق The Bloodline باستخدام BLOODLINE RUN-IN، وده معناه إنك تقدر تطلب المساعدة من عضو في الفريق خلال النزال لموازنة الأمور. تقدر تستخدم القدرة دي 3 مرات في مباريات Bloodline Rules، وده بيضيف عنصر تكتيكي جديد في المواجهات الجماعية.

الجرافيكس

التحسينات البصرية في WWE 2K25 عملت قفزة كبيرة في مستوى الجرافيكس والتفاصيل، وده بيخليها واحدة من أكتر الإصدارات المبهرّة في تاريخ السلسلة. من أول ما تبدأ أي ماتش، هتلاحظ الفرق في تصميم الشخصيات، اللي بقت ملامحهم أكتر واقعية وتعبير، مع تفاصيل دقيقة جدًا في شكل العضلات، اللبس، وحتى العرق اللي بيظهر تدريجيًا أثناء النزال! الإصابات بقت بتبان على وش المصارعين مع كل ضربة قوية، وده بيضيف إحساس حقيقي بالتأثر بالأحداث اللي بتحصل جوه الحلبة.

أما عن الحلبات والجماهير، فالاتنين حصلوا على تحسينات ضخمة. الإضاءة بقت ديناميكية أكتر، وبتعكس على أرضية الحلبة وأجساد المصارعين بشكل يخلي كل لحظة شبه اللي بنشوفها في العروض الحقيقية. الجمهور بقى متفاعل أكتر، بيهتف، بيرد على الحركات الكبيرة، وحتى ردود أفعالهم بتتغير حسب اللي بيحصل في الماتش، مش مجرد خلفية ساكنة زي زمان.

الحركات والأنيميشن كمان اتطورت بشكل واضح، الضربات بقت أكتر انسيابية، والاشتباكات بقت طبيعية وبتحس بيها أكتر، سواء في التأثيرات البصرية أو في طريقة تنفيذ الحركات نفسها. كل الحاجات دي مع بعض بتخلي WWE 2K25 تجربة بصرية استثنائية، تخليك تحس إنك بتتفرج على عرض مصارعة حقيقي، مش مجرد لعبة فيديو!

التقييم النهائي

8.5/10

قدرت WWE 2K25 تاخد السلسلة خطوة لقدام من خلال تحسينات واضحة في كل حاجة تقريبًا، سواء الجيم بلاي، الجرافيكس، أو حتى الأطوار المختلفة. اللعبة قدرت تلاقي توازن بين الواقعية والاستعراض، وده اللي بيخليها تجربة ممتعة لكل عشاق المصارعة، سواء كنت بتحب تلعب نزالات فردية، تدير العروض، أو حتى تجرب حاجة جديدة زي The Island. لكن زي أي لعبة، لسه فيها شوية عيوب، أهمها الاعتماد الكبير على العملة الافتراضية في بعض الأطوار، وحاجات ممكن تحس إنها بتقيد التجربة بدل ما تزود متعتها. ومع ذلك، التحسينات اللي حصلت في الذكاء الاصطناعي، والتفاعل مع البيئة، والتفاصيل البصرية، بتخلي WWE 2K25 واحدة من أقوى الأجزاء في تاريخ السلسلة لحد دلوقتي.