مع زحمة الألعاب الكبيرة الكتير في السنة دي، تنزل لعبة قد يكون كتير منكم مسمعش عنها قبل كده، او حتى شفلها عروض بس مهتمش ليها، هل لعبة Immortals Fenyx Rising فعلاً لعبة تستحق الاهتمام، ولا مجرد لعبة معتادة جداً ؟

القصة

بتدور أحداث القصة في الخيال أو الأساطير الإغريقية، وبعد ما تحرر الوحش Typhon من سجنه اللي كان فيه من آلاف السنين، بيبدأ ينتقم من Zeus وآلهة أوليمبوس، وبدأ ينشر أتباعه وحول البشر لصخور، وأهم من ده كله أنه أسر كل الآلهة الإغريقية الخيالية، فا بتيجي هنا مهمتك يا Fenyx في إنقاذ العالم وتحرير الآلهة وترجع كل حاجة زي ما كانت، ولكن طبعاً Typhon مش هيسيبك في حالك، هو متابع كل تحركاتك وهتلاقيه بيبعتلك أفضل محاربيه كل شوية في محاولة منه أنه يوقفك، بعض من أحداث القصة مأخوذة من الأساطير الإغريقية القديمة، ولكن اللعبة واخدة طابع الكوميديا الخفيفة في السرد، واللي بيديك تجربة جديدة تماما في عالم الاساطير الإغريقية اللي معروف عنها بالخيانات والحروب والعنف الدائم، ولكن اللعبة قدمت الأساطير دي بشكل جديد ومبهج ومليان بالإجابية، سرد أحداث القصة من بروميثيوس و Zeus بجد أضاف للتجربة بشكل كبير وأحد إيجابيات اللعبة، طول الوقت وانت ماشي في اللعبة هيكونوا هم اللي بيقولوا القصة وبيضيفوا للسرد متعة وكوميديا جميلة، هتلاقيهم بيعلقوا على كل حاجة أنت بتعملها، بيتريقوا عليك، أو حتى يدوك أفكار أو نصائح، بجد بنتمنى أننا نشوف الطريقة دي كتير في ألعاب تانية قدام، زي قولت الحوارات ممتعة ومضحكه ولكن في بعض الأوقات  بتكون الحوارات فيها مملة جداً، يعني مثلاً هتفهم أيه الحوار من أول كام ثانيه وخلاص، ولكن ممكن تلاقي الحوار أمتد معاك لمدة طويلة، بشكل عام قصة اللعبة مش عميقة بشكل كبير، ولكن القصة خفيفة وجميلة ومتميزة بسرد فعلاً متميز.

أسلوب اللعب

أول ما تبدأ في اللعبة بتقدر أنك تصمم شخصيتك، وتختار شكل الشخصية، وتختار لو كانت ذكر أو أنثى، واللي مش بيأثر على أحداث القصة، ولكن مفيش فكرة أنك تختار الclass بتاعك اللي فيه قدرات مميزة، زي أي لعبة RPG، ولكن بعد كده ممكن تغير من شكل الشخصية عادي جداً في المقر الرئيسي في اللعبة، اللي فيه تقدر تطور من شخصيتك وتاخد مهمات وتفتح قدرات جديده، وهو الماكن الوحيد اللي تقدر تعمل فيه كده، فا أنت بتجهز نفسك في المقر ده وبعدين تنطلق في رحلة جديدة في عالم اللعبة، وبعد ما تكمل ساعتين في القصة، هيفتح عندك العالم المفتوح اللي هتقدر تستكشفه وتحدد مصارك فيه، واللي فعلاً بتبدأ اللعبة تكون أفضل بكتير، لأن الساعتين اللي في الأول دول مملين شوية وأحداثهم بطيئة، عندك في اللعبة مجموعة من الأسلحة البسيطة، من السيوف الصغيرة اللي بتعمل damage بسيط، او الفأس الكبير اللي بيعمل damage عالي، وعندك كمان القوس والسهم، ومش هتحتاج أنك تحط سلاح واحد بس لأن كل سلاح ليه زرار خاص بيه، وده غريب من لعبة من نوع ده، وحتى من لعبة من تطوير Ubisoft، أو حتى مطورين Assassin’s Creed Odyssey، اللي بيكون فيها تنوع في الأسلحة والقدرات بشكل كبير، وخيارات كتيرة في موضوع الأسلحة ده، ولكن أنك تركز على الأسلحة بتاعتك وتطور فيها، أكيد أحسن من أنك مبتعملش حاجة غير أنك بتدور على السلاح الأفضل وخلاص، وكل ما تجيب سلاح جديد تبدأ تدور على اللي بعده، بس ده مش معناه أن مفيش نظام Loot، لا بالعكس أنت هتكون بتجمع الموارد والskill points اللي طبعا هتستخدمها في تطوير شخصيتك، ولكن للأسف نظام الloot ده عشوائي جداً، يعني مثلاً بعد مهمة صعبة وبعد ما قديت فيها وقت طويل، اللعبة بتكافئك بloot بسيط ومحبط جداً، وفي الجانب الآخر أنت ممكن وانت بتتجول في العالم كده تلاقي loot أفضل بكتير بالصدفة كده، فا نظام الloot مش منظم خالص، بجانب الأسلحة فا في عندك مجموعة من القوة الخارقة، زي غضب أريس، أو أندفاع أثينا، أو هجوم فوسفور، أو مطرقة هيفايستوس، أو قوة هرقل، وكل القوى دي هتستخدمها في الcombat أو حتى في حل الألغاز المنتشرة في اللعبة، عندك الأجنحة اللي مهمة جداً في التنقل في عالم اللعبة، وكمان عندك الخيول اللي ممكن تستخدمها في التنقل بشكل أفضل وأسرع في عالم اللعبة، الألغاز لازم تبقا عارف أنها جزء أساسي في اللعبة، وفعلاً بقالنا فترة طويلة ملعبناش لعبة ألغاز فعلاً تشدك وتخليك متحمس أنك تقيس قدراتك في حل الألغاز، في ألغاز بتكون بسيطة وسهلة، وفي ألغاز ممكن تكون مرحلة كاملة تاخد منك وقت عشان تحلها، ولكن متقلقش الألغاز في اللعبة مش من النوع الممل أو الصعب اللي يخليك تقفل اللعبة ومتلعبهاش تاني، الألغاز في اللعبة فعلاً ممتعة ومتدرجة في الصعوبة، القوائم في اللعبة بسيطة جداً و واضحة، ومعربة بالكامل زي ما تعودنا من دعم Ubisoft للمجتمع العربي بشكل دائم، بشكل عام الجيم بلاي في لعبة Immortals Fenyx Rising فعلاً ممتع وبترجعلك شعور الألعاب القديمة الجميل، وفيها تميز وشعور إدماني خاصة في الcombat، في طبعاً كلام أنتشر على أن اللعبة شبيها جداً بلعبة Zelda، والكلام ده صحيح، المطورين فعلاً أقتبسوا من Zelda بشكل كبير، ولكن اللعبة دي فيها تميز وليها لمستها الخاصة، فا هي عبارة عن ميكس ما بين Zelda و Assassin’s Creed، ولو أنت شخص لعبت Zelda فا أحتمال كبير جداً أن اللعبة تعجبك.

الجرافيكس والعالم

عالم اللعبة بجد جميل جداً، ومليان بالتفاصيل، واللي هتلاقي نفسك كل شوية بتوقف وتاخد صورة، ودي مش حاجة جديدة من Ubisoft، فا هم دايما متميزين في بنأهم لعالم جميل و ضخم مليان بالتفاصيل والمهام، جرافكيس اللعبة مش واقعي ولكن واخد طابع كرتوني محبب، في عالم مليان بالألوان الزاهية المبهجة، خريطة اللعبة متقسمة لسبع مناطق مختلفة في التضاريس والبيئة، من الغابات والبحار والأنهار والأراضي الخضراء للصحاري والجبال، وحتى هتلاقي فيها مهام وأعداء مميزين بكل منطقة، وبمناسبة الأعداء فا الAI أو الذكاء الاصطناعي على قده أوي، فا مثلاً لو دخل عليك أقوى Boss في اللعبة، فا انت لو حفظت حراكاته، خلاص تقدر تموته بكل سهولة، يعني الأعداء كلهم ليهم نمط محدد، ومش متغير، وطبعاً في خواص العرض من خيار دقة الصورة بجوده ال4K او سرعة الأداء مع ال60 frame.

الملخص

في الختام لعبة Immortals Fenyx Rising بجد من الألعاب اللي فاجأتني بشكل كبير، قد يكون من العروض البسيطة ليها مش هتشدك أوي، ولكن اللعبة فعلاً تستاهل الاهتمام، و واحدة من أفضل ألعاب السنة، بالرغم من فقرها في الأسلحة والقدرات، إلا أنها بتقدملك كل اللي أنت متوقعه منها، من قصة ممتعة ومليانة بالشخصيات اللي فعلاً هترتبط بيهم بسرعة وجيم بلاي حماسي وعالم جميل و واسع.

المزايا والعيوب

المزايا:

+قصة ممتعة ومتميزة بسرد قصصي مميز.

+عالم واسع مليان بالتفاصيل.

+جيم بلاي حماسي وممتع بشكل كبير.

+جرافكيس جميل بstyle رسومي مميز.

العيوب:

-نظام الloot العشوائي المحبط في بعض الأوقات.

-الذكاء الاصطناعي ضعيف.

-الحوارات قد تكون مملة ومتوقعة في بعض الأوقات.

التقييم

8.0/10