مراجعة لعبة

The Texas Chain Saw Massacre

سنة 2016 نزلت لعبة الرعب Dead by Daylight، و اللي نجحت جدًا لأنها قدمت نظام جديد في ألعاب الرعب و اللي قدمتها في شكل لعبة جماعية بتحاكي أفلام الرعب الشهيرة زي Friday 13th. واحد بيلعب بالسفاح قصاد 4 بيحاولو ينجو بحياتهم و يهربو من المكان. بعدها في سنة 2017 نزلت لعبة Friday 13th واللي حرفيًا بتخليك تلعب بـ Jason و بنفس نظام Dead by Daylight.

زي مانت شايف كدة الألعاب ديه نزلت من تقريبًا 6-7 سنين و نوعًا ما زهقنا منها و كنا عايزين شوية تجديد. عشان يجيلنا ستوديو
Sumo Digital و بالتعاون مع نفس الناشر للعبة Friday 13th يقدملنا لعبة من نفس النوع و هي The Texas Chain Saw Massacre. و المرادي مش هيبقي قاتل واحد لا هيبقو 3 سفاحين بيطاردوك. تعالى نشوف اللعبة ديه تستاهل فعلًا ولا أي كلام.

اللعبة بتقدم أيه؟

زي مانت عارف النوع ده من الألعاب مبيبقاش فيه قصة لكن بيقدم أطوار لعب جماعية بتجمع عدد من اللاعبين في مكان واحد و بتفضل تعيد في نفس المود كتير عشان تلفل شخصياتك و عشان تعيش التجربة بأكتر من سيناريو. لكن أسم اللعبة مع المقدمة اللي بتبقي عبارة عن كلام بيتقال من غير مشاهد أول ما تبدأ اللعبة كل ده بيديك فكرة عن جو اللعبة. خصوصًا لو شوفت فيلم “مجزرة منشار تكساس” اللي اللعبة مستوحاه من قصته و نزل في 1974

The Texas Chain Saw Massacre بتقدم مود لعب واحد بس و اللي بجتمع فيه 7 لاعبين في خريطة من 3 خرايط و هم الـ Slaughterhouse و الـ Family House و الـ Gas Station. و ديه طبعًا أماكن موجوده في الفيلم الأيقوني المعروف عشان تخلينا كلاعبين نعيش أجواء اننا نزول الأماكن ديه في اللعبة.

يمكن ديه واحدة من سلبيات اللعبة و هي قلة الخرايط اللي فيها. بس في رأيي ديه متعتبرش سلبية أوي لأن الخرايط كبيرة و تصميمها مختلف تمامًا عن بعض وفيها تنوع كبير. لكن فيها عيب تاني كان ممكن يتحل بسهولة و هنتكلم عنه كمان شوية.

الـ 7 لاعبين بيتقسمو لـ 3 بيقومو بدور السفاحين و 4 بيقومو بدور الضحايا و بيحاولو يهربوا. نفس طريقة Dead by Daylight بس الجديد هنا ان في 3 سفاحين مش 1. الهدف بسيط جدًا، السفاحين بيحاولوا يقتلوا الضحايا كلهم. و الضحايا عندهم 4 مخارج في كل خريطة و لازم يتعاونو عشان يخلصو المهمات اللي بتفتحلهم المخرج و يهربوا من المكان.

أسلوب اللعب

اكيد انت لو لعبت واحدة من اللعبتين اللي نزلو في 2016 و 2017 هتتوقع ايه اللي هتقابله. لكن اللعبة ديه فيها شوية اختلافات. دلوقتي القاتل أو السفاح مهمته بقت أسهل شوية لأنه دلوقتي معاه 2 يقدرو يساعدوه و لو كان في بينهم تعاون الموضوع هيبقي أصعب على الضحايا.

جانب السفاحين

من ناحية القاتل فانت عندك 5 سفاحين بتختار بينهم و كل واحد عنده قدرات بتميزه عن غيره. زي اللي بيقدر يسمع صوت الضحايا من ورا الحيطة أو اللي بيقدر يحط أفخاخ. أو Leatherface اللي كفاية المنشار بتاعه. كمان القاتل بيبقي عنده 4 أماكن لـ 4 قدرات و طبعًا زي ما قولتلك كل واحد من السفاحين عنده قدرة مميزة رئيسية و عنده 3 اماكن لقدرات بتفتحها من شجرة المهارات.

القاتل في The Texas Chain Saw Massacre مش دوره انه يطارد الضحايا بس. لأنه يقدر يحطلهم أفخاخ و يقفل الأبواب و الاضافة الجديدة بقى و هي الـ Grandpa. في أي خريطة بيبقي فيها 3 أماكن بيتواجد فيها الـ Grandpa بشكل عشوائي. و ده راجل كبير قاعد علي كرسي مبيتحركش من مكانه. و من قصة اللعبة بتعرف ان ده أكبر سفاح فيهم و اخطرهم بس العضمة كبرت و مبقاش قادر يطارد ضحاياه زي زمان.

الـ GrandPa بيطلب منك دايمًا انك تشربه دم. الدم ده بتجمعه من أماكن معينة في الخريطة أو من قتل الضحايا. و لما بتشربه الدم ده بتملا جزء من الشريط بتاعه اللي بيتكون من 5 مراحل. و كل ما تخلص مرحلة بتفتح قدرة من قدرات الـ Grandpa اللي بتختارها.

يمكن ديه واحدة من الإضافات الكويسة جدًا في الجزء ده. زي ما اللعبة ضافت عنصر التعاون في جانب السفاحين و خلتهم 3 مش واحد بس. كمان إضافة الـ Grandpa حطت عنصر صعوبة بيصعب الموضوع أكتر على الضحايا و بيتطلب منهم تركيز اكبر. يعني مثلًأ الـ Grandpa كل شوية بيصرخ صرخة بتكشف مكان أي ضحية بتتحرك. فلو انت ضحية أول ما تسمع ان الـ Grandpa صحي تثبت مكانك علطول.

كمان لو قربت منه و شافك بيصرخ و بيعرف كل السفاحين مكانك علطول. اكيد هتقولي و انا ايه اللي هيخليني اروحله. ده عشان لما بيتملي جزء من شريط الدم بتاعه بيتفتحله قدرات ممكن تخلي هروبك صعب جدًا. عشان كدة بيبقي الحل انك تروحله و تضربه بسكينة عشان توقف قدراته.

بالنسبة لشجرة المهارات فهي حاجات زي انك تزود الStamina و الصحة و حاجات زي كدة. بس في كل مسار من مسارات الشجرة ديه لما بتفتح عدد معين من المهارات بتوصل للقدرة الخاصة بالـ Grandpa اللي اتكلمنا عليها و بتقدر تضيفها في الـ Loadout بتاع شخصيتك.

جانب الضحايا

الضحايا بقى الوضع بالنسبالهم صعب شوية. فبدل ما زمان كان عندهم قاتل واحد قصاد 4 ضحايا مخطوفين و مهمتهم هي الهروب. لأ، المرادي بقت 3 قتلة و معاهم الـ Grandpa فتقريبًا بقت 4v4 أو ممكن نقول 3.5v4 عشان الـ Grandpa ميعتبرش لاعب. كمان الـ 3 قتلة بقى عندهم قدرات خاصة، فممكن تبقي ماشي في امان الله تلاقي مكانك اتعرف عشان واحد من القتلة بيسمع من ورا الحيطان. و طبعًا زي ما قولتلك الـ Grandpa زود التحدي بسبب صرخته اللي بتكشف اماكن كل الضحايا اللي بيتحركو. و قدراته الخاصة اللي بتتفتح مع الوقت.

الضحايا ميقدروش يقتلو السفاحين، لكن اكيد مش هيتسابو كدة بقلة حيلة قصاد 3 سفاحين و ابوهم. لأن لكل شخصية قدرات برضو و هم 5 شخصيات. زي Leland الشاب ابو عضلات اللي بيقدر يدي للسفاح اللي بيطارده كتف يوقعه علي الأرض و كمان بيبقي عنده سرعة أكتر من بقية الشخصيات. Connie الذكية اللي بتقدر تفك الافخاخ و الاقفال بسرعة.

الضحايا مهمتهم هي انه يخلص مهمات واحدة من ال3 ابواب. مثلًأ في باب لازم تفتحله انابيب الضغط و تستني وقت معين يفتح لكن اكيد السفاحين هيعرفو انك عملت كدة. و باب تاني بيحتاج Fuse و باب كمان مهمته مختلفة. و طبعًأ لازم يخلصو المهمات المطلوبة من غير ما يموتو و يتعاونو مع بعض. نفس نظام الألعاب القديمة من النوع ده.

لو فاكر لما اتكلمنا عن الخريطة قولتلك فيها عيب و هو ان الاهداف الرئيسية مبتتغيرش مع تغيير الخريطة. فالـ 3 مهمات موجودين في الـ خرايط. مفيش حاجة تميز كل خريطة غير تصميم الأماكن بتاعتها بس. عناصرها البئية اللي بتبقي مساعدة للقاتل و بتعيق الضحايا مش كتيرة و برضو مش متغيرة بالقدر المطلوب.

السفاحين امتع بكتير!

لعبة The Texas Chain saw Massacre بتقدم زي ما قولنا مود واحد بس و بتديلك حرية الاختيار بين انك تلعب بالسفاحين أو بالضحايا و تقدر تسيب اللعبة تختالرلك. بالنسبالي اللعب بالسفاح كان أمتع بكتير لكذا سبب. أول حاجة هي التنوع في الطرق اللي تقدر تلعب بيها و اللي بتتنوع اكتر مع كل سفاح. و مع القدرات بتحس ان السفاحين واخدين حقهم و اللعب بيهم امتع.

كمان السفاحين مميزين من ناحية الشكل أو التصميم. كل شخصية منهم ليها الـ Movement Animation بتاعها و السلاح اللي في ايديها و طريقتها في الاعدام أو الـ Execution. كل ديه حاجات بتدي متعة أكبر للعب بالسفاحين.

اللعب بالضحايا مش بالسوء لكنه فيه بعض العيوب زي ان مهمتهم مكررة و ممكن في مرحلة ما تزهق بعد ما استثمرت ساعات في لعب و تطوير شخصيات الضحايا.

الجرافيك و الرسوميات

واحدة من أمتع الحاجات اللي في اللعبة هي الجرافيكس. اللعبة بتقدم جرافيك ممتع بصريًا و مليان تفاصيل و مشبع بالألوان سواء في البيئات الخارجية اللي مليانة أراضي خضرا أو في البيوت و الأماكن الداخلية و كمان تحت الأرض. كلها متصممة بشكل مميز. لكن بالنسبالي أكتر جزء مميز كان في تصميم الضحايا و السفاحين اللي معمول بشكل حلو جدًا. فاللعبة رسوميًا ممتازة.

الأداء التقني

سلبية جديدة من سلبيات اللعبة هي الاداء التقني. اللعبة رغم مستواها الرسومي الممتاز لكنها فيها مشكلة تقنية غير مفهومة. اللعبة بتدي أداء ثابت و مستقر أغلب الوقت علي أعلى الاعدادات. لكن فجأة أول ما يظهر قدامك ضحية أو سفاح تاني بيحصل هبوط مفاجئ في الفريمات و لو انت في مطاردة ممكن يهرب منك بسبب الموضوع ده.

الموضوع اتحسن شوية حاليًا لكن لسة مستنيين تحديث يقضي على مشاكل هبوط الفريمات تمامًا.

خلاصة المراجعة

من الآخر اللعبة اضافت شوية حاجات جديدة للنوع ده من الألعاب اللي بتقدم فكرة أفلام الـ Serial killer في شكل ألعاب. زي الـ Skills الجديدة أو زيادة عدد السفاحين في كل Game. لكن لا يزال في حاجز بيني و بين النوع ده من الألعاب خصوصًا لو بلعب لوحدي. و مع Texas Chainsaw الحاجز زيد و ده بسبب ان اللعبة معقدة شوية و احيانًا بتحتاج ان فريقك يكون متفاهم جدًا، و ده مش هتلاقيه اغلب الوقت.

فمن الآخر لو انت بتحب ألعاب الرعب و عايز تعيش جو أفلام القتلة المتسلسلين بتاعت هوليوود فلازم تجرب اللعبة ديه. خصوصًا ان اللعبة متاحة على الـ Gamepass اللي اشتراكه بقي متاح في مصر بأسعار قليلة جدًأ بالنسبة للي بيقدمه. يعني فرصة تجرب لعبة جديدة مع صحابك.

تقييم اللعبة
7.5\10