ليه لازم تشتري CyberPunk 2077

واحدة من أكتر الالعاب المنتظرة بشكل كبير جداً في سنة 2020، و واحدة برده من أكتر الالعاب اللي اتأجلت، اتأجلت تلت مرات، اللعبة كان من المفروض أنها تكون نزلت في شهر ابريل اللي فات، ولكن خلاص أخيراً اللعبة هتنزل إن شاء الله يوم 10 من الشهر ده، يعني فاضل ايام بسيطة على اللعبة العظيمة دي.

أيه لعبة CyberPunk 2077 دي؟

لعبة CyberPunk هي لعبة Action RPG، في عالم مفتوح وضخم جداً، مليان بالتفاصيل والمهام الكتيرة اوي، واللي هتقدي فيها وقت مش قليل ابدا، وكمان قصة انت اللي بتشكلها بنفسك على حسب خياراتك في اللعبة، واللي بيكون فيها عمق بشكل كبير جداً وتأثير كبير على مجريات الأحداث، حرفياً اللعبة دي بتديك الحرية الكاملة في كل حاجة، من أن انت تصمم شخصيتك بنفسك وتحدد مصار القصة والاحداث بنفسك، واللعبة معربة بالكامل من القوائم و الترجمة، وكمان في خاصية إزالة كل المشاهد الاباحيه او nudity عمتا في اللعبة، ودي خاصية أنا بحترم الاستوديو عليها لأنه فعلاً راعا وأحترم مبادئ المجتمع العربي بشكل كبير.

أسلوب اللعب

اللعبة هتكون من منظور الfirst person، يعني هتعتمد على التصويب بشكل كبير، ولكن ده طبعاً مش معناه أن اللعبة هتكون كده بس، لا بالعكس اللعبة بتعمد برده على عامل الاستكشاف والمغامرات في عالم اللعبة الضخم، وزي ما سمعت اللعبة هي RPG فا طبعا هيكون فيها كل عناصر الRPG المعروفة، زي المهمات الجانبية الكتيرة واللي فيها تنوع بشكل كبير، زي ما شفنا في لعبة The Witcher 3، وبيكون طبعاً في skill tree كبيرة تقدر انك تطور فيها براحتك خالص، باستخدام طبعا الskill points اللي بتاخدهم كل ما تقدمت أكتر في اللعبة، وهفضل أكد على أن اللعبة عميقة جداً وفيها تفاصيل كبيرة، ومن أوائل التفاصيل اللي هتقبلك هي أنك بتصمم شخصيتك في بداية اللعبة، واللي فيها حرية بشكل كبير جداً في تحديد شكل شخصيتك، وخيارات كتيرة في كل حاجه تقريبا، وبعد ما تقدي وقت طويل جداً في تصميم شخصيتك، هيجيلك خيارات باسم life paths، والفكرة من الخيارات دي أنك بتختار ماضي شخصيتك، واللي طبعاً هيأثر على مصار القصة والأحداث في اللعبة، واللي كمان بتحدد خواص شخصيتك، وده زي كده خيارات campaign مختلفة، يعني قصص مختلفة، كل خيار هيديك مصار أحداث مختلف عن التاني، وتجربة مختلفة طبعاً، وده بيشجعك أنك تعيد اللعبة أكتر من مرة عشان تجرب كل الlife paths المتاحة، أول خيار وهو الnomad، واللي الترجمة الحرفية ليه وهو البدوي، وطبعاً من الاسم فا انت بتكون عايش في الصحاري وبتتنقل بشكل دائم، ومش مستقر في حته معينة، وهتبدأ اللعبة برا Night City، وتبني سمعتك من الصفر في المدينة، ولكن طبعاً بيكون عندك معارف كتيرة جداً مع القبائل اللي في الصحاري، وبتكون عندك خيارات في المحادثات معاهم مميزة، وبتكون خواص شخصيتك هي تخصصها في العربيات والأسلحة بشكل كبير، تاني خيار و هو الstreet kid، وبيكون المصار الرئيسي في اللعبة، فيه بتكون فرد من عصابة اسمهم الstreet kids وبيكون مكسبهم للفلوس من سرقة العربيات وبيعها وطرق كتير تانية، وبيتفتح ليك مهام كتيرة  في Night City، ويعتبر المصار المعتاد في أغلب ألعاب العالم المفتوح، وأخر خيار وهو الcorpo، فا هتبدأ كشخص بنفوذ كبيرة في شركة Arasaka، وهو شركة كبيرة جداً وعندها نفوذ أكتر من الحكومة نفسها، ولكن بعد فترة بتدأ تقلب على الشركة اللي انت كنت شغال معاها وتبقا ضدهم، وبيكون عندك معلومات خطيرة هتستخدمها لصالحك طبعا، ولازم تبقا عارف ان اللعبة فيها جماعات مختلفة، في منها اللي بتعمل خير، زي مساعدة الفقراء، وفي منها اللي بيسرق وينهب من أي، وشركة Arasaka هي أخطر شركة في الجماعات دي كلها، فا الlife path ده بيدخلك في مصار الشر وبيخليك منهم، وهتقبلك خيارات مصيرية كتيرة في القصة، كل دي مصارات مختلفة ومميزة عن غيرها، مفيش مصار صح او غلط، ولكن طبعاً في خيارات مختلفة لزيادة التنوع في التجربة. 

الجرافيكس

اللعبة بتقدم مستوى جرافكيس عالي جداً، وتفاصيل خرافية في عالم اللعبة الكبير، وهتكون متوفرة على كل المنصات معادا الswitch، على الPS4 والPS5، وعلى الXbox one والXbox series X|S ، وعلى الPC طبعاً، وده كان أهم سبب لتأجيل اللعبة أكتر من مرة، أن هي متوفرة على الأجهزة كلها، فا اللعبة هتشتغل على كل الأجهزة بشكل كويس جداً، ولكن ممكن نشوف شوية drop frame في الأجهزة القديمه زي الPS4 والXbox one، بسبب طبعاً كمية التفاصيل والعالم الكبير بتاع اللعبة، هتشتغل CyberPunk بتقنية الbackward compatibly على أجهزة الجيل الجديد، وفي سنة 2021 هينزل للعبة تحديث يحسن الجرافيكس بشكل كبير جداً عشان يناسب قدرات الجيل الجديد، زي الray tracing مثلا.