مراجعة

لعبة التنس TopSpin 2K25

سلسلة TopSpin كانت من العيار التقيل في عالم ألعاب التنس، خصوصًا وقت بدايتها؛ ودلوقتي، بعد ما غابت حوالي 13 سنة من بعد ما نزلت TopSpin 4، رجعتلنا تاني.

في أول الطريقها، كانت اللعبة محبوبة جدًا من جمهورها بين عشاق التنس، حتى مع وجود منافسين زي Virtua Tennis اللي عملتها شركة سيجا. وحاليًا، السلسلة رجعت بـ TopSpin 2K25، اللي بتنتجها Hangar 13 و 2K Games، وهدفها ترجع تاني تملي الفراغ اللي سابته لمدة جيلين. بس هل هتقدر TopSpin 2K25 تنافس الألعاب الرياضية الكبيرة زي EA Sports FC 24 و NBA 2K اللي برضه من إنتاج 2K؟ وتثبت إنها ممكن تبقى الأسطورة في زي ماكانت ولا لأ؟

الجيمبلاي

لعبة TopSpin 2K25 مبنية على نفس الأساس اللي كان في TopSpin 4، يعني اللي لعبوا القديمة هيحسوا بالألفة. ولو أنت جديد في اللعبة، متقلقش،  TopSpin Academy هتعلمك الأبجديات. اللعبة مش هتحسسك إنك متقيد، بالعكس اللعبة هتخليك تقدر تختار الضربة اللي تناسبك وقوتها، وكمان لازم تحسبها صح علشان تضرب الكورة ضربة مظبوطة، وبتديك حرية كبيرة في اللعب، وفيها جانب تكتيكي مهم يخلي كل ماتش مشوق. الحركة على الملعب مريحة وبتحس بثقل وزخم اللاعب، خصوصًا على الأرضيات المختلفة، كل واحدة فيهم بتديك إحساس مختلف. 

الحاجة الجديدة في اللعبة هي عداد التوقيت، وده بيساعدك تعرف إمتى تسيب زرار الضرب علشان تضرب الكورة بالقوة والدقة اللي انت عايزها. وكمان بتاخد فورًا تقييم لتوقيت ضربتك، يعني تعرف لو ضربت بدري أو متأخر. عداد التوقيت ده مفيد جدًا، بس في أوقات لازم متعتمدش عليه لوحده. عشان مش بس لازم تفكر إمتى تضرب، لأ ده كمان لازم تفكر إزاي تضرب. اللعبة بتقدملك خمسة أنواع ضربات مختلفة، واختيار الضربة الصح في الوقت الصح مهم جدًا، وطبعًا متنساش تكون واقف صح في الملعب.

اللعبة بتحاول تقدملك تجربة حقيقية لعالم التنس، وكأنك بتلعب مع العمالقة زي روجر فيدرر وسيرينا ويليامز، وكمان فيها كل بطولات الجراند سلام وطور الحياة المهنية وحاجات تانية كتير.

طور الحياة المهنية اللي اسمه myCAREER يعتبر نوعًا ما سهل. هتصمم لاعبك بنفسك من خلال خيارات كتيرة جدًا، وبعدين تبدأ رحلتك علشان تبقى رقم واحد في العالم. يعني من الأخر هتبدأ من القاع وهتشتغل لحد ما توصل للقمة.

التقدم في طور الحياة المهنية ده ممكن يكون مجزي. مستوى لاعبك في الأول هيكون واطي، وهتلاقي صعوبة في ضرب الكورة، بس كل ما تلعب أكتر، هتتحسن أكتر. بس لو عايز بقى تنافس في البطولات الكبيرة زي ويمبلدون أو الأوبن الأمريكي، يبقى استعد لشغل كتير.

كل شهر في اللعبة، تقدر تشارك في تدريب، وحدث خاص، وبطولة. لما تخلص كل دول، هتكسب نقاط خبرة (XP) تزود بيها مستوى صفاتك، وكمان نقاط VC (العملة الافتراضية) اللي تقدر تستخدمها تجيب بيها مدربين يعلوا من قدراتك وتشتري بيها أزياء وأشياء أخرى.

لو نفسك في تحدي حقيقي زي اللي بتلاقيه لما تلعب مع حد في الواقع، يبقى تروح على طور اللعب الجماعي على النت. بس للأسف، اللعبة مش بتسمحلك تلعب ضد أصحابك على النت؛ ده غير إنك كمان مش هتقدر تعمل بطولة خاصة وتجيب أصحابك ينافسوا قدامك. فمود اللعب الجماعي مش قوي أوي.

بس لو بتحب اللعب الهادي، “Online Exhibition” بتخليك تنافس في ماتشات ودية كده من غير تصنيف. لكن لو أنت من النوع اللي بيحب التنافس، يبقى تختار “World Tour” اللي بيدخل لاعبك اللي انت صممته في بطولات على النت والتنافس فيها.

الجرافيكس والأداء التقني

لعبة TopSpin 2K25 بتقدملك جرافيكس على أعلى مستوى، حاجة كده تحس إنك قاعد في المدرجات وبتتفرج على ماتش حقيقي؛ وكمان البراندات العالمية زي Nike و Adidas و New Balance بتظهر على الشاشة وبتزود الإحساس إنك في الحدث نفسه؛ وأحلى حاجة إن اللعبة شغالة حلو أوي على 60 إطار في الثانية على الـ PS5.

التقييم النهائي

7/10

لو أنت من عشاق رياضة التنس، هتحب لعبة TopSpin 2K25. اللعبة قوية و فيها مقويات كتيرة وطريقة اللعب فيها تقريبًا مثالية، بس فيها شوية عيوب، منهم إنها مش متنوعة كفاية في أطوار اللعب. بس على العموم، كويس إن في لعبة تنس تنافس في السوق دلوقتي، وكمان حلو إننا نشوف لعبة من أفضل ألعاب التنس ترجع تاني.