مراجعة

Need for Speed Unbound

بعد النجاح الكبير اللي حققته لعبة Need For Speed Heat كان لازم السلسلة تختفي عن الأنظار شوية عشان تقدر ترجع بحاجة قوية تشد الأنظار وتكون قادرة تنافس ألعاب تربعت على عرش السباقات في الفترة الأخيرة وأهمهم Forza Horizon 5 و Gran Turismo 7. وعشان نكون واضحين، في فرق جوهري بين الأتنين اللي ذكرتهم وسلسلة NFS وهو إن فورزا و Gran Turismo بيميلوا لنوع ألعاب السيارات بطريقة المحاكاة، لكن NFS بتميل لنوع الأركيد ريسينج وده النوع الدارج أكتر.

بدعاية زهيدة وإطلاق في صمت صدرت لعبة NFS Unbound بعد شهرين بس من الإعلان عنها، اللعبة بتقدم كل حاجة ولو بسيطة باستايل مختلف، فبتخلي الحاجات العادية تكون مختلفة وجميلة، وده باين في كل أركان اللعبة أمثلة على كده مثلا الساوند تراك والجانب الكرتوني في اللعبة اللي مستوحى من رسوم الجرافيتي بتاعة الشوارع، وده اللي واضح في كل أركان التجربة بشكل ماشوفتش شركة EA بتعمله من زمان، زي الطالب اللي بيسلم ورقة امتحانه بدري لإنه واثق من نفسه. المطور كمان واثق من نفسه بشكل جميل ويفرح واحد محب لصناعة الألعاب زيي. كفاية مقدمات وتعالى أقولك اللعبة قدمت إيه.

القصة

القصة رجعت من تاني في سلسلة NFS والمرة دي القصة بتدور حوالين أخين يمتلكان جراج تعديل عربيات بيتسرق في أول اللعبة، والعربية اللي أتسرقت منه بيتم استخدامها في سباقات غير قانونية أو أندر جراوند، وعشان يستعيدوها بيخططوا مع بعض يقتحموا عالم سباقات الأندر جراوند ويحاولوا استعادة العربية دي. قصة جميلة لكن طبعًا ماتتوقعش منها تكون قصة ملحمية والاهتمام يكون بيها كأساس. الاهتمام بالقصة هنا مايتعداش كونها دافع ليك عشان تستمر تتحط في مواقف مثيرة وممتعة.

الجيم بلاي

اتجاه الأندر جراوند باين في كل حاجة في اللعبة، واللي حقيقي فكرني بلعبتين بعشقهم من الجيل الذهبي لألعاب السباقات وهم Midnight Club و NFS Underground. والجيم بلاي متصمم بحيث يلعب على الوتر الحساس عند كل عاشق للعبتين دول بشكل ذكي جدًا، وتعالى أقولك إزاي.

اللعبة متقسمة فترة صباحية وفترة مساءية، تقدر تخش سباقات في أي فترة منهم، والجايزة بتاعة السباق لما بتحصل عليها هي كده مادخلتش حسابك لسا، هي كده معاك وبيكون مطلوب منك توصلها للWAREHOUSE بتاعك وبكده تكون دخلت حسابك. الفكرة إن البوليس بيطاردك. نظام البوليس من أفضل الأنظمة في اللعبة وفي تاريخ السلسلة.

المشاركة في سباقات أيًا كانت بيزود الheat بتاعك وده زي نظام الهيت في NFS HEAT بالظبط لكن الفكرة هنا إن السباقات بليل بتعلي لفل الهيت بتاعك جدًا وفي المقابل بتكون جوايزها أفضل، بس بعدها قابل بقى ياعم مطاردة صعبة من البوليس، والمطاردات هنا من أعنف وأقوى المطاردات في الألعاب عمومًا، وساعات كنت بختار إني أخش سباقات الصبح عشان أريح دماغي من المطاردات الطويلة دي. في مرة خلصت سباق في 5 دقايق والمطاردة اللي أتسببلي فيها السباق ده خلصت في ربع ساعة كاملة!! أنت متخيل؟

مدينة Lakeshore city هي مدينة وهمية مبنية على شيكاجو، من أجمل الأماكن اللي ممكن تسابق فيها والحقيقة البيئات من أجمل عناصراللعبة تصميمًا ومتنوعة بشكل كبير، وكمان بليل بتختلف عن الصبح. بليل اللعبة شبيهة أوي بلعبة Midnight Club وده كان مخليني حابب بليل أكتر، ده غير إن أتجاه اللعبة الفني عظيم ومختلف أوي.

اتجاه اللعبة الفني هو الرسوم المتحركة على طريقة الجرافيتي بتاع الشارع، بما إنها عن سباقات الشارع يعني، المؤثرات البصرية والمقاطع السينيمائية بتاعة القصة كانت كده وده خلاها مختلفة عن المعتاد بالنسبالنا كجيمرز، وكمان الأغاني والموسيقى بتخدم الموضوع ده لإن معظمها أغاني راب وأندرجراوند.

الجرافيكس مبهر والإنعاكسات عظيمة وجميلة وفي تفاصيل بتعلي كمان من جمال الجرافيكس زي المطر والرياح اللي بتظهر تأثيرًا على الإضاءة حواليك وأنت ماشي بسرعات عالية بشكل رائع. الجرافيكس تحس إنه جيل جديد بجد وأعلى منا كنت متوقع بكتير، وحتى الصور صعب تبينلك مدى جمال اللعبة، بس هي حقيقي جميلة ومبهرة.

اللعبة فيها جانب تطوير للعربية بيتضمن كل قطعة فيها بجانب الرسوم المتحركة الناتجة عن حركة العربية في السباقات، ودول قابلين للشراء بعملة داخلية. الجانب ده كان رائع ومن أفضل ما تم تقديمه في ألعاب السيارات. القوايم بسيطة وسلسة وفي نفس الوقت مفصلة ومش سايبة حاجة إلا وعارضاها. والأجمل إن اللعبة معربة بالكامل وده مخليها قابلة للعب والفهم من صغار السن أو اللي لغتهم الإنجليزية ضعيفة. حاجة ماكنتش متوفرة في ألعاب زمان لازم نقدرها لما تكون موجودة.

الأونلاين

الأونلاين متاح فيه التسابق مع لاعبين آخرين PVP أو Free Roam والجميل إن مود القصة مربوط بالأونلاين بشكل وثيق بحيث أي عربية بتفتحها في القصة بتكون موجودة معاك في الأونلاين، وفي عربيات زيادة بتكون متاحة للشراء والبيع، وفي سوق عربيات مستعملة في اللعبة بتشتري منه عربيات محتاجة تطوير في جانب وتصلحها وترجع تستخدمها. فكرة ذكية وطبعًا العربيات دي بتكون بأسعار أقل من سعرها جديدة. مشكلتي الوحيدة مع اللعبة في الاونلاين غير السرفرات كانت غياب الشرطة والمطاردات وده خلى اللعب أهدى، وأسهل بشكل ملحوظ. أتمنى يتم إضافته في بعدين لإنه بيفرق جدًا طبعًا في تجربة اللعبة

السرفرات حاليًا مفيهاش عدد كبير طبعًا وده خلاني أستنى كتير عشان ألاقي حد ألعب معاه بس الخبر الحلو إن اللعبة فيها كروس بلاي بين المنصات يعني أي نسخة مع صاحبك تخليه يقدر يعلب معاك أونلاين.

الأداء التقني

لعبة NFS unbound بتستهدف Dynamic 4K و 60 fps أو Native 4K و 30fps على الجيل الجديد. جربناها على بي سي اللعبة متطلبة جدًا وبتنزل ل30 فريم في لحظات كتير حتى على الكروت القوية زي RTX 3050 و 3080TI بالذات مع تشغيل إعدادات تتبع الأشعة ولكن بشكل عام اللعبة مش بتنزل عن 30 فريم ولو نزلت الدقة ل1440P الأداء بيكون أفضل مع فتح تقنية الDLSS. بعض المراجعين جربوا اللعبة على RTX 4090 وكان في شوية مشاكل بسيطة برضو فده معناه إن غالبًا اللعبة هيتم إصدار شوية باتشات ليها الفترة الجاية وهتتحسن.

على جهاز برامات 8 جيجا و كارت شاشة GTX 1050TI اللعبة عانت جامد وكان فيها تقطيع وتعليق، وده لإن طبعًا 8 جيجا رام قليل على اللعبة والرقم ده بدأ يقدم جامد دلوقتي، لإن كاليستو بروتوكول برض وفيها مشاكل على نفس الجهاز.
على جهاز بكارت أعلى حاجة بسيطة وهو GTX 1650TI و رامات 16 جيجا اللعبة بتأدي أحسن كتير وثابتة عند 30 فريم.

بشكل عام الأداء ثابت وفي قابلية للتحسن على الكروت من الفئة العالية لكن الفئة المتوسطة مفيهاش أي مشاكل والفريمات ثابتة عند 30-50 حسب الرامات عندك بقى ودقة العرض.

التقييم النهائي
8.5/10

لو عايز تشتري اللعبة تقدر تحصل عليها من متجر جيمزاوي من هنا