مراجعة

Sea Of Thieves نسخة PS5

أخيرًا، عشاق عالم القراصنة على موعد يغوصوا حرفيًا في تجربة Sea Of Thieves على PlayStation 5 بعد ست سنوات من إصدارها. خلال الفترة دي، عمل فريق التطوير Rare على تحسين اللعبة بشكل كبير. لكن السؤال المهم هو هل لسة Sea Of Thieves تستحق فعلًا اللعب بعد كل الوقت ده؟ ده اللي هنعرفه في مراجعة لعبة Sea Of Thieves نسخة PS5 فيلا بينا يا باشا نشوف القراصنة هنا بيقولوا إيه؟!

قصة اللعبة

قصة اللعبة بتاخدك في رحلة جامدة جداً في عرض البحار، هتلاقي نفسك مشغول طول الوقت بمغامرات ومهمات جديدة. كل ما تحديث جديد بييجي، بتلاقي نفسك أمام تحدي جديد وأحداث شيقة بتضاف للعبة.

واحدة من مهمات الأساسية فيها هي مهمات Tall Tales، دي المهمات اللي بتخليك تتدور في كل شواطئ Shores Of Gold على عنصر نادر مسمى Shroudbreaker. ده برضه غير قصص تانية اللي بتتطور في اللعبة، زي قصة Captain Jack Sparrow في مهمات A Pirate’s Life، وده بجانب قصص تانية.

الجيمبلاي

لعبة Sea Of Thieves من منظور الشخص الأول. اللعبة بتخليك تبقى القرصان بجد؛ هتركب سفن وتبحر في عالم كبير أوي مليان بالأسرار والحاجات الجامدة. البحر في اللعبة ده واسع جدًا وعالم اللعبة مفتوح بيديك حرية كبيرة تستكشف جزر مختلفة وتعيش المغامرات كتيرة، وتدور على كنوز مدفونة، وتواجه أعداء خطيرين، وتحافظ على البضايع الغالية اللي لازم توصلها للشركات التجارية.

الموانئ الرئيسية في اللعبة بتبقى مكان ترتاح وتبيع الغنايم اللي كسبتها، أو تسلم المهمات اللي خلصتها، وممكن كمان تجدد أو ترقي أسلحتك، وتظبط السفينة على ذوقك. ده غير الجزر اللي في البحر اللي بتبقى بداية لمغامرات جديدة، وفيها فصائل وشركات تجارية كتير ممكن تشتغل معاهم، 

كمان فيه أنواع كتير من السفن، تقدر تختار اللي يريحك في السواقة، سواء كنت بتقود سفينة كبيرة مع صحابك أو بتبحر لوحدك على قارب صغير. ده غير أن في حاجات كتير ممكن تعملها عن الأول، وده بسبب تحديثات اللعبة المستمرة من 2018 لحد دلوقتي؛ يعني لو حابب تحارب لاعبين تانيين، أو تعمل مهمات قصص، أو تصطاد أساطيل الهياكل العظمية، كل ده هيبقى مغامرة جامدة وفيها حاجات جديدة دايمًا.

المعارك في البحر متصممة بطريقة ممتازة، تقدر تقاتل ضد قراصنة تانيين أو وحوش البحر في معارك بحرية جامدة. اللعب لوحدك ممكن مايبقاش حلو أوي، لأن اللعبة مركزة على اللعب مع ناس تانيين أكتر من لوحدك. لأن القتال لوحدك في اللعبة سهل وممل شوية، مش محتاج تفكير.

لكن لو بتلعب مع صحابك، فاللعب المشترك ممتاز، تقدر تلعبوا مع بعض من أجهزة مختلفة ايًا كانت، ولو بتحب المعارك الكبيرة ضد لاعبين تانيين، هتلاقي تحديات كتير في اللعبة برضه يعني من الأخر زي ماقلتلك اللعبة بتقدملك طريقة لعب جماعي أحسن بكتير من اللعب لوحدك.

اللاعبين عندهم حرية يصطادوا، يتقاتلوا، يعملوا تحالفات، أو حتى يتنافسوا مع بعض في معارك بحرية أو برية. الاختيارات مفتوحة لكل واحد يختار طريقه في اللعبة. بس لما توصل لمستويات عالية، اللعب لفترات قصيرة مش هيبقى مفيد، وهتحتاج تلعب فترات أطول من غير ما توقف عشان تعرف تطور نفسك.

الجرافيكس والأداء التقني

جرافيك اللعبة ليه جماله وأجوائه فهو حاجة تانية خالص. الستايل الفني بتاعها مختلف وجذاب، والرسوميات تحسها لايقة عليها. ده بجانب أن أدائها على الـPS5، كان فوق الممتاز وثابت من غير أي دروبات في الفريمات.

اشتغلت الشركة المطورة Rare على تحسين اللعبة بشكل ملحوظ على PS5 لحد ما بقت تحفة فنية وشغالة زي الفل. اللعبة بتشتغل على 60 إطار في الثانية من غير مشاكل، لأ وكمان على الـPS5 الرسوميات أحسن شوية من حيث جودة الظلال وتفاصيل مقارنة بالـXbox Series X.

بالنسبة لأداء اللعبة على Xbox. فا اللعبة ماشية زي الفل على الـ Xbox Series X والـ Xbox Series S. الأداء كان جميل جداً وسلس في تجربتنا للعبة واللي كانت من وقت صدورها لأول مرة، وده لأن اللعبة صدرت من الأول عليهم وكمان لأنها كانت مصممة خصيصًا للجهازين بجانب الـ PC؛ كمان الرسوميات كانت كويسة جداً حتى على جهاز Series S

متنساش أن اللعبة متاحة بشكل مجاني على خدمة الـ Game Pass من Day One سواء على Xbox أو PC وبننصحك أنك تجربها لو كنت لسه بتفكر.

التقييم النهائي

9/10

لو بتدور على لعبة قراصنة تديلك فكرة القراصنةصح، فـ Sea Of Thieves هي الاختيار المناسب. اللعبة بتديك فرصة تعمل حاجات كتيرة وممتعة وده غير المغامرات كتيرة اللي فيها. لأ وكمان اللعبة دايمًا في تطور، وكل ده بجانب أداء اللعبة الممتاز على PS5، وده بيديها لمسة كمان من الامتياز بصراحة. ببساطة، اللعبة دي بتستاهل التجربة لكل محبي المغامرات والقراصنة.