طريقة جديدة لمعرفة الألعاب الي هتشتغل بكفائة على Steam Deck

زي ما ذكرنا قبل كدة في مقالة ليه الـ Steam Deck شغال ب Linux،وتتابعاً مع إستعراضات المطورين لأداء ألعابهم المختلفة على Steam Deck زي The witcher 3 و DOOM، أطلقت Valve حساب تويتر جديد متخصص لإستعراض أداء الألعاب على Steam Deck.

و النهاردة Valve أطلقت سكشن جديد في موقعهم بالإضافة لفيديو يوضح وضع أغلب الألعاب على Steam Deck تم نشره على حساب تويتر، و بيقسم الألعاب ﻷربع أنواع: Verified – playable -unsupported – unknown. ومن خلال المقالة ده هنعرف الأنواع المختلفة للألعاب على الـ Steam Deck.

Verified

وده معناه أن اللعبة تم اختبارها بنسبة 100% من ناحية الأداء سواء كانت بتحقق 30FPS أو أكتر، وطبيعة اللعب بطرق تحكم Steam Deck المختلفة من ناحية الـ Gamepad أو من خلال شاشة اللمس و لوحات اللمس، بالإضافة إلى سهولة اللعب على الجهاز بأريحية.

Playable

وعلى عكس Verified، فالألعاب اللي من نوع Playable هتكون بتتلعب من البداية للنهاية عادي على الجهاز، ولكن ممكن يكون في شوية مشاكل زي إن يكون الأداء مش مظبوط أو متكونش اللعبة متعرفة بشكل كويس على أزرار التحكم من أول مرة، فعلى سبيل المثال الكثير من الألعاب وخصوصاً ألعاب الـ RPG اللي بتتطلب كيبورد علشان تدخل إسم الشخصية وساعتها هتحتاج تستعمل الكيبورد الوهمي على الشاشة وده اللي ممكن يخل شوية بتجربة اللعب، أو تحتاج إنك تعدل الجرافيك بنفسك علشان يديك أداء أحسن، أو تضطر تفتح لانشر مختلف علشان تلعب اللعبة زي ألعاب ubisoft زي FarCry أو Assassin’s Creed اللي بيطلبوا ubisoft connect علشان يشتغلوا، وهيتم وضع الأسباب الي خلت اللعبة ده Playable ومش Verified.

Unsupported

والألعاب اللي هيكون عليها Unsupported معناها أن الألعاب ده مش هتشتغل على Steam Deck، وبالأخص ألعاب الـ VR واللي مش هتشتغل بشكل كامل على Steam Deck وده مفهوم بما أن ألعاب الـ VR بتحتاج نظارات متخصصة بالإضافة إلى الهاردوير أقوي من اللي بيقدمة الـ Steam Deck. بالإضافة إلى الألعاب الى شغالة ببرامج Anti-cheat ومش بتدعم Linux لسة زي Call of Duty Warzone.