رحلة في الذاكرة…. وهم حرية الاختيار في لعبة Mass Effect

اكتر حاجة بنتظرها من أي لعبة RPG هي أن الاختيارات المتعلقة بالقصة تكون صعبة وفعالة وأحس بيها في منتصف اللعب مش في آخر اللعبة وتتحسب عليا نهايات مختلفة؟؟!!

 سلسلة Mass Effect انا بحبها ومختم كل أجزائها، بس بصراحة فيها الحتة المش بحبها دي، وفي رأي بسميه وهم النتائج المختلفة وتحديداً في الجزء الثاني اللي ناس كتير معجبين بيها بسبب الاختيارات الهتأثر في آخر مهمة (Suicide Mission)

معلش هو لما كل اختياراتي الاقي نتائجها تظهر في آخر مهمة ده كده بالضبط عامل زي ألعاب tell tale فين روح المغامرة هنا، انا عايز احس خلال لعبي وانا لسة في البداية اشوف نتائج افعالي تختلف من فعل لآخر مش تيجي في الاخر وتقولي بص فاكر لما كنت عملت كده في اول اللعبة

زي كده The Witcher 2 او Fallout NV او Fable 2، مثال بسيط مثلا في لعبة Fable 2 في مهمة بسيطة خالص في اول اللعبة بتقرر تساعد التاجر او قاطع الطريق، لو ساعدت التاجر هتلاقي القرية اللي بتزورها كبرت واهلها بقوا مبسوطين وفي محلات جديدة فتحت بس في حراس، لكن لو ساعدت قاطع الطريق هتلاقي القرية باين عليها الفقر ومليانة حرامية بس مفيش حراس

ده الانا منتظره الاقيه خلال رحلتي نتائج افعالي مع أنه اختيار أخلاقي أهو بس ليه نتائج مختلفة وهفضل شايف نتيجته خلال ساعات لعبي مش الاقيها بس في اخر اللعبة

كمان اصلا نهايات ME2 كلها متعلقة بموت او عيش الشخصيات مش نهاية مختلفة في البلوت نفسه يعني وفوق كل ده لو عملت مهمات loyalty missions مفيش حد هيموت في اخر مهمة، طب فين هنا تأثير الاختيارات؟ عشان كده بستغرب من البيهاجمو MEA في نقطة الاختيارات، هو يعني الاجزاء القبليها كانت يعني قوية للدرجة في ناحية الاختيارات وبلاش طبعا نتكلم عن ME3 اللي كانت نهايتها كارثية

متفهمنيش غلط ME سلسلة ممتازة ومن الالعاب المحبوبة عندي بسبب قصتها وطريقة اللعب واللور والعالم الضخم اليضاهي ستار وارز، وعشان كده احلى جزء بالنسبالي في السلسلة هو الجزء الاول عشان قصته كانت احلى في رأي ويكفي ان فيها الحديث مع ال sovereign اللي من ضمن احلى لحظات الجيمنج بالنسبالي

 بس انا بتكلم عن جزئية محددة مش موجودة في العاب كتير غير تقريباً ال٣ اللي ذكرتهم فوق وممكن نضيف عليهم Divinty  ، والجزئية المحددة دي اتمنى الاقيها في اغلب الالعاب ال RPG