عمرك تخيلت تعيش في العصور الوسطى بكل تفاصيلها؟ Kingdom Come: Deliverance II هتاخدك في رحلة غامرة لعالم مليان بالتحديات، الحروب، والمؤامرات السياسية. اللعبة من تطوير Warhorse Studios ونشر Deep Silver، وواقعية لدرجة إنك هتحس كأنك جزء من التاريخ بجد.

بس السؤال هنا، هل الواقعية دي هتخلّي التجربة أحسن ولا ممكن تبقى عبء يخليك تحس بالملل؟ هل هتفضل مستمتع بكل لحظة، ولا التفاصيل الكتير ممكن تبقى سلاح ذو حدين؟

قصة اللعبة

اللعبة بتكمل رحلة هنري بعد أحداث الجزء الأول، لكن الوضع بقى أخطر وأعقد بكتير. الدنيا في بوهيميا مقلوبة، والصراعات بين النبلاء بدأت توصل لمراحل خطيرة، غير إن تهديد سيجيسموند لسه موجود في الخلفية. هنري، اللي كان مجرد حداد بسيط، بقى دلوقتي متورط في عالم السياسة، الحروب، والمؤامرات اللي ممكن تغيّر مصير المملكة كلها.

بعد اللي حصل قبل كده، هنري بيتحرك مع هانز كابون في مهمة دبلوماسية، لكن زي ما العادة بتقول، مفيش حاجة بتمشي بالسلاسة المطلوبة. الرحلة بتاخد منحنى غير متوقع بسبب هجوم غامض، وهنري بيلاقي نفسه في وضع صعب، لازم يستخدم كل خبرته اللي اكتسبها عشان يخرج منه.

في وسط محاولته لفهم اللي بيحصل، هنري بيبدأ يكتشف إن في لعبة سياسية أكبر بكتير من مجرد معارك وقطاع طرق. في ناس بتحاول تقلب الأوضاع لصالحها، وخيانة ممكن تحصل في أي لحظة. مع مرور الوقت، بيبدأ هنري يقابل شخصيات جديدة، بعضها هيساعده، وبعضها مش واضح نواياهم.

الجيم بلاي

لعبة Kingdom Come: Deliverance II بتقدملك تجربة لعب غامرة هترجعك لأجواء العصور الوسطى بتفاصيل دقيقة تخليك تحس كأنك عايش جوه التاريخ.

نظام القتال اتعاد تصميمه بالكامل، وبقى أكثر حيوية وتفاعل. بدل ما هو مجرد تبادل ضربات، بقى لازم تفكر في كل حركة قبل ما تعملها. تقدر تختار طريقتك في اللعب؛ سواء كنت بتحب المواجهات المباشرة كسياف محترف، أو بتفضل الحلول السلمية والدبلوماسية بالكلام، أو حتى تمشي بأسلوب التخفي كجاسوس بينفذ مهماته من الظلال. التنوع ده بيخلي كل معركة مميزة، وبيجبرك تعدّل استراتيجيتك حسب الموقف.

في الجزء الجديد، جنب الأسلحة التقليدية زي السيوف والرماح، تم إضافة الأسلحة النارية البدائية، وبالإضافة دي مش بس وسّعت أساليب القتال، لكنها كمان خلت اللاعب ياخد باله من تفاصيل جديدة، زي ضرورة ارتداء خوذة لحماية نفسه وهو بيستخدم البندقية. الأسلحة النارية دخلت بعد جديد في اللعبة، وبتحتاج منك فهم عميق للميكانيكيات وتأثير كل سلاح في أرض المعركة.

نظام تطوير الشخصية بقى أعمق، ومبقاش مقتصر على جمع نقاط خبرة بس، بل بيعتمد على شجرة مهارات فيها ستة فروع رئيسية. سواء كنت بتميل للقتال المباشر، التخفي، أو حتى الحرف اليدوية زي الحدادة وصناعة الدروع، هتلاقي لنفسك طريق مميز. كمان، نظام الكيمياء بقى محتاج دقة أكتر، لازم تسخّن وتخلط المكونات بعناية عشان تطلع جرعات قوية تديك أفضلية في المعارك.

ذكاء الأعداء الصناعي اتحسن بشكل كبير، وبقوا أذكى في التعامل معك. مثلاً، لو فضلت في وضعية دفاعية لفترة، ممكن يلفوا عليك من كذا اتجاه. وفي بعض الحالات، الأعداء بيشتغلوا كفريق، فهتحتاج تغيّر تكتيكك باستمرار.

العالم المفتوح في اللعبة بقى ديناميكي أكتر، وقراراتك بتأثر بشكل مباشر على العلاقات مع الشخصيات ومسار القصة. سواء اخترت تتسلل عشان تنفذ مهمة من غير ما حد ياخد باله، أو دخلت في نقاشات معقدة بنظام إقناع متطور، كل تصرف ليه نتيجة ممكن تغير مجرى الأحداث.

واحدة من الحاجات اللي خطفت انتباهي هو نظام الأحداث الديناميكية. قراراتك مش مجرد اختيارات عابرة، لكنها بتخلق واقع جديد في اللعبة. مثلاً، لو ساعدت مجموعة معينة، ممكن تلاقي نفسك فجأة هدف لعدوهم، أو لو قتلت قائد معين، ممكن يتسبب في انهيار تنظيم كامل. حتى المهام الجانبية بتتأثر بالوقت، فلو اتأخرت، ممكن تلاقي الموقف اتغير تمامًا.

نفس الكلام بينطبق على نظام الجريمة. اللعبة بقت أذكى في التعامل مع الجرائم، والشخصيات غير القابلة للعب بقت تلاحظ تصرفاتك. لو عملت حاجة مريبة، ممكن حد يبلغ عنك، وساعتها هيكون عندك اختيارات زي دفع غرامة، المراوغة، أو حتى الهروب، بس لو فضلت تكرر نفس الأخطاء، العقوبات هتبقى أشد.

الجرافيك وأداء اللعبة

لعبة Kingdom Come: Deliverance 2 عاملة شغل عالي جدًا في الجرافيكس، وفعلاً حاسسسك إنك عايش في العصور الوسطى بجد. التفاصيل في العالم المفتوح تحفة، من البيوت الحجرية للغابات والمناظر الطبيعية، حتى الشخصيات ملامحها متعوب عليها جدًا.

ده غير عالم اللعبة نفسه اللي بيمثل بوهيميا في القرن الخامس عشر، بيُعتبر من أكتر العوالم إثارة وإتقان في تصميم الألعاب. بالرغم من مساحته الكبيرة، المحتوى مليان ومهم، من غير أي عناصر مضافة لمجرد ملء الفراغ. مستوى التفاعل عالي، وكل قرار ومهارة بتأثر على تجربة اللعب، وبتوفر حرية في تقمص الأدوار بتفوق ألعاب تانية زي Red Dead Redemption 2 وThe Witcher 3: Wild Hunt.

بالنسبة لأداء اللعبة على الـPS5 بتقدم وضعين للجرافيكس، وضع الأداء (Performance Mode) واللي بيشتغل بدقة 1080p ومعدل 60 إطار في الثانية، مع ترقية الدقة إلى 1440p باستخدام تقنية FSR؛ ووضع التاني هو وضع الجودة (Fidelity Mode) واللي بيوفر دقة 1440p ومعدل 30 إطار في الثانية، مع ترقية الدقة إلى 4K باستخدام FSR.

في وضع الأداء، هتلاحظ سلاسة في الحركة بفضل الـ60 إطار في الثانية، لكن ممكن تلاحظ انخفاض بسيط في حدة الصورة بسبب الدقة الأقل. في بعض المشاهد، زي الهجوم الافتتاحي، ممكن يحصل انخفاض طفيف في معدل الإطارات، لكن بشكل عام الأداء ثابت. من ناحية تانية، وضع الجودة بيقدم صورة أوضح بفضل الدقة الأعلى، لكن بمعدل إطارات أقل.

التقييم النهائي
9/10

لعبة Kingdom Come: Deliverance II بتقدم تجربة فريدة لمحبي الألعاب التاريخية، وبتحافظ على الجوهر اللي خلى الجزء الأول مميز، مع تحسينات ضخمة على كل الجوانب. من القصة العميقة اللي بتاخدك في رحلة مليانة مفاجآت، سواء كنت من عشاق الجزء الأول أو داخل على السلسلة لأول مرة، اللعبة هتقدملك مغامرة لا تُنسى، مليانة تحديات، اختيارات، وتفاصيل تاريخية دقيقة بتخليك تعيش التجربة بكل حواسك.

تحذير: اللعبة فيها محتوى ما يتوافقش مع ديننا وقيمنا، زي الترويج للشذوذ وأفكار مخالفة لعقيدتنا. فخليك واعي قبل ما تلعبها أو تفكر تلعبها!