مراجعة

Grounded نسخة PS5

لعبة Grounded دي لعبة بقاء RPG، تطوير من Obsidian Entertainment، كانت في البداية حصرية على Xbox و PC، بس دلوقتي تقدر تجربها على PS5 كمان. ولما نزلت أول مرة، كانت حاجة مشهورة واللاعبين كانوا مبسوطين جدًا من فكرتها الجديدة وشكلها الحلو. السؤال هل اللعبة قدرت تحافظ على نفس المستوى؟ أو حتى بقت أفضل بعد ما نزلت على PS5؟

قصة اللعبة

في بيت لعائلة “تولي”، يعيش الدكتور “وينديل تولي”، العالم الغريب والمخترع المهووس بمشروعه الأخير. يعيش في البيت ده الدكتور تولي مع زوجته وأولادهم. دكتور تولي هو عالم مبدع ومجنون في نفس الوقت، متمرس في مجال تصغير الكائنات الحية إلى حجم الحشرات والكائنات الصغيرة، ومشروعه ده ممول من شركة “أوميننت للتكنولوجيا العملية”، العملاقة في مجال العلوم التطبيقية.

هتلعب بدور واحد من أربعة مراهقين اختفوا فجأة من المدرسة الثانوية المحلية، وجُرَّوا إلى عالم غامض بحجم النملة حرفيًا، وفاقدين الذاكرة. في العالم الصغير ده، هتتعرف على روبوت أسمه “BURG.L”، اللي هيقدم ليك المعلومات المهمة، ولكن للأسف ذاكرة روبوت BURG.L تأثرت كمان وبقى فاقد للذاكرة هو كمان، وهتحتاج إنك تدور عن مختبرات مخفية في الجنينةعشان تقدر ترجع ذاكرته.

مهمتك هي الكشف عن لغز اختفاءكم وإزاي تقدر ترجع للبيت. هتحتاج التحقيق في الجنينة والبحث عن جهاز الغامض الموجود فيها. وعلى طول الطريق، هتتعرف على عالم الغامض وشخصياته الغامضة.

الجيمبلاي

اللعبة فيها نظام بقاء على قيد الحياة معمول بعناية فائقة، وكل جزء فيها مترابط مع بعضه. العالم في اللعبة مليان خطر وتحديات، وأنت اللي عليك تتعلم تعيش وتتأقلم معاهم. اللعبة هتسيبك تعتمد على نفسك وتتعلم من تجربتك.

هدفك الأساسي في لعبة Grounded، إنك تفضل عايش بأي وسيلة، وعشان تعيش لازم تحافظ على صحتك، ومتجوعش ولا تعطش، وتحافظ كمان على طاقتك. هتلاقي نفسك بتدور على حاجات وموارد متنوعة في الجنينة عشان تعمل أدوات وحاجات جديدة، وكمان هتبني بيوت وملاجئ. ومتنساش إنك لازم تتعلم تتعامل مع الحشرات الغريبة اللي هتقابلها في الجنينة عشان تساعدك بعدين.

كمان لازم تدير وقتك وحاجات اللي معاك بذكاء، عشان ده هيأثر على نجاحك ونجاتك. الجنينة بشكل عام مصممة عشان تديك طرق كتيرة تخليك أقوى، زي ما تطور أدواتك وتعليها لمستويات أعلى، وتزود قوتها، وتفتح ليها قدرات خاصة.

بس طبعًا، مهما عملت، مش هتحس بالأمان التام في الجنينة، عشان دايمًا هتحسسك إنك مش منها، وكأنها عايزة تتخلص منك. ده غير أن العالم اللي فيها حي وبيتفاعل معاك. كل حشرة فيها ليه طريقته الخاصة. ده غير أن عالم اللعبة كله مليان أسرار واكتشافات مختلفة طول الطريق.

هتحتاج تدوّر كويس وتقرر ايه اللي لازم تعمله وتطوّره وتشيله معاك؛ زي لما تدخل منطقة كلها ضباب مثلاً، لازم تلبس قناع غاز عشان تحمي نفسك من السموم، وتستعد للحاجات اللي ممكن تضربك من بعيد، أو الأخطر، اللي ممكن تجري عليك وتفرقع في وشك وتخرّبلك معداتك، وده ممكن يخليك تفكر تجيب حاجات تضرب بيها من بعيد. في منطقة تانية مليانة بحشرات اليرقات اللي بتسببلك ضرر “ناري”، هتعتمد ساعتها على الأسلحة اليدوية والتوقيت الصح عشان تدافع عن نفسك من النار، ده غير إن اللعبة فيها تشكيلة كبيرة جدًا من أنواع الأعداء اللي هتحاربهم وكل عدو فيهم ليه نقطة ضعف مختلفة خالص عن التاني.

الجرافيكس والأداء التقني

اللعبة مصممة بالجرافيكس عالي جدًا بحيث كل التفاصيل فيها تجمع بين السحر  والواقعية عشان تخليك تحس إنك صغرت بجد وبقيت تشوف الدنيا من زاوية مختلفة خالص، ده غير إن الجنينة مليانة تنوع، وفيها أنظمة بيئية ممتازة، وتفاصيل الحشرات وتصممها حميلة جدًا ومبهرة.

اللعبة على الـ PS5 شغالة بدقة 1600p على 60 إطار في الثانية، بس للأسف هتلاقيفي أغلب الأوقات اللعبة بتقل وتوصل لـ 45 إطار. على الجانب التاني، على الـ Xbox Series X|S اللعبة ماشية زي الفل ومستقرة جدًا حتى مع جرافيكس أعلى من نسخة PS5.

التقييم النهائي

8.5/10

لعبة Grounded دي مغامرة جامدة جدًا وتحدي كبير ومختلفة عن أي لعبة RPG تانية، وده خلاها من واحدة من أجمد الألعاب اللي ظهرت في الفترة الأخيرة. يعني حتى لو مش من هواة الألعاب اللي بتعتمد على البقاء، Grounded هتبقى بداية حلوة أوي ليك وتستاهل تديها وقتك وتركيزك. الفريق اللي ورا اللعبة هو أستيديو Obsidian Entertainment، واللي مكون من 20 شخص بس، شغلوا فيها بإخلاص، بس للأسف الأداء على الـ PS5 مكنش قد المستوى اللي يخليها تاخد الدرجة أعلى بكيتر اللي فعلاً كانت تستحقها.