لعبة Skull And Bones اللعبة اللي كانت من المفروض أنها تبقى إضافة لـ  Assassin’s Creed 4: Black Flag، اللي كانت ناجحة جدًا في وقتها، بس بعدين قرروا شركة Ubisoft يعملوا منها لعبة منفصلة بنطاق أوسع وقعدوا تقريبًا عشر سنين في تطويرها. بالرغم من الطموح اللي كان معمول في المشروع ده، إلا إنه واجه تحديات كتير في التطوير، وده اللي خلانا نشوف التأجيلات كتير، أكثر من ستة مرات تقريبًا. وكل ما تتأجل، الناس بتقلق أكتر على مستقبل اللعبة وإزاي اللعبة هتكون وإذا كانت هتعجبهم ولا لأ، وهل هيعرفوا يعيشوا حياة القراصنة اللي عاشوها مع Black Flag ولا لأ، فيلا بينا يا معلم على مراجعة اللعبة، عشان نشوف اللعبة دي بتقول إيه.

القصة

انت قرصان في المحيط الهندي في آخر القرن السبعتاشر، الفترة اللي كانت فيها القراصنة بتحكم المحيط الهندي. أنت قرصان صغير بتحاول تثبت نفسك في عالم القراصنة، والهدف الأساسي هو تكوين اسم لنفسك في عالم القراصنة، عشان كدا لازم تعمل حسابك لسكورلوك، الراجل اللي بيحكم جزيرة سانت آن، وهي ملاذ القراصنة. بس مش هتبقى سهلة، لأن فيه ناس كتير بتحارب على السلطة والفلوس والمجد. فيه الإنجليز والفرنساويين والهولنديين وغيرهم، وكلهم بيحاولوا يسيطروا على التجارة والمستعمرات. وفيه القراصنة التانيين، اللي ممكن تتحالف معاهم أو تختلف معاهم في البحر. 

اللعبة بتقدملك فرصة تعيش مغامرات كتير في عالم مليء بالمعارك البحرية والاستكشاف ونهب المستوطنات. فانت حر تعمل اللي انت عايزه، بس لازم تبقى شجاع عشان تبقى قرصان حقيقي. اللعبة مفيهاش قصة محددة، بس فيه سرد بسيط لأحداث اللعبة، اللي بيتأثر حسب القرارات اللي بتتخذها أنت واللاعبين التانيين في عالم مشترك على النت.

الجيمبلاي

اللعبة دي من نوع PvE، ودي أختصار لـ “Player Versus Environment”، يعني إنك بتلعب ضد البيئة نفسها، مش ضد لاعبين تانيين. بمعنى تاني إنك بتتحالف مع لاعبين تانيين في السيرفر، اللي بيكون عادًة فيهم حوالي 20 لاعب، علشان تواجهوا مع بعض الأعداء أو الصعوبات اللي بتواجهك في اللعبة. بس المهم إنك متقدرش تهاجم لاعبين تانيين في السيرفر، غير لو لعبتوا بعض النشاطات PvP ودي أختصار لـ “Player Versus Player”، يعني انت بتلعب ضد ناس تانية عادي، بس دي بتبقى موجودة في مراحل متقدمة من اللعبة، وده غير إنها بس للتحدي والمرح ومش بتكون فيها خسارة لأحد، بس يعني بشكل عام مفيش PvP، إلا في حالات نادرة زي النشاطات اللي قلتلك عليها.

نظام القتال في اللعبة، بيبقى من سفينتك بس، مش بشخصيتك وسفينتك زي في لعبة Assassin’s Creed 4: Black Flag. وده غير إنك مش بتنزل تسرق السفن التانية بنفسك، بل بتبعت الطاقم بتاعك هما يعملوا كل حاجة، يعني بضغطة زرار واحدة، طاقمك بيروحوا على السفينة اللي انت عايزها وبيخلصوا الحكاية في ثواني، يعني للأسف متقدرش تنزل من سفينتك وتقاتل بسيفك عشان تاخد السفن العدو. القتال البحري في اللعبة بيديك تحدي شوية وده غير إنه كان حلوة أوي، لأنك لازم تتحرك بسفينتك الضخمة وتستخدم أسلحتك بحكمة، عشان هتحتاج إنك تدور بسفينتك عشان تستخدم سلاح تاني من جهة تانية، وبتاخد في الاعتبار العوامل الطبيعية زي الرياح والأمواج وكمان التعب اللي بيجي لطاقمك، خصوصاً لما تلعب بالليل وفيه عواصف وبرق، بتحس كدا إنك فعلاً بتسوق سفينة حقيقية. للأسف مفيش أي حرية حركة زي مثلًا مينفعش تتحرك جوا سفينتك، وده بجانب إنك لازم تنزل بس في أماكن محددة في الخريطة، ومش كل الجزر ممكن تنزل فيها وتكتشفها، وده اللي خلاني أحس إني محشور في عالم مفتوح كأنه خطي.

نيجي بقى للسفينة، اللعبة بتخليك تقدر تعمل السفينة اللي بتحلم بيها، يعني تخصيصها بالشكل اللي يعجبك، من الأسلحة والديكورات والشكل وحتى الحجم. اللعبة بتديك حرية كبيرة في اختيار اللي يعجبك. السفينة فيها أربع جوانب، وعلى كل جانب فيه منصة تقدر تحط فيها سلاحك. ممكن تستخدم أي نوع من الأسلحة، مهما كانت، مفيش فرق إيه الأسلحة اللي بتستخدمها، سواء كانت مدافع أو رماح أو حاجات تانية، ومش مهم فين تحطها، عشان كل الجوانب بتقبل أي نوع من الأسلحة اللي انت بتختارها. التخصيص في السفينة كان  حاجة جميلة جدًا، عشان بيديك حرية كبيرة في تعديلها وتجهيزها زي ما انت عايز، عشان تلبي احتياجاتك وتفضيلاتك الخاصة، عشان بتديك حرية تعمل فيها اللي انت عايز وتخليها تناسب احتياجاتك وذوقك، وبكده بتقدر تعمل تجربة مختلفة خالص تتناسب أسلوب لعبك. 

وعشان تقدر تشتري أو تطور حاجاتك وأدواتك لازم تروح على أماكن محددة خاصة للقراصنة زي جزيرة سانت آن، ده غير إنك لازم تلاقي مخطوطات اللي فيها تعليمات الصناعة. وبتقدر تاخدها من خلال إنك تخلص شغل أو عقود لصالح التجار أو الحرفيين أو أي حد تاني عامتًا، أو ممكن تلاقيها في الكنوز اللي مدفونة في الجزر.

العالم والمحتوى

اللعبة بصراحة خلتني أحس بكمية ملل في أوائل ساعتي الأولى، عشان مافيهاش حاجة تستاهل وده غير تقدمها الوحش، وكمان كان فيها تكرار زايد جداً، اللي خلاني أحس بزهق جامد أوي. وبالإضافة لكل ده، تصميم المهمات كان سيء جداً، كل المهمات كانت تقريباً بنفس الفكرة ومفيش فيها أي حاجة تشد انتباهك أو تحمسك، وده غير أن عالم اللعبة كبير أوي بس كان مفيهوش حاجة خالص، اللعبة بتديك مكان كبير تبحر فيه وتكتشف فيه، بس ما استفدتش منه كويس، عشان العالم كان مافيهوش حاجات تعملها ولا حاجات تحصل، وكل اللي بتشوفه عبارة عن بحر في بحر  منغير أي تفاعل.

الجرافيكس والأداء التقني

جرافيك اللعبة مش حاجة تهبل، يعني مش بتبين انها لعبة كانت بتتطور على مدار 10 سنين ولا انها لعبة AAAA يعني المفروض تبقى أحسن من كده، بس الحقيقة الجرافيك كان عادي أوي مش بيديك انطباع انه جيل جديد، يعني مش بيخليك تحس انك بتستمتع بحاجة حلوة زي إنك بتاكل كيكة مثلًا.

شاشات التحميل في اللعبة كانت بجد حاجة تضايق ومزعجة لأقصى درجة، كانت بتطلع كتير وبشكل مكرر جداً، يعني لما تعمل أي حاجة، تلاقي نفسك بتقعد وقت طويل وأنت بتنتظر شاشة التحميل تخلص بذات لو كنت حاطط اللعبة على هارد HDD. مهما كنت بتنزل من سفينتك، أو بتتكلم مع شخصية NPC، أو بتحفر عن كنز، أو حتى لو بتعمل حاجة بسيطة زي صنع حاجة أو شراء حاجة، هتلاقي نفسك واقف قدام شاشة التحميل. والأداء التقني في اللعبة كان فاشل في بعض الأوقات، يعني اللعبة كانت بتشتغل كويس في بعض الأوقات وبتبوظ في أوقات تانية، وكان في ساعات بتحصل دروب في الفريمات، وده بجانب حالات إن اللعبة بتقفل بنفسها من غير سبب واضح.

هل أنصحك بشراء لعبة Skull And Bones؟

طبعًا لأ، مش هنصحك بيها خالص إلا لو كانت في تخفيض جبار، لأنها بصراحة مش بتستاهل السعر العالي اللي بتباع بيه. اللعبة ممكن تكون مش مجديّة جدًا مقابل الفلوس اللي هتدفعها عليها، لأنها بفاعل لعبة مش AAAA وممكن تصرف فلوسك على أي حاجة تانية زي إنك تشتري لعبة تانية زي Sea Of Thieves اللي فيها تجربة قرصانية جميلة مع الاستكشاف وجيمبلاي والقصة هتحسسك إنك قرصان بجد .

التقييم

5/10

دي مش اللعبة اللي كنا بنتمناها بعد Assassin’s Creed 4: Black Flag، عشان اللعبة خلتني أحس بكمية بملل بسبب قلة المحتوى والعالم المفتوح الفاضي والمهام اللي بتتكرر وبتبقى ملهاش طعم ومش بتديك أي حاجة تشد انتباهك مش بتخليك تحس إنك قرصان زي لعبة  Black Flag أو لعبة Sea Of Thieves، ببساطة، دي نسخة ضعيفة جدًا من القرصنة مافيهاش حاجة تمتعك.