مراجعة

Sonic Superstars

قدمت شركة Sega شخصية سونيك لأول مرة في سنة 1991 عشان تنافس بيه شخصية ماريو من شركة Nintendo اللي كانت بتنافسها في مجال أجهزة الألعاب قبل دخول سوني ومايكروسوفت في المجال بقوة، ومن ساعتها وبقى سونيك واحد من اكتر الشخصيات المحبوبة في عالم اللعبة وده بفضل استغلال سيجا الجيد لاسم الشخصية وتقديمها لأفلام وألعاب كتير للشخصية وده اللي خلى ناس كتير تحب سونيك وتتعلق بيه من صغرهم.

بين كل فترة والتانية بتقدم سيجا اعمال جديدة مميزة خاصة بشخصية سونيك سواء كانت الأعمال دي أفلام أو ألعاب أخرهم كان لعبة Sonic Frontiers وفيلم  Sonic The Hedgehog.

المرة دي بقى بتقدملنا سيجا لعبة جديدة لشخصية القنفذ المحبوب واللي بتجمع بين التجربة الكلاسيكية القديمة اللي متعودين عليها والحديثة في نفس الوقت وده عشان تناسب الأجيال القديمة والجديدة وهي لعبة Sonic Superstars، واللي قدرنا نلعبها لفترة كافية من خلال نسخة خاصة من اللعبة وفرتهالنا شركة Sega.

ودلوقتي بعد ما لعبنا Sonic Superstars لوقت كافي بنقدملكم مراجعتنا الكاملة ليها!

ايه هي لعبة Sonic Superstars وايه قصتها ؟

باختصار شديد لعبة Sonic Superstars هي لعبة جديدة لشخصية سونيك من نوع 2.5D وهي بتقدم نفس أسلوب اللعب ونفس التجربة الكلاسيكية القديمة اللي متعودين عليها مع كل ألعاب شخصية سونيك، لكن الفرق هنا إنها بتقدم جرافيكس متطور سواء كان من ناحية تصميم البيئات أو حتى الشخصيات ودي حاجة بتخليها مناسبة لمحبي شخصية سونيك من كل الأجيال والفئات العمرية المختلفة.

أما عن قصة اللعبة فهي بتقدم قصة بسيطة جدًا مفيهاش اي نوع من أنواع التعقيد ففي اللعبة هتلعب بشخصية من الشخصيات الأربعة المعروفين وهما Sonic و Tails و Amy و Knuckles وفي كل المراحل اللي بتقدمها اللعبة واللي هما بالمناسبة 11 مرحلة و 26 فصل في القصة هتحاول توقف Dr Eggman وتتخلص من شره للأبد.

ويمكن دي حاجة مش جديدة بس لعبة Sonic Superstars بتقدم طور لعب جماعي وده اللي تقدر فيه تلعب انت و 3 من صحابك بالشخصيات الأربعة وتتعاونوا مع بعض عشان توقفوا Dr Eggman لكن الحاجة السلبية في طور اللعب الجماعي من وجهة نظري إنه مفيهوش Split Screen وده خلى في تقييد نوعًا ما في اللعب.

أسلوب اللعب

بص يا صديقي اللعبة بتقدم نفس أسلوب اللعب القديم من منظور 2.5D وفي كل مرحلة بتعدي عقبات وبتقتل بعض الأعداء الصغيرين لحد ما توصل لنهاية المرحلة أو توصل لمواجهة واحد من الزعماء في اللعبة أو واحد من اختراعات  Dr EggMan وعلى ذكر معارك الزعماء فا للأسف فيهم تكرار وتمطيط ممكن يخليك تزهق في بعض الأوقات. وخليني أقولك إن موضوع إنهاء المرحلة مش بالبساطة دي لأن كل مرحلة بتقدم تصميم معقد ومختلف عن كل مرحلة والتانية، ده بجانب إن كل مرحلة بتقدم عناصر مختلفة عشان متحسش بالتكرار وانت بتلعب وفعلا انا محستش بتكرار في أي مراحل من مراحل اللعبة.

وزي ما قولنا فا اللعبة بتقدم 4 شخصيات قابلين اللعب واللي بيميزهم إن كل شخصية فيهم ليها طريقتها في الحركة اللي بتميزها عن كل الشخصيات التانية وده اللي خلى في تنوع كبير في اللعبة وهو نفس السبب اللي خلاني مزهقش طوال فترة لعبي، ناهيك طبعًا عن القدرات اللي ساهمت في وجود تنوع في اللعبة بشكل كبير فا اللعبة هنا بتقدم قدرات مميزة ومتنوعة للشخصيات الأربعة منها قدرة بتخليك تصنع نسخ كتير من الشخصية بتساعدك في الهجوم وقدرة تانية بتساعدك في صنع فروع أشجار تساعدك في التسلق. وبرغم تنوع القدرات وكترهم فا للأسف مش هتستخدمهم كتير في اللعبة ده بجانب إن تأثيرهم محدود جدًا خصوصًا في معارك الزعماء.

وقبل ما انتقل للفقرة الجاية فا خليني أقولك إن اللعبة بتقدم طور لعب جماعي جديد بعيدًا عن القصة واللي بيسمى Battle Mode وفي الطور ده تقدر تلعب مباريات مع صحابك سواء كان اونلاين أو كان بشكل محلي على نفس الجهاز، والطور ده بيخليك تلعب بشخصيات من تصميمك وتقدر تخصص شكلهم بالـ Coins اللي بتجمعها من طور اللعب الفردي، وللأسف متقدرش تلعب فيه بالشخصيات الأربعة الأساسيين في طور القصة وده كان شيء محبط شوية بالنسبالي.

الرسوميات والصوتيات

بصراحة فا الرسوميات هي أفضل شيء اتقدم في اللعبة واللي بيخلبها مميزة إنها بتدمج بين الرسوميات الكلاسيكية والحديثة في نفس الوقت وده اللي خلى الرسوميات جميلة ومميزة عن معظم الألعاب الأخيرة لشخصية سونيك، واكتر حاجة بتظهر جمال رسوميات اللعبة هي البيئات لأن كل مرحلة بتكون في بيئة مختلفة وده اللي بيخلق تنوع في عالم اللعبة، بل إن البيئة الواحدة ساعات بتلاقيها مختلفة لأن أنت بتزورها في أوقات مختلفة زي صبح وليل إلخ.

وبالنسبة للشخصيات فا خليني أقولك يا صديقي إن تصاميمهم من احلى التصميمات اللي شفتها في ألعاب Sonic وكمان تحريكهم ممتاز وكل شخصية ليها طريقتها المختلفة في الحركة.

لكن الشيء اللي يعتبر محبط نوعًا ما في اللعبة هي الصوتيات، الصوتيات مش وحشة خالص بل إني بحب اسمع اصوات حركة الشخصيات وكلامهم، بس مشكلتي مع صوتيات اللعبة هي في الموسيقي لأنها عادية جدًا ومش هتتعلق بيها خالص.

في النهاية!

لو بتحب ألعاب شخصية سونيك خصوصا اللي بتحتفظ بالجانب الكلاسيكي منها يبقى لعبة Sonic Superstars هتكون مناسبة ليك وهتحبها، خصوصا إنها بتقدم رسوميات ممتازة ومراحل وشخصيات متنوعة مصممة بشكل اكتر من رائع هتخليك متزهقش من اللعبة، وغير كدا فا هي بتقدم تجرب لعب جماعي مميزة هتستمع بيها لو لعبت مع صحابك، بس بالرغم من كدا فهي فيها عيوب واضحة زي عدم وجود Split Screen في اللعب الجماعي وده اللي بيقيدك أثناء اللعب، لكن في المجمل فهي لعبة ممتازة وأنصحك بيها جدًا وفي نفس الوقت أنصحك متشتريهاش دلوقتي واستنى العروض لأن سعرها -60 دولار- أعلى من المحتوى اللي بتقدمه اللعبة.

وبنفكرك إنك تقدر تشتري اللعبة بأفضل سعر من خلال متجرنا الخاص وبس كدا

تقييمنا النهائي

7.5/10