مراجعة لعبة

Robocop: Rogue City

في سنة 1987 اتعرفنا علي واحد من أكثر أفلام الاكشن شهرة وهو الفيلم الأول لعالم RoboCop وهو واحد من الأفلام الكلاسيكية اللي عشنا معاها ذكريات كتير وكان بداية لواحدة من أكثر السلاسل المحبوبة في عالم الافلام وبعدها بسنة نزلت لعبة RoboCop الاولي ومعاها بداية لسلسلة العاب عريقة مكونة من 7 العاب صدرت على مدار 35 سنة وزي اي سلسلة العاب فيه منهم نجح بشكل كبير ولكن بعضهم شهد شوية تخبطات ومع صدور RoboCop: Rogue City اللعبة الثامنة في السلسلة من تطوير استوديو Teyon وطبعا كان لازم نجربها ونشارك معاكم التجربة علشان تعرف هل هي تستحق فلوسك ولا لا. 

قصة اللعبة

وخلينا الاول نتكلم عن القصة, و هنا قصتنا لسا مكملة مع الضابط اليكس مورفي في مدينة ديترويت في لعبة RoboCop: Rogue City بعد أحداث RoboCop 2 بثلاثة سنين و ده كان قبل أحداث RoboCop 3 والجريمة والفوضى أصبحوا منتشرين اكتر من اي وقت تاني في المدينه بس الكلام ده مش بيعجب اليكس وبيحاول يرجع المدينة زي ما كانت 

 ولكن الدنيا مش بتمشي تمام زي ما هو عايز وبيحصل مشكلة كبيرة جدا وهي ان شركة OCP المصنعة لRoboCop بتحاول تسيطر على قسم شرطة ديترويت وهي شركة فاسدة بيهمها مصالحها الخاصة و بس 

و بيوصل بلاغ عن هجوم على مركز الشرطة و لما الضابط اليكس بيوصل بيلاقي اعداء كتير جدا بشكل مش طبيعي وبعد ما بيقدر يتغلب عليهم و لكن بيكتشف منهم ان سبب المشاكل والدمار في المدينة هي منظمة سرية اسمها الشبكة

مع أحداث اللعبة بتكتشف محاولاتهم لتطوير سلاح جديد للتغلب علي اليكس وهنا بيظهر قدام اليكس تحديات كتير من كل مكان لازم يتغلب عليها واهمهم هو الصراع الداخلي جواه بسبب أنه نصف الة ونصف انسان  فيا ترى هل هيقدر بطلنا انه ينقذ مدينة ديترويت من شر منظمة الشبكة ولا الصعوبات اللي هتواجهه في طريقه هتعطله عن تحقيق هدفه ؟ 

تنويه بسيط, اللعبة صدرت من غير ترجمة للغة العربية لكن لو فهمك للغة متوسط هيكون كفاية انك تفهم أحداث اللعبة فا متتوقعش يعني لعبه محتاجه انجليزي تقيل زي الالعاب الروائية من نوعيه disco elysium. 

الجيمبلاي 

لعبة  RoboCop: Rogue City هي لعبة تندرج تحت تصنيف العاب منظور الشخصي الأول (FPS) وده بيتيح ليك فرصة انك تشوف العالم من عيون RoboCop في تجربة بتستمر لحوالي 10 ساعات

والقصة بتحركك انك تقتل الأعداء بشكل اساسي علشان تقدر تستمر في الاحداث بس في العموم اللعبة مش مركزة على الGameplay بشكل كبير بسبب ان استوديو Teyon كان بيحاول يركز أكثر على انه يطلع اللعبة بمنظور سينمائي اكتر ويعيشك جو السينما والاستوديو فعلا نجح في الجزء ده ولكنه اثر بالسلب علي اللعبة

لأن الحاجات اللي بتحصل في أثناء تحكمك بRoboCop مش بتعمل اي تأثير في القصة وبيكون سرد القصة متركز اكتر في ال cutscenes ودي هتكون نقطة ايجابية للاعبين اللي بيحبوا يركزوا على القصة اكتر وكأنهم بيتفرجوا على فيلم من السلسلة   ولكن في نقطة سلبية هيلاحظها اللي بيدور علي الgameplay والmechanics التي تعتبر شبه مش موجودة في لعبتنا 

ولكن فيها بعض الجوانب الكويسة زي الskill tree اللي ممكن تكون مش واسعة اوى وده راجع لأنها تعتبر لعبة قصيرة لكنها بتأثر بطريقه مباشره علي طريقة لعبك بطريقة ملحوظة وحاجة تانية زي وجود سلاح معاك بشكل دائم فيه عدد لا نهائي من الطلقات ومقدرتك علي استعمال الاسلحة اللي بتاخدها من الاعداء اللي بتقتلهم و تاخد حاجتهم من على الأرض ومن اكتر الحاجات الظريفة انك تقدر تاخد حاجات من بيئة اللعبة و ترميها عليهم زي شاشة كمبيوتر و لم بتخبط في حد بتكهربه وغيرها من الامثله اللي بتخلي اللاعب قادر على التفاعل في البيئة مما بيخليه مندمج أكثر في تجربة اللعبة و يحس كأنه في داخل العالم بجد 

بس من الجوانب السلبية هي عدم تنوع الأعداء وده معناه انك في اغلب المهمات بتعمل نفس الحاجة تقريبا بس مع اختلاف الاماكن وفيه بعض المهمات الجانبية اللي محدش فاهم ليه موجودة غير المطور و 2 صحابه تقريبا وبعض المشاكل في عالم اللعبة ومنهم ان أغلبه غير قابل للاستكشاف اصلا  وكمان بيجبرك معظم الوقت انك  تتحرك في المناطق المخصصة للمهام الاساسية للقصة و بس.

الجرافيك

استوديو Teyon قرر يستعمل محرك Unreal Engine 5 في تطوير RoboCop: Rogue City وطبعا زي ما هو معروف في العادي عن المحرك ده وهو الجرافيك الجبار اللي بيقدمه  والتفاصيل المبالغ فيها و اللي بيجي في معظم الوقت علي الاداء و اللي خلانا نشوف العاب محتاجه مكوك فضائي علشان تعرف تشغلها على اعلى اعدادات و لكن الغريب ان جرافيك Rogue City عكس الكلام ده كله لانك تحسه جي من 2013 مع ستايل تصميم قديم للشخصيات وفي بعض الأحيان بتحسه ساذج ودي نقطة نقدر نلوم فيها الاستوديو انهم مقدروش يستعملوا قدرات المحرك بشكل كامل لكنهم أبدعوا في إعادة إحياء تصميم مدينة ديترويت واللي ظهرت بشكل مميز ولامع علي مدار أحداث اللعبة 

وننتقل بعد كده لتصميم القوائم و اللي كان اكتر من ممتاز, القوائم بسيطة و فيها شرح لكل مهمات اللعبة بشكل تفصيلي هيقدر يساعدك لو تهت عن المسار اللي المفروض تمشي عليه في المهمة ولكن يعيبه الموسيقى اللي في بعض الاحيان ممكن تكون مزعجة و كمان بعض الجليتشات المزعجة اللي اوقات ممكن تخليك تعمل ريستارت للعبة غصب عنك مع بعض المشاكل في جرافيكس اللعبة نفسه من جوا و اللي المفروض منشوفهاش في لعبه بالحجم ده لانها مش كبيره اطلاقا ولا حتى عالمها المفتوح كبير علشان يبقى عذر اننا نقول الجرافيك فيه مشاكل او حتي جلتشات, و لكن في المجمل احنا ممكن نقول ان جانب الجرافكس في اللعبه متوسط مش سيء جدا و لكن متتوقعش حاجه تحس انها جيل جديد مثلا على الرغم من انها طالبه مواصفات عاليه نوعا ما

الملخص

لعبة RoboCop: Rogue City تعتبر لعبه متوسطة متتوقعش منها حاجه عظيمه ولا طفرات في الجيم بلاي او قصه جبارة و لكن هي لعبه ظريفه تحب تلعبها لو انت من عشاق العالم ده و عايز تستعيد ذكريات الطفولة  او حتى لو بتحب العالم ده بشكل عام و عايز تاخد جرعة أكبر منه 

التقييم النهائي

7/10